4. падасодхаммасиккха̄падаван̣н̣ана̄

падасо дхаммам̣ ва̄чеййа̄ти екато падам̣ падам̣ дхаммам̣ ва̄чеййа, кот̣т̣ха̄сам̣ кот̣т̣ха̄сам̣ ва̄чеййа̄ти аттхо. йасма̄ на кевалам̣ тиссо сан̇гӣтийо а̄рул̣хадхаммам̣йева падасо ва̄чентасса а̄патти, тасма̄ ‘‘сан̇гӣтиттайам̣ ана̄рул̣хампӣ’’тиа̄ди вуттам̣. а̄ди-саддена (па̄чи. ат̣т̣ха. 45) сӣлӯпадеса дхутан̇гапан̃хаа̄рамман̣акатха̄ буддхикадан̣д̣акан̃н̃а̄н̣аваттхуасубхакатха̄дӣнам̣ гахан̣ам̣. мен̣д̣акамилиндапан̃хесу тхерасса сакаппат̣ибха̄не ана̄патти. йам̣ ран̃н̃о сан̃н̃а̄панаттхам̣ а̄харитва̄ вуттам̣, таттха а̄патти. ван̣н̣апит̣акаан̇гулима̄лапит̣акарат̣т̣хапа̄лагаджджитаа̄л̣авакагаджджитагӯл̣хамаггагӯл̣хавессантарагӯл̣хавинайаведаллапит̣ака̄дӣни пана абуддхавачана̄нийева.

йасма̄ пана там̣ падам̣ чатуббидхам̣ хоти, тасма̄ там̣ дассетум̣ ‘‘пада̄нупадаанваккхара̄нубйан̃джанесӯ’’ти вуттам̣. таттха паданти еко га̄тха̄па̄до адхиппето. анупаданти дутийапа̄до. анваккхаранти екекам̣ аккхарам̣. анубйан̃джананти пуримабйан̃джанена садисам̣ паччха̄бйан̃джанам̣. йам̣ кин̃чи ва̄ екам̣ аккхарам̣ анваккхарам̣. аккхарасамӯхо анубйан̃джанам̣. аккхара̄нубйан̃джанасамӯхо падам̣. пат̣хамам̣ падам̣ падамева, дутийам̣ анупаданти еваметтха на̄на̄каран̣ам̣ ведитаббам̣. етесу пада̄дӣсу йам̣ кан̃чи кот̣т̣ха̄сам̣ бхиккхун̃ча бхиккхунин̃ча т̣хапетва̄ авасесапуггалехи саддхим̣ екато бхан̣антасса пада̄диган̣ана̄йа па̄читтийанти самбандхо.

еттха га̄тха̄бандхесу (па̄чи. ат̣т̣ха. 45) та̄ва ‘‘манопуббан̇гама̄ дхамма̄’’ти (дха. па. 1, 2) екамекам̣ падам̣ са̄ман̣ерена саддхим̣ екато а̄рабхитва̄ екатойева нит̣т̣ха̄пентасса падаган̣ана̄йа па̄читтийам̣. тхерена ‘‘манопуббан̇гама̄ дхамма̄’’ти вутте там̣ падам̣ апа̄пун̣итва̄ ‘‘маносет̣т̣ха̄ маномайа̄’’ти вачанака̄ле паттена са̄ман̣ерена екато бхан̣антасса анупадаган̣ана̄йа. ‘‘рӯпам̣ аничча’’нтиа̄ди (ма. ни. 1.353, 356) вачанака̄ле тена саддхим̣ ‘‘рӯ’’ ка̄раматтамева ва̄чентасса анваккхараган̣ана̄йа. еса найо га̄тха̄бандхепи. ‘‘рӯпам̣, бхиккхаве, аниччам̣, ведана̄ аничча̄’’ти (ма. ни. 1.353, 356) имам̣ суттам̣ ва̄чайама̄но тхерена ‘‘рӯпам̣ аничча’’нти вуччама̄не са̄ман̣еро сӣгхапан̃н̃ата̄йа ‘‘ведана̄ аничча̄’’ти имам̣ аниччападам̣ тхерасса ‘‘рӯпам̣ аничча’’нти етена аниччападена саддхим̣ екато бхан̣анто ва̄чам̣ ниччха̄рети, евам̣ ва̄чентасса анубйан̃джанаган̣ана̄йа па̄читтийанти ведитаббам̣.

тикапа̄читтийанти анупасампанне анупасампаннасан̃н̃ивематикаупасампаннасан̃н̃ӣнам̣ васена тӣн̣и па̄читтийа̄ни. анупасампаннена саддхим̣ екато уддесаггахан̣е екато бхан̣антасса ана̄паттӣти самбандхо. еса найо ‘‘саджджха̄йакаран̣е, тасса сантике уддесаггахан̣е’’ти еттха̄пи. татра̄йам̣ виниччхайо – упасампанно ча анупасампанно ча нисӣдитва̄ уддиса̄пенти. а̄чарийо ‘‘нисинна̄нам̣ бхан̣а̄мӣ’’ти техи саддхим̣ екато вадати, а̄чарийассева а̄патти. анупасампаннена саддхим̣ ган̣хантасса ана̄патти. двепи т̣хита̄ ган̣ханти, есева найо. дахарабхиккху нисинно, са̄ман̣еро т̣хито, ‘‘нисиннасса бхан̣а̄мӣ’’ти бхан̣ато ана̄патти. саче дахаро тит̣т̣хати, итаро нисӣдати, ‘‘т̣хитасса бхан̣а̄мӣ’’ти бхан̣атопи ана̄патти. саче бахӯнам̣ бхиккхӯнам̣ антаре еко са̄ман̣еро нисинно хоти, тасмим̣ нисинне падасо дхаммам̣ ва̄чентасса ачиттака̄ а̄патти. саче са̄ман̣еро упача̄рам̣ мун̃читва̄ т̣хито ва̄ нисинно ва̄ хоти, йесам̣ ва̄чети, тесу апарийа̄паннатта̄ екена диса̄бха̄гена пала̄йанакагантхам̣ на̄ма ган̣ха̄тӣти сан̇кхам̣ гаччхати, тасма̄ ана̄патти.

саджджха̄йакаран̣ети анупасампаннена саддхим̣ екато саджджха̄йакаран̣е. тасса сантике уддесаггахан̣ети анупасампаннасса сантике уддесаггахан̣е. йебхуййена пагун̣агантхам̣ бхан̣антасса̄ти саче екага̄тха̄йа еко па̄до на̄гаччхати, авасеса̄ а̄гаччханти, айам̣ йебхуййена пагун̣агантхо на̄ма. етена найена суттепи ведитаббо, там̣ бхан̣антасса. оса̄рентасса ча̄ти париса̄маджджхе суттам̣ учча̄рентасса ча.

падасодхаммасиккха̄падаван̣н̣ана̄ нит̣т̣хита̄.