2. дутийасуттантапа̄л̣иван̣н̣ана̄

13. пуна ан̃н̃асса суттантасса аттхавасена саччаппат̣иведхам̣ ниддиситука̄мо пуббе ме, бхиккхаветиа̄дикам̣ суттантам̣ а̄харитва̄ дассеси. таттха пуббе ме, бхиккхаве, самбодха̄ти бхиккхаве, мама самбодхито саббан̃н̃утан̃н̃а̄н̣ато пуббе. анабхисамбуддхасса̄ти саббадхамме аппат̣ивиддхасса. бодхисаттассева сатоти бодхисаттабхӯтассева. етадахосӣти бодхипаллан̇ке нисиннасса етам̣ паривитаккитам̣ ахоси. асса̄доти асса̄дӣйатӣти асса̄до. а̄дӣнавоти досо. ниссаран̣анти апагаманам̣. сукханти сукхайатӣти сукхам̣, йассуппаджджати, там̣ сукхитам̣ каротӣти аттхо. соманассанти пӣтисоманассайогато собханам̣ мано асса̄ти сумано, суманасса бха̄во соманассам̣, сукхамева пӣтийогато висеситам̣. аниччанти аддхувам̣. дуккханти дуккхаваттхутта̄ сан̇кха̄радуккхатта̄ ча дуккхам̣. випарин̣а̄мадхамманти авасӣ хутва̄ джара̄бхан̇гавасена париваттанапакатикам̣. етена анаттабха̄во вутто хоти. чхандара̄гавинайоти чхандасан̇кха̄тасса ра̄гасса сам̣варан̣ам̣, на ван̣н̣ара̄гасса. чхандара̄гаппаха̄нанти тассева чхандара̄гасса паджаханам̣.

йа̄вакӣван̃ча̄тиа̄дӣсу йа̄ва имесам̣ пан̃чаннам̣ упа̄да̄наккхандха̄нам̣…пе… йатха̄бхӯтам̣ на̄ббхан̃н̃а̄сим̣ на адхикена н̃а̄н̣ена пат̣ивиджджхим̣, та̄ва ануттарам̣ самма̄самбодхим̣ ануттарам̣ саббан̃н̃убха̄вам̣ абхисамбуддхо абхисамета̄вӣ араханти нева̄хам̣ паччан̃н̃а̄сим̣ нева пат̣ин̃н̃ам̣ ака̄синти самбандхато аттхо. кӣван̃ча̄ти нипа̄таматтам̣. йатоти йасма̄, йада̄ ва̄. атха̄ти анантарам̣. н̃а̄н̣ан̃ча пана ме дассанам̣ удапа̄дӣти дассанакиччакаран̣ена дассанасан̇кха̄там̣ паччавеккхан̣ан̃а̄н̣ан̃ча ме уппаджджи. акуппа̄ти копетум̣ ча̄летум̣ асаккун̣еййа̄. вимуттӣти арахаттапхалавимутти. ета̄йа ева пхалапаччавеккхан̣а̄йа магганибба̄напаччавеккхан̣а̄пи вутта̄ва хонти. айамантима̄ джа̄тӣти айам̣ паччхима̄ кхандхаппаватти. наттхида̄ни пунаббхавоти ида̄ни пуна уппатти наттхи. етена пахӣнакилесапаччавеккхан̣а̄ вутта̄. арахато хи авасит̣т̣хакилесапаччавеккхан̣а̄ на хоти.