༤. པ་ཙྩ་ནཱི་ཡཱ་ནུ་ལོ་མ་ཝ་ཎྞ་ནཱ
༤༩-༥༢. ཨི་དཱ་ནི པ་ཙྩ་ནཱི་ཡཱ་ནུ་ལོ་མཾ ཧོ་ཏི. ཏཾ ད་སྶེ་ཏུཾ སི་ཡཱ ཀུ་ས་ལཾ དྷ་མྨཾ པ་ཊི་ཙྩ ཀུ་ས་ལོ དྷ་མྨོ ཨུ་པྤ་ཛྫེ་ཡྻ ན་ཧེ་ཏུ་པ་ཙྩ་ཡཱ ཨཱ་ར་མྨ་ཎ་པ་ཙྩ་ཡཱཏི་ཨཱ་དི ཨཱ་ར་དྡྷཾ. ཏ་ཏྠ ཨ་ནུ་ལོ་མ་པ་ཙྩ་ནཱི་ཡ་པུ་ཙྪཱ་ཧི ས་མ་པྤ་མཱ་ཎོ ཨེ་ཝ པུ་ཙྪཱ་པ་རི་ཙྪེ་དོ. ཨེ་ཀ་མཱུ་ལ་ཀཱ་དཱི་སུ ཙེ་ཏྠ ཡཱ པུ་ཙྪཱ པཱ་ལི༹་ཡཾ ཨཱ་ག་ཏཱ, ཡཱ ཙ ན ཨཱ་ག་ཏཱ, ཏཱ ས་བྦཱ ཧེ་ཊྛཱ ཝུ་ཏྟ་ན་ཡཱ་ནུ་སཱ་རེ་ནེ་ཝ ཝེ་དི་ཏ་བྦཱ.
ཏི་ཀ་ཉྩ པ་ཊྛཱ་ན་ཝ་རཾ…པེ… ཚ པ་ཙྩ་ནཱི་ཡཱ་ནུ་ལོ་མ་མྷི ན་ཡཱ སུ་ག་མྦྷཱི་རཱཏི ཨེ་ཏྠཱ་པི ཧེ་ཊྛཱ ཝུ་ཏྟ་ན་ཡེ་ནེ་ཝ དྭེ པ་ཙྩ་ཡཱ་ནུ་ལོ་མཱ་ནི – དྷ་མྨ་པ་ཙྩ་ནཱི་ཡཱ་ནུ་ལོ་མཾ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མ་ཉྩ. ཏ་ཏྠ ‘‘ཀུ་ས་ལཱ དྷ་མྨཱ’’ཏི ཨེ་ཝཾ ཨ་བྷི་དྷ་མྨ་མཱ་ཏི་ཀཱ་པ་དེ་ཧི ས་ངྒ་ཧི་ཏཱ་ནཾ དྷ་མྨཱ་ནཾ ‘‘ན་ཀུ་ས་ལཾ དྷ་མྨཾ པ་ཊི་ཙྩ ཀུ་ས་ལོ དྷ་མྨོ’’ཏི པ་ཙྩ་ནཱི་ཡཱ་ནུ་ལོ་མ་དེ་ས་ནཱ་ཝ་སེ་ན པ་ཝ་ཏྟཾ དྷ་མྨ་པ་ཙྩ་ནཱི་ཡཱ་ནུ་ལོ་མཾ ནཱ་མ. ‘‘ན་ཧེ་ཏུ་པ་ཙྩ་ཡཱ ཨཱ་ར་མྨ་ཎ་པ་ཙྩ་ཡཱ’’ཏི ཨེ་ཝཾ ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ལ་བྦྷ་མཱ་ན་པ་དཱ་ནཾ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མ་དེ་ས་ནཱ་ཝ་སེ་ན པ་ཝ་ཏྟཾ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མཾ ནཱ་མ. ཏ་ཏྠ ཧེ་ཊྛཱ ཨ་ཊྛ་ཀ་ཐཱ་ཡཾ ‘‘ཏི་ཀ་ཉྩ པ་ཊྛཱ་ན་ཝ་རཾ…པེ… ཚ པ་ཙྩ་ནཱི་ཡཱ་ནུ་ལོ་མ་མྷི ན་ཡཱ སུ་ག་མྦྷཱི་རཱ’’ཏི ཨ་ཡཾ གཱ་ཐཱ དྷ་མྨ་པ་ཙྩ་ནཱི་ཡཱ་ནུ་ལོ་མཾ ས་ནྡྷཱ་ཡ ཝུ་ཏྟཱ. ཨི་དྷ པ་ན ཨ་ཡཾ གཱ་ཐཱ དྷ་མྨཱ་ནུ་ལོ་མེ་ཡེ་ཝ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མཾ ས་ནྡྷཱ་ཡ ཝུ་ཏྟཱ. ཏ་སྨཱ ‘‘ཚ པ་ཙྩ་ནཱི་ཡཱ་ནུ་ལོ་མ་མྷི ན་ཡཱ སུ་ག་མྦྷཱི་རཱ’’ཏི ཨ་ཊྛ་ཀ་ཐཱ་ཡ དྷ་མྨ་པ་ཙྩ་ནཱི་ཡཱ་ནུ་ལོ་མེ ཏི་ཀ་པ་ཊྛཱ་ནཱ་ད་ཡོ ཚ ན་ཡཱ སུ་ག་མྦྷཱི་རཱ་ཏི ཨེ་ཝ་མ་ཏྠོ ཝེ་དི་ཏ་བྦོ. ཨི་མ་སྨིཾ པ་ནོ་ཀཱ་སེ ན་ཧེ་ཏུ་པ་ཙྩ་ཡཱ ཨཱ་ར་མྨ་ཎ་པ་ཙྩ་ཡཱ་ཏི ཨེ་ཝཾ པ་ཝ་ཏྟེ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མེ ཨེ་ཏེ དྷ་མྨཱ་ནུ་ལོ་མེ་ཡེ་ཝ ཏི་ཀ་པ་ཊྛཱ་ནཱ་ད་ཡོ ཚ ན་ཡཱ སུ་ག་མྦྷཱི་རཱ་ཏི ཨེ་ཝ་མ་ཏྠོ ཝེ་དི་ཏ་བྦོ.
ཏེ་སུ ཨ་ནུ་ལོ་མ་ཏི་ཀ་པ་ཊྛཱ་ནེ་ཡེ་ཝ ཀུ་ས་ལ་ཏྟི་ཀ་མ་ཏྟ་སྶ་པི ཝ་སེ་ན ཨ་ཡཾ ཨི་མ་སྨིཾ པ་ཊི་ཙྩ་ཝཱ་ར་སྶ པ་ཎྞ་ཏྟི་ཝཱ་རེ ས་ངྑི་པི་ཏྭཱ པུ་ཙྪཱ་པ་བྷེ་དོ ད་སྶི་ཏོ. སེ་སེ་སུ པ་ན ཏི་ཀེ་སུ སེ་ས་པ་ཊྛཱ་ནེ་སུ ཙ ཨེ་ཀཱ་པི པུ་ཙྪཱ ན ད་སྶི་ཏཱ. ཏ་ཏོ པ་རེ་སུ པ་ན ས་ཧ་ཛཱ་ཏ་ཝཱ་རཱ་དཱི་སུ ཀུ་ས་ལ་ཏྟི་ཀ་སྶ་པི ཝ་སེ་ན པུ་ཙྪཾ ཨ་ནུ་དྡྷ་རི་ཏྭཱ ལ་བྦྷ་མཱ་ན་ཀ་ཝ་སེ་ན ཝི་སྶ་ཛྫ་ན་མེ་ཝ ད་སྶི་ཏཾ. ‘‘ཚ པ་ཙྩ་ནཱི་ཡཱ་ནུ་ལོ་མ་མྷི ན་ཡཱ སུ་ག་མྦྷཱི་རཱ’’ཏི ཝ་ཙ་ན་ཏོ པ་ན ཨི་མ་སྨིཾ པ་ཙྩ་ཡ་པ་ཙྩ་ནཱི་ཡཱ་ནུ་ལོ་མེ ཚ་པི ཨེ་ཏེ པ་ཊྛཱ་ན་ན་ཡཱ པུ་ཙྪཱ་ཝ་སེ་ན ཨུ་དྡྷ་རི་ཏྭཱ ད་སྶེ་ཏ་བྦཱ. པ་ཊྛཱ་ནཾ ཝ་ཎྞ་ཡ་ནྟཱ་ན་ཉྷི ཨཱ་ཙ་རི་ཡཱ་ནཾ བྷཱ་རོ ཨེ་སོ་ཏི.
པུ་ཙྪཱ་ཝཱ་ར་ཝ་ཎྞ་ནཱ ནི་ཊྛི་ཏཱ.