૮. ઉપસ્સુતિસિક્ખાપદવણ્ણના

સુય્યતીતિ સુતિ, સદ્દો, સુતિયા સમીપં ઉપસ્સુતીતિ આહ ‘‘સુતિસમીપ’’ન્તિ, સદ્દસમીપન્તિ અત્થો. યત્થ પન ઠિતેન સક્કા હોતિ સદ્દં સોતું, તત્થ તિટ્ઠન્તો સદ્દસમીપે તિટ્ઠતિ નામાતિ આહ ‘‘યત્થ ઠત્વા’’તિઆદિ. અથ વા ઉપેચ્ચ સુય્યતિ એત્થાતિ ઉપસ્સુતિ, ઠાનં, યં ઠાનં ઉપગતેન સક્કા હોતિ કથેન્તાનં સદ્દં સોતું, તત્થાતિ એવમ્પેત્થ અત્થો દટ્ઠબ્બો. તુરિતગમનેપીતિ પચ્છતો ગચ્છન્તસ્સ પુરતો ગચ્છન્તાનં સદ્દસવનત્થં સીઘગમનેપિ. ઓહીયમાનેપીતિ પુરતો ગચ્છન્તસ્સ પચ્છતો ગચ્છન્તાનં વચનસવનત્થં ઓહીયમાનેપિ.

વૂપસમિસ્સામીતિ ઉપસમં ગમિસ્સામિ, કલહં ન કરિસ્સામિ. અત્તાનં પરિમોચેસ્સામીતિ મમ અકારકભાવં કથેત્વા અત્તાનં પરિમોચેસ્સામિ. સિયા કિરિયન્તિ કદાચિ સોતુકામતાય ગમનવસેન સમુટ્ઠાનતો સિયા કિરિયં. સિયા અકિરિયન્તિ કદાચિ ઠિતટ્ઠાનં આગન્ત્વા મન્તયમાનાનં અજાનાપનવસેન સમુટ્ઠાનતો સિયા અકિરિયં.

ઉપસ્સુતિસિક્ખાપદવણ્ણના નિટ્ઠિતા.