5. пат̣хамасахасеййасиккха̄падаван̣н̣ана̄

идха ‘‘бхиккхум̣ т̣хапетва̄ авасесо анупасампанно на̄ма̄’’ти (па̄чи. 52) вачанато тираччха̄нагатопи анупасампаннойева, со ча кхо на саббо, метхунадхамма̄паттийа̄ ваттхубхӯтова̄ти а̄ха ‘‘антамасо’’тиа̄ди. тасса ча париччхедо метхунадхамма̄паттийа̄ вуттанайенева ведитаббо. дираттатираттанти еттха дираттавачанена на кочи висесаттхо лаббхати, кевалам̣ локавоха̄равасена бйан̃джанасилит̣т̣хата̄йа, мукха̄рул̣хата̄йа евам̣ вуттанти ведитаббам̣. двиннам̣ ва̄ тин̣н̣ам̣ ва̄ раттӣнанти пана вачанаттхаматтадассанаттхам̣ вуттам̣, нирантаратираттадассанаттхам̣ ва̄ дираттаггахан̣ам̣ катанти дат̣т̣хаббам̣. сахасеййанти екато сеййам̣. сеййа̄ти ча ка̄йаппаса̄ран̣асан̇кха̄там̣ сайанампи вуччати ‘‘сайанам̣ сеййа̄’’ти катва̄, йасмим̣ сена̄сане сайанти, тампи ‘‘сайанти еттха̄ти сеййа̄’’ти катва̄. тадубхайампи идха са̄ман̃н̃ена, екасесанайена ва̄ гахитанти а̄ха ‘‘саббаччханнапариччханне’’тиа̄ди.

таттха йам̣ сена̄санам̣ упари пан̃чахи чхаданехи (па̄чи. ат̣т̣ха. 51), ан̃н̃ена ва̄ кеначи антамасо ваттхена̄пи саббамева париччханнам̣, бхӯмито пат̣т̣ха̄йа йа̄ва чхаданам̣ а̄хачча, ана̄хачча̄пи ва̄ саббантимена парийа̄йена дийад̣д̣хахаттхуббедхена па̄ка̄рена ва̄ ан̃н̃ена ва̄ кеначи антамасо ваттхена̄пи париккхиттам̣, идам̣ саббаччханнасаббапариччханнам̣ на̄ма. йасса пана упари бахутарам̣ т̣ха̄нам̣ чханнам̣, аппам̣ аччханнам̣, самантато ча бахутарам̣ париккхиттам̣, аппам̣ апариккхиттам̣, идам̣ йебхуййена чханнам̣ йебхуййена париччханнам̣ на̄ма. тасмим̣ саббаччханнапариччханне, йебхуййена чханнапариччханне ва̄.

видахеййа̄ти кареййа, тан̃ча кхо аттхато сампа̄дананти а̄ха ‘‘сампа̄деййа̄’’ти. айан̃хеттха сан̇кхепаттхо ‘‘сена̄санасан̇кха̄там̣ сеййам̣ пависитва̄ ка̄йаппаса̄ран̣асан̇кха̄там̣ сеййам̣ каппеййа видахеййа сампа̄деййа̄’’ти. дийад̣д̣хахаттхуббедхо вад̣д̣хакихаттхена гахетаббо. екӯпача̄роти валан̃джанадва̄расса екаттам̣ сандха̄йа вуттам̣. сатагаббхам̣ ва̄ чатуса̄лам̣ екӯпача̄рам̣ хотӣти самбандхо. таттха ва̄ти пуримапуримадивасе йаттха вут̣т̣хам̣, тасмим̣йева сена̄сане ва̄. ан̃н̃аттха ва̄ та̄дисети йатха̄вутталаккхан̣ена саманна̄гате ан̃н̃асмим̣ пуббе авут̣т̣хасена̄сане ва̄. тена ва̄ти йена саха пуримапуримадивасе вут̣т̣хам̣, тена ва̄. ан̃н̃ена ва̄ти йена саха пуримапуримасмим̣ дивасе вут̣т̣хам̣, тато ан̃н̃ена ва̄. сан̇кхепоти сан̇кхепаван̣н̣ана̄. йади евам̣ виттха̄ро катхам̣ ведитабботи а̄ха ‘‘виттха̄ро пана̄’’тиа̄ди.

упад̣д̣хаччханнапариччханна̄дӣсӯти а̄дисаддена ‘‘саббаччханне чӯл̣акапариччханне дуккат̣ам̣, йебхуййена чханне чӯл̣акапариччханне дуккат̣ам̣, саббапариччханне чӯл̣акаччханне дуккат̣ам̣, йебхуййена париччханне чӯл̣акаччханне дуккат̣а’’нти (па̄чи. ат̣т̣ха. 53) ат̣т̣хакатха̄йам̣ вутта̄нам̣ гахан̣ам̣. татийа̄йа раттийа̄ пура̄рун̣а̄ никкхамитва̄ пуна васантасса̄ти татийа̄йа раттийа̄ арун̣ато пуретарамева никкхамитва̄ арун̣ам̣ бахи ут̣т̣ха̄петва̄ чатуттхадивасе аттхан̇гате сӯрийе пуна васантасса. саббаччханнасабба̄париччханна̄дӣсӯти еттха пана а̄дисаддена ‘‘саббапариччханне саббааччханне, йебхуййена аччханне йебхуййена апариччханне’’ти (па̄чи. 54) па̄л̣ийам̣ а̄гата̄нам̣, ‘‘упад̣д̣хаччханне чӯл̣акапариччханне ана̄патти, упад̣д̣хапариччханне чӯл̣акаччханне ана̄патти, чӯл̣акаччханне чӯл̣акапариччханне ана̄паттӣ’’ти (па̄чи. ат̣т̣ха. 53) ат̣т̣хакатха̄йам̣ а̄гата̄нан̃ча гахан̣ам̣.

пат̣хамасахасеййасиккха̄падаван̣н̣ана̄ нит̣т̣хита̄.