6. сахаджа̄тапаччайаниддесаван̣н̣ана̄

6. сахаджа̄тапаччайаниддесе ан̃н̃аман̃н̃анти ан̃н̃о ан̃н̃асса. имина̄ етесам̣ дхамма̄нам̣ екаккхан̣е паччайабха̄ван̃чева паччайуппаннабха̄ван̃ча дӣпети. оккантиккхан̣ети пан̃чавока̄рабхаве пат̣исандхиккхан̣е. тасмин̃хи кхан̣е на̄марӯпам̣ оккантам̣ вийа паккхандантам̣ вийа паралокато имам̣ локам̣ а̄гантва̄ пависантам̣ вийа уппаджджати, тасма̄ со кхан̣о ‘‘оккантиккхан̣о’’ти вуччати. еттха ча рӯпанти хадайаваттхуматтамева адхиппетам̣. тан̃хи на̄масса, на̄ман̃ча тасса ан̃н̃аман̃н̃ам̣ сахаджа̄тапаччайат̣т̣хам̣ пхарати. читтачетасика̄ти паваттийам̣ чатта̄ро кхандха̄. сахаджа̄тапаччайена̄ти еттха читтасамут̣т̣ха̄нарӯпа̄ читтачетасика̄нам̣ паччайат̣т̣хам̣ на пхаранти, тасма̄ ‘‘ан̃н̃аман̃н̃а’’нти на вуттам̣. татха̄ упа̄да̄рӯпа̄ бхӯта̄нам̣. рӯпино дхамма̄ арӯпӣнам̣ дхамма̄нанти хадайаваттху чатуннам̣ кхандха̄нам̣. кин̃чи ка̄лети кисмин̃чи ка̄ле. сахаджа̄тапаччайена̄ти пат̣исандхим̣ сандха̄йа вуттам̣. на сахаджа̄тапаччайена̄ти паваттим̣ сандха̄йа вуттам̣.

айам̣ пана ‘чатта̄ро кхандха̄ арӯпино ан̃н̃аман̃н̃ам̣ сахаджа̄тапаччайена паччайо’ти евам̣ чхахи кот̣т̣ха̄сехи т̣хито. таттха тайо кот̣т̣ха̄са̄ ан̃н̃аман̃н̃авасена вутта̄, тайо на ан̃н̃аман̃н̃авасена. таттха пат̣хамакот̣т̣ха̄се арӯпамева паччайо чева паччайуппаннан̃ча, дутийе рӯпамева, татийе на̄марӯпам̣, чатуттхе паччайо арӯпам̣, паччайуппаннам̣ рӯпам̣; пан̃чаме паччайопи паччайуппаннампи рӯпамева; чхат̣т̣хе паччайо рӯпам̣, паччайуппаннам̣ арӯпанти айам̣ та̄веттха па̄л̣иван̣н̣ана̄.

айам̣ пана сахаджа̄тапаччайо джа̄тивасена кусало акусало випа̄ко кирийам̣ рӯпанти пан̃чадха̄ бхиджджати. таттха кусало бхӯмито чатуббидхо хоти, акусало екавидхова випа̄ко чатуббидхо, кирийасан̇кха̄то тивидхо, рӯпам̣ екавидхам̣ ка̄ма̄вачарамева̄ти евам̣ та̄веттха на̄наппака̄рабхедато вин̃н̃а̄таббо виниччхайо.

евам̣ бхинне панеттха чатубхӯмакампи кусалам̣ пан̃чавока̄рабхаве аттана̄ сампайуттадхамма̄нан̃чева читтасамут̣т̣ха̄нарӯпасса ча сахаджа̄тапаччайо хоти, татха̄ акусалам̣. йам̣ панеттха арӯпе уппаджджати, там̣ арӯпадхамма̄нам̣йева сахаджа̄тапаччайо хоти.

ка̄ма̄вачарарӯпа̄вачаравипа̄кам̣ читтасамут̣т̣ха̄нарӯпасса чева сампайуттадхамма̄нан̃ча сахаджа̄тапаччайо хоти. йам̣ панеттха рӯпам̣ на самут̣т̣ха̄пети, там̣ сампайуттадхамма̄нан̃н̃ева. йам̣ пат̣исандхийам̣ уппаджджати, там̣ кат̣атта̄рӯпа̄нан̃ча̄пи сахаджа̄тапаччайо хоти. арӯпа̄вачаравипа̄кам̣ сампайуттадхамма̄нан̃н̃ева. локуттаравипа̄кам̣ пан̃чавока̄ре сампайуттадхамма̄нан̃чева читтасамут̣т̣ха̄нарӯпа̄нан̃ча, чатувока̄ре арӯпа̄нан̃н̃ева. ка̄ма̄вачараарӯпа̄вачаракирийа̄ пан̃чавока̄ре сампайуттака̄нан̃чева читтасамут̣т̣ха̄нарӯпа̄нан̃ча сахаджа̄тапаччайо хоти, чатувока̄ре арӯпа̄нан̃н̃ева. рӯпа̄вачаракирийа̄ сампайуттадхамма̄нан̃чева читтасамут̣т̣ха̄нарӯпа̄нан̃ча екантена сахаджа̄тапаччайо хоти.

чатусамут̣т̣ха̄никасса рӯпасса каммасамут̣т̣ха̄нарӯпе екам̣ маха̄бхӯтам̣ тин̣н̣ам̣, тӣн̣и екасса, две двиннам̣ маха̄бхӯта̄нам̣, маха̄бхӯта̄ упа̄да̄рӯпасса сахаджа̄тапаччайена паччайо. ка̄ма̄вачарарӯпа̄вачарапат̣исандхиккхан̣е ваттхурӯпам̣ випа̄каккхандха̄нам̣ сахаджа̄тапаччайена паччайо. утучитта̄ха̄расамут̣т̣ха̄несу пана маха̄бхӯта̄ни ан̃н̃аман̃н̃ан̃чева упа̄да̄рӯпасса ча сахаджа̄тапаччайена паччайоти еваметтха паччайуппаннатопи вин̃н̃а̄таббо виниччхайоти.

сахаджа̄тапаччайаниддесаван̣н̣ана̄.