2. уййоджанасиккха̄падаван̣н̣ана̄

га̄мам̣ ва̄ нигамам̣ ва̄ти еттха нагарампи га̄маггахан̣енева гахитанти дат̣т̣хаббам̣. пависисса̄ма̄ти еттха гахетва̄ ‘‘гантва̄’’ти па̄т̣хасесо, асаманна̄ха̄ро ва̄ тасса̄ иттхийа̄ тасмим̣ га̄ме саннихитабха̄вам̣ аджа̄нанто ва̄ ‘‘еха̄вусо, га̄мам̣ ва̄ нигамам̣ ва̄ пин̣д̣а̄йа пависисса̄ма̄’’ти бхиккхум̣ гахетва̄ гантва̄ти аттхо. йам̣ кин̃чи а̄мисанти йа̄гуа̄дикам̣ йам̣ кин̃чи а̄мисам̣. уййоджеййа̄ти аттано кӣл̣а̄нурӯпам̣ иттхим̣ дисва̄ уййоджеййа пахин̣еййа. тена̄ха ‘‘ма̄туга̄мена саддхи’’нтиа̄ди. а̄дисаддена вутта̄васесам̣ ка̄йавачӣдва̄равӣтиккамам̣ сан̇ган̣ха̄ти. ‘‘гаччха̄’’тиа̄дӣни ватва̄ти ‘‘гаччха̄вусо, на ме тайа̄ саддхим̣ катха̄ ва̄ нисаджджа̄ ва̄ пха̄су хоти, екакасса ме катха̄ ва̄ нисаджджа̄ ва̄ пха̄су хотӣ’’ти (па̄чи. 275) ватва̄. етам̣ ана̄ча̄рамева̄ти етам̣ йатха̄вуттам̣ хасана̄диана̄ча̄рамева. на ан̃н̃ам̣ патирӯпам̣ ка̄ран̣анти т̣хапетва̄ вуттаппака̄рам̣ ана̄ча̄рам̣ убхиннам̣ екато на йа̄пана̄дим̣ ан̃н̃ам̣ патирӯпака̄ран̣ам̣ паччайам̣ каритва̄ на хотӣти аттхо. асса̄ти уййоджакасса. соти йо уййоджито, со.

анупасампаннети са̄ман̣ере. сова идха анупасампанноти адхиппетоти ваданти. убхиннампӣти упасампаннасса ва̄ анупасампаннасса ва̄ти двиннампи. калиса̄сана̄ропанети (па̄чи. ат̣т̣ха. 277) калӣти кодхо, тасса са̄санам̣ а̄н̣ам̣ калиса̄санам̣, тасса̄ропанети аттхо, ‘‘аппева на̄ма имина̄пи убба̄л̣хо паккамеййа̄’’ти кодхавасена т̣ха̄нанисаджджа̄дӣсу досам̣ дассетва̄ ‘‘пассатха бхо имасса т̣ха̄нам̣ нисаджджам̣ а̄локитам̣ вилокитам̣, кха̄н̣у вийа тит̣т̣хати, сунакхо вийа нисӣдати, маккат̣о вийа ито чито ча вилокетӣ’’ти евам̣ амана̄павачанасса бхан̣анети вуттам̣ хоти. суддхачиттена паневам̣ бхан̣ане досо наттхи. евама̄дӣхӣти еттха а̄дисаддена ‘‘махаггхам̣ бхан̣д̣ам̣ пасситва̄ лобхадхаммам̣ уппа̄дессатӣ’’ти уййоджети, ‘‘ма̄туга̄мам̣ пасситва̄ анабхиратим̣ уппа̄дессатӣ’’ти уййоджети, ‘‘гила̄насса ва̄ охиййакасса ва̄ виха̄рапа̄ласса ва̄ йа̄гум̣ ва̄ бхаттам̣ ва̄ кха̄данӣйам̣ ва̄ нӣхара̄’’ти уййоджети, ‘‘на ана̄ча̄рам̣ а̄чаритука̄мо сати каран̣ӣйе уййоджетӣ’’ти (па̄чи. 278) етесам̣ гахан̣ам̣.

уййоджанасиккха̄падаван̣н̣ана̄ нит̣т̣хита̄.