21. аттхипаччайаниддесаван̣н̣ана̄

21. аттхипаччайаниддесе чатта̄ро кхандха̄тиа̄дӣхи сахаджа̄тавасена аттхипаччайо ниддит̣т̣хо. чаккха̄йатанантиа̄дӣхи пуреджа̄тавасена. йам̣ рӯпам̣ нисса̄йа̄ти еттха сахаджа̄тапуреджа̄тавасена аттхипаччайо ниддит̣т̣хо. евамайам̣ па̄л̣и сахаджа̄тапуреджа̄та̄нан̃н̃ева аттхипаччайа̄нам̣ васена а̄гата̄. пан̃ха̄ва̄ре пана сахаджа̄там̣, пуреджа̄там̣, паччха̄джа̄там̣, а̄ха̄рам̣, индрийанти имесам̣ васена а̄гататта̄ паччха̄джа̄таа̄ха̄риндрийавасена̄пи аттхипаччайо лаббхати. идха пана са̄васесавасена десана̄ ката̄ти айам̣ та̄веттха па̄л̣иван̣н̣ана̄.

айам̣ пана аттхипаччайо на̄ма дувидхо – ан̃н̃аман̃н̃ато, на ан̃н̃аман̃н̃ато. таттха ан̃н̃аман̃н̃ам̣ тивидхам̣ – арӯпам̣ арӯпена, рӯпам̣ рӯпена, рӯпа̄рӯпам̣ рӯпа̄рӯпена. ‘‘чатта̄ро кхандха̄ арӯпино’’ти еттха хи саббачиттуппаттивасена арӯпам̣ арӯпена вуттам̣. ‘‘чатта̄ро маха̄бхӯта̄’’ти еттха саббасантативасена рӯпам̣ рӯпена. ‘‘оккантиккхан̣е на̄марӯпа’’нти еттха пат̣исандхикхандха̄нан̃чева ваттхуно ча васена рӯпа̄рӯпам̣ рӯпа̄рӯпена вуттам̣. на ан̃н̃аман̃н̃ампи тивидхам̣ – ‘‘арӯпам̣ рӯпасса, рӯпам̣ рӯпасса, рӯпам̣ арӯпасса читтачетасика̄ дхамма̄’’ти еттха хи пан̃чавока̄равасена арӯпам̣ рӯпасса вуттам̣. ‘‘маха̄бхӯта̄ упа̄да̄рӯпа̄на’’нти еттха саббасантативасена рӯпам̣ рӯпасса. ‘‘чаккха̄йатанам̣ чаккхувин̃н̃а̄н̣адха̄туйа̄’’тиа̄дӣсу ваттха̄рамман̣авасена рӯпам̣ арӯпасса аттхипаччайоти вуттам̣.

апичеса аттхипаччайо на̄ма сан̇кхепато кхан̣аттайаппаттам̣ на̄ман̃чева рӯпан̃ча, ваттама̄на̄ пан̃чаккхандха̄типи ваттум̣ ват̣т̣ати. со джа̄тибхедато кусала̄кусалавипа̄какирийарӯпавасена пан̃чадха̄ бхиджджати. таттха кусало сахаджа̄тапаччха̄джа̄тавасена дувидхо хоти, татха̄ акусало випа̄какирийасан̇кха̄то ча. тесу кусало ка̄ма̄вачара̄дибхедена чатудха̄ бхиджджати, акусало ка̄ма̄вачарова випа̄ко чатубхӯмако, кирийа̄сан̇кха̄то тибхӯмако. рӯпасан̇кха̄то аттхипаччайо ка̄ма̄вачарова. со пана сахаджа̄тапуреджа̄тавасена дувидхо. таттха пан̃ча ваттхӯни а̄рамман̣а̄ни ча пуреджа̄та̄нева, хадайаваттху сахаджа̄там̣ ва̄ хоти пуреджа̄там̣ ва̄. пан̃ха̄ва̄ре пана а̄гато а̄ха̄ро индрийан̃ча сахаджа̄та̄дибхедам̣ на лабхатӣти еваметтха на̄наппака̄рабхедато вин̃н̃а̄таббо виниччхайо.

евам̣ бхинне панеттха чатубхӯмакакусалопи сахаджа̄то аттхипаччайо пан̃чавока̄ре ‘‘еко кхандхо тин̣н̣аннам̣ кхандха̄на’’нтиа̄дина̄ найена ан̃н̃аман̃н̃ам̣ кхандха̄нан̃чева читтасамут̣т̣ха̄нарӯпасса ча т̣хапетва̄ пана рӯпа̄вачаракусалам̣ авасесо а̄руппе сампайуттаккхандха̄нан̃н̃ева сахаджа̄такусало аттхипаччайена паччайо хоти. чатубхӯмако панеса пан̃чавока̄ре чатусамут̣т̣ха̄никатисамут̣т̣ха̄никака̄йасса паччха̄джа̄то кусало аттхипаччайена паччайо хоти. акусалепи есева найо. сопи хи пан̃чавока̄ре сампайуттаккхандха̄нан̃чева читтасамут̣т̣ха̄нарӯпасса ча, чатувока̄ре сампайуттаккхандха̄нан̃н̃ева сахаджа̄та̄кусало аттхипаччайена паччайо. пан̃чавока̄ре чатусамут̣т̣ха̄никатисамут̣т̣ха̄никака̄йасса паччха̄джа̄та̄кусало аттхипаччайена паччайо.

випа̄като пана ка̄ма̄вачарарӯпа̄вачаро аттхипаччайо нийаменева пат̣исандхиккхан̣е кхандха̄нан̃чева кат̣атта̄рӯпасса ча сахаджа̄таттхипаччайена паччайо. паватте пана сампайуттаккхандха̄нан̃чева читтасамут̣т̣ха̄нарӯпасса ча сахаджа̄таттхипаччайена паччайо, т̣хитиппаттасса чатусамут̣т̣ха̄никатисамут̣т̣ха̄никака̄йасса паччха̄джа̄таттхипаччайена паччайо. арӯпа̄вачаравипа̄ко пана а̄руппе уппанналокуттаравипа̄ко ча аттана̄ сампайуттаккхандха̄нан̃н̃ева сахаджа̄таттхипаччайена паччайо. пан̃чавока̄ре локуттаравипа̄ко сампайуттаккхандха̄нан̃чева читтасамут̣т̣ха̄нарӯпасса ча сахаджа̄таттхипаччайена паччайо, чатусамут̣т̣ха̄никатисамут̣т̣ха̄никака̄йасса паччха̄джа̄таттхипаччайена паччайо. кирийато рӯпа̄вачаро аттхипаччайо сампайуттаккхандха̄нан̃чева читтасамут̣т̣ха̄нарӯпасса ча сахаджа̄таттхипаччайена паччайо, чатусамут̣т̣ха̄никатисамут̣т̣ха̄никака̄йасса паччха̄джа̄таттхипаччайена паччайо. ка̄ма̄вачара̄рӯпа̄вачаро пана а̄руппе сампайуттаккхандха̄нан̃н̃ева, пан̃чавока̄ре читтасамут̣т̣ха̄нарӯпасса̄пи сахаджа̄таттхипаччайена паччайо, чатусамут̣т̣ха̄никатисамут̣т̣ха̄никака̄йасса паччха̄джа̄таттхи паччайена паччайо.

рӯпасан̇кха̄то пана аттхипаччайо сахаджа̄то, пуреджа̄то, а̄ха̄ро, индрийанти чатуббидхо. таттха сахаджа̄тарӯпаттхипаччайо чатусамут̣т̣ха̄навасена чатудха̄ т̣хито. таттха каммасамут̣т̣ха̄но екам̣ маха̄бхӯтам̣ тин̣н̣аннам̣ маха̄бхӯта̄нам̣, тӣн̣и екасса, две двиннам̣, маха̄бхӯта̄ упа̄да̄рӯпа̄нанти евам̣ сахаджа̄таттхипаччайена паччайо хоти. пат̣исандхиккхан̣е ваттхурӯпам̣ ка̄ма̄вачарарӯпа̄вачаравипа̄каккхандха̄нам̣ сахаджа̄таттхипаччайена паччайо хоти. тесампи тисамут̣т̣ха̄никарӯпам̣ екам̣ маха̄бхӯтам̣ тин̣н̣аннам̣ маха̄бхӯта̄нам̣, тӣн̣и екасса, две двиннам̣, маха̄бхӯта̄ упа̄да̄рӯпа̄нанти евам̣ сахаджа̄таттхипаччайена паччайо хоти. пуреджа̄таттхипаччайо пана ваттхупуреджа̄таа̄рамман̣апуреджа̄тавасена дувидхо хоти. со дувидхопи хет̣т̣ха̄ пуреджа̄тапаччайе вуттанайенева йоджетва̄ гахетаббо. а̄ха̄раттхипаччайопи хет̣т̣ха̄ кабал̣ӣка̄ра̄ха̄рапаччайе йоджитанайенева йоджетаббо. идха панеса аттано анируддхаккхан̣е паччайабха̄вена аттхипаччайоти вутто. рӯпаджӣвитиндрийампи хет̣т̣ха̄ индрийапаччайе рӯпаджӣвитиндрийайоджана̄йам̣ вуттанайенева йоджетаббам̣. идха панетампи аттано анируддхаккхан̣ейева паччайабха̄вена аттхипаччайоти вуттанти еваметтха паччайуппаннатопи вин̃н̃а̄таббо виниччхайоти.

аттхипаччайаниддесаван̣н̣ана̄.