૯. દુતિયઉચ્ચારછડ્ડનસિક્ખાપદવણ્ણના

ભિક્ખુનિયાપીતિ પિ-સદ્દેન ભિક્ખું સમુચ્ચિનોતિ. અનિક્ખિત્તબીજેસુ (પાચિ. અટ્ઠ. ૮૩૦) પન ખેત્તેસુ કોણાદીસુ વા અસઞ્જાતરોપિમેસુ ખેત્તમરિયાદાદીસુ વા છડ્ડેતું વટ્ટતિ. મનુસ્સાનં કચવરછડ્ડનટ્ઠાનેપિ વટ્ટતિયેવ. છડ્ડિતખેત્તેતિ મનુસ્સેસુ સસ્સં ઉદ્ધરિત્વા ગતેસુ છડ્ડિતખેત્તં નામ હોતિ, તત્થ વટ્ટતિ. યત્થ પન ‘‘લાયિતમ્પિ પુબ્બણ્ણાદિ પુન ઉટ્ઠહિસ્સતી’’તિ રક્ખન્તિ, તત્થ યથાવત્થુકમેવ. સામિકે અપલોકેત્વાતિ એત્થ ખેત્તપાલકા, આરામાદિગોપકા ચ સામિકાવ. ઇમિના ચ સઙ્ઘસન્તકે ભિક્ખુસ્સ છડ્ડેતું વટ્ટતિ સઙ્ઘપરિયાપન્નત્તા, ન ભિક્ખુનીનં. ભિક્ખુનીનં પન અત્તનો સન્તકે ભિક્ખુસન્તકે વુત્તનયેનેવ વટ્ટતીતિ દસ્સેતિ, એવં સન્તેપિ સારુપ્પવસેન કાતબ્બં.

દુતિયઉચ્ચારછડ્ડનસિક્ખાપદવણ્ણના નિટ્ઠિતા.