༢. ཙོ་རི་ཝུ་ཊྛཱ་པི་ཀཱ་སི་ཀྑཱ་པ་ད་ཝ་ཎྞ་ནཱ

མ་ལླ་ག་ཎ་བྷ་ཊི་པུ་ཏྟ་ག་ཎཱ་དི་ཀནྟི་ཨཱ་དཱི་སུ (སཱ་ར་ཏྠ. ཊཱི. པཱ་ཙི་ཏྟི་ཡ ༣.༦༨༣) མ་ལླ་ག་ཎོ ནཱ་མ ནཱ་རཱ་ཡ་ན་བྷ་ཏྟི་ཀོ ཏ་ཏྠ ཏ་ཏྠ པཱ་ནཱི་ཡ་ཊྛ་པ་ན་པོ་ཀྑ་ར་ཎི་ཁ་ཎ་ནཱ་དི་པུ་ཉྙ་ཀ་མྨ་ཀཱ་ར་ཀོ ག་ཎོ. བྷ་ཊི་པུ་ཏྟ་ག་ཎོ ནཱ་མ ཀུ་མཱ་ར་བྷ་ཏྟི་ཀ་ག་ཎོ. དྷ་མྨ་ག་ཎོཏི སཱ་ས་ན་བྷ་ཏྟི་ཀོ ཨ་ནེ་ཀ་པྤ་ཀཱ་ར་པུ་ཉྙ་ཀ་མྨ་ཀཱ་ར་ཀོ ག་ཎོ. ག་ནྡྷི་ཀ་སེ་ཎཱིཏི ཨ་ནེ་ཀ་པྤ་ཀཱ་ར་སུ་ག་ནྡྷི་ཝི་ཀ་ཏི་ཀཱ་ར་ཀོ ག་ཎོ. དུ་སྶི་ཀ་སེ་ཎཱིཏི དུ་སྶ་ཝཱ་ཎི་ཛ་ས་མཱུ་ཧོ, པེ་ས་ཀཱ་ར་ག་ཎོ་ཏི ཨ་ཏྠོ.

ཝུ་ཊྛཱ་པེ་ནྟི་ཡཱཏི ཨུ་པ་ས་མྤཱ་དེ་ནྟི་ཡཱ. ཀེ་ན་ཙི ཀ་ར་ཎཱི་ཡེ་ན པ་ཀྐ་ནྟཱ་སུ བྷི་ཀྑུ་ནཱི་སུ ཨ་ག་ནྟྭཱ ཁ་ཎྜ་སཱི་མཾ ཡ་ཐཱ་ནི་སི་ནྣ་ཊྛཱ་ནེ་ཡེ་ཝ ཨ་ཏྟ་ནོ ནི་སྶི་ཏ་ཀ་པ་རི་སཱ་ཡ ས་དྡྷིཾ ཝུ་ཊྛཱ་པེ་ནྟི་ཡཱ ཝཱ་ཙཱ་ཙི་ཏྟ་ཏོ ས་མུ་ཊྛཱ་ཏི (པཱ་ཙི. ཨ་ཊྛ. ༦༨༣), ཨ་ཉྙཾ སཱི་མཾ ཝཱ ན་དིཾ ཝཱ ག་ནྟྭཱ ཝུ་ཊྛཱ་པེ་ནྟི་ཡཱ ཀཱ་ཡ་ཝཱ་ཙཱ་ཙི་ཏྟ་ཏོ ས་མུ་ཊྛཱ་ཏཱི་ཏི ཨཱ་ཧ ‘‘ཙོ་རི་ཝུ་ཊྛཱ་པ་ན་ས་མུ་ཊྛཱ་ན’’ནྟི. ཨ་ནཱ་པུ་ཙྪཱ ཝུ་ཊྛཱ་པ་ན་ཝ་སེ་ན ཀི་རི་ཡཱ་ཀི་རི་ཡཾ. པ་ཉྙ་ཏྟིཾ ཨ་ཛཱ་ན་ནྟཱ ཨ་རི་ཡཱ་པི ཝུ་ཊྛཱ་པེ་ནྟཱི་ཏི ཝཱ ཀ་མྨ་ཝཱ་ཙཱ་པ་རི་ཡོ་སཱ་ནེ ཨཱ་པ་ཏྟི་ཀྑ་ཎེ ཝི་པཱ་ཀཱ་བྱཱ་ཀ་ཏ་ས་མ་ངྒི་ཏཱ་ཝ་སེ་ན ཝཱ ཏི་ཙི་ཏྟཾ.

ཙོ་རི་ཝུ་ཊྛཱ་པི་ཀཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.