৮. দস্সনেনপহাতব্বত্তিকৱণ্ণনা

দস্সনেনপহাতব্বত্তিকে দস্সনেন পহাতব্বো ধম্মো ভাৱনায পহাতব্বস্স ধম্মস্স একেনপি পচ্চযেন পচ্চযো ন হোতীতি ইদং পটিচ্চসমুপ্পাদৱিভঙ্গে ৱিচাৰিতনযেন ৱিচাৰেতব্বন্তি.

দস্সনেনপহাতব্বত্তিকৱণ্ণনা নিট্ঠিতা.

পুচ্ছাগণনগাথাযো

কুসলাদি এককত্তয-মথাদি অন্তেন মজ্ঝিমন্তেন;

আদি চ মজ্ঝেন দুকা, তযো তিকেকো চ ৱিঞ্ঞেয্যো.

তেস্ৱেকেকং মূলং কত্ৱা, তং সত্তসত্তকা পুচ্ছা;

একেকপচ্চযে যথা, ভৱন্তি একূনপঞ্ঞাস.

ছসত্ততাধিকসতং, সহস্সমেকঞ্চ সুদ্ধিকে পুচ্ছা;

এস চ নযোনুলোমে, পচ্চনীযে চাতি নাঞ্ঞত্থ.

ৰাসিগুণিতস্স ৰাসিস্সড্ঢং, সহ ৰাসিকস্স পিণ্ডো সো;

ৰাসিস্স ৱা সহেকস্সড্ঢং, পুন ৰাসিনা গুণিতং.

ইতি হেতুমূলকাদুক-তিকাদযো ছচ্চ সত্ততিসতা দ্ৱে;

চতুৱীসতেত্থ পুচ্ছা, অড্ঢুড্ঢসহস্সনহুতঞ্চ.

তাসং যস্মা সুদ্ধিক-নযো ন পচ্চেকপচ্চযে তস্মা;

চতুৱীসতিগুণিতানং, সসুদ্ধিকানং অযং গণনা.

লক্খত্তযং দ্ৱিনহুতং, পঞ্চ সহস্সানি সত্ত চ সতানি;

দ্ৱাপঞ্ঞাসা এতা, অনুলোমে পিণ্ডিতা পুচ্ছা.

অনুলোমসদিসগণনা, ভৱন্তি পুচ্ছানযে চ পচ্চনীযে;

হাপেত্ৱা পন সেসে, নযদ্ৱযে সুদ্ধিকে লদ্ধা.

ছপ্পঞ্ঞাস ভৱন্তি পুচ্ছা, ছসতসহিতঞ্চ লক্খতেৰসকং;

পুচ্ছানযেসু গণিতা, পটিচ্চৱাৰে চতূস্ৱপি.

সত্তহি গুণিতা কুসলত্তিকে দ্ৱযং, নৱুতিঞ্চেৱ পঞ্চসতা;

চত্তাৰি সহস্সানি চ, তথেকনৱুতে চ লক্খকা.

নাদ্ৱাৱীসতি গুণিতা, তিকেসু সব্বেসু ৱীসতি চ কোটি;

লক্খত্তযং সহস্সং, চতুৱীসতি চাপি ৱিঞ্ঞেয্যা.

তিকপট্ঠানং.

এককপচ্চযে পন, নৱ নৱ কত্ৱা সসোড়সদ্ৱিসতং;

হেতুদুকপঠমৱাৰে, পঠমনযে সুদ্ধিকে পুচ্ছা.

হেতাদিমূলকনযে-স্ৱেকেকস্মিং দুকাদিভেদযুতে;

চতুৰাসীতিচতুসত-সহিতং সহস্সদ্ৱযং পুচ্ছা.

তা চতুৱীসতিগুণিতা, সসুদ্ধিকা এত্থ হোন্তি অনুলোমে;

দ্ৱত্তিংসট্ঠসতাধিক-সহস্সনৱকড্ঢলক্খকা.

এৱং পচ্চনীযে দ্ৱে, সুদ্ধিকৰহিতা চতূস্ৱতো হোন্তি;

ছন্নৱুতট্ঠসতট্ঠ-তিংসসহস্সদ্ৱিলক্খকানি.

তা পন সত্তগুণা দ্ৱে, সত্ততিসতদ্ৱযং সহস্সানি;

দ্ৱাসত্ততি হোন্তি ততো, সোড়স লক্খানি হেতুদুকে.

তা সতগুণা দুকসতে, সতদ্ৱযং সত্তৱীসতি সহস্সা;

দ্ৱাসত্ততিলক্খানি চ, সোড়সকোটি ততো পুচ্ছা.

দুকপট্ঠানং.

দুকতিকপট্ঠানে তিক-পক্খেপো হোতি একমেকদুকে;

তস্স ছসট্ঠিগুণেন তে, ছসট্ঠিসতং দুকা হোন্তি.

হেতুদুকলদ্ধপুচ্ছা, গুণিতা তেহি চ হোন্তি তিকপদমেৱ;

দুকপট্ঠানে পুচ্ছা, তাসং গণনা অযং ঞেয্যা.

দ্ৱাপঞ্ঞাস সতানি চ, নৱেৱ নহুতানি নৱ চ সট্ঠিঞ্চ;

লক্খানি তীহি সহিতং, সতং সহস্সঞ্চ কোটিনং.

দুকতিকপট্ঠানং.

তিকদুকপট্ঠানে তিক-মেকেকং দ্ৱিসতভেদনং কত্ৱা;

দ্ৱাৱীসদ্ৱিসতগুণা, ঞেয্যা কুসলত্তিকে লদ্ধা.

পুচ্ছা অট্ঠসতাধিক-চতুসহস্সদ্ৱিলক্খযুত্তানং;

কোটীনং ছক্কমথো, কোটিসহস্সানি চত্তাৰি.

তিকদুকপট্ঠানং.

তিকতিকপট্ঠানে, তেসট্ঠিৱিধেকেকভেদনা তু তিকা;

তেহি চ গুণিতা কুসল-ত্তিকপুচ্ছাপি হোন্তি পুচ্ছা তা.

দ্ৱাদস পঞ্চসতা চতু-সট্ঠিসহস্সানি নৱুতি চেকূনা;

লক্খানমেকসট্ঠি, দ্ৱাদসসতকোটিযো চেৱ.

তিকতিকপট্ঠানং.

দ্ৱযহীনদ্ৱযসতগুণো, একেকো দুকদুকে তেহি;

হেতুদুকে লদ্ধা সঙ্খ্য-ভেদেহি চ ৱড্ঢিতা পুচ্ছা.

ছসতযুতানি পঞ্চা-সীতিসহস্সানি লক্খনৱকঞ্চ;

একাদসাপি কোটি, পুন কোটিসতানি তেত্তিংস.

দুকদুকপট্ঠানং.

সম্পিণ্ডিতা তু পুচ্ছা, অনুলোমে ছব্বিধেপি পট্ঠানে;

ছত্তিংসতিসতসহস্স-ট্ঠকযুতসত্তনহুতানি.

লক্খানি ছচ্চ চত্তা-লীসেৱ নৱাথ কোটিযো দস চ;

সত্তকোটিসতেহি চ, কোটিসহস্সানি নৱ হোন্তি.

তা চতুগুণিতা পুচ্ছা, চতুপ্পভেদে সমন্তপট্ঠানে;

চতুচত্তালীসসতত্তযং, সহস্সানি তেৰস চ.

সত্তাসীতি চ লক্খানং, কোটীনঞ্চ সত্তসত্ততিযো;

হোন্তিট্ঠসতানিট্ঠ-তিংসসতসহস্সানি ইতি গণনা.

পট্ঠানস্স পুচ্ছাগণনগাথা.

পট্ঠানপকৰণ-মূলটীকা সমত্তা.

ইতি ভদন্তআনন্দাচৰিযকেন কতা লীনত্থপদৱণ্ণনা

অভিধম্মস্স মূলটীকা সমত্তা.