২. সহজাতৱাৰৱণ্ণনা

২৩৪-২৪২. কুসলং ধম্মং সহজাতো, কুসলং একং খন্ধং সহজাতোতিআদীসু সহজাতসদ্দেন সহজাতপচ্চযকৰণং সহজাতাযত্তভাৱগমনং ৱা ৱুত্তন্তি তস্স কৰণস্স গমনস্স ৱা কুসলাদীনং কম্মভাৱতো উপযোগৱচনং কতন্তি দট্ঠব্বং. এস নযো পচ্চযৱাৰাদীসুপি. তত্ৰাপি হি পচ্চযসদ্দেন চ নিস্সযপচ্চযকৰণং নিস্সযাযত্তভাৱগমনং ৱা ৱুত্তং, সংসট্ঠসদ্দেন চ সম্পযুত্তপচ্চযকৰণং সম্পযুত্তাযত্তভাৱগমনং ৱাতি তংকম্মভাৱতো উপযোগৱচনং কুসলাদীসু কতন্তি. সহজাতম্পি চ উপাদাৰূপং ভূতৰূপস্স পচ্চযো ন হোতীতি ‘‘পটিচ্চা’’তি ইমিনা ৱচনেন দীপিতো পচ্চযো ন হোতীতি অত্থো. ‘‘উপাদাৰূপং ভূতৰূপস্সা’’তি চ নিদস্সনৱসেন ৱুত্তং. উপাদাৰূপস্সপি হি উপাদাৰূপং যথাৱুত্তো পচ্চযো ন হোতি, ৱত্থুৱজ্জানি ৰূপানি চ অৰূপানন্তি.

সহজাতৱাৰৱণ্ণনা নিট্ঠিতা.