2. ган̣абходжанасиккха̄падаван̣н̣ана̄

ган̣абходжанети ган̣ена ладдхатта̄ ган̣асса сантаке бходжане. тена̄ха ‘‘ган̣асса бходжане’’ти. нану четтха ‘‘ган̣асса бходжане’’ти вуччати, со ча кхо ган̣о ‘‘каттхачи двӣхи, каттхачи тӣхӣ’’тиа̄дина̄ анекадха̄ адхиппето, идха катихӣти а̄ха ‘‘идха ча̄’’тиа̄ди. там̣ панетам̣ ган̣абходжанам̣ двӣхи пака̄рехи пасавати нимантанато ва̄ вин̃н̃аттито ва̄ти а̄ха ‘‘тесам̣ нимантанато ва̄’’тиа̄ди. таттха нимантанато ва̄ти акаппийанимантанато ва̄. одана̄дӣнам̣ пан̃чаннанти оданасаттукумма̄самаччхамам̣са̄нам̣ пан̃чаннам̣.

‘‘оданена нимантеми, оданам̣ ме ган̣хатха̄’’тиа̄дина̄ найена йена кеначи вевачанена ва̄ бха̄сантарена ва̄ пан̃чаннам̣ бходжана̄нам̣ на̄мам̣ гахетва̄ нимантетӣти самбандхо. чатта̄роти екат̣т̣ха̄не ва̄ на̄на̄т̣т̣ха̄несу ва̄ т̣хите чатта̄ро бхиккхӯ. лаккхан̣авачанан̃четам̣, тасма̄ чатта̄ро ва̄ тато ва̄ адхике бхиккхӯти аттхо. вевачанена ва̄ти бхаттаанна̄дипарийа̄йасаддена ва̄. бха̄сантарена ва̄ти андхадамил̣а̄дибха̄сантарена ва̄. пан̃чаннам̣ бходжана̄нам̣ на̄мам̣ гахетва̄ти пан̃чаннам̣ бходжана̄нам̣ ан̃н̃атарасса на̄мам̣ гахетва̄. оданена нимантемӣти тумхе бханте оданена нимантеми. а̄дисаддена ‘‘а̄кан̇кхатха олокетха адхива̄сетха пат̣има̄нетха, саттуна̄ нимантеми, саттум̣ ме ган̣хатха а̄кан̇кхатха олокетха адхива̄сетха пат̣има̄нетха̄’’тиа̄дӣнам̣ (па̄чи. ат̣т̣ха. 217-218) гахан̣ам̣. екато ва̄ти екаттха т̣хите ва̄ нисинне ва̄ бхиккхӯ дисва̄ ‘‘тумхе, бханте, оданена нимантемӣ’’тиа̄дина̄ евам̣ екато нимантита̄. на̄на̄то ва̄ нимантита̄ти чатта̄ри паривен̣а̄ни ва̄ виха̄ре ва̄ гантва̄ на̄на̄то ва̄ нимантита̄. екат̣т̣ха̄не т̣хитесуйева ва̄ еко путтена, еко питара̄ти евампи нимантита̄ на̄на̄тойева нимантита̄ на̄ма хонти. екато ган̣хантити ан̃н̃аман̃н̃асса два̄дасахаттхӯпача̄ре т̣хита̄ ган̣ханти.

касма̄ пана на̄на̄то бхуттепи ган̣абходжанам̣ хотӣти а̄ха ‘‘пат̣иггахан̣амева хеттха пама̄н̣а’’нти. йади евам̣ атха касма̄ па̄л̣ийам̣ ‘‘ган̣абходжанам̣ на̄ма йаттха чатта̄ро бхиккхӯ пан̃чаннам̣ бходжана̄нам̣ ан̃н̃атарена бходжанена нимантита̄ бхун̃джанти, етам̣ ган̣абходжанам̣ на̄ма̄’’ти (па̄чи. 218) вуттам̣? там̣ пат̣иггахан̣анийаманаттхамева. на хи аппат̣иггахитакам̣ бхиккхӯ бхун̃джантӣти ‘‘бхун̃джантӣ’’ти падам̣ пат̣иггахан̣анийамавачанам̣ хоти. екато ва̄ на̄на̄то ва̄ вин̃н̃а̄петва̄ти чатта̄ро бхиккхӯ екато т̣хита̄ ва̄ нисинна̄ ва̄ упа̄сакам̣ дисва̄ ‘‘амха̄кам̣ чатуннампи бхаттам̣ дехӣ’’ти ва̄ па̄т̣еккам̣ пависитва̄ ‘‘майхам̣ бхаттам̣ дехи, майхам̣ бхаттам̣ дехӣ’’ти ва̄ екато ва̄ на̄на̄то ва̄ вин̃н̃а̄петва̄. тасса дувидхасса̄пӣти йан̃ча нимантанато ладдхам̣ ган̣абходжанам̣, йан̃ча вин̃н̃аттито ладдхам̣, тасса дувидхасса̄пи ган̣абходжанасса. евам̣ пат̣иггахан̣ети екато пат̣иггахан̣е.

па̄да̄нампи пхалитатта̄ти (па̄чи. ат̣т̣ха. 217-218) антамасо па̄да̄нампи йатха̄ маха̄чаммасса парато мам̣сам̣ диссати, евам̣ пхалитатта̄. на сакка̄ пин̣д̣а̄йа чаритунти ва̄лика̄йа ва̄ саккхара̄йа ва̄ пхут̣т̣хаматте дуккхуппаттито антога̄ме пин̣д̣а̄йа чаритум̣ на саккоти. чӣваре карийама̄нети са̄т̣акан̃ча суттан̃ча лабхитва̄ чӣваре карийама̄не. йам̣ кин̃чи чӣваре каттаббакамманти чӣваравича̄ран̣ачхинданамогхасутта̄ропана̄ди йам̣ кин̃чи чӣваре каттаббам̣ каммам̣, антамасо сӯчиведханампӣти адхиппа̄йо. ‘‘аддхайоджанампӣ’’тиа̄ди авакам̣сато вуттам̣. йо пана дӯрам̣ гантука̄мо, таттха ваттаббамева наттхи, гаччханто аддхайоджанаббхантаре га̄вутепи бхун̃джитум̣ лабхати, гато пана екадивасам̣. йада̄ на̄вам̣ абхирухитука̄мо ва̄ хоти а̄рул̣хо ва̄ орул̣хо ва̄, айам̣ на̄ва̄бхируханасамайо на̄ма̄ти а̄ха ‘‘на̄ва̄бхируханасамайепи есева найо’’ти. айам̣ пана висесо – абхирул̣хена иччхитат̣т̣ха̄нам̣ гантва̄пи йа̄ва на орохати, та̄ва бхун̃джитаббам̣. чатта̄ро бхиккхӯти антимапариччхедо. йаттха пана сатам̣ ва̄ сахассам̣ ва̄ саннипатитам̣, таттха ваттаббамева наттхи. тасма̄ та̄дисе ка̄ле ‘‘маха̄самайо’’ти адхит̣т̣хахитва̄ бхун̃джитаббам̣. йо кочи паббаджитоти сахадхаммикесу ва̄ титтхийесу ва̄ ан̃н̃атаро.

йе ча две тайо екато ган̣хантӣти йепи акаппийанимантанам̣ са̄дийитва̄ две ва̄ тайо ва̄ екато ган̣ханти, тесампи ана̄патти. пан̣ӣтабходжанасӯподанавин̃н̃аттӣхи пана а̄паттийева̄ти ваданти, упапариккхитаббам̣. ниччабхатта̄дӣсӯти ниччабхатте сала̄кабхатте паккхике упосатхике па̄т̣ипадике. таттха ниччабхаттанти дхувабхаттам̣ вуччати. ‘‘ниччабхаттам̣ ган̣хатха̄’’ти ваданти, бахӯнампи екато ган̣хитум̣ ват̣т̣ати. сала̄кабхатта̄дӣсупи есева найо.

ган̣абходжанасиккха̄падаван̣н̣ана̄ нит̣т̣хита̄.