༡. སུ་རཱ་པཱ་ན་སི་ཀྑཱ་པ་ད་ཝ་ཎྞ་ནཱ

པི་ཊྛཱ་དཱི་ཧི ཀ་ཏཾ མ་ཛྫཾ སུ་རཱཏི པི་ཊྛ་པཱུ་ཝ་ཨོ་ད་ན་ཀི་ཎྞ་ས་མྦྷཱ་རེ་ཧི ཀ་ཏཾ མ་ཛྫཾ སུ་རཱ་ཏི ཨ་ཏྠོ. ཨི་དཾ ཝུ་ཏྟཾ ཧོ་ཏི – པི་ཊྛ་སུ་རཱ, པཱུ་ཝ་སུ་རཱ, ཨོ་ད་ན་སུ་རཱ, ཀི་ཎྞ་པ་ཀྑི་ཏྟཱ, ས་མྦྷཱ་ར་སཾ་ཡུ་ཏྟཱ་ཏི (པཱ་ཙི. ༣༢༨) ཨི་མཱ་ནི པ་ཉྩ སུ་རཱ ནཱ་མཱ་ཏི. ཏ་ཏྠ པི་ཊྛཾ བྷཱ་ཛ་ནེ པ་ཀྑི་པི་ཏྭཱ ཏ་ཛྫཾ ཨུ་ད་ཀཾ ད་ཏྭཱ མ་དྡི་ཏྭཱ ཀ་ཏཱ པི་ཊྛ་སུ་རཱ (སཱ་ར་ཏྠ. ཊཱི. པཱ་ཙི་ཏྟི་ཡ ༣.༣༢༦-༣༢༨). ཨེ་ཝཾ སེ་སཱ་སུ་པི. ཀི་ཎྞཱཏི པ་ན ཏ་སྶཱ སུ་རཱ་ཡ བཱི་ཛཾ ཝུ་ཙྩ་ཏི. ཡེ ‘‘སུ་རཱ་མོ་ད་ཀཱ’’ཏི་པི ཝུ་ཙྩ་ནྟི, ཏེ པ་ཀྑི་པི་ཏྭཱ ཀ་ཏཱ ཀི་ཎྞ་པ་ཀྑི་ཏྟཱ. ཧ་རཱི་ཏ་ཀི་སཱ་ས་པཱ་དི་ནཱ་ནཱ་ས་མྦྷཱ་རེ་ཧི སཾ་ཡོ་ཛི་ཏཱ ས་མྦྷཱ་ར་སཾ་ཡུ་ཏྟཱ.

པུ་པྥཱ་དཱི་ཧི ཀ་ཏོ ཨཱ་ས་ཝོ མེ་ར་ཡནྟི པུ་པྥ་ཕ་ལ་མ་དྷུ་གུ་ལ༹་ས་མྦྷཱ་རེ་ཧི ཀ་ཏོ ཙི་ར་པ་རི་ཝཱ་སི་ཏོ མེ་ར་ཡ་ནྟི ཨ་ཏྠོ. ཨི་དཾ ཝུ་ཏྟཾ ཧོ་ཏི – པུ་པྥཱ་ས་ཝོ, ཕ་ལཱ་ས་ཝོ, མ་དྷྭཱ་ས་ཝོ, གུ་ལཱ༹་ས་ཝོ, ས་མྦྷཱ་ར་སཾ་ཡུ་ཏྟོ་ཏི པ་ཉྩ་མེ་ར་ཡཾ ནཱ་མཱ་ཏི. ཏ་ཏྠ མ་དྷུ་ཀ་ཏཱ་ལ་ནཱ་ལི༹་ཀེ་རཱ་དི པུ་པྥ་ར་སོ ཙི་ར་པ་རི་ཝཱ་སི་ཏོ པུ་པྥཱ་ས་ཝོ. པ་ན་སཱ་དི་ཕ་ལ་ར་སོ ཕ་ལཱ་ས་ཝོ. མུ་དྡི་ཀཱ་ར་སོ མ་དྷྭཱ་ས་ཝོ. ས་མ་ནྟ་པཱ་སཱ་དི་ཀཱ་ཡཾ པ་ན ‘‘ཕ་ལཱ་ས་ཝོ ནཱ་མ མུ་དྡི་ཀཱ་ཕ་ལཱ་དཱི་ནི མ་དྡི་ཏྭཱ ཏེ་སཾ ར་སེ་ན ཀ་ཏོ. མ་དྷྭཱ་ས་ཝོ ནཱ་མ མུ་དྡི་ཀཱ་ནཾ ཛཱ་ཏི་ར་སེ་ན ཀ་ཏོ, མ་ཀྑི་ཀཱ་མ་དྷུ་ནཱ་པི ཀ་རཱི་ཡ་ཏཱི་ཏི ཝ་ད་ནྟཱི’’ཏི (པཱ་ཙི. ཨ་ཊྛ. ༣༢༨) ཝུ་ཏྟཾ. ཨུ་ཙྪུ་ར་སོ གུ་ལཱ༹་ས་ཝོ. ཧ་རཱི་ཏ་ཀཱ་མ་ལ་ཀ་ཀ་ཊུ་ཀ་བྷ་ཎྜཱ་དི་ནཱ་ནཱ་ས་མྦྷཱ་རཱ་ནཾ ར་སོ ཙི་ར་པ་རི་ཝཱ་སི་ཏོ ས་མྦྷཱ་ར་སཾ་ཡུ་ཏྟོ. ཨེ་ཏྠ ཙ སུ་རཱ་ཡ, མེ་ར་ཡ་སྶ ཙ ས་མཱ་ནེ་པི ས་མྦྷཱ་ར་སཾ་ཡོ་གེ མ་དྡི་ཏྭཱ ཀ་ཏཱ སུ་རཱ, ཙི་ར་པ་རི་ཝཱ་སི་ཏ་མ་ཏྟེ་ན མེ་ར་ཡནྟི ཨེ་ཝ་མི་མེ་སཾ ནཱ་ནཱ་ཀ་ར་ཎཾ ད་ཊྛ་བྦཾ. བཱི་ཛ་ཏོ པ་ཊྛཱ་ཡཱཏི ས་མྦྷཱ་རེ པ་ཊི་ཡཱ་དེ་ཏྭཱ ཙཱ་ཊི་ཡཾ པ་ཀྑི་ཏྟ་ཀཱ་ལ་ཏོ ཙེ་ཝ ཏཱ་ལ་ནཱ་ལི༹་ཀེ་རཱ་དཱི་ནཾ པུ་པྥ་ར་ས་སྶ ཨ་བྷི་ན་ཝ་ཀཱ་ལ་ཏོ ཙ པ་ཊྛཱ་ཡ.

ལོ་ཎ་སོ་ཝཱི་ར་ཀཾ ཝཱ སུ་ཏྟཾ ཝཱཏི ཨི་མེ དྭེ ཨ་ནེ་ཀེ་ཧི བྷེ་ས་ཛྫེ་ཧི ཨ་བྷི་ས་ངྑ་ཏཱ ཨཱ་ས་ཝ་ཝི་སེ་སཱ. ཝཱ་ས་གྒཱ་ཧཱ་པ་ན་ཏྠནྟི སུ་ག་ནྡྷ་བྷཱ་ཝ་གཱ་ཧཱ་པ་ན་ཏྠཾ. ཝ་ཏྠུཾ ཨ་ཛཱ་ན་ན་ཏཱ་ཡ ཙེ་ཏྠ ཨ་ཙི་ཏྟ་ཀཏཱ ཝེ་དི་ཏ་བྦཱ. ཨ་ཀུ་ས་ལེ་ནེ་ཝ པཱ་ཏ་བྦ་ཏཱ་ཡ ལོ་ཀ་ཝ་ཛྫཾ. ཡཾ པ་ནེ་ཏྠ ཝ་ཏྟ་བྦཾ སི་ཡཱ, ཏཾ ས་བྦཾ པ་ཋ་མ་པཱ་རཱ་ཛི་ཀ་ཝ་ཎྞ་ནཱ་ཡ ཝུ་ཏྟ་ན་ཡ་མེ་ཝ.

སུ་རཱ་པཱ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.