3. сабходжанасиккха̄падаван̣н̣ана̄

‘‘сабходжане’’ти ба̄хираттхасама̄сойам̣, убхасадде ука̄расса ча лопоти а̄ха ‘‘саха убхохи джанехӣ’’тиа̄ди. таттха убхохи джанехӣти джа̄йа̄ ча пати ча̄ти убхохи джанехи. бхун̃джитаббанти ва̄ бходжанам̣, иттхӣ ча пурисо ча, тена саха ваттатӣти сабходжананти а̄ха ‘‘атха ва̄’’тиа̄ди. ра̄гапарийут̣т̣хитасса̄ти метхуна̄дхиппа̄йасса. сайанигхаранти сайанӣйагхарам̣, ва̄сагеханти аттхо. махаллакасса̄ти махаллакасса сайанигхарасса. пит̣т̣хасан̇гха̄т̣атоти два̄раба̄хато кхуддакасса ва̄ти йатха̄ татха̄ ва̄ катасса кхуддакасса сайанигхарасса. вемаджджхам̣ атиккамитва̄ нисӣдеййа̄ти пит̣т̣хивам̣сам̣ атиккамитва̄ нисӣдеййа. кхуддакам̣ (са̄раттха. т̣ӣ. па̄читтийа 3.280) на̄ма сайанигхарам̣ виттха̄рато пан̃чахаттхаппама̄н̣ам̣ хоти, тасса ча маджджхимат̣т̣ха̄нам̣ пит̣т̣хасан̇гха̄т̣ато ад̣д̣хатеййахаттхаппама̄н̣амева хоти, тасма̄ та̄дисе сайанигхаре пит̣т̣хасан̇гха̄т̣ато хаттхапа̄сам̣ виджахитва̄ нисинно пит̣т̣хивам̣сам̣ атиккамитва̄ нисинно на̄ма хоти. евам̣ нисинно ча вемаджджхам̣ атиккамитва̄ нисинно на̄ма хоти. тена вуттам̣ па̄л̣ийам̣ ‘‘пит̣т̣хивам̣сам̣ атиккамитва̄ нисӣдатӣ’’ти (па̄чи. 281). сачиттакан̃четтха анупависитва̄ нисӣданачиттена дат̣т̣хаббам̣.

сабходжанасиккха̄падаван̣н̣ана̄ нит̣т̣хита̄.