১০. সপ্পাণকসিক্খাপদৰণ্ণনা

একস্মিং ঘটে একাৰ আপত্তীতি একস্মিং উদকঘটে একাৰ আপত্তি. এস নযো সব্বভাজনেসু. ৰিচ্ছিন্দন্তস্সাতি ধারং ৰিচ্ছিন্দন্তস্স. একেকং পক্খিপন্তস্সাতি একেকং তিণং ৰা পণ্ণং ৰা মত্তিকং ৰা অঞ্ঞং ৰা কট্ঠগোমযাদিং পক্খিপন্তস্স. পরিযাদানন্তি খযং.

‘‘পদীপে (সারত্থ. টী. পাচিত্তিয ৩.১৪০) পতিত্ৰা পটঙ্গাদিপাণকা মরিস্সন্তী’’তি জানন্তস্সাপি কুসলচিত্তেন পদীপুজ্জলনং ৰিয ‘‘সিঞ্চনেন পাণকা মরিস্সন্তী’’তি পুব্বভাগে জানন্তস্সাপি ‘‘ইদং জলং সিঞ্চামী’’তি সিঞ্চন্তস্স ৰধকচিত্তং ন হোতীতি আহ ‘‘ৰিনা ৰধকচেতনাযা’’তিআদি. এৰঞ্চ কত্ৰা ‘‘পণ্ণত্তিৰজ্জ’’ন্তি ইদম্পি সমত্থিতং হোতি. তিচিত্তন্তি কুসলাকুসলাব্যাকতৰসেন তিচিত্তং. তথা হি পণ্ণত্তিং মদ্দিত্ৰা সিঞ্চন্তস্স ৰা সিঞ্চাপেন্তস্স ৰা অকুসলচিত্তেন হোতি, ‘‘আসনং ধোৰিস্সামী’’তি চিত্তেন ধোৰনত্থং সিঞ্চন্তস্স ৰা সিঞ্চাপেন্তস্স ৰা কুসলচিত্তেন হোতি, পণ্ণত্তিং অজানতা অরহতা সিঞ্চনাদিকরণে অব্যাকতচিত্তেন হোতীতি কুসলাকুসলাব্যাকতচিত্তৰসেন তিচিত্তং হোতি.

সপ্পাণকসিক্খাপদৰণ্ণনা নিট্ঠিতা.

ভূতগামৰগ্গো দুতিযো.