7. ан̃н̃аман̃н̃апаччайаниддесаван̣н̣ана̄

7. ан̃н̃аман̃н̃апаччайаниддесе сахаджа̄тапаччайаниддесасса пурима̄нам̣ тин̣н̣ам̣ кот̣т̣ха̄са̄нам̣ васена па̄л̣и а̄гата̄. тасса̄ таттха вуттасадиса̄ва ван̣н̣ана̄ти пуна на гахита̄. айампи ча ан̃н̃аман̃н̃апаччайо джа̄тивасена кусало акусало випа̄ко кирийам̣ рӯпанти пан̃чадха̄ бхинно. таттха кусало бхӯмито чатуббидхо. саббам̣ пуримасадисамева̄ти еваметтха на̄наппака̄рабхедато вин̃н̃а̄таббо виниччхайо.

евам̣ бхинне панеттха саббампи чатубхӯмакам̣ кусалам̣ аттана̄ сампайуттадхамма̄нам̣ ан̃н̃аман̃н̃апаччайена паччайо. татха̄ акусалам̣. випа̄ке пана ка̄ма̄вачарарӯпа̄вачаравипа̄кам̣ пат̣исандхийам̣ ваттхурӯпасса, паватте сампайуттадхамма̄нан̃н̃ева. арӯпа̄вачаралокуттаравипа̄кам̣ аттана̄ сампайуттадхамма̄нан̃н̃ева ан̃н̃аман̃н̃апаччайена паччайо. саббампи кирийам̣ сампайуттадхамма̄нан̃н̃ева ан̃н̃аман̃н̃апаччайена паччайо. чатусамут̣т̣ха̄никарӯпасса каммасамут̣т̣ха̄не екам̣ маха̄бхӯтам̣ тин̣н̣ам̣, тӣн̣и екасса, две двиннам̣ маха̄бхӯта̄нам̣ ан̃н̃аман̃н̃апаччайена паччайо. ка̄ма̄вачарарӯпа̄вачарапат̣исандхийам̣ ваттхурӯпам̣ випа̄каккхандха̄нам̣ ан̃н̃аман̃н̃апаччайена паччайо. утучитта̄ха̄расамут̣т̣ха̄несу маха̄бхӯта̄нева маха̄бхӯта̄нам̣ ан̃н̃аман̃н̃апаччайена паччайоти еваметтха паччайуппаннатопи вин̃н̃а̄таббо виниччхайоти.

ан̃н̃аман̃н̃апаччайаниддесаван̣н̣ана̄.