༨. དུ་བྦ་ཎྞ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ
ལཱ་བྷས་དྡོ་ཡཾ ཀ་མྨ་སཱ་དྷ་ནོ ‘‘ཀོ བྷ་ཝ་ཏཱ ལཱ་བྷོ ལ་དྡྷོ’’ཏི་ཨཱ་དཱི་སུ ཝི་ཡ, སོ ཙེ་ཏྠ ཨ་ཏཱི་ཏ་ཀཱ་ལི་ཀོ་ཏི ཨཱ་ཧ ‘‘ཨ་ལ་བྦྷཱི་ཏི ལ་བྷོ’’ཏི, ལ་དྡྷ་ནྟི ཨ་ཏྠོ. ‘‘ལ་བྷོ ཨེ་ཝ ལཱ་བྷོ’’ཏི ཨི་མི་ནཱ ས་ཀ་ཏྠེ ཎ་པ་ཙྩ་ཡོ་ཏི ད་སྶེ་ཏི. ཀིཾ ཨ་ལ་བྦྷཱིཏི ཀིཾ ལ་དྡྷཾ. ན་ཝནྟི ཨ་བྷི་ན་ཝཾ. ཨེ་ཏྟཱ་ཝ་ཏཱ ཙ ན་ཝ་ཉྩ ཏཾ ཙཱི་ཝ་ར་ཉྩཱ་ཏི ན་ཝ་ཙཱི་ཝ་རཾ, ན་ཝ་ཙཱི་ཝ་རཾ ལཱ་བྷོ ཨེ་ཏེ་ནཱ་ཏི ན་ཝ་ཙཱི་ཝ་ར་ལཱ་བྷོཏི ཨེ་ཝ་མེ་ཏྠ ས་མཱ་སོ ད་ཊྛ་བྦོ་ཏི. ཡ་དི ཨེ་ཝཾ ཀ་ཐཾ ‘‘ན་ཝཾ ཙཱི་ཝ་ར་ལཱ་བྷེ་ནཱ’’ཏི ཝུ་ཏྟ་ནྟི ཨཱ་ཧ ‘‘ཨི་ཏི ན་ཝ་ཙཱི་ཝ་ར་ལཱ་བྷེ་ནཱ’’ཏི་ཨཱ་དི. ཨེ་ཏྠ ཙ ‘‘ཝི་ཀ་པྤ་ནུ་པ་གཾ པ་ཙྪི་མ’’ནྟི ན ཝུ་ཏྟ་ཏྟཱ ཙཱི་ཝ་རནྟི ཡཾ ནི་ཝཱ་སེ་ཏུཾ ཝཱ པཱ་རུ་པི་ཏུཾ ཝཱ ས་ཀྐཱ ཧོ་ཏི, ཏ་དེ་ཝ ཝེ་དི་ཏ་བྦ་ནྟི ཨཱ་ཧ ‘‘ནི་ཝཱ་ས་ན་པཱ་རུ་པ་ནུ་པ་གཾ ཙཱི་ཝ་ར’’ནྟི. ‘‘དུ་བྦ་ཎྞ་ཀ་ར་ཎཾ ཨཱ་དཱ་ཏ་བྦ’’ནྟི ཨེ་ཏཾ ཀ་པྤ་བི་ནྡུཾ ས་ནྡྷཱ་ཡ ཝུ་ཏྟཾ, ན ནཱི་ལཱ་དཱི་ཧི ས་ཀ་ལ་ཙཱི་ཝ་རཾ དུ་བྦ་ཎྞ་ཀ་ར་ཎཾ, ཏ་ཉྩ པ་ན ཀ་པྤཾ ཨཱ་དི་ཡ་ནྟེ་ན ཙཱི་ཝ་རཾ ར་ཛི་ཏྭཱ ཙ་ཏཱུ་སུ ཝཱ ཀོ་ཎེ་སུ, ཏཱི་སུ ཝཱ དྭཱི་སུ ཝཱ ཨེ་ཀ་སྨིཾ ཝཱ ཀོ་ཎེ མོ་ར་སྶ ཨ་ཀྑི་མ་ཎྜ་ལ་མ་ཏྟཾ ཝཱ མ་ངྒུ་ལ་པི་ཊྛི་མ་ཏྟཾ ཝཱ ཨཱ་དཱ་ཏ་བྦ་ནྟི ཨཱ་ཧ ‘‘ཏ་སྶཱ’’ཏི་ཨཱ་དི. ཀཾ་ས་ནཱི་ལེ་ནཱཏི ཙ་མྨ་ཀཱ་ར་ནཱི་ལེ་ན. མ་ཧཱ་པ་ཙྩ་རི་ཡཾ པ་ན ‘‘ཨ་ཡོ་མ་ལཾ ལོ་ཧ་མ་ལཾ, ཨེ་ཏཾ ཀཾ་ས་ནཱི་ལཾ ནཱ་མཱ’’ཏི (པཱ་ཙི. ཨ་ཊྛ. ༣༦༨) ཝུ་ཏྟཾ. པ་ཏྟ་ནཱི་ལེ་ནཱཏི ཡེ་ན ཀེ་ན་ཙི ནཱི་ལ་ཝ་ཎྞེ་ན པ་ཎྞ་ར་སེ་ན. ཀ་པྤ་བི་ནྡུཾ ཨཱ་དི་ཡི་ཏྭཱཏི ཝ་ཊྚཾ ཨེ་ཀཾ ཀ་པྤ་བི་ནྡུཾ ཨཱ་དི་ཡི་ཏྭཱ.
པཱ་ལི༹་ཀ་པྤ་ཀ་ཎྞི་ཀ་ཀ་པྤཱ་ད་ཡོ པ་ན ས་བྦ་ཊྛ་ཀ་ཐཱ་སུ པ་ཊི་སི་དྡྷཱ. ཨ་གྒ་ལཱ༹་དཱི་ནི ཀ་པྤ་ཀ་ཏ་ཙཱི་ཝ་རེ པ་ན པ་ཙྪཱ ཨཱ་རོ་པེ་ཏྭཱ ཀ་པྤ་ཀ་ར་ཎ་ཀི་ཙྩཾ ན་ཏྠཱི་ཏི ཨཱ་ཧ ‘‘པ་ཙྪཱ ཨཱ་རོ་པི་ཏེ་སཱུ’’ཏི་ཨཱ་དི. ཨ་གྒ་ལ༹་ཨ་ནུ་ཝཱ་ཏ་པ་རི་བྷ་ཎྜེ་སཱུཏི ཨུ་དྡྷ་རི་ཏྭཱ ཨ་ལླི་ཡཱ་པ་ན་ཀ་ཁ་ཎྜ་པི་ཊྛི་ཨ་ནུ་ཝཱ་ཏ་ཀུ་ཙྪི་ཨ་ནུ་ཝཱ་ཏེ་སུ. ཀི་རི་ཡཱ་ཀི་རི་ཡནྟི ནི་ཝཱ་ས་ན་པཱ་རུ་པ་ན་ཏོ, ཀ་པྤ་སྶ ཨ་ནཱ་དཱ་ན་ཏོ ཀི་རི་ཡཱ་ཀི་རི་ཡཾ.
དུ་བྦ་ཎྞ་ཀ་ར་ཎ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.