কম্মপথসংসন্দনকথাৰণ্ণনা

তথাতি কম্মপথপ্পত্তানং. কেচীতি ধম্মসিরিত্থেরং সন্ধাযাহ. সো হি কম্মপথপ্পত্তানমেৰ দুস্সীল্যাদীনং সুসীল্যাদীনঞ্চ কম্মপথেহি অত্থতো নানত্তাভাৰদস্সনং, তেসং ৰা ফস্সদ্ৰারাদীহি অৰিরোধভাৰেন দীপনং কম্মপথসংসন্দনন্তি ৰদতি. কম্মপথতা নত্থীতি এতেন যথাৰুত্তানং অসংৰরসংৰরানং তেসং ৰাদে কম্মপথসংসন্দনে অসঙ্গহিততং দস্সেতি. যে পন সঙ্গহং লভন্তি, তেসং গহণে পযোজনাভাৰং দস্সেতুং ‘‘তিৰিধ…পে… দস্সনেনা’’তি ৰুত্তং. এৰং পুরিমপক্খে সঙ্খেপতো দোসং ৰত্ৰা দুতিযপক্খেপি ৰত্তুং ‘‘ন চ দুচ্চরিতান’’ন্তিআদিমাহ. তেন যে দুচ্চরিতসুচরিতঅসংৰরসংৰরা অনুচরীযন্তি, তেসং কাযকম্মাদিতা ৰিধীযতীতি দস্সেতি. ‘‘পঞ্চফস্সদ্ৰারৰসেন উপ্পন্নো অসংৰরো অকুসলং মনোকম্মমেৰ হোতী’’তিআদিনা হি ৰুত্তন্তি. যদি চাতিআদিনা অনৰসেসপরিযাদানাভাৰমাহ. উপ্পত্তি ন ৰত্তব্বাতি কম্মপথ…পে… ৰদন্তেহি ‘‘মনোকম্মং ছফস্সদ্ৰারৰসেন উপ্পজ্জতী’’তি ন ৰত্তব্বন্তি অত্থো. অথ ৰা যদি কম্মপথপ্পত্তানেৰ দুস্সীল্যাদীনি কাযকম্মাদিনামেহি অট্ঠকথাযং ৰুত্তানীতি এৰং ৰদন্তেহি অট্ঠকথাচরিযেহি মনোকম্মস্স ছফস্সদ্ৰারৰসেন উপ্পত্তি ন ৰত্তব্বাতি অত্থো. তংতংকম্মভাৰস্স ৰুত্তত্তাতি ‘‘তিৰিধং কাযদুচ্চরিতং অকুসলং কাযকম্মমেৰ হোতী’’তিআদিং (ৰিভ. ৯১৩) সন্ধাযাহ.

কম্মন্তরম্পি তংদ্ৰারিককম্মমেৰ সিযাতি পাণাতিপাতাদিকস্স ৰচীকম্মাদিভাৰমাসঙ্কতি. তস্মাতি যস্মা কেসঞ্চি অসংৰরানং সংৰরানঞ্চ কম্মপথতা নত্থি, কাযদুচ্চরিতাদীনঞ্চ কম্মপথেহি নানত্তাভাৰদস্সনেন পযোজনং নত্থি, ন চ দুচ্চরিতাদীনং ফস্সদ্ৰারানং ৰসেন উপ্পত্তি দীপিতা, ন চাযং ৰিধি নিরৰসেসসঙ্গাহিকা, কম্মানঞ্চ সঙ্করো আপজ্জতি, অট্ঠকথাযঞ্চ পুব্বাপরৰিরোধো, তস্মাতি অত্থো. সমাননামতা কাযকম্মাদিতা. সামঞ্ঞনামাৰিজহনং কাযকম্মাদিভাৰাৰিজহনং. উভযেসন্তি কম্মপথাকম্মপথানং. উপ্পত্তিপরিযাযৰচনাভাৰতোতি এতেন ফস্সদ্ৰারঅসংৰরদ্ৰারাদীনং তংদ্ৰারিককম্মানঞ্চ অত্থতো নানত্তাভাৰেপি তথা তথা পৰত্তদেসনাৰসেন তে ৰিচারিতাতি দস্সেতি. ‘‘অকুসলং কাযকম্মং পঞ্চফস্সদ্ৰারৰসেন ন উপ্পজ্জতী’’তিআদিকো দুতিযৰিনিচ্ছযো.

কাযে ৰাচায চ…পে… সিদ্ধিতোতি এতেন চোপনপ্পত্তং অকুসলং মনোকম্মং চোপনং অপ্পত্ততো ৰিসেসেত্ৰা দস্সেতুং ‘‘কাযৰচীকম্ম’’ন্তি ৰুত্তং, ন পন কাযৰচীকম্মভাৰতোতি দস্সেতি. তেন কাযৰচীগহণং যথাৰুত্তচোপনপ্পত্তং এৰ ৰিভাৰেতীতি দট্ঠব্বং. তেনেৰাহ – ‘‘চোপনপ্পত্তং অকুসলং কাযদ্ৰারে ৰচীদ্ৰারে চ মনোকম্মং হোতী’’তি. তং-সদ্দে ৰুত্তে যং-সদ্দো অব্যভিচারিতসম্বন্ধতায ৰুত্তোযেৰ হোতীতি কত্ৰা ‘‘যং উপ্পজ্জতী’’তি ৰুত্তং. উপ্পাদমত্তপরিচ্ছিন্নেনাতি ছফস্সদ্ৰারিককম্মেনাতি অত্থো. মত্ত-সদ্দেন ৰিসেসনিৰত্তিঅত্থেন মনোকম্মতাৰিসেসং নিৰত্তেতি. নিযমস্স এৰ-সদ্দস্স অকতত্তা ‘‘কাযৰচীকম্মমেৰ হোতী’’তি অৰুত্তত্তা. ইদানি নিযমাকরণেন লদ্ধগুণং দস্সেন্তো ‘‘ন পন সব্বম্পী’’তিআদিমাহ.

‘‘নিযমস্স অকতত্তা’’তিআদি পুরিমনযোতি অধিপ্পেতো. ৰত্তুঅধিপ্পাযানুরোধিনী সদ্দপ্পৰত্তীতি সমাসপদে একদেসোপি আকড্ঢীযতি অধিকারৰসেনাতি অধিপ্পাযেন ‘‘কম্ম-সদ্দমত্তেন সম্বন্ধং কত্ৰা’’তি ৰুত্তং. যং পন ৰদন্তীতিআদিনা এত্থ পদকারমতস্স অযুত্ততং দস্সেতি. তত্থ চেতনাপক্খিকানন্তি কাযৰচীকম্মভূতচেতনাপক্খিকানং. সতন্তি সমানানং. তংতংদ্ৰারকম্মপথানঞ্চাতি ইদং ইমস্স চিত্তস্স কম্মপথভাৰেন পৰত্তং কালং সন্ধায ৰুত্তং, ন সব্বদা, কম্মপথভাৰেনেৰ পৰত্তনতো. চ-সদ্দেন ৰা অকম্মপথসঙ্গহো দট্ঠব্বো. অথ ৰা তংতংদ্ৰারা চ তংতংদ্ৰারকম্মপথা চ তংতংদ্ৰারকম্মপথাতি ‘‘তংতংদ্ৰারা’’তি পদেন অকম্মপথানং সংৰরানং সঙ্গহো দট্ঠব্বো. তেন সভাৰেনাতি মনোকম্মস্স দ্ৰারভাৰেন, ন অত্তনোতি অধিপ্পাযো. এৰমিধাপীতি চিত্তজনিতো চিত্তসম্পযুত্তস্স কম্মস্স দ্ৰারভাৰো চিত্তেপি উপচরিতোতি অত্থো. ৰত্তব্বমেৰ নত্থি অনন্তরপচ্চযভূতমনোরহিতস্স চিত্তস্স অভাৰতোতি.

দ্ৰারকথাৰণ্ণনা নিট্ঠিতা.

কমাভাৰনিযমাভাৰে সব্বারম্মণতাদীতি আদি-সদ্দেন সঙ্গণ্হাতি. ন হি…পে… অত্থীতি পধানে অসম্ভৰতো অপ্পধানং অধিকরীযতীতি দস্সেতি.