1. а̄васатхасиккха̄падаван̣н̣ана̄

‘‘агила̄но’’ти еттха антамасо двига̄вутам̣ гантум̣ саматтхо адхиппетоти а̄ха ‘‘аддхайоджанампи гантум̣ саматтхена̄’’ти. а̄васатхапин̣д̣оти а̄васатхе пин̣д̣о, са̄ла̄дӣсу анодисса йа̄вадаттхам̣ пан̃н̃аттам̣ пан̃чаннам̣ бходжана̄нам̣ ан̃н̃атарам̣ бходжананти аттхо. тена̄ха ‘‘имесам̣ ва̄’’тиа̄ди. таттха имесам̣ ва̄ти имесам̣ па̄сан̣д̣а̄нам̣ ва̄. еттака̄нам̣ ва̄ти имасмим̣ па̄сан̣д̣е еттака̄нам̣ па̄сан̣д̣а̄нам̣ ва̄. па̄сан̣д̣анти чханнавутивидхам̣ саман̣апарибба̄джака̄дим̣. те хи тан̣ха̄па̄сан̃чева дит̣т̣хипа̄сан̃ча д̣енти од̣д̣ентӣти па̄сан̣д̣а̄ти вуччанти. анодисса̄ти ануддиситва̄, апариччхиндитва̄ти аттхо. са̄ла̄дӣсу йаттха каттхачӣти са̄ла̄руккхамӯлааббхока̄са̄дӣсу йаттха каттхачи т̣ха̄несу. екадивасамева бхун̃джитабботи екадивасам̣ саким̣йева бхун̃джитаббо, екасмим̣ дивасе пунаппунам̣ бхун̃джитум̣ на ват̣т̣ати. дутийадивасато пат̣т̣ха̄йа̄ти бхуттадивасасса дутийадивасато пат̣т̣ха̄йа. аджджхоха̄ре аджджхоха̄ре па̄читтийанти а̄лопе а̄лопе кабал̣е кабал̣е па̄читтийам̣. на̄на̄кулехи (па̄чи. ат̣т̣ха. 206) пана на̄на̄т̣т̣ха̄несу пан̃н̃аттам̣, екасмим̣ т̣ха̄не екадивасам̣ бхун̃джитва̄ дутийадивасе ан̃н̃аттха бхун̃джитум̣ ват̣т̣ати, пат̣ипа̄т̣им̣ пана кхепетва̄ пуна а̄дито пат̣т̣ха̄йа бхун̃джитум̣ на ват̣т̣ати. екапӯгана̄на̄пӯгаекага̄мана̄на̄га̄месупи есева найо. йопи екакуласса ва̄ на̄на̄кула̄нам̣ ва̄ екато пан̃н̃атто тан̣д̣ула̄дӣнам̣ абха̄вена антарантара̄ чхиджджати, сопи на бхун̃джитаббо. саче пана ‘‘на саккома да̄ту’’нти упаччхиндитва̄ пуна калйа̄н̣ачитте уппанне да̄тум̣ а̄рабханти, етам̣ пуна екадивасам̣ бхун̃джитум̣ ват̣т̣ати.

тикапа̄читтийанти агила̄не агила̄насан̃н̃ивематикагила̄насан̃н̃ӣнам̣ васена тӣн̣и па̄читтийа̄ни. гила̄насса гила̄насан̃н̃иноти гила̄насса пана ‘‘гила̄но аха’’нти сан̃н̃ино ануваситва̄ бхун̃джантасса ана̄патти. саким̣ бхун̃джатӣти екадивасам̣ бхун̃джати. ‘‘гаччханто ва̄’’ти идам̣ аддхайоджанавасена гахетаббам̣, татха̄ ‘‘пачча̄гаччханто’’ти (са̄раттха. т̣ӣ. па̄читтийа 3.208) идампӣти ваданти. кеначи упаддавена̄ти надипӯрачорабхайа̄дина̄ кеначи упаддавена. ан̃н̃анти йа̄гукхаджджакапхала̄пхала̄дибхедам̣ йам̣ кин̃чи ан̃н̃ам̣. ануваситва̄ти пуна васитва̄.

а̄васатхасиккха̄падаван̣н̣ана̄ нит̣т̣хита̄.