౭. నిక్కడ్ఢనసిక్ఖాపదవణ్ణనా

అనేకకోట్ఠకానీతి అనేకద్వారకోట్ఠకాని. ‘‘నిక్ఖమాతి వచనం సుత్వా అత్తనో రుచియా చే నిక్ఖమతి, అనాపత్తీ’’తి (సారత్థ. టీ. పాచిత్తియ ౧౨౬) వదన్తి.

తస్స పరిక్ఖారనిక్కడ్ఢనేతి తస్స సన్తకం యం కిఞ్చి పత్తచీవరపరిస్సావనధమ్మకరణమఞ్చపీఠభిసిబిబ్బోహనాదిభేదం అన్తమసో రజనఛల్లిపి అత్థి, తస్స పరిక్ఖారస్స నిక్కడ్ఢనే. తఞ్చాతి దుక్కటం పరామసతి. నిక్కడ్ఢాపనేపి ఏసేవ నయో. గాళ్హం బన్ధిత్వా ఠపితేసు పన ఏకావ ఆపత్తి.

భణ్డనకారకకలహకారకమేవ సకలసఙ్ఘారామతో నిక్కడ్ఢితుం లభతి. సో హి పక్ఖం లభిత్వా సఙ్ఘమ్పి భిన్దేయ్య. అలజ్జిఆదయో పన అత్తనో వసనట్ఠానతోయేవ నిక్కడ్ఢితబ్బా. సకలసఙ్ఘారామతో నిక్కడ్ఢితుం న వట్టతి. తేనాహ ‘‘సకలసఙ్ఘారామతోపీ’’తిఆది.

నిక్కడ్ఢనసిక్ఖాపదవణ్ణనా నిట్ఠితా.