པ་ཙྩ་ཡ་ནི་དྡེ་སོ

༡. ཧེ་ཏུ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡. ཨི་དཱ་ནི ས་བྦེ་པི ཏེ པ་ཙྩ་ཡེ ཨུ་དྡི་ཊྛ་པ་ཊི་པཱ་ཊི་ཡཱ ནི་དྡི་སི་ཏྭཱ ད་སྶེ་ཏུཾ ཧེ་ཏུ་པ་ཙྩ་ཡོ་ཏི ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ནཾ དྷ་མྨཱ་ནཾ ཏཾ་ས་མུ་ཊྛཱ་ནཱ་ན་ཉྩ རཱུ་པཱ་ནཾ ཧེ་ཏུ་པ་ཙྩ་ཡེ་ན པ་ཙྩ་ཡོཏི་ཨཱ་དི་མཱ་ཧ. ཏ་ཏྠ ཧེ་ཏུ་པ་ཙྩ་ཡོཏི ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ནི་ཀྑི་ཏྟ་པ་ཊི་པཱ་ཊི་ཡཱ ས་བྦ་པ་ཋ་མཾ བྷཱ་ཛེ་ཏ་བྦ་སྶ པ་དུ་དྡྷཱ་རོ. སེ་ས་པ་ཙྩ་ཡེ་སུ་པི ཨི་མི་ནཱ་ཝ ན་ཡེ་ན པ་ཋ་མཾ བྷཱ་ཛེ་ཏ་བྦ་པ་དཾ ཨུ་དྡྷ་རི་ཏྭཱ ཝི་སྶ་ཛྫ་ནཾ ཀ་ཏ་ནྟི ཝེ་དི་ཏ་བྦཾ. ཨ་ཡཾ པ་ནེ་ཏྠ ས་མྦ་ནྡྷོ – ཡོ པ་ཙྩ་ཡུ་དྡེ་སེ ཧེ་ཏུ་པ་ཙྩ་ཡོ་ཏི ཨུ་དྡི་ཊྛོ, སོ ནི་དྡེ་ས་ཏོ ‘‘ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ནཾ དྷ་མྨཱ་ནཾ ཏཾ་ས་མུ་ཊྛཱ་ནཱ་ན་ཉྩ རཱུ་པཱ་ནཾ ཧེ་ཏུ་པ་ཙྩ་ཡེ་ན པ་ཙྩ་ཡོ’’ཏི ཨེ་ཝཾ ཝེ་དི་ཏ་བྦོ. ཨི་མི་ནཱ ཨུ་པཱ་ཡེ་ན ས་བྦ་པ་ཙྩ་ཡེ་སུ བྷཱ་ཛེ་ཏ་བྦ་སྶ པ་ད་སྶ ཝི་སྶ་ཛྫ་ནེ་ན ས་དྡྷིཾ ས་མྦ་ནྡྷོ ཝེ་དི་ཏ་བྦོ.

ཨི་དཱ་ནི ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ནནྟི ཨེ་ཏྠ ‘‘ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཨ་ཝ་ཏྭཱ ‘‘ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཀ་སྨཱ ཝུ་ཏྟ་ནྟི? པ་ཙྩ་ཡ་སྶ ཙེ་ཝ པ་ཙྩ་ཡུ་པྤ་ནྣཱ་ན་ཉྩ ཝ་ཝ་ཏྠཱ་པ་ན་ཏོ. ཧེ་ཏུ་ས་མྤ་ཡུ་ཏྟ་ཀཱ་ན་ནྟི ཧི ཝུ་ཏྟེ ཧེ་ཏུ་ནཱ ས་མྤ་ཡུ་ཏྟ་ཀཱ་ནཾ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི ཨ་ཏྠོ བྷ་ཝེ་ཡྻ. ཨེ་ཝཾ ས་ནྟེ ཨ་སུ་ཀོ ནཱ་མ དྷ་མྨོ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི པ་ཙྩ་ཡ་ཝ་ཝ་ཏྠཱ་ནཾ ན པ་ཉྙཱ་ཡེ་ཡྻ. ཨ་ཐཱ་པི ཧེ་ཏུ་ནཱ ས་མྤ་ཡུ་ཏྟ་ཀཱ་ནཾ ཧེ་ཏུ་ས་མྤ་ཡུ་ཏྟ་ཀཱ་ན་ནྟི ཨ་ཏྠཾ ཨ་གྒ་ཧེ་ཏྭཱ་ཝ ཡེ་སཾ ཀེ་ས་ཉྩི ས་མྤ་ཡུ་ཏྟ་ཀཱ་ནཾ ཧེ་ཏཱུ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི ཨ་ཏྠོ བྷ་ཝེ་ཡྻ, ཨེ་ཝཾ ས་ནྟེ ཧེ་ཏུ་ནཱ ཝི་པྤ་ཡུ་ཏྟཱ ཙ་ཀྑུ་ཝི་ཉྙཱ་ཎཱ་ད་ཡོ་པི ས་མྤ་ཡུ་ཏྟ་ཀཱ་ཡེ་ཝ, ཧེ་ཏུ་ནཱ ས་མྤ་ཡུ་ཏྟཱ ཀུ་ས་ལཱ་ད་ཡོ་པི. ཏ་ཏྠ ཨ་ཡཾ ཧེ་ཏུ ཨ་སུ་ཀ་སྶ ནཱ་མ ས་མྤ་ཡུ་ཏྟ་ཀ་དྷ་མྨ་སྶ པ་ཙྩ་ཡོ་ཏི པ་ཙྩ་ཡུ་པྤ་ནྣ་ཝ་ཝ་ཏྠཱ་ནཾ ན པ་ཉྙཱ་ཡེ་ཡྻ. ཏ་སྨཱ པ་ཙྩ་ཡ་ཉྩེ་ཝ པ་ཙྩ་ཡུ་པྤ་ནྣ་ཉྩ ཝ་ཝ་ཏྠཱ་པེ་ནྟོ ‘‘ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཨཱ་ཧ. ཏ་སྶ་ཏྠོ – ཧེ་ཏུ་ས་མྤ་ཡུ་ཏྟ་ཀཱ་ནཾ ཀུ་ས་ལཱ་དི་དྷ་མྨཱ་ནཾ ཡོ ཧེ་ཏུ ས་མྤ་ཡུ་ཏྟ་ཀོ, སོ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི. ཏ་ཏྲཱ་པི ‘‘པ་ཙྩ་ཡོ’’ཏི ཨ་ཝ་ཏྭཱ ‘‘ཧེ་ཏུ་པ་ཙྩ་ཡེ་ནཱ’’ཏི ཝ་ཙ་ནཾ ཧེ་ཏུ་ནོ ཨ་ཉྙ་ཐཱ པ་ཙྩ་ཡ་བྷཱ་ཝ་པ་ཊི་སེ་དྷ་ན་ཏྠཾ. ཨ་ཡ་ཉྷི ཧེ་ཏུ ཧེ་ཏུ་པ་ཙྩ་ཡེ་ནཱ་པི པ་ཙྩ་ཡོ ཧོ་ཏི, ས་ཧ་ཛཱ་ཏཱ་དི་པ་ཙྩ་ཡེ་ནཱ་པི. ཏ་ཏྲཱ་སྶ ཡྭཱ་ཡཾ ས་ཧ་ཛཱ་ཏཱ་དི་པ་ཙྩ་ཡ་ཝ་སེ་ན ཨ་ཉྙ་ཐཱ་པི པ་ཙྩ་ཡ་བྷཱ་ཝོ, ཏ་སྶ པ་ཊི་སེ་དྷ་ན་ཏྠཾ ཧེ་ཏུ་པ་ཙྩ་ཡེ་ནཱ་ཏི ཝུ་ཏྟཾ. ཨེ་ཝཾ ས་ནྟེ་པི ‘‘ཏཾ་ས་མྤ་ཡུ་ཏྟ་ཀཱ་ན’’ནྟི ཨ་ཝ་ཏྭཱ ཀ་སྨཱ ‘‘ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཝུ་ཏྟ་ནྟི? ནི་དྡི་སི་ཏ་བྦ་སྶ ཨ་པཱ་ཀ་ཊ་ཏྟཱ. ཏཾ་ས་མྤ་ཡུ་ཏྟ་ཀཱ་ན་ནྟི ཧི ཝུ་ཏྟེ ཡེ་ན ཏེ ཏཾ་ས་མྤ་ཡུ་ཏྟ་ཀཱ ནཱ་མ ཧོ་ནྟི, ཨ་ཡཾ ནཱ་མ སོ་ཏི ནི་དྡི་སི་ཏ་བྦོ ཨ་པཱ་ཀ་ཊོ. ཏ་སྶ ཨ་པཱ་ཀ་ཊ་ཏྟཱ ཡེ་ན ས་མྤ་ཡུ་ཏྟཱ ཏེ ཏཾ་ས་མྤ་ཡུ་ཏྟ་ཀཱ་ཏི ཝུ་ཙྩ་ནྟི, ཏཾ ས་རཱུ་པ་ཏོ་ཝ ད་སྶེ་ཏུཾ ‘‘ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཝུ་ཏྟཾ.

ཏཾ་ས་མུ་ཊྛཱ་ནཱ་ནནྟི ཨེ་ཏྠ པ་ན ནི་དྡི་སི་ཏ་བྦ་སྶ པཱ་ཀ་ཊ་ཏྟཱ ཏཾ-ག་ཧ་ཎཾ ཀ་ཏཾ. ཨ་ཡ་ཉྷེ་ཏྠ ཨ་ཏྠོ – ཏེ ཧེ་ཏཱུ ཙེ་ཝ ཧེ་ཏུ་ས་མྤ་ཡུ་ཏྟ་ཀཱ ཙ དྷ་མྨཱ ས་མུ་ཊྛཱ་ནཾ ཨེ་ཏེ་ས་ནྟི ཏཾ་ས་མུ་ཊྛཱ་ནཱ་ནི. ཏེ་སཾ ཏཾ་ས་མུ་ཊྛཱ་ནཱ་ནཾ, ཧེ་ཏུ་ཏོ ཙེ་ཝ ཧེ་ཏུ་ས་མྤ་ཡུ་ཏྟ་དྷ་མྨེ་ཧི ཙ ནི་བྦ་ཏྟཱ་ན་ནྟི ཨ་ཏྠོ. ཨི་མི་ནཱ ཙི་ཏྟ་ས་མུ་ཊྛཱ་ན་རཱུ་པཾ ག་ཎྷཱ་ཏི. ཀིཾ པ་ན ཏཾ ཙི་ཏྟ་ཏོ ཨ་ཉྙེ་ན་པི ས་མུ་ཊྛཱ་ཏཱི་ཏི? ཨཱ་མ, ས་མུ་ཊྛཱ་ཏི. ས་བྦེ་པི ཧི ཙི་ཏྟ་ཙེ་ཏ་སི་ཀཱ ཨེ་ཀ་ཏོ ཧུ་ཏྭཱ རཱུ་པཾ ས་མུ་ཊྛཱ་པེ་ནྟི. ལོ་ཀི་ཡ་དྷ་མྨ་དེ་ས་ནཱ་ཡཾ པ་ན ཙི་ཏྟ་སྶ ཨ་དྷི་ཀ་བྷཱ་ཝ་ཏོ ཏ་ཐཱ་ཝི་དྷཾ རཱུ་པཾ ཙི་ཏྟ་ས་མུ་ཊྛཱ་ན་ནྟི ཝུ་ཙྩ་ཏི. ཏེ་ནེ་ཝཱ་ཧ ཙི་ཏྟ་ཙེ་ཏ་སི་ཀཱ དྷ་མྨཱ ཙི་ཏྟ་ས་མུ་ཊྛཱ་ནཱ་ནཾ རཱུ་པཱ་ནཾ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ་ཏི.

ཡ་དི ཨེ་ཝཾ ཨི་དྷཱ་པི ‘‘ཏཾ་ས་མུ་ཊྛཱ་ནཱ་ན’’ནྟི ཨ་ཝ་ཏྭཱ ཙི་ཏྟ་ས་མུ་ཊྛཱ་ནཱ་ན་ནྟི ཀ་སྨཱ ན ཝུ་ཏྟ་ནྟི? ཨ་ཙི་ཏྟ་ས་མུ་ཊྛཱ་ནཱ་ན་མྤི ས་ངྒ་ཎྷ་ན་ཏོ. པ་ཉྷཱ་ཝཱ་ར་སྨི་ཉྷི ‘‘པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ ཧེ་ཏཱུ ས་མྤ་ཡུ་ཏྟ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི ཨཱ་ག་ཏཾ’’. ཏ་སྶ ས་ངྒ་ཎྷ་ན་ཏྠཾ ཨི་དྷ ཙི་ཏྟ་ས་མུ་ཊྛཱ་ནཱ་ན་ནྟི ཨ་ཝ་ཏྭཱ ཏཾ་ས་མུ་ཊྛཱ་ནཱ་ན་ནྟི ཝུ་ཏྟཾ. ཏ་སྶ་ཏྠོ – ཙི་ཏྟ་ཛ་རཱུ་པཾ ཨ་ཛ་ན་ཡ་མཱ་ནཱ་པི ཏེ ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ དྷ་མྨཱ ས་ཧ་ཛཱ་ཏཱ་དི་པ་ཙྩ་ཡ་ཝ་སེ་ན ས་མུ་ཊྛཱ་ནཾ ཨེ་ཏེ་ས་ནྟི ཏཾ་ས་མུ་ཊྛཱ་ནཱ་ནི. ཏེ་སཾ ཏཾ་ས་མུ་ཊྛཱ་ནཱ་ནཾ པ་ཝ་ཏྟེ ཙི་ཏྟ་ཛཱ་ནཾ པ་ཊི་ས་ནྡྷི་ཡ་ཉྩ ཀ་ཊ་ཏྟཱ་རཱུ་པཱ་ན་མྤི ཧེ་ཏཱུ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི. ཨི་མི་ནཱ ཨུ་པཱ་ཡེ་ན ཨ་ཉྙེ་སུ་པི ཏཾ་ས་མུ་ཊྛཱ་ནཱ་ན་ནྟི ཨཱ་ག་ཏ་ཊྛཱ་ནེ་སུ ཨ་ཏྠོ ཝེ་དི་ཏ་བྦོ.

ཀ་སྨཱ པ་ནཱ་ཡཾ ཧེ་ཏུ པ་ཊི་ས་ནྡྷི་ཡ་མེ་ཝ ཀ་ཊ་ཏྟཱ་རཱུ་པཱ་ནཾ ཧེ་ཏུ་པ་ཙྩ་ཡོ ཧོ་ཏི, ན པ་ཝ་ཏྟེ་ཏི? པ་ཊི་ས་ནྡྷི་ཡཾ ཀ་མྨ་ཛ་རཱུ་པཱ་ནཾ ཙི་ཏྟ་པ་ཊི་བ་དྡྷ་ཝུ་ཏྟི་ཏཱ་ཡ. པ་ཊི་ས་ནྡྷི་ཡ་ཉྷི ཀ་མྨ་ཛ་རཱུ་པཱ་ནཾ ཙི་ཏྟ་པ་ཊི་བ་དྡྷཱ པ་ཝ་ཏྟི, ཙི་ཏྟ་ཝ་སེ་ན ཨུ་པྤ་ཛྫ་ནྟི ཙེ་ཝ ཏི་ཊྛ་ནྟི ཙ. ཏ་སྨི་ཉྷི ཁ་ཎེ ཙི་ཏྟཾ ཙི་ཏྟ་ཛ་རཱུ་པཾ ཛ་ནེ་ཏུཾ ན ས་ཀྐོ་ཏི, ཏཱ་ནི་པི ཝི་ནཱ ཙི་ཏྟེ་ན ཨུ་པྤ་ཛྫི་ཏུཾ ཝཱ ཋཱ་ཏུཾ ཝཱ ན ས་ཀྐོ་ནྟི. ཏེ་ནེ་ཝཱ་ཧ – ‘‘ཝི་ཉྙཱ་ཎ་པ་ཙྩ་ཡཱ ནཱ་མ་རཱུ་པཾ, ཏ་སྨིཾ པ་ཏི་ཊྛི་ཏེ ཝི་ཉྙཱ་ཎེ ནཱ་མ་རཱུ་པ་སྶ ཨ་ཝ་ཀྐ་ནྟི ཧོ་ཏཱི’’ཏི (སཾ. ནི. ༢.༣༩). པ་ཝ་ཏྟི་ཡཾ པ་ན ཏེ་སཾ ཙི་ཏྟེ ཝི་ཛྫ་མཱ་ནེ་པི ཀ་མྨ་པ་ཊི་བ་དྡྷཱ་ཝ པ་ཝ་ཏྟི, ན ཙི་ཏྟ་པ་ཊི་བ་དྡྷཱ. ཨ་ཝི་ཛྫ་མཱ་ནེ ཙཱ་པི ཙི་ཏྟེ ནི་རོ་དྷ་ས་མཱ་པ་ནྣཱ་ནཾ ཨུ་པྤ་ཛྫ་ནྟི་ཡེ་ཝ.

ཀ་སྨཱ པ་ན པ་ཊི་ས་ནྡྷི་ཀྑ་ཎེ ཙི་ཏྟཾ ཙི་ཏྟ་ཛ་རཱུ་པཾ ཛ་ནེ་ཏུཾ ན ས་ཀྐོ་ཏཱི་ཏི? ཀ་མྨ་ཝེ་ག་ཀྑི་ཏྟ་ཏཱ་ཡ ཙེ་ཝ ཨ་པྤ་ཏི་ཊྛི་ཏ་ཝ་ཏྠུ་ཏཱ་ཡ ཙ དུ་བྦ་ལ་ཏྟཱ. ཏ་ཉྷི ཏ་དཱ ཀ་མྨ་ཝེ་ག་ཀྑི་ཏྟཾ ཨ་པུ་རེ་ཛཱ་ཏ་ཝ་ཏྠུ་ཀ་ཏྟཱ ཙ ཨ་པྤ་ཏི་ཊྛི་ཏ་ཝ་ཏྠུ་ཀ་ནྟི དུ་བྦ་ལཾ ཧོ་ཏི. ཏ་སྨཱ པ་པཱ་ཏེ པ་ཏི་ཏ་མ་ཏྟོ པུ་རི་སོ ཀི་ཉྩི སི་པྤཾ ཀཱ་ཏུཾ ཝི་ཡ རཱུ་པཾ ཛ་ནེ་ཏུཾ ན ས་ཀྐོ་ཏི; ཀ་མྨ་ཛ་རཱུ་པ་མེ་ཝ པ་ན་སྶ ཙི་ཏྟ་ས་མུ་ཊྛཱ་ན་རཱུ་པ་ཊྛཱ་ནེ ཏི་ཊྛ་ཏི. ཏ་ཉྩ ཀ་མྨ་ཛ་རཱུ་པ་སྶེ་ཝ བཱི་ཛ་ཊྛཱ་ནེ ཏི་ཊྛ་ཏི. ཀ་མྨཾ པ་ན་སྶ ཁེ་ཏྟ་ས་དི་སཾ, ཀི་ལེ་སཱ ཨཱ་པ་ས་དི་སཱ. ཏ་སྨཱ ས་ནྟེ་པི ཁེ་ཏྟེ ཨཱ་པེ ཙ པ་ཋ་མུ་པྤ་ཏྟི་ཡཾ བཱི་ཛཱ་ནུ་བྷཱ་ཝེ་ན རུ་ཀྑུ་པྤ་ཏྟི ཝི་ཡ པ་ཊི་ས་ནྡྷི་ཀྑ་ཎེ ཙི་ཏྟཱ་ནུ་བྷཱ་ཝེ་ན རཱུ་པ་ཀཱ་ཡ་སྶ ཨུ་པྤ་ཏྟི. བཱི་ཛེ པ་ན ཝི་ག་ཏེ་པི པ་ཐ་ཝཱི་ཨཱ་པཱ་ནུ་བྷཱ་ཝེ་ན རུ་ཀྑ་སྶ ཨུ་པ་རཱུ་པ་རི པ་ཝ་ཏྟི ཝི་ཡ; ཝི་ནཱ ཙི་ཏྟེ་ན ཀ་མྨ་ཏོ་ཝ ཀ་ཊ་ཏྟཱ་རཱུ་པཱ་ནཾ པ་ཝ་ཏྟི ཧོ་ཏཱི་ཏི ཝེ་དི་ཏ་བྦཱ. ཝུ་ཏྟ་མྤི ཙེ་ཏཾ – ‘‘ཀ་མྨཾ ཁེ་ཏྟཾ ཝི་ཉྙཱ་ཎཾ བཱི་ཛཾ ཏ་ཎྷཱ སྣེ་ཧོ’’ཏི (ཨ. ནི. ༣.༧༧).

ཨ་ཡ་ཉྩ པ་ན་ཏྠོ ཨོ་ཀཱ་ས་ཝ་སེ་ནེ་ཝ ག་ཧེ་ཏ་བྦོ. ཏ་ཡོ ཧི ཨོ་ཀཱ་སཱ – ནཱ་མོ་ཀཱ་སོ, རཱུ་པོ་ཀཱ་སོ, ནཱ་མ་རཱུ་པོ་ཀཱ་སོ་ཏི. ཏ་ཏྠ ཨ་རཱུ་པ་བྷ་ཝོ ནཱ་མོ་ཀཱ་སོ ནཱ་མ. ཏ་ཏྲ ཧི ཧ་ད་ཡ་ཝ་ཏྠུ་མ་ཏྟ་མྤི རཱུ་པ་པ་ཙྩ་ཡཾ ཝི་ནཱ ཨ་རཱུ་པ་དྷ་མྨཱ་ཝ ཨུ་པྤ་ཛྫ་ནྟི. ཨ་ས་ཉྙ་བྷ་ཝོ རཱུ་པོ་ཀཱ་སོ ནཱ་མ. ཏ་ཏྲ ཧི པ་ཊི་ས་ནྡྷི་ཙི་ཏྟ་མ་ཏྟ་མྤི ཨ་རཱུ་པ་པ་ཙྩ་ཡཾ ཝི་ནཱ རཱུ་པ་དྷ་མྨཱ་ཝ ཨུ་པྤ་ཛྫ་ནྟི. པ་ཉྩ་ཝོ་ཀཱ་ར་བྷ་ཝོ ནཱ་མ་རཱུ་པོ་ཀཱ་སོ ནཱ་མ. ཏ་ཏྲ ཧི ཝ་ཏྠུ་རཱུ་པ་མ་ཏྟ་མྤི ཝི་ནཱ པ་ཊི་ས་ནྡྷི་ཡཾ ཨ་རཱུ་པ་དྷ་མྨཱ, པ་ཊི་ས་ནྡྷི་ཙི་ཏྟ་ཉྩ ཝི་ནཱ ཀ་མྨ་ཛཱ་པི རཱུ་པ་དྷ་མྨཱ ནུ་པྤ་ཛྫ་ནྟི. ཡུ་ག་ན་དྡྷཱ་ཝ རཱུ་པཱ་རཱུ་པཱ་ནཾ ཨུ་པྤ་ཏྟི. ཡ་ཐཱ ཧི ས་སྶཱ་མི་ཀེ ས་རཱ་ཛ་ཀེ གེ་ཧེ ས་དྭཱ་ར་པཱ་ལ་ཀེ རཱ་ཛཱ་ཎ་ཏྟིཾ ཝི་ནཱ པ་ཋ་མ་པྤ་ཝེ་སོ ནཱ་མ ན་ཏྠི, ཨ་པ་ར་བྷཱ་གེ པ་ན ཝི་ནཱ་པི ཨཱ་ཎ་ཏྟིཾ པུ་རི་མཱ་ཎ་ཏྟི་ཨཱ་ནུ་བྷཱ་ཝེ་ནེ་ཝ ཧོ་ཏི, ཨེ་ཝ་མེ་ཝ པ་ཉྩ་ཝོ་ཀཱ་རེ པ་ཊི་ས་ནྡྷི་ཝི་ཉྙཱ་ཎ་རཱ་ཛ་སྶ ས་ཧ་ཛཱ་ཏཱ་དི་པ་ཙྩ་ཡ་ཏཾ ཝི་ནཱ རཱུ་པ་སྶ པ་ཊི་ས་ནྡྷི་ཝ་སེ་ན པ་ཋ་མུ་པྤ་ཏྟི ནཱ་མ ན་ཏྠི. ཨ་པ་ར་བྷཱ་གེ པ་ན ཝི་ནཱ་པི པ་ཊི་ས་ནྡྷི་ཝི་ཉྙཱ་ཎ་སྶ ས་ཧ་ཛཱ་ཏཱ་དི་པ་ཙྩ་ཡཱ་ནུ་བྷཱ་ཝཾ པུ་རི་མཱ་ནུ་བྷཱ་ཝ་ཝ་སེ་ན ལ་དྡྷ་པྤ་ཝེ་ས་སྶ ཀ་མྨ་ཏོ པ་ཝ་ཏྟི ཧོ་ཏི. ཨ་ས་ཉྙ་བྷ་ཝོ པ་ན ཡ་སྨཱ ཨ་རཱུ་པོ་ཀཱ་སོ ན ཧོ་ཏི, ཏ་སྨཱ ཏ་ཏྠ ཝི་ནཱ་ཝ ཨ་རཱུ་པ་པ་ཙྩ་ཡཱ ཨ་ས་ཉྙོ་ཀཱ་ས་ཏྟཱ རཱུ་པཾ པ་ཝ་ཏྟ་ཏི, ཨ་སྶཱ་མི་ཀེ སུ་ཉྙ་གེ་ཧེ ཨ་ཏྟ་ནོ གེ་ཧེ ཙ པུ་རི་ས་སྶ པ་ཝེ་སོ ཝི་ཡ. ཨ་རཱུ་པ་བྷ་ཝོ་པི ཡ་སྨཱ རཱུ་པོ་ཀཱ་སོ ན ཧོ་ཏི, ཏ་སྨཱ ཏ་ཏྠ ཝི་ནཱ་ཝ རཱུ་པ་པ་ཙྩ་ཡཱ ཨ་ཉྙོ་ཀཱ་ས་ཏྟཱ ཨ་རཱུ་པ་དྷ་མྨཱ པ་ཝ་ཏྟ་ནྟི. པ་ཉྩ་ཝོ་ཀཱ་ར་བྷ་ཝོ པ་ན རཱུ་པཱ་རཱུ་པོ་ཀཱ་སོ་ཏི ན་ཏྠེ་ཏྠ ཨ་རཱུ་པ་པ་ཙྩ་ཡཾ ཝི་ནཱ པ་ཊི་ས་ནྡྷི་ཀྑ་ཎེ རཱུ་པཱ་ནཾ ཨུ་པྤ་ཏྟཱི་ཏི. ཨི་ཏི ཨ་ཡཾ ཧེ་ཏུ པ་ཊི་ས་ནྡྷི་ཡ་མེ་ཝ ཀ་ཊ་ཏྟཱ་རཱུ་པཱ་ནཾ པ་ཙྩ་ཡོ ཧོ་ཏི, ན པ་ཝ་ཏྟེ་ཏི.

ན་ནུ ‘‘ཧེ་ཏཱུ ས་ཧ་ཛཱ་ཏཱ་ནཾ ཧེ་ཏུ་པ་ཙྩ་ཡེ་ན པ་ཙྩ་ཡོ་ཏི ཝུ་ཏྟེ ས་བྦོ་པི ཨ་ཡ་མ་ཏྠོ ག་ཧི་ཏོ ཧོ་ཏི, ཨ་ཐ ཀ་སྨཱ ‘‘ཧེ་ཏུ་ས་མྤ་ཡུ་ཏྟ་ཀཱ་ནཾ དྷ་མྨཱ་ནཾ ཏཾ་ས་མུ་ཊྛཱ་ནཱ་ན་ཉྩ རཱུ་པཱ་ན’’ནྟི ཨི་དཾ ག་ཧི་ཏ་ནྟི? པ་ཝ་ཏྟི་ཡཾ ཀ་ཊ་ཏྟཱ་རཱུ་པཱ་དཱི་ནཾ པ་ཙྩ་ཡ་བྷཱ་ཝ་པ་ཊི་བཱ་ཧ་ན་ཏོ. ཨེ་ཝ་ཉྷི ས་ཏི ཡཱ་ནི པ་ཝ་ཏྟི་ཡཾ ཧེ་ཏུ་ནཱ ས་ཧ ཨེ་ཀ་ཀྑ་ཎེ ཀ་ཊ་ཏྟཱ་རཱུ་པཱ་ནི ཙེ་ཝ ཨུ་ཏུ་ཨཱ་ཧཱ་ར་ས་མུ་ཊྛཱ་ནཱ་ནི ཙ ཛཱ་ཡ་ནྟི, ཏེ་ས་མྤི ཧེ་ཏཱུ ཧེ་ཏུ་པ་ཙྩ་ཡོ་ཏི ཨཱ་པ་ཛྫེ་ཡྻ, ན ཙ སོ ཏེ་སཾ པ་ཙྩ་ཡོ. ཏ་སྨཱ ཏེ་སཾ པ་ཙྩ་ཡ་བྷཱ་ཝ་སྶ པ་ཊི་བཱ་ཧ་ན་ཏྠ་མེ་ཏཾ ག་ཧི་ཏ་ནྟི ཝེ་དི་ཏ་བྦཾ.

ཨི་དཱ་ནི ‘‘ནཱ་ན་པྤ་ཀཱ་ར་བྷེ་ད་ཏོ པ་ཙྩ་ཡུ་པྤ་ནྣ་ཏོ’’ཏི ཨི་མེ་སཾ པ་དཱ་ནཾ ཝ་སེ་ནེ་ཏྠ ཝི་ཉྙཱ་ཏ་བྦོ ཝི་ནི་ཙྪ་ཡོ. ཏེ་སུ ནཱ་ན་པྤ་ཀཱ་ར་བྷེ་ད་ཏོཏི ཨ་ཡ་ཉྷི ཧེ་ཏུ ནཱ་མ ཛཱ་ཏི་ཏོ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་བྷེ་ད་ཏོ ཙ་ཏུ་བྦི་དྷོ. ཏ་ཏྠ ཀུ་ས་ལ་ཧེ་ཏུ བྷཱུ་མ་ནྟ་ར་ཏོ ཀཱ་མཱ་ཝ་ཙ་རཱ་དི་བྷེ་དེ་ན ཙ་ཏུ་བྦི་དྷོ, ཨ་ཀུ་ས་ལ་ཧེ་ཏུ ཀཱ་མཱ་ཝ་ཙ་རོ་ཝ ཝི་པཱ་ཀ་ཧེ་ཏུ ཀཱ་མཱ་ཝ་ཙ་རཱ་དི་བྷེ་དེ་ན ཙ་ཏུ་བྦི་དྷོ, ཀི་རི་ཡ་ཧེ་ཏུ ཀཱ་མཱ་ཝ་ཙ་རོ རཱུ་པཱ་ཝ་ཙ་རོ ཨ་རཱུ་པཱ་ཝ་ཙ་རོ་ཏི ཏི་ཝི་དྷོ. ཏ་ཏྠ ཀཱ་མཱ་ཝ་ཙ་ར་ཀུ་ས་ལ་ཧེ་ཏུ ནཱ་མ་ཏོ ཨ་ལོ་བྷཱ་དི་ཝ་སེ་ན ཏི་ཝི་དྷོ. རཱུ་པཱ་ཝ་ཙ་རཱ་དི་ཀུ་ས་ལ་ཧེ་ཏཱུ་སུ་པི ཨེ་སེ་ཝ ན་ཡོ. ཨ་ཀུ་ས་ལ་ཧེ་ཏུ ལོ་བྷཱ་དི་ཝ་སེ་ན ཏི་ཝི་དྷོ. ཝི་པཱ་ཀ་ཀི་རི་ཡ་ཧེ་ཏཱུ པ་ན ཨ་ལོ་བྷཱ་དི་ཝ་སེ་ན ཏ་ཡོ ཏ་ཡོ ཧོ་ནྟི. ཏཾ་ཏཾ་ཙི་ཏྟ་ས་མྤ་ཡོ་ག་ཝ་སེ་ན པ་ན ཏེ་སཾ ཏེ་སཾ ཧེ་ཏཱུ་ནཾ ནཱ་ན་པྤ་ཀཱ་ར་བྷེ་དོ་ཡེ་ཝཱ་ཏི ཨེ་ཝཾ ཏཱ་ཝེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

པ་ཙྩ་ཡུ་པྤ་ནྣ་ཏོཏི ཨི་མི་ནཱ པ་ཙྩ་ཡེ་ན ཨི་མེ དྷ་མྨཱ ཨུ་པྤ་ཛྫ་ནྟི, ཨི་མེ་སཾ ནཱ་མ དྷ་མྨཱ་ནཾ ཨ་ཡཾ པ་ཙྩ་ཡོ་ཏི ཨེ་ཝ་མྤི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི ཨ་ཏྠོ. ཏ་ཏྠ ཨི་མ་སྨིཾ ཏཱ་ཝ ཧེ་ཏུ་པ་ཙྩ་ཡེ ཀཱ་མཱ་ཝ་ཙ་ར་ཀུ་ས་ལ་ཧེ་ཏུ ཀཱ་མ་བྷ་ཝ་རཱུ་པ་བྷ་ཝེ་སུ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཧེ་ཏུ་པ་ཙྩ་ཡོ ཧོ་ཏི, ཨ་རཱུ་པ་བྷ་ཝེ ས་མྤ་ཡུ་ཏྟ་དྷ་མྨཱ་ནཾ་ཡེ་ཝ. རཱུ་པཱ་ཝ་ཙ་ར་ཀུ་ས་ལ་ཧེ་ཏུ ཀཱ་མ་བྷ་ཝ་རཱུ་པ་བྷ་ཝེ་སུ་ཡེ་ཝ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཧེ་ཏུ་པ་ཙྩ་ཡོ. ཨ་རཱུ་པཱ་ཝ་ཙ་ར་ཀུ་ས་ལ་ཧེ་ཏུ ཀཱ་མཱ་ཝ་ཙ་ར་ཀུ་ས་ལ་ཧེ་ཏུ་ས་དི་སོ་ཝ. ཏ་ཐཱ ཨ་པ་རི་ཡཱ་པ་ནྣ་ཀུ་ས་ལ་ཧེ་ཏུ, ཏ་ཐཱ ཨ་ཀུ་ས་ལ་ཧེ་ཏུ. ཀཱ་མཱ་ཝ་ཙ་ར་ཝི་པཱ་ཀ་ཧེ་ཏུ པ་ན ཀཱ་མ་བྷ་ཝ་སྨིཾ་ཡེ་ཝ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ནཾ, པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ནཾ, པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཧེ་ཏུ་པ་ཙྩ་ཡོ. རཱུ་པཱ་ཝ་ཙ་ར་ཝི་པཱ་ཀ་ཧེ་ཏུ རཱུ་པ་བྷ་ཝེ ཝུ་ཏྟ་པྤ་ཀཱ་རཱ་ན་ཉྙེ་ཝ ཧེ་ཏུ་པ་ཙྩ་ཡོ. ཨ་རཱུ་པཱ་ཝ་ཙ་ར་ཝི་པཱ་ཀ་ཧེ་ཏུ ཨ་རཱུ་པ་བྷ་ཝེ ས་མྤ་ཡུ་ཏྟ་ཀཱ་ན་ཉྙེ་ཝ ཧེ་ཏུ་པ་ཙྩ་ཡོ. ཨ་པ་རི་ཡཱ་པ་ནྣ་ཝི་པཱ་ཀ་ཧེ་ཏུ ཀཱ་མ་བྷ་ཝ་རཱུ་པ་བྷ་ཝེ་སུ ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཨ་རཱུ་པ་བྷ་ཝེ ཨ་རཱུ་པ་དྷ་མྨཱ་ན་ཉྙེ་ཝ ཧེ་ཏུ་པ་ཙྩ་ཡོ. ཀི་རི་ཡ་ཧེ་ཏཱུ་སུ པ་ན ཏེ་བྷཱུ་མ་ཀེ་སུ་པི ཀུ་ས་ལ་ཧེ་ཏུ་ས་དི་སོ་ཝ པ་ཙྩ་ཡོ་ཏི. ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཧེ་ཏུ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢. ཨཱ་ར་མྨ་ཎ་པ་ཙྩ་ཡ་ནི་དྡེ་ས་ཝ་ཎྞ་ནཱ

༢. ཨཱ་ར་མྨ་ཎ་པ་ཙྩ་ཡ་ནི་དྡེ་སེ རཱུ་པཱ་ཡ་ཏ་ནནྟི རཱུ་པ་ས་ངྑཱ་ཏཾ ཨཱ་ཡ་ཏ་ནཾ. སེ་སེ་སུ་པི ཨེ་སེ་ཝ ན་ཡོ. ཙ་ཀྑུ་ཝི་ཉྙཱ་ཎ་དྷཱ་ཏུ་ཡཱཏི ཙ་ཀྑུ་ཝི་ཉྙཱ་ཎ་ས་ངྑཱ་ཏཱ་ཡ དྷཱ་ཏུ་ཡཱ. སེ་ས་པ་དེ་སུ་པི ཨེ་སེ་ཝ ན་ཡོ. ཏཾ་ས་མྤ་ཡུ་ཏྟ་ཀཱ་ནནྟི ཏཱ་ཡ ཙ་ཀྑུ་ཝི་ཉྙཱ་ཎ་དྷཱ་ཏུ་ཡཱ ས་མྤ་ཡུ་ཏྟ་ཀཱ་ནཾ ཏི་ཎྞཾ ཁ་ནྡྷཱ་ནཾ, ས་བྦེ་ས་མྤི ཙ་ཀྑུ་པ་སཱ་ད་ཝ་ཏྠུ་ཀཱ་ནཾ ཙ་ཏུ་ནྣཾ ཁ་ནྡྷཱ་ནཾ རཱུ་པཱ་ཡ་ཏ་ནཾ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ་ཏི ཨ་ཏྠོ. ཨི་ཏོ པ་རེ་སུ་པི ཨེ་སེ་ཝ ན་ཡོ. མ་ནོ་དྷཱ་ཏུ་ཡཱཏི ས་ས་མྤ་ཡུ་ཏྟ་དྷ་མྨཱ་ཡ ཏི་ཝི་དྷཱ་ཡ་པི མ་ནོ་དྷཱ་ཏུ་ཡཱ རཱུ་པཱ་ཡ་ཏ་ནཱ་དཱི་ནི པ་ཉྩ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ, ནོ ཙ ཁོ ཨེ་ཀ་ཀྑ་ཎེ. ས་བྦེ དྷ་མྨཱཏི ཨེ་ཏཱ་ནི ཙ རཱུ་པཱ་ཡ་ཏ་ནཱ་དཱི་ནི པ་ཉྩ ཨ་ཝ་སེ་སཱ ཙ ས་བྦེ་པི ཉེ་ཡྻ་དྷ་མྨཱ ཨི་མཱ ཚ དྷཱ་ཏུ་ཡོ ཋ་པེ་ཏྭཱ སེ་སཱ་ཡ ས་ས་མྤ་ཡུ་ཏྟ་དྷ་མྨཱ་ཡ མ་ནོ་ཝི་ཉྙཱ་ཎ་དྷཱ་ཏུ་ཡཱ ཨཱ་ར་མྨ་ཎ་པ་ཙྩ་ཡེ་ན པ་ཙྩ་ཡོ་ཏི ཨ་ཏྠོ. ཡཾ ཡཾ དྷ་མྨཾ ཨཱ་ར་བྦྷཱཏི ཨི་མི་ནཱ ཡེ ཨེ་ཏེ ཨེ་ཏཱ་སཾ ས་ཏྟ་ནྣཾ ཝི་ཉྙཱ་ཎ་དྷཱ་ཏཱུ་ནཾ ཨཱ་ར་མྨ་ཎ་དྷ་མྨཱ ཝུ་ཏྟཱ, ཏེ ཏཱ་སཾ དྷཱ་ཏཱུ་ནཾ ཨཱ་ར་མྨ་ཎཾ ཀ་ཏྭཱ ཨུ་པྤ་ཛྫ་ན་ཀྑ་ཎེ་ཡེ་ཝ ཨཱ་ར་མྨ་ཎ་པ་ཙྩ་ཡོ ཧོ་ནྟཱི་ཏི དཱི་པེ་ཏི. ཨེ་ཝཾ ཧོ་ནྟཱ་པི ཙ ན ཨེ་ཀ་ཏོ ཧོ་ནྟི, ཡཾ ཡཾ ཨཱ་ར་བྦྷ ཡེ ཡེ ཨུ་པྤ་ཛྫ་ནྟི, ཏེ་སཾ ཏེ་སཾ ཏེ ཏེ ཝི་སུཾ ཝི་སུཾ ཨཱ་ར་མྨ་ཎ་པ་ཙྩ་ཡོ ཧོ་ནྟཱི་ཏི་པི དཱི་པེ་ཏི. ཨུ་པྤ་ཛྫ་ནྟཱིཏི ཨི་དཾ ཡ་ཐཱ ན་ཛྫོ ས་ནྡ་ནྟི, པ་བྦ་ཏཱ ཏི་ཊྛ་ནྟཱི་ཏི ས་བྦ་ཀཱ་ལ་ས་ངྒ་ཧ་ཝ་སེ་ན, ཨེ་ཝཾ ཝུ་ཏྟ་ནྟི ཝེ་དི་ཏ་བྦཾ. ཏེ་ན ཡེ་པི ཨཱ་ར་བྦྷ ཡེ ཨུ་པྤ་ཛྫིཾ་སུ, ཡེ་པི ཨུ་པྤ་ཛྫི་སྶ་ནྟི, ཏེ ས་བྦེ ཨཱ་ར་མྨ་ཎ་པ་ཙྩ་ཡེ་ནེ་ཝ ཨུ་པྤ་ཛྫིཾ་སུ ཙ ཨུ་པྤ་ཛྫི་སྶ་ནྟི ཙཱ་ཏི སི་དྡྷཾ ཧོ་ཏི. ཙི་ཏྟ་ཙེ་ཏ་སི་ཀཱ དྷ་མྨཱཏི ཨི་དཾ ‘‘ཡེ ཡེ དྷ་མྨཱ’’ཏི ཝུ་ཏྟཱ་ནཾ ས་རཱུ་པ་ཏོ ནི་ད་སྶ་ནཾ. ཏེ ཏེ དྷ་མྨཱཏི ཏེ ཏེ ཨཱ་ར་མྨ་ཎ་དྷ་མྨཱ. ཏེ་སཾ ཏེ་སནྟི ཏེ་སཾ ཏེ་སཾ ཙི་ཏྟ་ཙེ་ཏ་སི་ཀ་དྷ་མྨཱ་ནཾ. ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨི་དཾ པ་ན ཨཱ་ར་མྨ་ཎཾ ནཱ་མ རཱུ་པཱ་ར་མྨ་ཎཾ ས་དྡ་ག་ནྡྷ་ར་ས་ཕོ་ཊྛ་བྦ་དྷ་མྨཱ་ར་མྨ་ཎ་ནྟི ཀོ་ཊྛཱ་ས་ཏོ ཚ་བྦི་དྷཾ ཧོ་ཏི. ཏ་ཏྠ ཋ་པེ་ཏྭཱ པ་ཉྙ་ཏྟིཾ ཨ་ཝ་སེ་སཾ བྷཱུ་མི་ཏོ ཀཱ་མཱ་ཝ་ཙ་རཾ…པེ… ཨ་པ་རི་ཡཱ་པ་ནྣ་ནྟི ཙ་ཏུ་བྦི་དྷཾ ཧོ་ཏི. ཏ་ཏྠ ཀཱ་མཱ་ཝ་ཙ་རཾ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་བྷེ་ད་ཏོ པ་ཉྩ་ཝི་དྷཾ; རཱུ་པཱ་ཝ་ཙ་རཾ ཀུ་ས་ལ་ཝི་པཱ་ཀ་ཀི་རི་ཡ་ཏོ ཏི་ཝི་དྷཾ, ཏ་ཐཱ ཨ་རཱུ་པཱ་ཝ་ཙ་རཾ, ཨ་པ་རི་ཡཱ་པ་ནྣཾ ཀུ་ས་ལ་ཝི་པཱ་ཀ་ནི་བྦཱ་ན་ཝ་སེ་ན ཏི་ཝི་དྷཾ ཧོ་ཏི. ས་བྦ་མེ་ཝ ཝཱ ཨེ་ཏཾ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་ནི་བྦཱ་ན་པ་ཉྙ་ཏྟི་བྷེ་ད་ཏོ ས་ཏྟ་ཝི་དྷཾ ཧོ་ཏི. ཏ་ཏྠ ཀུ་ས་ལཾ བྷཱུ་མི་བྷེ་ད་ཏོ ཙ་ཏུ་བྦི་དྷཾ ཧོ་ཏི, ཨ་ཀུ་ས་ལཾ ཀཱ་མཱ་ཝ་ཙ་ར་མེ་ཝ, ཝི་པཱ་ཀཾ ཙ་ཏུ་བྷཱུ་མ་ཀཾ, ཀི་རི་ཡཾ ཏི་བྷཱུ་མ་ཀཾ, རཱུ་པཾ ཨེ་ཀ་བྷཱུ་མ་ཀཾ ཀཱ་མཱ་ཝ་ཙ་ར་མེ་ཝ, ནི་བྦཱ་ན་མྤི ཨེ་ཀ་བྷཱུ་མ་ཀཾ ཨ་པ་རི་ཡཱ་པ་ནྣ་མེ་ཝ, པ་ཉྙ་ཏྟི བྷཱུ་མི་ཝི་ནི་མུ་ཏྟཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏ་སྨིཾ ཨཱ་ར་མྨ་ཎེ ཀཱ་མཱ་ཝ་ཙ་ར་ཀུ་ས་ལཱ་ར་མྨ་ཎཾ ཀཱ་མཱ་ཝ་ཙ་ར་ཀུ་ས་ལ་སྶ, རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཀཱ་མཱ་ཝ་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་ཀི་རི་ཡ་སྶ, རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀུ་ས་ལཱ་ར་མྨ་ཎཾ ཏེ་སུ ཚ་སུ རཱ་སཱི་སུ ཀཱ་མཱ་ཝ་ཙ་ར་ཝི་པཱ་ཀ་ཝ་ཛྫཱ་ནཾ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཀུ་ས་ལཱ་ར་མྨ་ཎཾ ཀཱ་མཱ་ཝ་ཙ་ར་ཀུ་ས་ལ་སྶ, རཱུ་པཱ་ཝ་ཙ་ར་ཀུ་ས་ལ་སྶ, ཨ་རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཨ་རཱུ་པཱ་ཝ་ར་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་ཀི་རི་ཡ་སྶ, རཱུ་པཱ་ཝ་ཙ་ར་ཀི་རི་ཡ་སྶ, ཨ་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཨ་ཊྛ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་པ་རི་ཡཱ་པ་ནྣ་ཀུ་ས་ལཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཏོ ཀུ་ས་ལ་ཀི་རི་ཡཱ་ན་མེ་ཝ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་ཀུ་ས་ལཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཀཱ་མཱ་ཝ་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི.

ཀཱ་མཱ་ཝ་ཙ་ར་ཝི་པཱ་ཀཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཀཱ་མཱ་ཝ་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཝི་པཱ་ཀཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཝི་པཱ་ཀཱ་ར་མྨ་ཎ་མྤི ཨི་མེ་སཾ་ཡེ་ཝ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་པ་རི་ཡཱ་པ་ནྣ་ཝི་པཱ་ཀཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་ཀི་རི་ཡཱ་ན་ཉྙེ་ཝ ཨཱ་ར་མྨ་ཎ་པ་ཙྩ་ཡོ ཧོ་ཏི.

ཀཱ་མཱ་ཝ་ཙ་ར་ཀི་རི་ཡཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ, ཨ་ཀུ་ས་ལ་སྶ, ཀཱ་མཱ་ཝ་ཙ་ར་ཝི་པཱ་ཀ་སྶ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀི་རི་ཡཱ་ར་མྨ་ཎཾ ཨི་མེ་སུ ཚ་སུ རཱ་སཱི་སུ ཀཱ་མཱ་ཝ་ཙ་ར་ཝི་པཱ་ཀ་ཝ་ཛྫཱ་ནཾ པ་ཉྩ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཀི་རི་ཡཱ་ར་མྨ་ཎཾ ཏེ་སཾ པ་ཉྩ་ནྣཾ ཨ་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཙ་ཏུ་ས་མུ་ཊྛཱ་ནཾ རཱུ་པ་ཀྑ་ནྡྷ་ས་ངྑཱ་ཏཾ རཱུ་པཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ ཨ་ཀུ་ས་ལ་སྶ ཀཱ་མཱ་ཝ་ཙ་ར་ཝི་པཱ་ཀ་སྶ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ནི་བྦཱ་ནཱ་ར་མྨ་ཎཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀུ་ས་ལ་སྶ, ཨ་པ་རི་ཡཱ་པ་ནྣ་ཏོ ཀུ་ས་ལ་ཝི་པཱ་ཀ་སྶ, ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཀི་རི་ཡ་སྶ ཙཱ་ཏི ཨི་མེ་སཾ ཚ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀུ་ས་ལ་ཀི་རི་ཡཱ་ནཾ ཀེ་ཙི ནི་ཙྪ་ནྟི, ཏཾ ཡུ་ཏྟི་ཏོ ཨུ་པ་དྷཱ་རེ་ཏ་བྦཾ. ནཱ་ན་པྤ་ཀཱ་ར་ཀཾ པ་ན པ་ཉྙ་ཏྟི་ཨཱ་ར་མྨ་ཎཾ ཏེ་བྷཱུ་མ་ཀ་ཀུ་ས་ལ་སྶ, ཨ་ཀུ་ས་ལ་སྶ, རཱུ་པཱ་ཝ་ཙ་ར་ཝི་པཱ་ཀ་སྶ, ཨ་རཱུ་པཱ་ཝ་ཙ་ར་ཝི་པཱ་ཀ་སྶ, ཏེ་བྷཱུ་མ་ཀ་ཀི་རི་ཡ་སྶ ཙཱ་ཏི ཨི་མེ་སཾ ན་ཝ་ནྣཾ རཱ་སཱི་ནཾ ཨཱ་ར་མྨ་ཎ་པ་ཙྩ་ཡོ ཧོ་ཏི. ཏ་ཏྠ ཡཾ ཡཾ ཨཱ་ར་མྨ་ཎཾ ཡེ་སཾ ཡེ་སཾ པ་ཙྩ་ཡོ, ཏེ ཏེ ཏཾ་ཏཾ་པ་ཙྩ་ཡུ་པྤ་ནྣཱ ནཱ་མ ཧོ་ནྟཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨཱ་ར་མྨ་ཎ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༣. ཨ་དྷི་པ་ཏི་པ་ཙྩ་ཡ་ནི་དྡེ་ས་ཝ་ཎྞ་ནཱ

༣. ཨ་དྷི་པ་ཏི་པ་ཙྩ་ཡ་ནི་དྡེ་སེ ཚ་ནྡཱ་དྷི་པ་ཏཱིཏི ཚ་ནྡ་ས་ངྑཱ་ཏོ ཨ་དྷི་པ་ཏི. ཚ་ནྡཾ དྷུ་རཾ ཀ་ཏྭཱ ཚ་ནྡཾ ཛེ་ཊྛ་ཀཾ ཀ་ཏྭཱ ཙི་ཏྟུ་པྤ་ཏྟི་ཀཱ་ལེ ཨུ་པྤ་ནྣ་སྶ ཀ་ཏྟུ་ཀ་མྱ་ཏཱ་ཚ་ནྡ་སྶེ་ཏཾ ནཱ་མཾ. སེ་སེ་སུ་པི ཨེ་སེ་ཝ ན་ཡོ. ཀ་སྨཱ པ་ན ཡ་ཐཱ ཧེ་ཏུ་པ་ཙྩ་ཡ་ནི་དྡེ་སེ ཧེ་ཏཱུ ཧེ་ཏུ་ས་མྤ་ཡུ་ཏྟ་ཀཱ་ན’’ནྟི ཝུ་ཏྟཾ, ཨེ་ཝ་མི་དྷ ‘‘ཨ་དྷི་པ་ཏཱི ཨ་དྷི་པ་ཏི་ས་མྤ་ཡུ་ཏྟ་ཀཱ་ན་ནྟི ཨ་ཝ་ཏྭཱ ‘‘ཚ་ནྡཱ་དྷི་པ་ཏི ཚ་ནྡ་ས་མྤ་ཡུ་ཏྟ་ཀཱ་ན’’ནྟི་ཨཱ་དི་ནཱ ན་ཡེ་ན དེ་ས་ནཱ ཀ་ཏཱ་ཏི? ཨེ་ཀ་ཀྑ་ཎེ ཨ་བྷཱ་ཝ་ཏོ. པུ་རི་མ་ན་ཡ་སྨི་ཉྷི དྭེ ཏ་ཡོ ཧེ་ཏཱུ ཨེ་ཀ་ཀྑ་ཎེ་པི ཧེ་ཏུ་པ་ཙྩ་ཡོ ཧོ་ནྟི མཱུ་ལ་ཊྛེ་ན. ཨུ་པ་ཀཱ་ར་ཀ་བྷཱ་ཝ་སྶ ཨ་ཝི་ཛ་ཧ་ན་ཏོ. ཨ་དྷི་པ་ཏི པ་ན ཛེ་ཊྛ་ཀ་ཊྛེ་ན ཨུ་པ་ཀཱ་ར་ཀོ, ན ཙ ཨེ་ཀ་ཀྑ་ཎེ བ་ཧཱུ ཛེ་ཊྛ་ཀཱ ནཱ་མ ཧོ་ནྟི. ཏ་སྨཱ ཨེ་ཀ་ཏོ ཨུ་པྤ་ནྣཱ་ན་མྤི ནེ་སཾ ཨེ་ཀ་ཀྑ་ཎེ ཨ་དྷི་པ་ཏི་པ་ཙྩ་ཡ་བྷཱ་ཝོ ན་ཏྠི. ཏ་སྶ ཨ་དྷི་པ་ཏི་པ་ཙྩ་ཡ་བྷཱ་ཝ་སྶ ཨེ་ཀ་ཀྑ་ཎེ ཨ་བྷཱ་ཝ་ཏོ ཨི་དྷ ཨེ་ཝཾ དེ་ས་ནཱ ཀ་ཏཱ་ཏི.

ཨེ་ཝཾ ས་ཧ་ཛཱ་ཏཱ་དྷི་པ་ཏིཾ ད་སྶེ་ཏྭཱ ཨི་དཱ་ནི ཨཱ་ར་མྨ་ཎཱ་དྷི་པ་ཏིཾ ད་སྶེ་ཏུཾ ཡཾ ཡཾ དྷ་མྨཾ ག་རུཾ ཀ་ཏྭཱཏི་ཨཱ་དི ཨཱ་ར་དྡྷཾ. ཏ་ཏྠ ཡཾ ཡཾ དྷ་མྨནྟི ཡཾ ཡཾ ཨཱ་ར་མྨ་ཎ་དྷ་མྨཾ. ག་རུཾ ཀ་ཏྭཱཏི ག་རུ་ཀཱ་ར་ཙི་ཏྟཱི་ཀཱ་ར་ཝ་སེ་ན ཝཱ ཨ་སྶཱ་ད་ཝ་སེ་ན ཝཱ ག་རུཾ བྷཱ་རི་ཡཾ ལ་དྡྷ་བྦཾ ཨ་ཝི་ཛ་ཧི་ཏ་བྦཾ ཨ་ན་ཝ་ཉྙཱ་ཏཾ ཀ་ཏྭཱ. ཏེ ཏེ དྷ་མྨཱཏི ཏེ ཏེ ག་རུ་ཀཱ་ཏ་བྦ་དྷ་མྨཱ. ཏེ་སཾ ཏེ་སནྟི ཏེ་སཾ ཏེ་སཾ ག་རུ་ཀཱ་ར་ཀ་དྷ་མྨཱ་ནཾ. ཨ་དྷི་པ་ཏི་པ་ཙྩ་ཡེ་ནཱཏི ཨཱ་ར་མྨ་ཎཱ་དྷི་པ་ཏི་པ་ཙྩ་ཡེ་ན པ་ཙྩ་ཡོ ཧོ་ཏཱི་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཨ་དྷི་པ་ཏི ནཱ་མ ས་ཧ་ཛཱ་ཏཱ་ར་མྨ་ཎ་ཝ་སེ་ན དུ་ཝི་དྷོ. ཏ་ཏྠ ས་ཧ་ཛཱ་ཏོ ཚ་ནྡཱ་དི་ཝ་སེ་ན ཙ་ཏུ་བྦི་དྷོ. ཏེ་སུ ཨེ་ཀེ་ཀོ ཀཱ་མཱ་ཝ་ཙ་རཱ་དི་ཝ་སེ་ན བྷཱུ་མི་ཏོ ཙ་ཏུ་བྦི་དྷོ. ཏ་ཏྠ ཀཱ་མཱ་ཝ་ཙ་རོ ཀུ་ས་ལཱ་ཀུ་ས་ལ་ཀི་རི་ཡ་ཝ་སེ་ན ཏི་ཝི་དྷོ. ཨ་ཀུ་ས་ལཾ པ་ཏྭཱ པ་ནེ་ཏྠ ཝཱི་མཾ་སཱ་དྷི་པ་ཏི ན ལ་བྦྷ་ཏི. རཱུ་པཱ་རཱུ་པཱ་ཝ་ཙ་རོ ཀུ་ས་ལ་ཀི་རི་ཡ་ཝ་སེ་ན དུ་ཝི་དྷོ, ཨ་པ་རི་ཡཱ་པ་ནྣོ ཀུ་ས་ལ་ཝི་པཱ་ཀ་ཝ་སེ་ན དུ་ཝི་དྷོ. ཨཱ་ར་མྨ་ཎཱ་དྷི་པ་ཏི པ་ན ཛཱ་ཏི་བྷེ་ད་ཏོ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་ནི་བྦཱ་ནཱ་ནཾ ཝ་སེ་ན ཚ་བྦི་དྷོ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ས་ཧ་ཛཱ་ཏཱ་དྷི་པ་ཏི་མྷི ཏཱ་ཝ ཀཱ་མཱ་ཝ་ཙ་ར་ཀུ་ས་ལ་ཀི་རི་ཡ་ས་ངྑཱ་ཏོ ཨ་དྷི་པ་ཏི དུ་ཧེ་ཏུ་ཀ་ཏི་ཧེ་ཏུ་ཀེ་སུ ཙི་ཏྟུ་པྤཱ་དེ་སུ ཚ་ནྡཱ་དཱི་ནཾ ཨ་ཉྙ་ཏ་རཾ ཛེ་ཊྛ་ཀཾ ཀ་ཏྭཱ ཨུ་པྤ་ཏྟི་ཀཱ་ལེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ཨ་དྷི་པ་ཏི་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀུ་ས་ལ་ཀི་རི་ཡ་ས་ངྑཱ་ཏེ་པི ཨེ་སེ་ཝ ན་ཡོ. ཨ་ཡཾ པ་ན ཨེ་ཀ་ནྟེ་ནེ་ཝ ལ་བྦྷ་ཏི. ན ཧི ཏེ དྷ་མྨཱ ས་ཧ་ཛཱ་ཏཱ་དྷི་པ་ཏིཾ ཝི་ནཱ ཨུ་པྤ་ཛྫ་ནྟི. ཨ་རཱུ་པཱ་ཝ་ཙ་ར་ཀུ་ས་ལ་ཀི་རི་ཡ་ས་ངྑཱ་ཏོ པ་ན པ་ཉྩ་ཝོ་ཀཱ་རེ རཱུ་པཱ་ཝ་ཙ་ར་ཨ་དྷི་པ་ཏི་ས་དི་སོ་ཝ ཙ་ཏུ་ཝོ་ཀཱ་རེ པ་ན ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨ་དྷི་པ་ཏི་པ་ཙྩ་ཡོ ཧོ་ཏི. ཏ་ཐཱ ཏ་ཏྠུ་པྤ་ནྣོ ས་བྦོ་པི ཀཱ་མཱ་ཝ་ཙ་རཱ་དྷི་པ་ཏི. ཨ་པ་རི་ཡཱ་པ་ནྣོ ཀུ་ས་ལ་ཏོ་པི ཝི་པཱ་ཀ་ཏོ་པི པ་ཉྩ་ཝོ་ཀཱ་རེ ཨེ་ཀ་ནྟེ་ནེ་ཝ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཨ་དྷི་པ་ཏི་པ་ཙྩ་ཡོ ཧོ་ཏི, ཙ་ཏུ་ཝོ་ཀཱ་རེ ཨ་རཱུ་པ་དྷ་མྨཱ་ན་ཉྙེ་ཝ. ཨ་ཀུ་ས་ལོ ཀཱ་མ་བྷ་ཝེ མི་ཙྪ་ཏྟ་ནི་ཡ་ཏ་ཙི་ཏྟེ་སུ ཨེ་ཀ་ནྟེ་ནེ་ཝ ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཨ་དྷི་པ་ཏི་པ་ཙྩ་ཡོ ཧོ་ཏི. ཨ་ནི་ཡ་ཏོ ཀཱ་མ་བྷ་ཝ་རཱུ་པ་བྷ་ཝེ་སུ ཨ་ཏྟ་ནོ ཨ་དྷི་པ་ཏི་ཀཱ་ལེ ཏེ་ས་ཉྙེ་ཝ. ཨ་རཱུ་པ་བྷ་ཝེ ཨ་རཱུ་པ་དྷ་མྨཱ་ན་ཉྙེ་ཝ ཨ་དྷི་པ་ཏི་པ་ཙྩ་ཡོ ཧོ་ཏི. ཨ་ཡཾ ཏཱ་ཝ ས་ཧ་ཛཱ་ཏཱ་དྷི་པ་ཏི་མྷི ན་ཡོ.

ཨཱ་ར་མྨ་ཎཱ་དྷི་པ་ཏི་མྷི པ་ན ཀཱ་མཱ་ཝ་ཙ་ར་ཀུ་ས་ལོ ཨཱ་ར་མྨ་ཎཱ་དྷི་པ་ཏི ཀཱ་མཱ་ཝ་ཙ་ར་ཀུ་ས་ལ་སྶ ལོ་བྷ་ས་ཧ་ག་ཏཱ་ཀུ་ས་ལ་སྶཱ་ཏི ཨི་མེ་སཾ དྭི་ནྣཾ རཱ་སཱི་ནཾ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. རཱུ་པཱ་ཝ་ཙ་རཱ་རཱུ་པཱ་ཝ་ཙ་རེ་པི ཀུ་ས་ལཱ་ར་མྨ་ཎཱ་དྷི་པ་ཏི་མྷི ཨེ་སེ་ཝ ན་ཡོ. ཨ་པ་རི་ཡཱ་པ་ནྣ་ཀུ་ས་ལོ པ་ན ཨཱ་ར་མྨ་ཎཱ་དྷི་པ་ཏི ཀཱ་མཱ་ཝ་ཙ་ར་ཏོ ཉཱ་ཎ་ས་མྤ་ཡུ་ཏྟ་ཀུ་ས་ལ་སྶ ཙེ་ཝ ཉཱ་ཎ་ས་མྤ་ཡུ་ཏྟ་ཀི་རི་ཡ་སྶ ཙ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ཨ་ཀུ་ས་ལོ པ་ན ཨཱ་ར་མྨ་ཎཱ་དྷི་པ་ཏི ནཱ་མ ལོ་བྷ་ས་ཧ་ག་ཏ་ཙི་ཏྟུ་པྤཱ་དོ ཝུ་ཙྩ་ཏི. སོ ལོ་བྷ་ས་ཧ་ག་ཏཱ་ཀུ་ས་ལ་སྶེ་ཝ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ཀཱ་མཱ་ཝ་ཙ་རོ པ་ན ཝི་པཱ་ཀཱ་ར་མྨ་ཎཱ་དྷི་པ་ཏི ལོ་བྷ་ས་ཧ་ག་ཏཱ་ཀུ་ས་ལ་སྶེ་ཝ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ཏ་ཐཱ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀཱ་ར་མྨ་ཎཱ་དྷི་པ་ཏི. ལོ་ཀུ་ཏྟ་རོ པ་ན ཝི་པཱ་ཀཱ་ར་མྨ་ཎཱ་དྷི་པ་ཏི ཀཱ་མཱ་ཝ་ཙ་ར་ཏོ ཉཱ་ཎ་ས་མྤ་ཡུ་ཏྟ་ཀུ་ས་ལ་ཀི་རི་ཡཱ་ན་ཉྙེ་ཝ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ཀཱ་མཱ་ཝ་ཙ་རཱ་དི་བྷེ་ད་ཏོ པ་ན ཏི་ཝི་དྷོ་པི ཀི་རི་ཡཱ་ར་མྨ་ཎཱ་དྷི་པ་ཏི ལོ་བྷ་ས་ཧ་ག་ཏཱ་ཀུ་ས་ལ་སྶེ་ཝ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ཙ་ཏུ་ས་མུ་ཊྛཱ་ནི་ཀ་རཱུ་པ་ས་ངྑཱ་ཏོ རཱུ་པ་ཀྑ་ནྡྷོ ཨཱ་ར་མྨ་ཎཱ་དྷི་པ་ཏི ལོ་བྷ་ས་ཧ་ག་ཏཱ་ཀུ་ས་ལ་སྶེ་ཝ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏི. ནི་བྦཱ་ནཾ ཀཱ་མཱ་ཝ་ཙ་ར་ཏོ ཉཱ་ཎ་ས་མྤ་ཡུ་ཏྟ་ཀུ་ས་ལ་སྶ ཉཱ་ཎ་ས་མྤ་ཡུ་ཏྟ་ཀི་རི་ཡ་སྶ ལོ་ཀུ་ཏྟ་ར་ཀུ་ས་ལ་སྶ ལོ་ཀུ་ཏྟ་ར་ཝི་པཱ་ཀ་སྶ ཙཱ་ཏི ཨི་མེ་སཾ ཙ་ཏུ་ནྣཾ རཱ་སཱི་ནཾ ཨཱ་ར་མྨ་ཎཱ་དྷི་པ་ཏི་པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨ་དྷི་པ་ཏི་པ་ཙྩ་ཡ་ནི་དྡེ་ས་ཝ་ཎྞ་ནཱ.

༤. ཨ་ན་ནྟ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ

༤. ཨ་ན་ནྟ་ར་པ་ཙྩ་ཡ་ནི་དྡེ་སེ མ་ནོ་དྷཱ་ཏུ་ཡཱཏི ཝི་པཱ་ཀ་མ་ནོ་དྷཱ་ཏུ་ཡཱ. མ་ནོ་ཝི་ཉྙཱ་ཎ་དྷཱ་ཏུ་ཡཱཏི ས་ནྟཱི་ར་ཎ་ཀི་ཙྩཱ་ཡ ཨ་ཧེ་ཏུ་ཀ་ཝི་པཱ་ཀ་མ་ནོ་ཝི་ཉྙཱ་ཎ་དྷཱ་ཏུ་ཡཱ. ཏ་ཏོ པ་རཾ པ་ན ཝོ་ཊྛ་བྦ་ན་ཛ་ཝ་ན་ཏ་དཱ་ར་མྨ་ཎ་བྷ་ཝ་ངྒ་ཀི་ཙྩཱ མ་ནོ་ཝི་ཉྙཱ་ཎ་དྷཱ་ཏུ་ཡོ ཝ་ཏྟ་བྦཱ སི་ཡུཾ, ཏཱ ཨ་ཝུ་ཏྟཱ་པི ཨི་མི་ནཱ་ཝ ན་ཡེ་ན ཝེ་དི་ཏ་བྦཱ་ཏི ན་ཡཾ ད་སྶེ་ཏྭཱ དེ་ས་ནཱ ས་ངྑི་ཏྟཱ. ‘‘པུ་རི་མཱ པུ་རི་མཱ ཀུ་ས་ལཱ དྷ་མྨཱ’’ཏི་ཨཱ་དི་ཀེ ཙ ཚ་ཊྛ་ན་ཡེ ཏཱ ས་ངྒ་ཧི་ཏཱ་ཏི་པི ཨི་དྷ ན ཝུ་ཏྟཱ་ཏི ཝེ་དི་ཏ་བྦཱ. ཏ་ཏྠ པུ་རི་མཱ པུ་རི་མཱཏི ཚ་སུ དྭཱ་རེ་སུ་པི ཨ་ན་ནྟ་རཱ་ཏཱི་ཏཱ ཀུ་ས་ལ་ཛ་ཝ་ན་དྷ་མྨཱ ད་ཊྛ་བྦཱ. པ་ཙྪི་མཱ་ནཾ པ་ཙྪི་མཱ་ནནྟི ཨ་ན་ནྟ་ར་ཨུ་པྤ་ཛྫ་མཱ་ནཱ་ན་ཉྙེ་ཝ. ཀུ་ས་ལཱ་ནནྟི ས་དི་ས་ཀུ་ས་ལཱ་ནཾ. ཨ་བྱཱ་ཀ་ཏཱ་ནནྟི ཨི་དཾ པ་ན ཀུ་ས་ལཱ་ན་ནྟ་རཾ ཏ་དཱ་ར་མྨ་ཎ་བྷ་ཝ་ངྒ་ཕ་ལ་ས་མཱ་པ་ཏྟི་ཝ་སེ་ན ཝུ་ཏྟཾ. ཨ་ཀུ་ས་ལ་མཱུ་ལ་ཀེ ཨ་བྱཱ་ཀ་ཏཱ་ནནྟི ཏ་དཱ་ར་མྨ་ཎ་བྷ་ཝ་ངྒ་ས་ངྑཱ་ཏཱ་ན་ཉྙེ་ཝ. ཨ་བྱཱ་ཀ་ཏ་མཱུ་ལ་ཀེ ཨ་བྱཱ་ཀ་ཏཱ་ནནྟི ཨཱ་ཝ་ཛྫ་ན་ཛ་ཝ་ན་ཝ་སེ་ན ཝཱ བྷ་ཝ་ངྒ་ཝ་སེ་ན ཝཱ པ་ཝ་ཏྟཱ་ནཾ ཀི་རི་ཡ་ཝི་པཱ་ཀཱ་བྱཱ་ཀ་ཏཱ་ནཾ ཀི་རི་ཡ་མ་ནོ་དྷཱ་ཏུ་ཏོ པ་ཊྛཱ་ཡ པ་ན ཡཱ་ཝ ཝོ་ཊྛ་བྦ་ན་ཀི་ཙྩཱ མ་ནོ་ཝི་ཉྙཱ་ཎ་དྷཱ་ཏུ, ཏཱ་ཝ པ་ཝ་ཏྟེ་སུ ཝཱི་ཐི་ཙི་ཏྟེ་སུ་པི ཨ་ཡཾ ན་ཡོ ལ་བྦྷ་ཏེ་ཝ. ཀུ་ས་ལཱ་ནནྟི པ་ཉྩ་དྭཱ་རེ ཝོ་ཊྛ་བྦ་ནཱ་ན་ནྟ་རཱ་ནཾ མ་ནོ་དྭཱ་རེ ཨཱ་ཝ་ཛྫ་ནཱ་ནྟ་རཱ་ནཾ པ་ཋ་མ་ཛ་ཝ་ན་ཀུ་ས་ལཱ་ནཾ. ཨ་ཀུ་ས་ལཱ་ནནྟི པ་དེ་པི ཨེ་སེ་ཝ ན་ཡོ. ཡེ་སཾ ཡེ་སནྟི ཨི་དཾ ས་བྦེ་ས་མྤི ཨ་ན་ནྟ་ར་པ་ཙྩ་ཡ་དྷ་མྨཱ་ནཾ. ས་ངྑེ་པ་ལ་ཀྑ་ཎ་ནྟི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཨ་ན་ནྟ་ར་པ་ཙྩ་ཡོ ནཱ་མ ཋ་པེ་ཏྭཱ ནི་བྦཱ་ནཾ ཙ་ཏུ་བྷཱུ་མ་ཀོ ཨ་རཱུ་པ་དྷ་མྨ་རཱ་སི་ཡེ་ཝཱ་ཏི ཝེ་དི་ཏ་བྦོ. སོ ཛཱ་ཏི་ཝ་སེ་ན ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་ཏོ ཙ་ཏུ་དྷཱ བྷི་ཛྫ་ཏི. ཏ་ཏྠ ཀུ་ས་ལོ ཀཱ་མཱ་ཝ་ཙ་རཱ་དི་བྷེ་ད་ཏོ ཙ་ཏུ་བྦི་དྷོ ཧོ་ཏི, ཨ་ཀུ་ས་ལོ ཀཱ་མཱ་ཝ་ཙ་རོ་ཝ ཝི་པཱ་ཀོ ཙ་ཏུ་བྷཱུ་མ་ཀོ, ཀི་རི་ཡཱ་ན་ནྟ་ར་པ་ཙྩ་ཡོ པ་ན ཏེ བྷཱུ་མ་ཀོ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཀཱ་མཱ་ཝ་ཙ་ར་ཀུ་ས་ལོ ཨ་ཏྟ་ནཱ ས་དི་ས་སྶེ་ཝ ཀཱ་མཱ་ཝ་ཙ་ར་ཀུ་ས་ལ་སྶ ཨ་ན་ནྟ་ར་པ་ཙྩ་ཡོ ཧོ་ཏི. ཉཱ་ཎ་ས་མྤ་ཡུ་ཏྟ་ཀཱ་མཱ་ཝ་ཙ་ར་ཀུ་ས་ལོ པ་ན རཱུ་པཱ་ཝ་ཙ་ར་ཀུ་ས་ལ་སྶ ཨ་རཱུ་པཱ་ཝ་ཙ་ར་ཀུ་ས་ལ་སྶ ལོ་ཀུ་ཏྟ་ར་ཀུ་ས་ལ་སྶཱ་ཏི ཨི་མེ་སཾ ཏི་ཎྞཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ཀཱ་མཱ་ཝ་ཙ་ར་ཀུ་ས་ལོ ཙ ཀཱ་མཱ་ཝ་ཙ་ར་ཝི་པཱ་ཀ་སྶ, རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀ་སྶ, ཉཱ་ཎ་ས་མྤ་ཡུ་ཏྟོ ལོ་ཀུ་ཏྟ་ར་ཝི་པཱ་ཀ་སྶཱ་པཱི་ཏི ཨི་མེ་སཾ ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀུ་ས་ལོ རཱུ་པཱ་ཝ་ཙ་ར་ཀུ་ས་ལ་སྶ, ཉཱ་ཎ་ས་མྤ་ཡུ་ཏྟ་ཀཱ་མཱ་ཝ་ཙ་ར་ཝི་པཱ་ཀ་སྶ, རཱུ་པཱ་ཝ་ཙ་ར་ཝི་པཱ་ཀ་སྶཱ་ཏི ཨི་མེ་སཾ ཏི་ཎྞཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཀུ་ས་ལོ ཏེ་སཾ དྭི་ནྣཾ ཝི་པཱ་ཀཱ་ནཾ ཨ་ཏྟ་ནོ ཀུ་ས་ལ་སྶ ཝི་པཱ་ཀ་སྶ ཙཱ་ཏི ཨ་ཝི་སེ་སེ་ན ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ཝི་སེ་སེ་ན པ་ནེ་ཏྠ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ཀུ་ས་ལོ ཨ་ནཱ་གཱ་མི་ཕ་ལ་ས་ངྑཱ་ཏ་སྶ ལོ་ཀུ་ཏྟ་ར་ཝི་པཱ་ཀ་སྶ་པི ཨ་ན་ནྟ་ར་པ་ཙྩ་ཡོ ཧོ་ཏི. ལོ་ཀུ་ཏྟ་ར་ཀུ་ས་ལོ ལོ་ཀུ་ཏྟ་ར་ཝི་པཱ་ཀ་སྶེ་ཝ ཨ་ན་ནྟ་ར་པ་ཙྩ་ཡོ ཧོ་ཏི. ཨ་ཀུ་ས་ལོ ཨ་ཝི་སེ་སེ་ན ཨ་ཀུ་ས་ལ་སྶ ཙེ་ཝ ཀུ་ས་ལཱ་ཀུ་ས་ལ་ཝི་པཱ་ཀ་སྶ ཙ. ཝི་སེ་སེ་ན པ་ནེ་ཏྠ སུ་ཁ་མ་ཛ྄ཛྷ་ཏྟ་ཝེ་ད་ནཱ་ས་མྤ་ཡུ་ཏྟོ ཨ་ཀུ་ས་ལོ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀ་སྶཱ་པཱི་ཏི ཨི་མེ་སཾ ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི.

ཀཱ་མཱ་ཝ་ཙ་ར་ཝི་པཱ་ཀ་སྶ ཉཱ་ཎ་ས་མྤ་ཡུ་ཏྟོ ཝཱ ཉཱ་ཎ་ཝི་པྤ་ཡུ་ཏྟོ ཝཱ ཝི་པཱ་ཀོ ཀཱ་མཱ་ཝ་ཙ་ར་ཀི་རི་ཡཱ་ཝ་ཛྫ་ན་སྶ, ཉཱ་ཎ་ས་མྤ་ཡུ་ཏྟ་ཝི་པཱ་ཀོ པ་ནེ་ཏྠ པ་ཊི་ས་ནྡྷི་ཝ་སེ་ན ཨུ་པྤ་ཛྫ་མཱ་ན་སྶ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀ་སྶཱ་པཱི་ཏི ཨི་མེ་སཾ ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཝི་པཱ་ཀོ ས་ཧེ་ཏུ་ཀ་ཀཱ་མཱ་ཝ་ཙ་ར་ཝི་པཱ་ཀ་སྶ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ཝི་པཱ་ཀ་སྶ ཀཱ་མཱ་ཝ་ཙ་ར་ཀི་རི་ཡཱ་ཝ་ཛྫ་ན་སྶཱ་ཏི ཨི་མེ་སཾ ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཝི་པཱ་ཀོ ཏི་ཧེ་ཏུ་ཀ་ཀཱ་མཱ་ཝ་ཙ་ར་ཝི་པཱ་ཀ་སྶ ཨ་རཱུ་པཱ་ཝ་ཙ་ར་ཝི་པཱ་ཀ་སྶ ཀཱ་མཱ་ཝ་ཙ་ར་ཀི་རི་ཡཱ་ཝ་ཛྫ་ན་སྶཱ་ཏི ཏི་ཎྞཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ལོ་ཀུ་ཏྟ་ར་ཝི་པཱ་ཀོ ཏི་ཧེ་ཏུ་ཀ་ཀཱ་མཱ་ཝ་ཙ་ར་ཝི་པཱ་ཀ་སྶ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ལོ་ཀུ་ཏྟ་ར་ཝི་པཱ་ཀ་སྶཱ་ཏི ཙ་ཏུ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི.

ཀཱ་མཱ་ཝ་ཙ་ར་ཀི་རི་ཡཾ ཀཱ་མཱ་ཝ་ཙ་ར་ཀུ་ས་ལཱ་ཀུ་ས་ལ་སྶ ཙ་ཏུ་བྷཱུ་མ་ཀ་ཝི་པཱ་ཀ་སྶ ཏེ་བྷཱུ་མ་ཀ་ཀི་རི་ཡ་སྶཱ་ཏི ན་ཝ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀི་རི་ཡཾ ཏི་ཧེ་ཏུ་ཀ་ཀཱ་མཱ་ཝ་ཙ་ར་ཝི་པཱ་ཀ་སྶ རཱུ་པཱ་ཝ་ཙ་ར་ཝི་པཱ་ཀ་སྶ རཱུ་པཱ་ཝ་ཙ་ར་ཀི་རི་ཡ་སྶཱ་ཏི ཏི་ཎྞཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཀི་རི་ཡཾ ཏི་ཧེ་ཏུ་ཀ་ཀཱ་མཱ་ཝ་ཙ་ར་ཝི་པཱ་ཀ་སྶ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ལོ་ཀུ་ཏྟ་ར་ཝི་པཱ་ཀ་སྶ ཨ་རཱུ་པཱ་ཝ་ཙ་ར་ཀི་རི་ཡ་སྶཱ་ཏི པ་ཉྩ་ནྣཾ རཱ་སཱི་ནཾ ཨ་ན་ནྟ་ར་པ་ཙྩ་ཡོ ཧོ་ཏཱི་ཏི. ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨ་ན་ནྟ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ.

༥. ས་མ་ན་ནྟ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ

༥. ས་མ་ན་ནྟ་ར་པ་ཙྩ་ཡ་ནི་དྡེ་སོ་པི ཨི་མི་ནཱ ས་མཱ་ན་ག་ཏི་ཀོ་ཝ. ཨི་མེ པ་ན དྭེ པ་ཙྩ་ཡཱ མ་ཧཱ་ཝི་ཏྠཱ་རཱ, ཏ་སྨཱ ས་བྦ་ཙི་ཏྟུ་པྤ་ཏྟི་ཝ་སེ་ན ཏེ་སཾ ཨུ་པ་པ་རི་ཀྑི་ཏྭཱ ཝི་ཏྠཱ་རོ ག་ཧེ་ཏ་བྦོ་ཏི.

ས་མ་ན་ནྟ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ.

༦. ས་ཧ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ

༦. ས་ཧ་ཛཱ་ཏ་པ་ཙྩ་ཡ་ནི་དྡེ་སེ ཨ་ཉྙ་མ་ཉྙནྟི ཨ་ཉྙོ ཨ་ཉྙ་སྶ. ཨི་མི་ནཱ ཨེ་ཏེ་སཾ དྷ་མྨཱ་ནཾ ཨེ་ཀ་ཀྑ་ཎེ པ་ཙྩ་ཡ་བྷཱ་ཝ་ཉྩེ་ཝ པ་ཙྩ་ཡུ་པྤ་ནྣ་བྷཱ་ཝ་ཉྩ དཱི་པེ་ཏི. ཨོ་ཀྐ་ནྟི་ཀྑ་ཎེཏི པ་ཉྩ་ཝོ་ཀཱ་ར་བྷ་ཝེ པ་ཊི་ས་ནྡྷི་ཀྑ་ཎེ. ཏ་སྨི་ཉྷི ཁ་ཎེ ནཱ་མ་རཱུ་པཾ ཨོ་ཀྐ་ནྟཾ ཝི་ཡ པ་ཀྑ་ནྡ་ནྟཾ ཝི་ཡ པ་ར་ལོ་ཀ་ཏོ ཨི་མཾ ལོ་ཀཾ ཨཱ་ག་ནྟྭཱ པ་ཝི་ས་ནྟཾ ཝི་ཡ ཨུ་པྤ་ཛྫ་ཏི, ཏ་སྨཱ སོ ཁ་ཎོ ‘‘ཨོ་ཀྐ་ནྟི་ཀྑ་ཎོ’’ཏི ཝུ་ཙྩ་ཏི. ཨེ་ཏྠ ཙ རཱུ་པནྟི ཧ་ད་ཡ་ཝ་ཏྠུ་མ་ཏྟ་མེ་ཝ ཨ་དྷི་པྤེ་ཏཾ. ཏ་ཉྷི ནཱ་མ་སྶ, ནཱ་མ་ཉྩ ཏ་སྶ ཨ་ཉྙ་མ་ཉྙཾ ས་ཧ་ཛཱ་ཏ་པ་ཙྩ་ཡ་ཊྛཾ ཕ་ར་ཏི. ཙི་ཏྟ་ཙེ་ཏ་སི་ཀཱཏི པ་ཝ་ཏྟི་ཡཾ ཙ་ཏྟཱ་རོ ཁ་ནྡྷཱ. ས་ཧ་ཛཱ་ཏ་པ་ཙྩ་ཡེ་ནཱཏི ཨེ་ཏྠ ཙི་ཏྟ་ས་མུ་ཊྛཱ་ན་རཱུ་པཱ ཙི་ཏྟ་ཙེ་ཏ་སི་ཀཱ་ནཾ པ་ཙྩ་ཡ་ཊྛཾ ན ཕ་ར་ནྟི, ཏ་སྨཱ ‘‘ཨ་ཉྙ་མ་ཉྙ’’ནྟི ན ཝུ་ཏྟཾ. ཏ་ཐཱ ཨུ་པཱ་དཱ་རཱུ་པཱ བྷཱུ་ཏཱ་ནཾ. རཱུ་པི་ནོ དྷ་མྨཱ ཨ་རཱུ་པཱི་ནཾ དྷ་མྨཱ་ནནྟི ཧ་ད་ཡ་ཝ་ཏྠུ ཙ་ཏུ་ནྣཾ ཁ་ནྡྷཱ་ནཾ. ཀི་ཉྩི ཀཱ་ལེཏི ཀི་སྨི་ཉྩི ཀཱ་ལེ. ས་ཧ་ཛཱ་ཏ་པ་ཙྩ་ཡེ་ནཱཏི པ་ཊི་ས་ནྡྷིཾ ས་ནྡྷཱ་ཡ ཝུ་ཏྟཾ. ན ས་ཧ་ཛཱ་ཏ་པ་ཙྩ་ཡེ་ནཱཏི པ་ཝ་ཏྟིཾ ས་ནྡྷཱ་ཡ ཝུ་ཏྟཾ.

ཨ་ཡཾ པ་ན ‘ཙ་ཏྟཱ་རོ ཁ་ནྡྷཱ ཨ་རཱུ་པི་ནོ ཨ་ཉྙ་མ་ཉྙཾ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ’ཏི ཨེ་ཝཾ ཚ་ཧི ཀོ་ཊྛཱ་སེ་ཧི ཋི་ཏོ. ཏ་ཏྠ ཏ་ཡོ ཀོ་ཊྛཱ་སཱ ཨ་ཉྙ་མ་ཉྙ་ཝ་སེ་ན ཝུ་ཏྟཱ, ཏ་ཡོ ན ཨ་ཉྙ་མ་ཉྙ་ཝ་སེ་ན. ཏ་ཏྠ པ་ཋ་མ་ཀོ་ཊྛཱ་སེ ཨ་རཱུ་པ་མེ་ཝ པ་ཙྩ་ཡོ ཙེ་ཝ པ་ཙྩ་ཡུ་པྤ་ནྣ་ཉྩ, དུ་ཏི་ཡེ རཱུ་པ་མེ་ཝ, ཏ་ཏི་ཡེ ནཱ་མ་རཱུ་པཾ, ཙ་ཏུ་ཏྠེ པ་ཙྩ་ཡོ ཨ་རཱུ་པཾ, པ་ཙྩ་ཡུ་པྤ་ནྣཾ རཱུ་པཾ; པ་ཉྩ་མེ པ་ཙྩ་ཡོ་པི པ་ཙྩ་ཡུ་པྤ་ནྣ་མྤི རཱུ་པ་མེ་ཝ; ཚ་ཊྛེ པ་ཙྩ་ཡོ རཱུ་པཾ, པ་ཙྩ་ཡུ་པྤ་ནྣཾ ཨ་རཱུ་པ་ནྟི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ས་ཧ་ཛཱ་ཏ་པ་ཙྩ་ཡོ ཛཱ་ཏི་ཝ་སེ་ན ཀུ་ས་ལོ ཨ་ཀུ་ས་ལོ ཝི་པཱ་ཀོ ཀི་རི་ཡཾ རཱུ་པ་ནྟི པ་ཉྩ་དྷཱ བྷི་ཛྫ་ཏི. ཏ་ཏྠ ཀུ་ས་ལོ བྷཱུ་མི་ཏོ ཙ་ཏུ་བྦི་དྷོ ཧོ་ཏི, ཨ་ཀུ་ས་ལོ ཨེ་ཀ་ཝི་དྷོ་ཝ ཝི་པཱ་ཀོ ཙ་ཏུ་བྦི་དྷོ, ཀི་རི་ཡ་ས་ངྑཱ་ཏོ ཏི་ཝི་དྷོ, རཱུ་པཾ ཨེ་ཀ་ཝི་དྷཾ ཀཱ་མཱ་ཝ་ཙ་ར་མེ་ཝཱ་ཏི ཨེ་ཝཾ ཏཱ་ཝེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀ་མྤི ཀུ་ས་ལཾ པ་ཉྩ་ཝོ་ཀཱ་ར་བྷ་ཝེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ས་ཧ་ཛཱ་ཏ་པ་ཙྩ་ཡོ ཧོ་ཏི, ཏ་ཐཱ ཨ་ཀུ་ས་ལཾ. ཡཾ པ་ནེ་ཏྠ ཨ་རཱུ་པེ ཨུ་པྤ་ཛྫ་ཏི, ཏཾ ཨ་རཱུ་པ་དྷ་མྨཱ་ནཾ་ཡེ་ཝ ས་ཧ་ཛཱ་ཏ་པ་ཙྩ་ཡོ ཧོ་ཏི.

ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཾ ཙི་ཏྟ་ས་མུ་ཊྛཱ་ན་རཱུ་པ་སྶ ཙེ་ཝ ས་མྤ་ཡུ་ཏྟ་དྷ་མྨཱ་ན་ཉྩ ས་ཧ་ཛཱ་ཏ་པ་ཙྩ་ཡོ ཧོ་ཏི. ཡཾ པ་ནེ་ཏྠ རཱུ་པཾ ན ས་མུ་ཊྛཱ་པེ་ཏི, ཏཾ ས་མྤ་ཡུ་ཏྟ་དྷ་མྨཱ་ན་ཉྙེ་ཝ. ཡཾ པ་ཊི་ས་ནྡྷི་ཡཾ ཨུ་པྤ་ཛྫ་ཏི, ཏཾ ཀ་ཊ་ཏྟཱ་རཱུ་པཱ་ན་ཉྩཱ་པི ས་ཧ་ཛཱ་ཏ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཝི་པཱ་ཀཾ ས་མྤ་ཡུ་ཏྟ་དྷ་མྨཱ་ན་ཉྙེ་ཝ. ལོ་ཀུ་ཏྟ་ར་ཝི་པཱ་ཀཾ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ, ཙ་ཏུ་ཝོ་ཀཱ་རེ ཨ་རཱུ་པཱ་ན་ཉྙེ་ཝ. ཀཱ་མཱ་ཝ་ཙ་ར་ཨ་རཱུ་པཱ་ཝ་ཙ་ར་ཀི་རི་ཡཱ པ་ཉྩ་ཝོ་ཀཱ་རེ ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ས་ཧ་ཛཱ་ཏ་པ་ཙྩ་ཡོ ཧོ་ཏི, ཙ་ཏུ་ཝོ་ཀཱ་རེ ཨ་རཱུ་པཱ་ན་ཉྙེ་ཝ. རཱུ་པཱ་ཝ་ཙ་ར་ཀི་རི་ཡཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཨེ་ཀ་ནྟེ་ན ས་ཧ་ཛཱ་ཏ་པ་ཙྩ་ཡོ ཧོ་ཏི.

ཙ་ཏུ་ས་མུ་ཊྛཱ་ནི་ཀ་སྶ རཱུ་པ་སྶ ཀ་མྨ་ས་མུ་ཊྛཱ་ན་རཱུ་པེ ཨེ་ཀཾ མ་ཧཱ་བྷཱུ་ཏཾ ཏི་ཎྞཾ, ཏཱི་ཎི ཨེ་ཀ་སྶ, དྭེ དྭི་ནྣཾ མ་ཧཱ་བྷཱུ་ཏཱ་ནཾ, མ་ཧཱ་བྷཱུ་ཏཱ ཨུ་པཱ་དཱ་རཱུ་པ་སྶ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་པ་ཊི་ས་ནྡྷི་ཀྑ་ཎེ ཝ་ཏྠུ་རཱུ་པཾ ཝི་པཱ་ཀ་ཀྑ་ནྡྷཱ་ནཾ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ. ཨུ་ཏུ་ཙི་ཏྟཱ་ཧཱ་ར་ས་མུ་ཊྛཱ་ནེ་སུ པ་ན མ་ཧཱ་བྷཱུ་ཏཱ་ནི ཨ་ཉྙ་མ་ཉྙ་ཉྩེ་ཝ ཨུ་པཱ་དཱ་རཱུ་པ་སྶ ཙ ས་ཧ་ཛཱ་ཏ་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ས་ཧ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༧. ཨ་ཉྙ་མ་ཉྙ་པ་ཙྩ་ཡ་ནི་དྡེ་ས་ཝ་ཎྞ་ནཱ

༧. ཨ་ཉྙ་མ་ཉྙ་པ་ཙྩ་ཡ་ནི་དྡེ་སེ ས་ཧ་ཛཱ་ཏ་པ་ཙྩ་ཡ་ནི་དྡེ་ས་སྶ པུ་རི་མཱ་ནཾ ཏི་ཎྞཾ ཀོ་ཊྛཱ་སཱ་ནཾ ཝ་སེ་ན པཱ་ལི༹ ཨཱ་ག་ཏཱ. ཏ་སྶཱ ཏ་ཏྠ ཝུ་ཏྟ་ས་དི་སཱ་ཝ ཝ་ཎྞ་ནཱ་ཏི པུ་ན ན ག་ཧི་ཏཱ. ཨ་ཡ་མྤི ཙ ཨ་ཉྙ་མ་ཉྙ་པ་ཙྩ་ཡོ ཛཱ་ཏི་ཝ་སེ་ན ཀུ་ས་ལོ ཨ་ཀུ་ས་ལོ ཝི་པཱ་ཀོ ཀི་རི་ཡཾ རཱུ་པ་ནྟི པ་ཉྩ་དྷཱ བྷི་ནྣོ. ཏ་ཏྠ ཀུ་ས་ལོ བྷཱུ་མི་ཏོ ཙ་ཏུ་བྦི་དྷོ. ས་བྦཾ པུ་རི་མ་ས་དི་ས་མེ་ཝཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ས་བྦ་མྤི ཙ་ཏུ་བྷཱུ་མ་ཀཾ ཀུ་ས་ལཾ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ནཾ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ. ཏ་ཐཱ ཨ་ཀུ་ས་ལཾ. ཝི་པཱ་ཀེ པ་ན ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཾ པ་ཊི་ས་ནྡྷི་ཡཾ ཝ་ཏྠུ་རཱུ་པ་སྶ, པ་ཝ་ཏྟེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ. ཨ་རཱུ་པཱ་ཝ་ཙ་ར་ལོ་ཀུ་ཏྟ་ར་ཝི་པཱ་ཀཾ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ. ས་བྦ་མྤི ཀི་རི་ཡཾ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ. ཙ་ཏུ་ས་མུ་ཊྛཱ་ནི་ཀ་རཱུ་པ་སྶ ཀ་མྨ་ས་མུ་ཊྛཱ་ནེ ཨེ་ཀཾ མ་ཧཱ་བྷཱུ་ཏཾ ཏི་ཎྞཾ, ཏཱི་ཎི ཨེ་ཀ་སྶ, དྭེ དྭི་ནྣཾ མ་ཧཱ་བྷཱུ་ཏཱ་ནཾ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་པ་ཊི་ས་ནྡྷི་ཡཾ ཝ་ཏྠུ་རཱུ་པཾ ཝི་པཱ་ཀ་ཀྑ་ནྡྷཱ་ནཾ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ. ཨུ་ཏུ་ཙི་ཏྟཱ་ཧཱ་ར་ས་མུ་ཊྛཱ་ནེ་སུ མ་ཧཱ་བྷཱུ་ཏཱ་ནེ་ཝ མ་ཧཱ་བྷཱུ་ཏཱ་ནཾ ཨ་ཉྙ་མ་ཉྙ་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨ་ཉྙ་མ་ཉྙ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༨. ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ

༨. ནི་སྶ་ཡ་པ་ཙྩ་ཡ་ནི་དྡེ་སེ ས་ཧ་ཛཱ་ཏ་པ་ཙྩ་ཡ་ནི་དྡེ་ས་སྶ པུ་རི་མཱ་ནཾ པ་ཉྩ་ནྣཾ ཀོ་ཊྛཱ་སཱ་ནཾ ཝ་སེ་ན ས་ཧ་ཛཱ་ཏ་ནི་སྶ་ཡ་ན་ཡཾ ད་སྶེ་ཏྭཱ པུ་ན ཚ་ཊྛེ་ན ཀོ་ཊྛཱ་སེ་ན པུ་རེ་ཛཱ་ཏ་ནི་སྶ་ཡ་ན་ཡཾ ད་སྶེ་ཏུཾ ཙ་ཀྑཱ་ཡ་ཏ་ནཾ ཙ་ཀྑུ་ཝི་ཉྙཱ་ཎ་དྷཱ་ཏུ་ཡཱཏི་ཨཱ་དི ཨཱ་ར་དྡྷཾ. ཏ་ཏྠ ཡཾ རཱུ་པཾ ནི་སྶཱ་ཡཱཏི ཝ་ཏྠུ་རཱུ་པཾ ས་ནྡྷཱ་ཡ ཝུ་ཏྟཾ. ཏ་ཉྷི ནི་སྶཱ་ཡ ཏི་ཝི་དྷཱ མ་ནོ་དྷཱ་ཏུ, ཋ་པེ་ཏྭཱ ཨ་རཱུ་པ་ཝི་པཱ་ཀཾ དྭཱ་ས་ཏྟ་ཏི་ཝི་དྷཱ མ་ནོ་ཝི་ཉྙཱ་ཎ་དྷཱ་ཏཱུ་ཏི ཨི་མཱ་ནི པ་ཉྩ་ས་ཏྟ་ཏི ཙི་ཏྟཱ་ནི ཝ་ཏྟ་ནྟཱི་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ. ཨ་ཡ་མྤི ནི་སྶ་ཡ་པ་ཙྩ་ཡོ ཛཱ་ཏི་ཝ་སེ་ན ཀུ་ས་ལཱ་དི་བྷེ་ད་ཏོ པ་ཉྩ་དྷཱ་ཝ བྷི་ཛྫ་ཏི. ཏ་ཏྠ ཀུ་ས་ལོ བྷཱུ་མི་ཏོ ཙ་ཏུ་བྦི་དྷོ་ཝ ཨ་ཀུ་ས་ལོ ཨེ་ཀ་ཝི་དྷོ ཝི་པཱ་ཀོ ཙ་ཏུ་བྦི་དྷོ, ཀི་རི་ཡ་ས་ངྑཱ་ཏོ ཏི་ཝི་དྷོ, རཱུ་པཾ ཨེ་ཀ་ཝི་དྷ་མེ་ཝཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀ་མྤི ཀུ་ས་ལཾ པ་ཉྩ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ནི་སྶ་ཡ་པ་ཙྩ་ཡེ་ན པ་ཙྩ་ཡོ ཧོ་ཏི. ཏ་ཐཱ ཨ་ཀུ་ས་ལཾ. ཡཾ པ་ནེ་ཏྠ ཨཱ་རུ་པྤེ ཨུ་པྤ་ཛྫ་ཏི, ཏཾ ཨ་རཱུ་པ་དྷ་མྨཱ་ན་ཉྙེ་ཝ ནི་སྶ་ཡ་པ་ཙྩ་ཡོ ཧོ་ཏི. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཾ པ་ཝ་ཏྟེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པ་སྶཱ་པི ནི་སྶ་ཡ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཝི་པཱ་ཀཾ ས་མྤ་ཡུ་ཏྟ་ཀྑ་ནྡྷཱ་ནཾ་ཡེ་ཝ ཧོ་ཏི. ལོ་ཀུ་ཏྟ་ར་ཝི་པཱ་ཀཾ པ་ཉྩ་ཝོ་ཀཱ་རེ; ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཙ་ཏུ་ཝོ་ཀཱ་རེ ཨ་རཱུ་པ་སྶེ་ཝ ནི་སྶ་ཡ་པ་ཙྩ་ཡོ ཧོ་ཏི. ཀཱ་མཱ་ཝ་ཙ་ར་ཨ་རཱུ་པཱ་ཝ་ཙ་ར་ཀི་རི་ཡཱ པ་ཉྩ་ཝོ་ཀཱ་རེ ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ནི་སྶ་ཡ་པ་ཙྩ་ཡོ ཧོ་ཏི, ཙ་ཏུ་ཝོ་ཀཱ་རེ ཨ་རཱུ་པཱ་ན་ཉྙེ་ཝ. རཱུ་པཱ་ཝ་ཙ་ར་ཀི་རི་ཡཱ ས་མྤ་ཡུ་ཏྟ་ཀཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ཨེ་ཀ་ནྟེ་ན ནི་སྶ་ཡ་པ་ཙྩ་ཡོ ཧོ་ཏི.

ཙ་ཏུ་ས་མུ་ཊྛཱ་ནི་ཀ་རཱུ་པ་སྶ ཙ ཀ་མྨ་ས་མུ་ཊྛཱ་ན་རཱུ་པེ ཨེ་ཀཾ མ་ཧཱ་བྷཱུ་ཏཾ ཏི་ཎྞཾ, ཏཱི་ཎི ཨེ་ཀ་སྶ, དྭེ དྭི་ནྣཾ མ་ཧཱ་བྷཱུ་ཏཱ་ནཾ, མ་ཧཱ་བྷཱུ་ཏཱ ཨུ་པཱ་དཱ་རཱུ་པཱ་ནཾ, ཝ་ཏྠུ་རཱུ་པཾ པ་ཉྩ་ཝོ་ཀཱ་ར་བྷ་ཝེ ཙ་ཏུ་བྷཱུ་མ་ཀ་ཀུ་ས་ལ་སྶ, ཨ་ཀུ་ས་ལ་སྶ, ཋ་པེ་ཏྭཱ ཨཱ་རུ་པྤ་ཝི་པཱ་ཀ་ཉྩེ་ཝ དྭེ པ་ཉྩ་ཝི་ཉྙཱ་ཎཱ་ནི ཙ སེ་ས་ཏེ་བྷཱུ་མ་ཀ་ཝི་པཱ་ཀ་སྶ, ཏེ་བྷཱུ་མ་ཀ་ཀི་རི་ཡ་སྶཱ་ཏི ཨི་མེ་སཾ ཙ་ཏུ་ནྣཾ དྷ་མྨ་རཱ་སཱི་ནཾ ནི་སྶ་ཡ་པ་ཙྩ་ཡོ ཧོ་ཏི. ཙ་ཀྑཱ་ཡ་ཏ་ནཱ་དཱི་ནི པ་ཉྩ ས་ས་མྤ་ཡུ་ཏྟཱ་ནཾ ཙ་ཀྑུ་ཝི་ཉྙཱ་ཎཱ་དཱི་ནཾ ནི་སྶ་ཡ་པ་ཙྩ་ཡོ ཧོ་ཏི. ཨུ་ཏུ་ཙི་ཏྟཱ་ཧཱ་ར་ས་མུ་ཊྛཱ་ནེ་སུ པ་ན མ་ཧཱ་བྷཱུ་ཏཱ མ་ཧཱ་བྷཱུ་ཏཱ་ན་ཉྩེ་ཝ ཨུ་པཱ་དཱ་རཱུ་པ་སྶ ཙ ནི་སྶ་ཡ་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༩. ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ

༩. ཨུ་པ་ནི་སྶ་ཡ་པ་ཙྩ་ཡ་ནི་དྡེ་སེ པུ་རི་མཱ པུ་རི་མཱཏི ཨ་ན་ནྟ་རཱུ་པ་ནི་སྶ་ཡེ ས་མ་ན་ནྟ་རཱ་ཏཱི་ཏཱ ལ་བྦྷ་ནྟི, ཨཱ་ར་མྨ་ཎཱུ་པ་ནི་སྶ་ཡ་པ་ཀ་ཏཱུ་པ་ནི་སྶ་ཡེ་སུ ནཱ་ནཱ་ཝཱི་ཐི་ཝ་སེ་ན པུ་རི་མ་ཏ་རཱ. ཏེ ཏ་ཡོ་པི རཱ་ས་ཡོ ཀུ་ས་ལ་ཝ་སེ་ན ཀུ་ས་ལ་པ་དེ ལ་བྦྷ་ནྟི, ཀུ་ས་ལེ་ན པ་ན ཨ་ཀུ་ས་ལེ ས་མ་ན་ནྟ་རཱ་ཏཱི་ཏཱ ན ལ་བྦྷ་ནྟི. ཏེ་ནེ་ཝ ཝུ་ཏྟཾ – ‘‘ཨ་ཀུ་ས་ལཱ་ནཾ དྷ་མྨཱ་ནཾ ཀེ་ས་ཉྩི ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི. ཨི་ད་ཉྷི – ‘‘ཀུ་ས་ལོ དྷ་མྨོ ཨ་ཀུ་ས་ལ་སྶ དྷ་མྨ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ; ཨཱ་ར་མྨ་ཎཱུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ. ཨཱ་ར་མྨ་ཎཱུ་པ་ནི་སྶ་ཡོ – དཱ་ནཾ ད་ཏྭཱ སཱི་ལཾ ས་མཱ་དི་ཡི་ཏྭཱ ཨུ་པོ་ས་ཐ་ཀ་མྨཾ ཀ་ཏྭཱ ཏཾ ག་རུཾ ཀ་ཏྭཱ ཨ་སྶཱ་དེ་ཏི ཨ་བྷི་ན་ནྡ་ཏི, ཏཾ ག་རུཾ ཀ་ཏྭཱ རཱ་གོ ཨུ་པྤ་ཛྫ་ཏི, དི་ཊྛི ཨུ་པྤ་ཛྫ་ཏི, པུ་བྦེ སུ་ཙི་ཎྞཱ་ནི ག་རུཾ ཀ་ཏྭཱ ཨ་སྶཱ་དེ་ཏི ཨ་བྷི་ན་ནྡ་ཏི, ཏཾ ག་རུཾ ཀ་ཏྭཱ རཱ་གོ ཨུ་པྤ་ཛྫ་ཏི, དི་ཊྛི ཨུ་པྤ་ཛྫ་ཏི. ཛྷཱ་ནཱ ཝུ་ཊྛ་ཧི་ཏྭཱ ཛྷཱ་ནཾ ག་རུཾ ཀ་ཏྭཱ ཨ་སྶཱ་དེ་ཏི ཨ་བྷི་ན་ནྡ་ཏི, ཏཾ ག་རུཾ ཀ་ཏྭཱ རཱ་གོ ཨུ་པྤ་ཛྫ་ཏི དི་ཊྛི ཨུ་པྤ་ཛྫ་ཏི. པ་ཀ་ཏཱུ་པ་ནི་སྶ་ཡོ – ས་དྡྷཾ ཨུ་པ་ནི་སྶཱ་ཡ མཱ་ནཾ ཛ་པྤེ་ཏི, དི་ཊྛིཾ ག་ཎྷཱ་ཏི. སཱི་ལཾ སུ་ཏཾ ཙཱ་གཾ པ་ཉྙཾ ཨུ་པ་ནི་སྶཱ་ཡ མཱ་ནཾ ཛ་པྤེ་ཏི, དི་ཊྛིཾ ག་ཎྷཱ་ཏི. ས་དྡྷཱ སཱི་ལཾ སུ་ཏཾ ཙཱ་གོ པ་ཉྙཱ རཱ་ག་སྶ དོ་ས་སྶ མོ་ཧ་སྶ མཱ་ན་སྶ དི་ཊྛི་ཡཱ པ་ཏྠ་ནཱ་ཡ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི ཨི་མཾ ན་ཡཾ ས་ནྡྷཱ་ཡ ཝུ་ཏྟཾ. ཀུ་ས་ལེ་ན ཨ་བྱཱ་ཀ་ཏེ ཏ་ཡོ་པི ལ་བྦྷ་ནྟི, ཏ་ཐཱ ཨ་ཀུ་ས་ལེ་ན ཨ་ཀུ་ས་ལེ.

ཨ་ཀུ་ས་ལེ་ན པ་ན ཀུ་ས་ལེ ས་མ་ན་ནྟ་རཱ་ཏཱི་ཏཱ ན ལ་བྦྷ་ནྟི. ཏེ་ན ཝུ་ཏྟཾ – ‘‘ཀུ་ས་ལཱ་ནཾ དྷ་མྨཱ་ནཾ ཀེ་ས་ཉྩི ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ’’ཏི. ཨི་ད་མྤི ཧི – ‘‘ཨ་ཀུ་ས་ལོ དྷ་མྨོ ཀུ་ས་ལ་སྶ དྷ་མྨ་སྶ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ. པ་ཀ་ཏཱུ་པ་ནི་སྶ་ཡོ – རཱ་གཾ ཨུ་པ་ནི་སྶཱ་ཡ དཱ་ནཾ དེ་ཏི, སཱི་ལཾ ས་མཱ་དི་ཡ་ཏི, ཨུ་པོ་ས་ཐ་ཀ་མྨཾ ཀ་རོ་ཏི, ཛྷཱ་ནཾ ཨུ་པྤཱ་དེ་ཏི ཝི་པ་སྶ་ནཾ ཨུ་པྤཱ་དེ་ཏི, མ་གྒཾ ཨུ་པྤཱ་དེ་ཏི, ཨ་བྷི་ཉྙཾ ཨུ་པྤཱ་དེ་ཏི, ས་མཱ་པ་ཏྟིཾ ཨུ་པྤཱ་དེ་ཏི; དོ་སཾ མོ་ཧཾ མཱ་ནཾ དི་ཊྛིཾ པ་ཏྠ་ནཾ ཨུ་པ་ནི་སྶཱ་ཡ དཱ་ནཾ དེ་ཏི…པེ… ས་མཱ་པ་ཏྟིཾ ཨུ་པྤཱ་དེ་ཏི. རཱ་གོ དོ་སོ མོ་ཧོ མཱ་ནོ དི་ཊྛི པ་ཏྠ་ནཱ ས་དྡྷཱ་ཡ སཱི་ལ་སྶ སུ་ཏ་སྶ ཙཱ་ག་སྶ པ་ཉྙཱ་ཡ ཨུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡོ. པཱ་ཎཾ ཧ་ནྟྭཱ ཏ་སྶ པ་ཊི་གྷཱ་ཏ་ཏྠཱ་ཡ དཱ་ནཾ དེ་ཏཱི’’ཏི་ཨཱ་དི་ནཱ ན་ཡེ་ན པ་ཉྷཱ་ཝཱ་རེ ཨཱ་ག་ཏཾ པ་ཀ་ཏཱུ་པ་ནི་སྶ་ཡ་མེ་ཝ ས་ནྡྷཱ་ཡ ཝུ་ཏྟཾ. ཨ་ཀུ་ས་ལཾ པ་ན ཀུ་ས་ལ་སྶ ཨཱ་ར་མྨ་ཎཱུ་པ་ནི་སྶ་ཡོ ན ཧོ་ཏི. ཀ་སྨཱ? ཏཾ ག་རུཾ ཀ་ཏྭཱ ཏ་སྶ ཨ་པྤ་ཝ་ཏྟ་ན་ཏོ་ཏི ཡ་ཐཱ ཨ་ན་ནྟ་རཱུ་པ་ནི་སྶ་ཡོ, ཨེ་ཝཾ ཨཱ་ར་མྨ་ཎཱུ་པ་ནི་སྶ་ཡོ་པེ་ཏྠ ན ལ་བྦྷ་ཏཱི་ཏི ཝེ་དི་ཏ་བྦོ. ཨ་ཀུ་ས་ལེ་ན ཨ་བྱཱ་ཀ་ཏ་པ་དེ ཨཱ་ར་མྨ་ཎཱུ་པ་ནི་སྶ་ཡོ་ཝ ན ལ་བྦྷ་ཏི. ན ཧི ཨ་བྱཱ་ཀ་ཏཱ དྷ་མྨཱ ཨ་ཀུ་ས་ལཾ ག་རུཾ ཀ་རོ་ནྟི. ཡ་སྨཱ པ་ན ཨ་ན་ནྟ་ར་ཏཱ ལ་བྦྷ་ཏི, ཏ་སྨཱ ཨེ་ཏྠ ‘‘ཀེ་ས་ཉྩཱི’’ཏི ན ཝུ་ཏྟཾ. ཨ་བྱཱ་ཀ་ཏེ་ན པ་ན ཨ་བྱཱ་ཀ་ཏེ ཀུ་ས་ལེ ཨ་ཀུ་ས་ལེ་ཏི ཏཱི་སུ ན་ཡེ་སུ ཏ་ཡོ་པི ཨུ་པ་ནི་སྶ་ཡཱ ལ་བྦྷ་ནྟེ་ཝ. པུ་གྒ་ལོ་པི སེ་ནཱ་ས་ན་མྤཱིཏི ཨི་དཾ དྭ་ཡཾ པ་ཀ་ཏཱུ་པ་ནི་སྶ་ཡ་ཝ་སེ་ན ཝུ་ཏྟཾ. ཨི་ད་ཉྷི དྭ་ཡཾ ཀུ་ས་ལཱ་ཀུ་ས་ལ་པ་ཝ་ཏྟི་ཡཱ བ་ལ་ཝ་པ་ཙྩ་ཡོ ཧོ་ཏི. པ་ཙྩ་ཡ་བྷཱ་ཝོ ཙ་སྶ པ་ནེ་ཏྠ པ་རི་ཡཱ་ཡ་ཝ་སེ་ན ཝེ་དི་ཏ་བྦོ་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཨུ་པ་ནི་སྶ་ཡ་པ་ཙྩ་ཡོ ནཱ་མ ས་དྡྷིཾ ཨེ་ཀ་ཙྩཱ་ཡ པ་ཉྙ་ཏྟི་ཡཱ ས་བྦེ་པི ཙ་ཏུ་བྷཱུ་མ་ཀ་དྷ་མྨཱ. ཝི་བྷཱ་ག་ཏོ པ་ན ཨཱ་ར་མྨ་ཎཱུ་པ་ནི་སྶ་ཡཱ་དི་ཝ་སེ་ན ཏི་ཝི་དྷོ ཧོ་ཏི. ཏ་ཏྠ ཨཱ་ར་མྨ་ཎཱུ་པ་ནི་སྶ་ཡོ ཨཱ་ར་མྨ་ཎཱ་དྷི་པ་ཏི་ནཱ ནི་ནྣཱ་ནཱ་ཀ་ར་ཎོ་ཏི ཧེ་ཊྛཱ ཝུ་ཏྟ་ན་ཡེ་ནེ་ཝ ནཱ་ན་པྤ་ཀཱ་ར་བྷེ་ད་ཏོ ག་ཧེ་ཏ་བྦོ. ཨ་ན་ནྟ་རཱུ་པ་ནི་སྶ་ཡོ ཨ་ན་ནྟ་ར་པ་ཙྩ་ཡེ་ན ནི་ནྣཱ་ནཱ་ཀ་ར་ཎོ, སོ་པི ཧེ་ཊྛཱ ཝུ་ཏྟ་ན་ཡེ་ནེ་ཝ ནཱ་ན་པྤ་ཀཱ་ར་བྷེ་ད་ཏོ ཝེ་དི་ཏ་བྦོ. པ་ཙྩ་ཡུ་པྤ་ནྣ་ཏོ་པི ནེ་སཾ ཏ་ཏྠ ཝུ་ཏྟ་ན་ཡེ་ནེ་ཝ ཝི་ནི་ཙྪ་ཡོ ཝེ་དི་ཏ་བྦོ. པ་ཀ་ཏཱུ་པ་ནི་སྶ་ཡོ པ་ན ཛཱ་ཏི་ཝ་སེ་ན ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་བྷེ་ད་ཏོ པ་ཉྩ་ཝི་དྷོ ཧོ་ཏི, ཀུ་ས་ལཱ་དཱི་ནཾ པ་ན བྷཱུ་མི་བྷེ་ད་ཏོ ཨ་ནེ་ཀ་ཝི་དྷོ་ཏི ཨེ་ཝཾ ཏཱ་ཝེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཏེ་བྷཱུ་མ་ཀ་ཀུ་ས་ལོ ཙ་ཏུ་བྷཱུ་མ་ཀ་སྶཱ་པི ཀུ་ས་ལ་སྶ ཨ་ཀུ་ས་ལ་སྶ ཝི་པཱ་ཀ་ཀི་རི་ཡ་སྶཱ་ཏི ཙ་ཏུ་ནྣཾ རཱ་སཱི་ནཾ པ་ཀ་ཏཱུ་པ་ནི་སྶ་ཡོ ཧོ་ཏི. ལོ་ཀུ་ཏྟ་རོ ཨ་ཀུ་ས་ལ་སྶེ་ཝ ན ཧོ་ཏི. ཨ་མྷཱ་ཀཾ ཨཱ་ཙ་རི་ཡེ་ན ‘‘ལོ་ཀུ་ཏྟ་ར་དྷ་མྨོ ནི་བྦ་ཏྟི་ཏོ’’ཏི ཨི་མི་ནཱ པ་ན ན་ཡེ་ན ཨ་ཉྙེ་སཾ ཨ་ཀུ་ས་ལ་སྶཱ་པི ཧོ་ཏི. ཡ་སྶ ཝཱ ཨུ་པྤ་ཛྫི་སྶ་ཏི, ཏ་སྶཱ་པི ཨ་ནུ་ཏྟ་རེ་སུ ཝི་མོ་ཀྑེ་སུ པི་ཧཾ ཨུ་པ་ཊྛཱ་པ་ཡ་ཏོ ཨི་མི་ནཱ ན་ཡེ་ན ཧོ་ཏི་ཡེ་ཝ. ཨ་ཀུ་ས་ལོ ས་བྦེ་ས་མྤི ཙ་ཏུ་བྷཱུ་མ་ཀཱ་ནཾ ཁ་ནྡྷཱ་ནཾ པ་ཀ་ཏཱུ་པ་ནི་སྶ་ཡོ ཧོ་ཏི, ཏ་ཐཱ ཏེ་བྷཱུ་མ་ཀ་ཝི་པཱ་ཀོ. ལོ་ཀུ་ཏྟ་ར་ཝི་པཱ་ཀེ ཧེ་ཊྛི་མཱ་ནི ཏཱི་ཎི ཕ་ལཱ་ནི ཨ་ཀུ་ས་ལ་སྶེ་ཝ ན ཧོ་ནྟི, ཨུ་པ་རི་ཊྛི་མཾ ཀུ་ས་ལ་སྶཱ་པི. པུ་རི་མ་ན་ཡེ་ན པ་ན ཨ་ཉྙེ་སཾ ཝཱ ཡ་སྶ ཝཱ ཨུ་པྤ་ཛྫི་སྶ་ཏི, ཏ་སྶ ས་ནྟཱ་ནེ ས་བྦོ་པི ལོ་ཀུ་ཏྟ་ར་ཝི་པཱ་ཀོ ས་བྦེ་སཾ ཀུ་ས་ལཱ་དཱི་ནཾ ཨ་རཱུ་པ་ཀྑ་ནྡྷཱ་ནཾ པ་ཀ་ཏཱུ་པ་ནི་སྶ་ཡོ ཧོ་ཏི. ཀི་རི་ཡ་ས་ངྑཱ་ཏོ་པི པ་ཀ་ཏཱུ་པ་ནི་སྶ་ཡོ ཙ་ཏུ་བྷཱུ་མ་ཀཱ་ནཾ ཨ་ཀུ་ས་ལཱ་དི་ཁ་ནྡྷཱ་ནཾ ཧོ་ཏི་ཡེ་ཝ, ཏ་ཐཱ རཱུ་པ་ས་ངྑཱ་ཏོ. ས་ཡཾ པ་ན རཱུ་པཾ ཨི་མ་སྨིཾ པ་ཊྛཱ་ན་མ་ཧཱ་པ་ཀ་ར་ཎེ ཨཱ་ག་ཏ་ན་ཡེ་ན ཨུ་པ་ནི་སྶ་ཡ་པ་ཙྩ་ཡཾ ན ལ་བྷ་ཏི, སུ་ཏྟ་ནྟི་ཀ་པ་རི་ཡཱ་ཡེ་ན པ་ན ལ་བྷ་ཏཱི་ཏི ཝ་ཏྟུཾ ཝ་ཊྚ་ཏི. ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨུ་པ་ནི་སྶ་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༠. པུ་རེ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༠. པུ་རེ་ཛཱ་ཏ་པ་ཙྩ་ཡ་ནི་དྡེ་སེ པུ་རེ་ཛཱ་ཏ་པ་ཙྩ་ཡེ་ན པ་ཙྩ་ཡོཏི ཨེ་ཏྠ པུ་རེ་ཛཱ་ཏཾ ནཱ་མ ཡ་སྶ པ་ཙྩ་ཡོ ཧོ་ཏི, ཏ་ཏོ པུ་རི་མ་ཏ་རཾ ཛཱ་ཏཾ ཛཱ་ཏི་ཀྑ་ཎཾ ཨ་ཏི་ཀྐ་མི་ཏྭཱ ཋི་ཏི་ཀྑ་ཎ་པྤ་ཏྟཾ. ཙ་ཀྑཱ་ཡ་ཏ་ནནྟི་ཨཱ་དི ཝ་ཏྠུ་པུ་རེ་ཛཱ་ཏ་ཝ་སེ་ན ཝུ་ཏྟཾ. རཱུ་པཱ་ཡ་ཏ་ནནྟི་ཨཱ་དི ཨཱ་ར་མྨ་ཎ་པུ་རེ་ཛཱ་ཏ་ཝ་སེ་ན. ཀི་ཉྩི་ཀཱ་ལེ པུ་རེ་ཛཱ་ཏ་པ་ཙྩ་ཡེ་ནཱཏི པ་ཝ་ཏྟིཾ ས་ནྡྷཱ་ཡ ཝུ་ཏྟཾ. ཀི་ཉྩི་ཀཱ་ལེ ན པུ་རེ་ཛཱ་ཏ་པ་ཙྩ་ཡེ་ནཱཏི པ་ཊི་ས་ནྡྷིཾ ས་ནྡྷཱ་ཡ ཝུ་ཏྟཾ. ཨེ་ཝཾ ས་བྦ་ཐཱ་པི པ་ཉྩ་དྭཱ་རེ ཝ་ཏྠཱ་ར་མྨ་ཎ་ཝ་སེ་ན, མ་ནོ་དྭཱ་རེ ཝ་ཏྠུ་ཝ་སེ་ནེ་ཝཱ་ཡཾ པཱ་ལི༹ ཨཱ་ག་ཏཱ, པ་ཉྷཱ་ཝཱ་རེ པ་ན ‘‘ཨཱ་ར་མྨ་ཎ་པུ་རེ་ཛཱ་ཏཾ – སེ་ཀྑཱ ཝཱ པུ་ཐུ་ཛྫ་ནཱ ཝཱ ཙ་ཀྑུཾ ཨ་ནི་ཙྩ་ཏོ དུ་ཀྑ་ཏོ ཨ་ན་ཏྟ་ཏོ ཝི་པ་སྶ་ནྟཱི’’ཏི ཨཱ་ག་ཏ་ཏྟཱ མ་ནོ་དྭཱ་རེ་པི ཨཱ་ར་མྨ་ཎ་པུ་རེ་ཛཱ་ཏཾ ལ་བྦྷ་ཏེ་ཝ. ཨི་དྷ པ་ན སཱ་ཝ་སེ་ས་ཝ་སེ་ན དེ་ས་ནཱ ཀ་ཏཱ་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན པུ་རེ་ཛཱ་ཏ་པ་ཙྩ་ཡོ སུ་དྡྷ་རཱུ་པ་མེ་ཝ ཧོ་ཏི. ཏ་ཉྩ ཁོ ཨུ་པྤཱ་ད་ཀྑ་ཎཾ ཨ་ཏི་ཀྐ་མི་ཏྭཱ ཋི་ཏི་པྤ་ཏྟཾ ཨ་ཊྛཱ་ར་ས་ཝི་དྷཾ རཱུ་པ་རཱུ་པ་མེ་ཝ. ཏཾ ས་བྦ་མྤི ཝ་ཏྠུ་པུ་རེ་ཛཱ་ཏཾ ཨཱ་ར་མྨ་ཎ་པུ་རེ་ཛཱ་ཏ་ནྟི དྭི་དྷཱ ཋི་ཏཾ. ཏ་ཏྠ ཙ་ཀྑཱ་ཡ་ཏ་ནཾ…པེ… ཀཱ་ཡཱ་ཡ་ཏ་ནཾ ཝ་ཏྠུ་རཱུ་པ་ནྟི ཨི་དཾ ཝ་ཏྠུ་པུ་རེ་ཛཱ་ཏཾ ནཱ་མ. སེ་སཾ ཨི་མཱ་ཡ པཱ་ལི༹་ཡཱ ཨཱ་ག་ཏ་ཉྩ ཨ་ནཱ་ག་ཏ་ཉྩ ཝ་ཎྞོ ས་དྡོ ག་ནྡྷོ ར་སོ ཙ་ཏ་སྶོ དྷཱ་ཏུ་ཡོ ཏཱི་ཎི ཨི་ནྡྲི་ཡཱ་ནི ཀ་བ་ལཱི༹་ཀཱ་རོ ཨཱ་ཧཱ་རོ་ཏི དྭཱ་ད་ས་ཝི་དྷཾ རཱུ་པཾ ཨཱ་ར་མྨ་ཎ་པུ་རེ་ཛཱ་ཏ་པ་ཙྩ་ཡོ ནཱ་མཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཀྑཱ་ཡ་ཏ་ནཾ དྭི་ནྣཾ ཙ་ཀྑུ་ཝི་ཉྙཱ་ཎཱ་ནཾ པུ་རེ་ཛཱ་ཏ་པ་ཙྩ་ཡེ་ན པ་ཙྩ་ཡོ, ཏ་ཐཱ ཨི་ཏ་རཱ་ནི ཙ་ཏྟཱ་རི སོ་ཏ་ཝི་ཉྙཱ་ཎཱ་དཱི་ནཾ. ཝ་ཏྠུ་རཱུ་པཾ པ་ན ཋ་པེ་ཏྭཱ དྭི་པ་ཉྩ་ཝི་ཉྙཱ་ཎཱ་ནི ཙ་ཏྟཱ་རོ ཙ ཨཱ་རུ་པྤ་ཝི་པཱ་ཀེ སེ་སཱ་ནཾ ས་བྦེ་ས་མྤི ཙ་ཏུ་བྷཱུ་མ་ཀཱ་ནཾ ཀུ་ས་ལཱ་ཀུ་ས་ལཱ་བྱཱ་ཀ་ཏཱ་ནཾ ཙི་ཏྟ་ཙེ་ཏ་སི་ཀཱ་ནཾ པུ་རེ་ཛཱ་ཏ་པ་ཙྩ་ཡོ ཧོ་ཏི. རཱུ་པཱ་དཱི་ནི པ་ན པ་ཉྩཱ་ར་མྨ་ཎཱ་ནི དྭི་པ་ཉྩ་ཝི་ཉྙཱ་ཎཱ་ན་ཉྩེ་ཝ མ་ནོ་དྷཱ་ཏཱུ་ན་ཉྩ ཨེ་ཀ་ནྟེ་ནེ་ཝ པུ་རེ་ཛཱ་ཏ་པ་ཙྩ་ཡཱ ཧོ་ནྟི. ཨ་ཊྛཱ་ར་ས་ཝི་དྷ་མྤི པ་ནེ་ཏཾ རཱུ་པ་རཱུ་པཾ ཀཱ་མཱ་ཝ་ཙ་ར་ཀུ་ས་ལ་སྶ རཱུ་པཱ་ཝ་ཙ་ར་ཏོ ཨ་བྷི་ཉྙཱ་ཀུ་ས་ལ་སྶ ཨ་ཀུ་ས་ལ་སྶ ཏ་དཱ་ར་མྨ་ཎ་བྷཱ་ཝི་ནོ ཀཱ་མཱ་ཝ་ཙ་ར་ཝི་པཱ་ཀ་སྶ ཀཱ་མཱ་ཝ་ཙ་ར་ཀི་རི་ཡ་སྶ རཱུ་པཱ་ཝ་ཙ་ར་ཏོ ཨ་བྷི་ཉྙཱ་ཀི་རི་ཡ་སྶཱ་ཏི ཨི་མེ་སཾ ཚ་ནྣཾ རཱ་སཱི་ནཾ པུ་རེ་ཛཱ་ཏ་པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

པུ་རེ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༡. པ་ཙྪཱ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༡. པ་ཙྪཱ་ཛཱ་ཏ་པ་ཙྩ་ཡ་ནི་དྡེ་སེ པ་ཙྪཱ་ཛཱ་ཏཱཏི ཡ་སྶ ཀཱ་ཡ་སྶ པ་ཙྩ་ཡཱ ཧོ་ནྟི, ཏ་སྨིཾ ཨུ་པྤ་ཛྫི་ཏྭཱ ཋི་ཏེ ཛཱ་ཏཱ. པུ་རེ་ཛཱ་ཏ་སྶཱཏི ཏེ་སཾ ཨུ་པྤཱ་ད་ཏོ པ་ཋ་མ་ཏ་རཾ ཛཱ་ཏ་སྶ ཛཱ་ཏི་ཀྑ་ཎཾ ཨ་ཏི་ཀྐ་མི་ཏྭཱ ཋི་ཏི་པྤ་ཏྟ་སྶ. ཨི་མ་སྶ ཀཱ་ཡ་སྶཱཏི ཨི་མ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་བྷཱུ་ཏ་ཨུ་པཱ་དཱ་རཱུ་པ་ས་ངྑཱ་ཏ་སྶ ཀཱ་ཡ་སྶ. ཨེ་ཏྠ ཙ ཏི་ས་མུ་ཊྛཱ་ནི་ཀ་ཀཱ་ཡོ་ཏི ཨཱ་ཧཱ་ར་ས་མུ་ཊྛཱ་ན་སྶ ཨ་བྷཱ་ཝ་ཏོ བྲ་ཧྨ་པཱ་རི་ས་ཛྫཱ་དཱི་ནཾ ཀཱ་ཡོ ཝེ་དི་ཏ་བྦོ. ཨ་ཡ་མེ་ཏྠ པཱ་ལི༹་ཝ་ཎྞ་ནཱ. ཨ་ཡཾ པ་ན པ་ཙྪཱ་ཛཱ་ཏ་པ་ཙྩ་ཡོ ནཱ་མ ས་ངྑེ་པ་ཏོ ཋ་པེ་ཏྭཱ ཨཱ་རུ་པྤ་ཝི་པཱ་ཀེ ཨ་ཝ་སེ་སཱ ཙ་ཏུ་བྷཱུ་མ་ཀཱ ཨ་རཱུ་པ་ཀྑ་ནྡྷཱ. སོ ཛཱ་ཏི་ཝ་སེ་ན ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་བྷེ་དེ་ན ཙ་ཏུ་དྷཱ བྷི་ཛྫ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ པ་ཉྩ་ཝོ་ཀཱ་ར་བྷ་ཝེ ཨུ་པྤ་ནྣཾ ཙ་ཏུ་བྷཱུ་མ་ཀ་ཀུ་ས་ལ་ཉྩ ཨ་ཀུ་ས་ལ་ཉྩ ཨུ་པྤཱ་ད་ཀྑ་ཎཾ ཨ་ཏི་ཀྐ་མི་ཏྭཱ ཋི་ཏི་པྤ་ཏྟ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་རཱུ་པ་ཀཱ་ཡ་སྶ པ་ཙྪཱ་ཛཱ་ཏ་པ་ཙྩ་ཡོ ཧོ་ཏི. ཝི་པཱ་ཀེ་པི ཋ་པེ་ཏྭཱ པ་ཊི་ས་ནྡྷི་ཝི་པཱ་ཀཾ ཨ་ཝ་སེ་སོ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀོ ཏ་སྶེ་ཝ ཨེ་ཀ་ནྟེ་ན པ་ཙྪཱ་ཛཱ་ཏ་པ་ཙྩ་ཡོ ཧོ་ཏི. ལོ་ཀུ་ཏྟ་རོ་པི པ་ཉྩ་ཝོ་ཀཱ་རེ ཨུ་པྤ་ནྣ་ཝི་པཱ་ཀོ ཏ་སྶེ་ཝ པ་ཙྪཱ་ཛཱ་ཏ་པ་ཙྩ་ཡོ ཧོ་ཏི. ཏེ་བྷཱུ་མ་ཀ་ཀི་རི་ཡཱ་པི པ་ཉྩ་ཝོ་ཀཱ་རེ ཨུ་པྤ་ནྣཱ་ཝ ཝུ་ཏྟ་པྤ་ཀཱ་ར་སྶ ཀཱ་ཡ་སྶ པ་ཙྪཱ་ཛཱ་ཏ་པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

པ་ཙྪཱ་ཛཱ་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༢. ཨཱ་སེ་ཝ་ན་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༢. ཨཱ་སེ་ཝ་ན་པ་ཙྩ་ཡ་ནི་དྡེ་སེ པུ་རི་མཱ པུ་རི་མཱཏི ས་བྦ་ན་ཡེ་སུ ས་མ་ན་ནྟ་རཱ་ཏཱི་ཏཱ་ཝ ད་ཊྛ་བྦཱ. ཀ་སྨཱ པ་ནེ་ཏྠ ཨ་ན་ནྟ་ར་པ་ཙྩ་ཡེ ཝི་ཡ ‘‘པུ་རི་མཱ པུ་རི་མཱ ཀུ་ས་ལཱ དྷ་མྨཱ པ་ཙྪི་མཱ་ནཾ པ་ཙྪི་མཱ་ནཾ ཨ་བྱཱ་ཀ་ཏཱ་ནཾ དྷ་མྨཱ་ན’’ནྟི་ཨཱ་དི་ནཱ ན་ཡེ་ན བྷི་ནྣ་ཛཱ་ཏི་ཀེ་ཧི ས་དྡྷིཾ ནི་དྡེ་སོ ན ཀ་ཏོ་ཏི? ཨ་ཏྟ་ནོ ག་ཏིཾ གཱ་ཧཱ་པེ་ཏུཾ ཨ་ས་མ་ཏྠ་ཏཱ་ཡ. བྷི་ནྣ་ཛཱ་ཏི་ཀཱ ཧི བྷི་ནྣ་ཛཱ་ཏི་ཀཱ་ནཾ ཨ་རཱུ་པ་དྷ་མྨཱ་ནཾ ཨཱ་སེ་ཝ་ན་གུ་ཎེ་ན པ་གུ་ཎ་བ་ལ་ཝ་བྷཱ་ཝཾ སཱ་དྷ་ཡ་མཱ་ནཱ ཨ་ཏྟ་ནོ ཀུ་ས་ལཱ་དི་བྷཱ་ཝ་ས་ངྑཱ་ཏཾ ག་ཏིཾ གཱ་ཧཱ་པེ་ཏུཾ ན ས་ཀྐོ་ནྟི. ཏ་སྨཱ ཏེ་ཧི ས་དྡྷིཾ ནི་དྡེ་སཾ ཨ་ཀ་ཏྭཱ ཡེ ཡེ་སཾ ཝཱ་ས་ནཱ་ས་ངྑཱ་ཏེ་ན ཨཱ་སེ་ཝ་ནེ་ན པ་གུ་ཎ་ཏ་ར་བ་ལ་ཝ་ཏ་ར་བྷཱ་ཝ་ཝི་སི་ཊྛཾ ཨ་ཏྟ་ནོ ཀུ་ས་ལཱ་དི་བྷཱ་ཝ་ས་ངྑཱ་ཏཾ ག་ཏིཾ གཱ་ཧཱ་པེ་ཏུཾ ས་ཀྐོ་ནྟི, ཏེ་སཾ ཏེ་ཧི ས་མཱ་ན་ཛཱ་ཏི་ཀེ་ཧེ་ཝ ས་དྡྷིཾ ནི་དྡེ་སོ ཀ་ཏོ་ཏི ཝེ་དི་ཏ་བྦོ. ཨ་ཐ ཝི་པཱ་ཀཱ་བྱཱ་ཀ་ཏཾ ཀ་སྨཱ ན ག་ཧི་ཏ་ནྟི? ཨཱ་སེ་ཝ་ནཱ་བྷཱ་ཝེ་ན. ཝི་པཱ་ཀ་ཉྷི ཀ་མྨ་ཝ་སེ་ན ཝི་པཱ་ཀ་བྷཱ་ཝ་པྤ་ཏྟཾ ཀ་མྨ་པ་རི་ཎཱ་མི་ཏཾ ཧུ་ཏྭཱ ཝ་ཏྟ་ཏི ནི་རུ་སྶཱ་ཧཾ དུ་བྦ་ལ་ནྟི ཏཾ ཨཱ་སེ་ཝ་ན་གུ་ཎེ་ན ཨ་ཏྟ་ནོ ས་བྷཱ་ཝཾ གཱ་ཧཱ་པེ་ཏྭཱ པ་རི་བྷཱ་ཝེ་ཏྭཱ ནེ་ཝ ཨ་ཉྙཾ ཝི་པཱ་ཀཾ ཨུ་པྤཱ་དེ་ཏུཾ ས་ཀྐོ་ཏི, ན པུ་རི་མ་ཝི་པཱ་ཀཱ་ནུ་བྷཱ་ཝཾ ག་ཧེ་ཏྭཱ ཨུ་པྤ་ཛྫི་ཏུ་ནྟི. ཀ་མྨ་ཝེ་ག་ཀྑི་ཏྟཾ པ་ན པ་ཏི་ཏཾ ཝི་ཡ ཧུ་ཏྭཱ ཨུ་པྤ་ཛྫ་ཏཱི་ཏི ས་བྦ་ཐཱ་པི ཝི་པཱ་ཀེ ཨཱ་སེ་ཝ་ནཾ ན་ཏྠཱི་ཏི ཨཱ་སེ་ཝ་ནཱ་བྷཱ་ཝེ་ན ཝི་པཱ་ཀཾ ན ག་ཧི་ཏཾ. ཀུ་ས་ལཱ་ཀུ་ས་ལ་ཀི་རི་ཡཱ་ན་ནྟ་རཾ ཨུ་པྤ་ཛྫ་མཱ་ན་མྤི ཙེ་ཏཾ ཀ་མྨ་པ་ཊི་བ་དྡྷ་ཝུ་ཏྟི་ཏཱ་ཡ ཨཱ་སེ་ཝ་ན་གུ་ཎཾ ན ག་ཎྷཱ་ཏཱི་ཏི ཀུ་ས་ལཱ་ད་ཡོ་པི་སྶ ཨཱ་སེ་ཝ་ན་པ་ཙྩ་ཡཱ ན ཧོ་ནྟི. ཨ་པི་ཙ ནཱ་ནཱ་ཛཱ་ཏི་ཀ་ཏྟཱ་པེ་ཏེ ན ཧོ་ནྟི་ཡེ་ཝ. བྷཱུ་མི་ཏོ པ་ན ཨཱ་ར་མྨ་ཎ་ཏོ ཝཱ ནཱ་ནཱ་ཛཱ་ཏི་ཀ་ཏྟཾ ནཱ་མ ན་ཏྠི. ཏ་སྨཱ ཀཱ་མཱ་ཝ་ཙ་ར་ཀུ་ས་ལ་ཀི་རི་ཡཱ་མ་ཧ་གྒ་ཏ་ཀུ་ས་ལ་ཀི་རི་ཡཱ་ན་མྤི, ས་ངྑཱ་རཱ་ར་མྨ་ཎ་ཉྩ ཨ་ནུ་ལོ་མ་ཀུ་ས་ལཾ ནི་བྦཱ་ནཱ་ར་མྨ་ཎ་སྶ གོ་ཏྲ་བྷུ་ཀུ་ས་ལ་སྶ ཨཱ་སེ་ཝ་ན་པ་ཙྩ་ཡོ ཧོ་ཏི་ཡེ་ཝཱ་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ. ཨ་ཡཾ པ་ན ཨཱ་སེ་ཝ་ན་པ་ཙྩ་ཡོ ཛཱ་ཏི་ཏོ ཏཱ་ཝ ཀུ་ས་ལོ ཨ་ཀུ་ས་ལོ ཀི་རི་ཡཱ་བྱཱ་ཀ་ཏོ་ཏི ཏི་དྷཱ ཋི་ཏོ. ཏ་ཏྠ ཀུ་ས་ལོ བྷཱུ་མི་ཏོ ཀཱ་མཱ་ཝ་ཙ་རོ རཱུ་པཱ་ཝ་ཙ་རོ ཨ་རཱུ་པཱ་ཝ་ཙ་རོ་ཏི ཏི་ཝི་དྷོ ཧོ་ཏི, ཨ་ཀུ་ས་ལོ ཀཱ་མཱ་ཝ་ཙ་རོ་ཝ ཀི་རི་ཡཱ་བྱཱ་ཀ་ཏོ ཀཱ་མཱ་ཝ་ཙ་རོ རཱུ་པཱ་ཝ་ཙ་རོ ཨ་རཱུ་པཱ་ཝ་ཙ་རོ་ཏི ཏི་ཝི་དྷོ་ཝ, ལོ་ཀུ་ཏྟ་རོ ཨཱ་སེ་ཝ་ན་པ་ཙྩ་ཡོ ནཱ་མ ན་ཏྠཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཀཱ་མཱ་ཝ་ཙ་ར་ཀུ་ས་ལཾ ཨ་ཏྟ་ནོ ཨ་ན་ནྟ་ར་སྶ ཀཱ་མཱ་ཝ་ཙ་ར་ཀུ་ས་ལ་སྶེ་ཝ. ཡཾ པ་ནེ་ཏྠ ཉཱ་ཎ་ས་མྤ་ཡུ་ཏྟཾ, ཏཾ ཨ་ཏྟ་ནཱ ས་དི་ས་ཝེ་ད་ན་སྶ རཱུ་པཱ་ཝ་ཙ་ར་ཀུ་ས་ལ་སྶ ཨ་རཱུ་པཱ་ཝ་ཙ་ར་ཀུ་ས་ལ་སྶ ལོ་ཀུ་ཏྟ་ར་ཀུ་ས་ལ་སྶཱ་ཏི ཨི་མེ་སཾ རཱ་སཱི་ནཾ ཨཱ་སེ་ཝ་ན་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀུ་ས་ལཾ པ་ན རཱུ་པཱ་ཝ་ཙ་ར་ཀུ་ས་ལ་སྶེ་ཝ. ཨ་རཱུ་པཱ་ཝ་ཙ་ར་ཀུ་ས་ལཾ ཨ་རཱུ་པཱ་ཝ་ཙ་ར་ཀུ་ས་ལ་སྶེ་ཝ. ཨ་ཀུ་ས་ལཾ པ་ན ཨ་ཀུ་ས་ལ་སྶེ་ཝ ཨཱ་སེ་ཝ་ན་པ་ཙྩ་ཡོ ཧོ་ཏི. ཀི་རི་ཡ་ཏོ པ་ན ཀཱ་མཱ་ཝ་ཙ་ར་ཀི་རི་ཡ་ས་ངྑཱ་ཏོ ཏཱ་ཝ ཀཱ་མཱ་ཝ་ཙ་ར་ཀི་རི་ཡ་སྶེ་ཝ. ཡོ པ་ནེ་ཏྠ ཉཱ་ཎ་ས་མྤ་ཡུ་ཏྟོ, སོ ཨ་ཏྟ་ནཱ ས་དི་ས་ཝེ་ད་ན་སྶ རཱུ་པཱ་ཝ་ཙ་ར་ཀི་རི་ཡ་སྶ ཨ་རཱུ་པཱ་ཝ་ཙ་ར་ཀི་རི་ཡ་སྶཱ་ཏི ཨི་མེ་སཾ རཱ་སཱི་ནཾ ཨཱ་སེ་ཝ་ན་པ་ཙྩ་ཡོ ཧོ་ཏི. རཱུ་པཱ་ཝ་ཙ་ར་ཀི་རི་ཡ་ས་ངྑཱ་ཏོ པ་ན རཱུ་པཱ་ཝ་ཙ་ར་ཀི་རི་ཡ་སྶེ་ཝ, ཨ་རཱུ་པཱ་ཝ་ཙ་ར་ཀི་རི་ཡ་ས་ངྑཱ་ཏོ ཨ་རཱུ་པཱ་ཝ་ཙ་ར་ཀི་རི་ཡ་སྶེ་ཝ ཨཱ་སེ་ཝ་ན་པ་ཙྩ་ཡོ ཧོ་ཏི. ཝི་པཱ་ཀོ པ་ན ཨེ་ཀ་དྷ་མྨ་སྶཱ་པི ཨེ་ཀ་དྷ་མྨོ་པི ཝཱ ཀོ་ཙི ཝི་པཱ་ཀ་སྶ ཨཱ་སེ་ཝ་ན་པ་ཙྩ་ཡོ ན་ཏྠཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨཱ་སེ་ཝ་ན་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༣. ཀ་མྨ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༣. ཀ་མྨ་པ་ཙྩ་ཡ་ནི་དྡེ་སེ ཀ་མྨནྟི ཙེ་ཏ་ནཱ་ཀ་མྨ་མེ་ཝ. ཀ་ཊ་ཏྟཱ ཙ རཱུ་པཱ་ནནྟི ཀ་མྨ་སྶ ཀ་ཊ་ཏྟཱ ཨུ་པྤ་ནྣ་རཱུ་པཱ་ནཾ. ཀ་མྨ་པ་ཙྩ་ཡེ་ནཱཏི ཨ་ནེ་ཀཱ་ན་མྤི ཀ་པྤ་ཀོ་ཊཱི་ནཾ མ་ཏྠ་ཀེ ཨ་ཏྟ་ནོ ཕ་ལཾ ཨུ་པྤཱ་དེ་ཏུཾ ས་མ་ཏྠེ་ན ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ནཱ་ཏི ཨ་ཏྠོ. ཀུ་ས་ལཱ་ཀུ་ས་ལ་ཉྷི ཀ་མྨཾ ཨ་ཏྟ་ནོ པ་ཝ་ཏྟི་ཀྑ་ཎེ ཕ་ལཾ ན དེ་ཏི. ཡ་དི ད་དེ་ཡྻ, ཡཾ མ་ནུ་སྶོ དེ་ཝ་ལོ་ཀཱུ་པ་གཾ ཀུ་ས་ལ་ཀ་མྨཾ ཀ་རོ་ཏི, ཏ་སྶཱ་ནུ་བྷཱ་ཝེ་ན ཏ་སྨིཾ་ཡེ་ཝ ཁ་ཎེ དེ་ཝོ བྷ་ཝེ་ཡྻ. ཡ་སྨིཾ པ་ན ཁ་ཎེ ཏཾ ཀ་ཏཾ, ཏ་ཏོ ཨ་ཉྙ་སྨིཾ ཁ་ཎེ ཨ་ཝི་ཛྫ་མཱ་ན་མྤི ཀེ་ཝ་ལཾ ཀ་ཊ་ཏྟཱ་ཡེ་ཝ དི་ཊྛེ་ཝ དྷ་མྨེ ཨུ་པ་པ་ཛྫེ ཝཱ ཨ་པ་རེ ཝཱ པ་རི་ཡཱ་ཡེ ཨ་ཝ་སེ་ས་པ་ཙྩ་ཡ་ས་མཱ་ཡོ་གེ ས་ཏི ཕ་ལཾ ཨུ་པྤཱ་དེ་ཏི ནི་རུ་དྡྷཱ་པི པུ་རི་མ་སི་པྤཱ་དི་ཀི་རི་ཡཱ ཝི་ཡ ཀཱ་ལ་ནྟ་རེ པ་ཙྪི་མ་སི་པྤཱ་དི་ཀི་རི་ཡཱ་ཡ. ཏ་སྨཱ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡོ་ཏི ཝུ་ཙྩ་ཏི. ཙེ་ཏ་ནཱ ས་མྤ་ཡུ་ཏྟ་ཀཱ་ནཾ དྷ་མྨཱ་ནནྟི ཡཱ ཀཱ་ཙི ཙེ་ཏ་ནཱ ཨ་ཏྟ་ནཱ ས་མྤ་ཡུ་ཏྟ་ཀཱ་ནཾ དྷ་མྨཱ་ནཾ. ཏཾ་ས་མུ་ཊྛཱ་ནཱ་ནནྟི ཨི་མི་ནཱ པ་ཊི་ས་ནྡྷི་ཀྑ་ཎེ ཀ་ཊ་ཏྟཱ་རཱུ་པ་མྤི ག་ཎྷཱ་ཏི. ཀ་མྨ་པ་ཙྩ་ཡེ་ནཱཏི ཨི་དཾ ས་ཧ་ཛཱ་ཏ་ཙེ་ཏ་ནཾ ས་ནྡྷཱ་ཡ ཝུ་ཏྟཾ. ཀུ་ས་ལཱ་དཱི་སུ ཧི ཡཱ ཀཱ་ཙི ས་ཧ་ཛཱ་ཏ་ཙེ་ཏ་ནཱ སེ་ས་དྷ་མྨཱ་ནཾ ཙི་ཏྟ་པ་ཡོ་ག་ས་ངྑཱ་ཏེ་ན ཀི་རི་ཡཱ་བྷཱ་ཝེ་ན ཨུ་པ་ཀཱ་རི་ཀཱ ཧོ་ཏི. ཏ་སྨཱ ས་ཧ་ཛཱ་ཏ་ཀ་མྨ་པ་ཙྩ་ཡོ་ཏི ཝུ་ཙྩ་ཏི. ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཀ་མྨ་པ་ཙྩ་ཡོ ཨ་ཏྠ་ཏོ ཙ་ཏུ་བྷཱུ་མི་ཀ་ཙེ་ཏ་ནཱ་མ་ཏྟ་མེ་ཝ. སོ ཧི ཛཱ་ཏི་བྷེ་ད་ཏོ ཀུ་ས་ལོ ཨ་ཀུ་ས་ལོ ཝི་པཱ་ཀོ ཀི་རི་ཡཱ་ཏི ཙ་ཏུ་དྷཱ བྷི་ཛྫ་ཏི. ཏ་ཏྠ ཀུ་ས་ལོ བྷཱུ་མི་ཏོ ཀཱ་མཱ་ཝ་ཙ་རཱ་དི་ཝ་སེ་ན ཙ་ཏུ་དྷཱ བྷི་ཛྫ་ཏི. ཨ་ཀུ་ས་ལོ ཨེ་ཀ་དྷཱ་ཝ ཝི་པཱ་ཀོ ཙ་ཏུ་དྷཱ, ཀི་རི་ཡཱ ཏི་དྷཱ་ཝཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ས་ཧ་ཛཱ་ཏཱ ཀཱ་མཱ་ཝ་ཙ་ར་ཀུ་ས་ལ་ཙེ་ཏ་ནཱ པ་ཉྩ་ཝོ་ཀཱ་རེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཙ་ཏུ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡོ ཧོ་ཏི. ཨུ་པྤ་ཛྫི་ཏྭཱ ནི་རུ་དྡྷཱ པ་ན ཨ་ཏྟ་ནོ ཝི་པཱ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ན པ་ཙྩ་ཡོ ཧོ་ཏི. སཱ ཙ ཁོ པ་ཉྩ་ཝོ་ཀཱ་རེ་ཡེ་ཝ, ན ཨ་ཉྙ་ཏྠ. ས་ཧ་ཛཱ་ཏཱ རཱུ་པཱ་ཝ་ཙ་ར་ཀུ་ས་ལ་ཙེ་ཏ་ནཱ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཨེ་ཀ་ནྟེ་ནེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཨུ་པྤ་ཛྫི་ཏྭཱ ནི་རུ་དྡྷཱ པ་ན ཨ་ཏྟ་ནོ ཝི་པཱ་ཀཱ་ན་ཉྩེ་ཝ ཀ་ཊ་ཏྟཱ་རཱུ་པཱ་ན་ཉྩ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ན པ་ཙྩ་ཡོ. ཨ་རཱུ་པཱ་ཝ་ཙ་རཱ པ་ན ལོ་ཀུ་ཏྟ་རཱ ཙ ས་ཧ་ཛཱ་ཏཱ ཀུ་ས་ལ་ཙེ་ཏ་ནཱ པ་ཉྩ་ཝོ་ཀཱ་རེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ, ཙ་ཏུ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཨུ་པྤ་ཛྫི་ཏྭཱ ནི་རུ་དྡྷཱ པ་ནེ་སཱ དུ་ཝི་དྷཱ་པི ཨ་ཏྟ་ནོ ཨ་ཏྟ་ནོ ཝི་པཱ་ཀ་ཀྑ་ནྡྷཱ་ན་ཉྙེ་ཝ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ན པ་ཙྩ་ཡོ. ས་ཧ་ཛཱ་ཏཱ ཨ་ཀུ་ས་ལ་ཙེ་ཏ་ནཱ པ་ཉྩ་ཝོ་ཀཱ་རེ ཨ་ཏྟ་ནཱ ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པཱ་ན་ཉྩ ཙ་ཏུ་ཝོ་ཀཱ་རེ ཨ་རཱུ་པ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཨུ་པྤ་ཛྫི་ཏྭཱ ནི་རུ་དྡྷཱ པ་ན ཝི་པཱ་ཀ་ཀྑ་ནྡྷཱ་ན་ཉྩེ་ཝ ཀ་ཊ་ཏྟཱ་རཱུ་པཱ་ན་ཉྩ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ན པ་ཙྩ་ཡོ.

ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཏོ ཝི་པཱ་ཀ་ཙེ་ཏ་ནཱ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ནཾ པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པཱ་ནཾ, པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ན་ཉྩ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཨ་རཱུ་པཱ་ཝ་ཙ་ར་ཝི་པཱ་ཀ་ཙེ་ཏ་ནཱ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ལོ་ཀུ་ཏྟ་ར་ཝི་པཱ་ཀ་ཙེ་ཏ་ནཱ པ་ཉྩ་ཝོ་ཀཱ་རེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཙ་ཏུ་ཝོ་ཀཱ་རེ ཨ་རཱུ་པ་སྶེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཏེ་བྷཱུ་མི་ཀཱ ཀི་རི་ཡ་ཙེ་ཏ་ནཱ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ. ཡཱ པ་ནེ་ཏྠ ཨཱ་རུ་པྤེ ཨུ་པྤ་ཛྫ་ཏི, སཱ ཨ་རཱུ་པ་དྷ་མྨཱ་ན་ཉྙེ་ཝ ས་ཧ་ཛཱ་ཏ་ཀ་མྨ་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཀ་མྨ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༤. ཝི་པཱ་ཀ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༤. ཝི་པཱ་ཀ་པ་ཙྩ་ཡ་ནི་དྡེ་སེ ཝི་པཱ་ཀཱ ཙ་ཏྟཱ་རོ ཁ་ནྡྷཱཏི ཡ་སྨཱ ཀ་མྨ་ས་མུ་ཊྛཱ་ནཱ་པི རཱུ་པཱ ཝི་པཱ་ཀཱ ན ཧོ་ནྟི, ཏ་སྨཱ ‘‘ཝི་པཱ་ཀཱ’’ཏི ཝ་ཏྭཱ ‘‘ཙ་ཏྟཱ་རོ ཁ་ནྡྷཱ’’ཏི ཝུ་ཏྟཾ. ཨེ་ཝཾ ཨ་ཡཾ པཱ་ལི༹ ཨ་རཱུ་པ་དྷ་མྨཱ་ན་ཉྙེ་ཝ ཝི་པཱ་ཀ་པ་ཙྩ་ཡ་ཝ་སེ་ན ཨཱ་ག་ཏཱ. པ་ཉྷཱ་ཝཱ་རེ པ་ན ‘‘ཝི་པཱ་ཀཱ་བྱཱ་ཀ་ཏོ ཨེ་ཀོ ཁ་ནྡྷོ ཏི་ཎྞཾ ཁ་ནྡྷཱ་ནཾ ཙི་ཏྟ་ས་མུ་ཊྛཱ་ནཱ་ན་ཉྩ རཱུ་པཱ་ནཾ ཝི་པཱ་ཀ་པ་ཙྩ་ཡེ་ན པ་ཙྩ་ཡོ. པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏོ ཨེ་ཀོ ཁ་ནྡྷོ ཏི་ཎྞ་ནྣཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ཝི་པཱ་ཀ་པ་ཙྩ་ཡེ་ན པ་ཙྩ་ཡོ’’ཏི ཨཱ་ག་ཏ་ཏྟཱ ཙི་ཏྟ་ས་མུ་ཊྛཱ་ན་ཀ་མྨ་ས་མུ་ཊྛཱ་ན་རཱུ་པཱ་ན་མྤི ཝི་པཱ་ཀ་པ་ཙྩ་ཡོ ལ་བྦྷ་ཏི. ཨི་དྷ པ་ན སཱ་ཝ་སེ་ས་ཝ་སེ་ན དེ་ས་ནཱ ཀ་ཏཱ་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ. ཨ་ཡཾ པ་ན ཝི་པཱ་ཀ་པ་ཙྩ་ཡོ ཝི་པཱ་ཀ་བྷཱ་ཝེ་ན ཛཱ་ཏི་ཏོ ཨེ་ཀ་ཝི་དྷོ, བྷཱུ་མི་བྷེ་ད་ཏོ ཀཱ་མཱ་ཝ་ཙ་རཱ་དི་ཝ་སེ་ན ཙ་ཏུ་དྷཱ བྷི་ཛྫ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀོ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ནཾ པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པཱ་ནཾ པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པཱ་ན་ཉྩ ཝི་པཱ་ཀ་པ་ཙྩ་ཡོ ཧོ་ཏི. ཨ་རཱུ་པཱ་ཝ་ཙ་ར་ཝི་པཱ་ཀོ ས་མྤ་ཡུ་ཏྟ་དྷ་མྨཱ་ན་ཉྙེ་ཝ. ལོ་ཀུ་ཏྟ་ར་ཝི་པཱ་ཀོ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཙ་ཏུ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ཝི་པཱ་ཀ་པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཝི་པཱ་ཀ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༥. ཨཱ་ཧཱ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༥. ཨཱ་ཧཱ་ར་པ་ཙྩ་ཡ་ནི་དྡེ་སེ ཀ་བ་ལཱི༹་ཀཱ་རོ ཨཱ་ཧཱ་རོཏི ཙ་ཏུ་ས་ནྟ་ཏི་ས་མུ་ཊྛཱ་ནེ རཱུ་པེ ཨོ་ཛཱ ཨཱ་ཧཱ་རོ ནཱ་མ. སོ པ་ན ཡ་སྨཱ ཀ་བ་ལ༹ཾ ཀ་རི་ཏྭཱ ཨ་ཛ྄ཛྷོ་ཧ་རི་ཏོ་ཝ ཨཱ་ཧཱ་ར་ཀི་ཙྩཾ ཀ་རོ་ཏི, ན བ་ཧི ཋི་ཏོ, ཏ་སྨཱ ཨཱ་ཧཱ་རོ་ཏི ཨ་ཝ་ཏྭཱ ‘‘ཀ་བ་ལཱི༹་ཀཱ་རོ ཨཱ་ཧཱ་རོ’’ཏི ཝུ་ཏྟཾ. ཀ་བ་ལ༹ཾ ཀ་རི་ཏྭཱ ཨ་ཛ྄ཛྷོ་ཧ་རི་ཏ་བྦ་ཝ་ཏྠུ་ཀ་ཏྟཱ ཝཱ ཀ་བ་ལཱི༹་ཀཱ་རོ་ཏི ནཱ་མ་མེ་ཏཾ ཏ་སྶ. ཨ་རཱུ་པི་ནོ ཨཱ་ཧཱ་རཱཏི ཕ་སྶ་ཙེ་ཏ་ནཱ་ཝི་ཉྙཱ་ཎཱ་ཧཱ་རཱ. ཏཾ་ས་མུ་ཊྛཱ་ནཱ་ནནྟི ཨི་དྷཱ་པི ཀ་མྨ་ས་མུ་ཊྛཱ་ནཱ་ནི ག་ཧི་ཏཱ་ནེ་ཝ. ཝུ་ཏྟ་ཉྷེ་ཏཾ པ་ཉྷཱ་ཝཱ་རེ – པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ ཨཱ་ཧཱ་རཱ ས་མྤ་ཡུ་ཏྟ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ་ཏི. ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཨཱ་ཧཱ་ར་པ་ཙྩ་ཡོ ས་ངྑེ་པ་ཏོ ཀ་བ་ལཱི༹་ཀཱ་རོ ཨཱ་ཧཱ་རོ, ཕ་སྶོ, ཙེ་ཏ་ནཱ, ཝི་ཉྙཱ་ཎ་ནྟི ཙ་ཏྟཱ་རོ་ཝ དྷ་མྨཱ ཧོ་ནྟི. ཏ་ཏྠ ཋ་པེ་ཏྭཱ ཀ་བ་ལཱི༹་ཀཱ་རཱ་ཧཱ་རཾ སེ་སཱ ཏ་ཡོ ཨ་རཱུ་པཱ་ཧཱ་རཱ ཛཱ་ཏི་ཝ་སེ་ན ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་བྷེ་ད་ཏོ ཙ་ཏུ་དྷཱ བྷི་ཛྫ་ནྟི. པུ་ན བྷཱུ་མི་བྷེ་དེ་ན ཀུ་ས་ལོ ཙ་ཏུ་དྷཱ, ཨ་ཀུ་ས་ལོ ཨེ་ཀ་དྷཱ, ཝི་པཱ་ཀོ ཙ་ཏུ་དྷཱ, ཀི་རི་ཡཱ ཏི་དྷཱ་ཏི ཨེ་ཝཾ ཨ་ནེ་ཀ་དྷཱ བྷི་ཛྫ་ནྟི. ཀ་བ་ལཱི༹་ཀཱ་རཱ་ཧཱ་རོ པ་ན ཛཱ་ཏི་ཏོ ཨ་བྱཱ་ཀ་ཏོ, བྷཱུ་མི་ཏོ ཀཱ་མཱ་ཝ་ཙ་རོ་ཝཱ་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀཱ་པི ཏ་ཡོ ཀུ་ས་ལཱ་ཧཱ་རཱ པ་ཉྩ་ཝོ་ཀཱ་རེ ཨ་ཏྟ་ནཱ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ, ཋ་པེ་ཏྭཱ པ་ན རཱུ་པཱ་ཝ་ཙ་རཾ ཨ་ཝ་སེ་སཱ ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ. ཨ་ཀུ་ས་ལཱ་ཧཱ་རེ་སུ་པི ཨེ་སེ་ཝ ན་ཡོ. ཙ་ཏུ་བྷཱུ་མ་ཀ་ཝི་པཱ་ཀཱ་ཧཱ་རཱ པ་ན ས་བྦ་ཏྠ ས་མྤ་ཡུ་ཏྟ་ཀཱ་ནཾ ཨཱ་ཧཱ་ར་པ་ཙྩ་ཡཱ ཧོ་ནྟི. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཱ པ་ནེ་ཏྠ པ་ཉྩ་ཝོ་ཀཱ་རེ ཨུ་པྤ་ཛྫ་མཱ་ནཱ པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པ་སྶ པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པ་སྶཱ་པི ཨཱ་ཧཱ་ར་པ་ཙྩ་ཡཱ ཧོ་ནྟི. ལོ་ཀུ་ཏྟ་རཱ པ་ན ཙི་ཏྟ་ས་མུ་ཊྛཱ་ན་རཱུ་པ་སྶེ་ཝ, ཨཱ་རུ་པྤེ ཨུ་པྤ་ནྣཱ རཱུ་པ་སྶ པ་ཙྩ་ཡཱ ན ཧོ་ནྟི. ཏེ་བྷཱུ་མ་ཀཱ་པི ཏ་ཡོ ཀི་རི་ཡཱ་ཧཱ་རཱ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཀཱ་མཱ་ཝ་ཙ་རཱ་རཱུ་པཱ་ཝ་ཙ་རཱ པ་ན ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ. ཙ་ཏུ་ས་ནྟ་ཏི་ས་མུ་ཊྛཱ་ནོ ཀ་བ་ལཱི༹་ཀཱ་རཱ་ཧཱ་རོ ཀི་ཉྩཱ་པི ‘‘ཨི་མ་སྶ ཀཱ་ཡ་སྶཱ’’ཏི ཨ་ཝི་སེ་ས་ཏོ ཝུ་ཏྟོ, ཝི་སེ་ས་ཏོ པ་ནཱ་ཡ་མེ་ཏྠ ཨཱ་ཧཱ་ར་ས་མུ་ཊྛཱ་ན་རཱུ་པ་སྶ ཛ་ན་ཀོ ཙེ་ཝ ཨ་ནུ་པཱ་ལ་ཀོ ཙ ཧུ་ཏྭཱ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ ཧོ་ཏི, སེ་ས་ཏི་ས་ནྟ་ཏི་ས་མུ་ཊྛཱ་ན་སྶ ཨ་ནུ་པཱ་ལ་ཀོ་ཝ ཧུ་ཏྭཱ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨཱ་ཧཱ་ར་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༦. ཨི་ནྡྲི་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༦. ཨི་ནྡྲི་ཡ་པ་ཙྩ་ཡ་ནི་དྡེ་སེ ཙ་ཀྑུ་ནྡྲི་ཡནྟི ཙ་ཀྑུ་ས་ངྑཱ་ཏཾ ཨི་ནྡྲི་ཡཾ. ཨི་ནྡྲི་ཡ་པ་ཙྩ་ཡེ་ནཱཏི ས་ཡཾ པུ་རེ་ཛཱ་ཏོ ཧུ་ཏྭཱ ཨ་རཱུ་པ་དྷ་མྨཱ་ནཾ ཨུ་པྤཱ་ད་ཏོ པ་ཊྛཱ་ཡ ཡཱ་ཝ བྷ་ངྒཱ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ ཧོ་ཏི. སོ་ཏི་ནྡྲི་ཡཱ་དཱི་སུ་པི ཨེ་སེ་ཝ ན་ཡོ. ཨ་རཱུ་པི་ནོ ཨི་ནྡྲི་ཡཱཏི ཨེ་ཏྠ ཨ་རཱུ་པ་ཛཱི་ཝི་ཏི་ནྡྲི་ཡ་མྤི ས་ངྒ་ཧི་ཏཾ. ཏཾ་ས་མུ་ཊྛཱ་ནཱ་ནནྟི ཨེ་ཏྠ ཧེ་ཊྛཱ ཝུ་ཏྟ་ན་ཡེ་ནེ་ཝ ཀ་ཊ་ཏྟཱ་རཱུ་པ་མྤི ས་ངྒ་ཧི་ཏཾ. ཝུ་ཏྟ་ཉྷེ་ཏཾ པ་ཉྷཱ་ཝཱ་རེ – པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ ཨི་ནྡྲི་ཡཱ ས་མྤ་ཡུ་ཏྟ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ་ཏི. ཨེ་ཝཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ ཝེ་དི་ཏ་བྦཱ.

ཨ་ཡཾ པ་ན ཨི་ནྡྲི་ཡ་པ་ཙྩ་ཡོ ཨི་ཏྠི་ནྡྲི་ཡ་པུ་རི་སི་ནྡྲི་ཡ་ཝ་ཛྫཱ་ནཾ ས་མ་ཝཱི་ས་ཏི་ཡཱ ཨི་ནྡྲི་ཡཱ་ནཾ ཝ་སེ་ན ཋི་ཏོ. ཨི་ཏྠི་ནྡྲི་ཡ་པུ་རི་སི་ནྡྲི་ཡཱ་ནི ཧི ཀི་ཉྩཱ་པི ཨི་ཏྠི་ལི་ངྒ་པུ་རི་ས་ལི་ངྒཱ་དཱི་ནཾ བཱི་ཛ་བྷཱུ་ཏཱ་ནི, ཀ་ལ་ལཱ་དི་ཀཱ་ལེ པ་ན ཝི་ཛྫ་མཱ་ནེ་སུ་པི ཏེ་སུ ཨི་ཏྠི་ལི་ངྒ་པུ་རི་ས་ལི་ངྒཱ་དཱི་ནཾ ཨ་བྷཱ་ཝཱ ཏཱ་ནི ནེ་ཝ ཏེ་སཾ, ན ཨ་ཉྙེ་སཾ ཨི་ནྡྲི་ཡ་པ་ཙྩ་ཡ་ཏཾ ཕ་ར་ནྟི. ཨི་ནྡྲི་ཡ་པ་ཙྩ་ཡོ ཧི ཨ་ཏྟ་ནོ ཝི་ཛྫ་མཱ་ན་ཀྑ་ཎེ ཨ་ཝི་ནི་བྦྷུ་ཏྟ་དྷ་མྨཱ་ནཾ ཨི་ནྡྲི་ཡ་པ་ཙྩ་ཡ་ཏཾ ཨ་ཕ་ར་ནྟོ ནཱ་མ ན་ཏྠི, ཏ་སྨཱ ཏཱ་ནི ཨི་ནྡྲི་ཡ་པ་ཙྩ་ཡཱ ན ཧོ་ནྟི. ཡེ་སཾ པ་ནེ་ཏཱ་ནི བཱི་ཛ་བྷཱུ་ཏཱ་ནི, ཏེ་སཾ ཏཱ་ནི སུ་ཏྟ་ནྟི་ཀ་པ་རི་ཡཱ་ཡེ་ན པ་ཀ་ཏཱུ་པ་ནི་སྶ་ཡ་བྷཱ་ཝཾ བྷ་ཛ་ནྟི. ཨི་ཏི ཨི་ནྡྲི་ཡ་པ་ཙྩ་ཡོ ས་མ་ཝཱི་ས་ཏི་ཡཱ ཨི་ནྡྲི་ཡཱ་ནཾ ཝ་སེ་ན ཋི་ཏོ་ཏི ཝེ་དི་ཏ་བྦོ. སོ ཛཱ་ཏི་ཏོ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་ཝ་སེ་ན པ་ཉྩ་དྷཱ བྷི་ཛྫ་ཏི. ཏ་ཏྠ ཀུ་ས་ལོ བྷཱུ་མི་ཝ་སེ་ན ཙ་ཏུ་དྷཱ, ཨ་ཀུ་ས་ལོ ཀཱ་མཱ་ཝ་ཙ་རོ་ཝ ཝི་པཱ་ཀོ ཙ་ཏུ་དྷཱ་ཝ ཀི་རི་ཡཱ་ས་ངྑཱ་ཏོ ཏི་དྷཱ, རཱུ་པཾ ཀཱ་མཱ་ཝ་ཙ་ར་མེ་ཝཱ་ཏི ཨེ་ཝཾ ཨ་ནེ་ཀ་དྷཱ བྷི་ཛྫ་ཏཱི་ཏི ཨེ་ཝཾ ཏཱ་ཝེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀོ་པི ཀུ་ས་ལི་ནྡྲི་ཡ་པ་ཙྩ་ཡོ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ, ཏ་ཐཱ ཨ་ཀུ་ས་ལོ. ཋ་པེ་ཏྭཱ པ་ན རཱུ་པཱ་ཝ་ཙ་ར་ཀུ་ས་ལཾ ཨ་ཝ་སེ་སཱ ཀུ་ས་ལཱ་ཀུ་ས་ལཱ ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ. ཙ་ཏུ་བྷཱུ་མ་ཀོ ཝི་པཱ་ཀི་ནྡྲི་ཡ་པ་ཙྩ་ཡོ ཨེ་ཀ་ནྟེ་ནེ་ཝ ས་མྤ་ཡུ་ཏྟ་ཀཱ་ནཾ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ. ཀཱ་མཱ་ཝ་ཙ་ར་རཱུ་པཱ་ཝ་ཙ་རཱ པ་ནེ་ཏྠ པ་ཉྩ་ཝོ་ཀཱ་རེ ཨུ་པྤ་ཛྫ་ན་ཏོ པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པ་སྶ, པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པ་སྶཱ་པི ཨི་ནྡྲི་ཡ་པ་ཙྩ་ཡེ་ན པ་ཙྩ་ཡཱ ཧོ་ནྟི. ལོ་ཀུ་ཏྟ་རཱ ཙི་ཏྟ་ས་མུ་ཊྛཱ་ན་རཱུ་པ་སྶེ་ཝ. ཨཱ་རུ་པྤེ ཨུ་པྤ་ནྣཱ ལོ་ཀུ་ཏྟ་ར་ཝི་པཱ་ཀཱ ཨི་ནྡྲི་ཡཱ རཱུ་པ་སྶ པ་ཙྩ་ཡཱ ན ཧོ་ནྟི. ཏེ་བྷཱུ་མ་ཀཱ ཀི་རི་ཡི་ནྡྲི་ཡཱ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཀཱ་མཱ་ཝ་ཙ་རཱ་རཱུ་པཱ་ཝ་ཙ་རཱ པ་ན ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཨི་ནྡྲི་ཡ་པ་ཙྩ་ཡ་ཏཾ ཕ་ར་ནྟི. ཙ་ཀྑུ་ནྡྲི་ཡཱ་དི་ཝ་སེ་ན ཚ་བྦི་དྷེ རཱུ་པི་ནྡྲི་ཡེ ཙ་ཀྑུ་ནྡྲི་ཡཾ ཀུ་ས་ལཱ་ཀུ་ས་ལ་ཝི་པཱ་ཀ་ཏོ ས་མྤ་ཡུ་ཏྟ་དྷ་མྨཱ་ནཾ དྭི་ནྣཾ ཙ་ཀྑུ་ཝི་ཉྙཱ་ཎཱ་ནཾ, སོ་ཏི་ནྡྲི་ཡཱ་དཱི་ནི ཏ་ཐཱ་ཝི་དྷཱ་ན་ཉྙེ་ཝ སོ་ཏ་ཝི་ཉྙཱ་ཎཱ་དཱི་ནཾ, རཱུ་པ་ཛཱི་ཝི་ཏི་ནྡྲི་ཡཾ ཨ་ཏྟ་ནཱ ས་ཧ་ཛཱ་ཏ་རཱུ་པཱ་ནཾ ཋི་ཏི་ཀྑ་ཎེ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ. ས་ཧ་ཛཱ་ཏ་པ་ཙྩ་ཡ་ཏཱ པ་ན ཏ་སྶ ན་ཏྠཱི་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨི་ནྡྲི་ཡ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༧. ཛྷཱ་ན་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༧. ཛྷཱ་ན་པ་ཙྩ་ཡ་ནི་དྡེ་སེ ཛྷཱ་ན་ངྒཱ་ནཱིཏི དྭི་པ་ཉྩ་ཝི་ཉྙཱ་ཎ་ཝ་ཛྫེ་སུ སེ་ས་ཙི་ཏྟེ་སུ ཨུ་པྤ་ནྣཱ་ནི ཝི་ཏ་ཀྐ་ཝི་ཙཱ་ར་པཱི་ཏི་སོ་མ་ན་སྶ་དོ་མ་ན་སྶུ་པེ་ཀྑཱ་ཙི་ཏྟེ་ཀ་གྒ་ཏཱ་ས་ངྑཱ་ཏཱ་ནི ས་ཏྟ ཨ་ངྒཱ་ནི. པ་ཉྩ་ནྣཾ པ་ན ཝི་ཉྙཱ་ཎ་ཀཱ་ཡཱ་ནཾ ཨ་བྷི་ནི་པཱ་ཏ་མ་ཏྟ་ཏྟཱ ཏེ་སུ ཝི་ཛྫ་མཱ་ནཱ་ནི་པི ཨུ་པེ་ཀྑཱ་སུ་ཁ་དུ་ཀྑཱ་ནི ཨུ་པ་ནི་ཛ྄ཛྷཱ་ནཱ་ཀཱ་ར་སྶ ཨ་བྷཱ་ཝ་ཏོ ཛྷཱ་ན་ངྒཱ་ནཱི་ཏི ན ཨུ་དྡྷ་ཊཱ་ནི. ཏ་ཏྠ པ་ཙྪི་ནྣ་ཏྟཱ པ་ན སེ་སཱ་ཧེ་ཏུ་ཀེ་སུ་པི ཛྷཱ་ན་ངྒཾ ན ཨུ་དྡྷ་ཊ་མེ་ཝ. ཏཾ་ས་མུ་ཊྛཱ་ནཱ་ནནྟི ཨི་དྷཱ་པི ཀ་ཊ་ཏྟཱ་རཱུ་པཾ ས་ངྒ་ཧི་ཏ་ནྟི ཝེ་དི་ཏ་བྦཾ. ཝུ་ཏྟ་ཉྷེ་ཏཾ པ་ཉྷཱ་ཝཱ་རེ – ‘‘པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ་ནི ཛྷཱ་ན་ངྒཱ་ནི ས་མྤ་ཡུ་ཏྟ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ ཛྷཱ་ན་པ་ཙྩ་ཡེ་ན པ་ཙྩ་ཡོ’’ཏི. ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ. ཨ་ཡཾ པ་ན ཛྷཱ་ན་པ་ཙྩ་ཡོ ས་ཏྟ་ནྣཾ ཛྷཱ་ན་ངྒཱ་ནཾ ཝ་སེ་ན ཋི་ཏོ་པི ཛཱ་ཏི་བྷེ་ད་ཏོ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་ཝ་སེ་ན ཙ་ཏུ་དྷཱ བྷི་ཛྫ་ཏི, པུ་ན བྷཱུ་མི་ཝ་སེ་ན ཙ་ཏུ་དྷཱ; ཨེ་ཀ་དྷཱ, ཙ་ཏུ་དྷཱ, ཏི་དྷཱ་ཏི དྭཱ་ད་ས་དྷཱ བྷི་ཛྫ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀ་མྤི ཀུ་ས་ལ་ཛྷཱ་ན་ངྒཾ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཋ་པེ་ཏྭཱ རཱུ་པཱ་ཝ་ཙ་རཾ ཨ་ཝ་སེ་སཾ ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཛྷཱ་ན་པ་ཙྩ་ཡེ་ན པ་ཙྩ་ཡོ. ཨ་ཀུ་ས་ལེ་པི ཨེ་སེ་ཝ ན་ཡོ. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཾ པ་ཝ་ཏྟེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, པ་ཊི་ས་ནྡྷི་ཡཾ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཀ་ཊ་ཏྟཱ་རཱུ་པ་སྶ ཙ, ཨཱ་རུ་པྤ་ཝི་པཱ་ཀཾ ས་མྤ་ཡུ་ཏྟ་དྷ་མྨཱ་ན་ཉྙེ་ཝ, ཡ་ཉྩ ཨཱ་རུ་པྤེ ལོ་ཀུ་ཏྟ་ར་ཝི་པཱ་ཀཾ ཨུ་པྤ་ཛྫ་ཏི, ཏ་ཉྩ. པ་ཉྩ་ཝོ་ཀཱ་རེ པ་ན ཏཾ ཙི་ཏྟ་ས་མུ་ཊྛཱ་ན་རཱུ་པ་སྶ་པི ཛྷཱ་ན་པ་ཙྩ་ཡེ་ན པ་ཙྩ་ཡོ ཧོ་ཏི. ཏེ་བྷཱུ་མ་ཀ་མྤི ཀི་རི་ཡ་ཛྷཱ་ན་ངྒཾ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ. ཡཾ པ་ནེ་ཏྠ ཨཱ་རུ་པྤེ ཨུ་པྤ་ཛྫ་ཏི, ཏཾ ས་མྤ་ཡུ་ཏྟ་དྷ་མྨཱ་ན་ཉྙེ་ཝ ཛྷཱ་ན་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཛྷཱ་ན་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༨. མ་གྒ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༨. མ་གྒ་པ་ཙྩ་ཡ་ནི་དྡེ་སེ མ་གྒ་ངྒཱ་ནཱིཏི ཨ་ཧེ་ཏུ་ཀ་ཙི་ཏྟུ་པྤཱ་ད་ཝ་ཛྫེ་སུ སེ་ས་ཙི་ཏྟེ་སུ ཨུ་པྤ་ནྣཱ་ནི པ་ཉྙཱ, ཝི་ཏ་ཀྐོ, ས་མྨཱ་ཝཱ་ཙཱ་ཀ་མྨ་ནྟཱ་ཛཱི་ཝཱ, ཝཱི་རི་ཡཾ, ས་ཏི, ས་མཱ་དྷི, མི་ཙྪཱ་དི་ཊྛི, མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝཱ་ཏི ཨི་མཱ་ནི དྭཱ་ད་ས་ངྒཱ་ནི. མ་གྒ་སྶ པ་ན ཧེ་ཏུ་པ་ཙྪི་མ་ཀ་ཏྟཱ ཨ་ཧེ་ཏུ་ཀ་ཙི་ཏྟེ་སུ མ་གྒ་ངྒཱ་ནི ན ཨུ་དྡྷ་ཊཱ་ནི. ཏཾ་ས་མུ་ཊྛཱ་ནཱ་ནནྟི ཨི་དྷཱ་པི ཀ་ཊ་ཏྟཱ་རཱུ་པཾ ས་ངྒ་ཧི་ཏ་མེ་ཝ. ཝུ་ཏྟ་ཉྷེ་ཏཾ པ་ཉྷཱ་ཝཱ་རེ – ‘‘པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ་ནི མ་གྒ་ངྒཱ་ནི ས་མྤ་ཡུ་ཏྟ་ཀཱ་ནཾ ཁ་ནྡྷཱ་ནཾ ཀ་ཊ་ཏྟཱ ཙ རཱུ་པཱ་ནཾ མ་གྒ་པ་ཙྩ་ཡེ་ན པ་ཙྩ་ཡོ’’ཏི. ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན མ་གྒ་པ་ཙྩ་ཡོ དྭཱ་ད་ས་ནྣཾ མ་གྒ་ངྒཱ་ནཾ ཝ་སེ་ན ཋི་ཏོ་པི ཛཱ་ཏི་བྷེ་ད་ཏོ ཀུ་ས་ལཱ་དི་ཝ་སེ་ན ཙ་ཏུ་དྷཱ, ཀུ་ས་ལཱ་དཱི་ན་ཉྩ ཀཱ་མཱ་ཝ་ཙ་རཱ་དི་བྷཱུ་མི་བྷེ་ད་ཏོ དྭཱ་ད་ས་དྷཱ བྷི་ཛྫ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ. ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀ་མྤི ཀུ་ས་ལ་མ་གྒ་ངྒཾ པ་ཉྩ་ཝོ་ཀཱ་རེ ས་མྤ་ཡུ་ཏྟ་དྷ་མྨཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཋ་པེ་ཏྭཱ རཱུ་པཱ་ཝ་ཙ་རཾ ཨ་ཝ་སེ་སཾ ཨཱ་རུ་པྤེ ས་མྤ་ཡུ་ཏྟ་དྷ་མྨཱ་ན་ཉྙེ་ཝ མ་གྒ་པ་ཙྩ་ཡེ་ན པ་ཙྩ་ཡོ་ཏི ས་བྦཾ ཛྷཱ་ན་པ་ཙྩ་ཡེ ཝི་ཡ ཝི་ཏྠཱ་རེ་ཏ་བྦ་ནྟི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

མ་གྒ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༡༩. ས་མྤ་ཡུ་ཏྟ་པ་ཙྩ་ཡ་ནི་དྡེ་ས་ཝ་ཎྞ་ནཱ

༡༩. ས་མྤ་ཡུ་ཏྟ་པ་ཙྩ་ཡ་ནི་དྡེ་སེ པཱ་ལི༹ ཨུ་ཏྟཱ་ན་ཏྠཱ ཨེ་ཝ. ཨ་ཡཾ པ་ན ས་མྤ་ཡུ་ཏྟ་པ་ཙྩ་ཡོ ནཱ་མ ས་ངྑེ་པ་ཏོ ས་བྦེ་པི ཨ་རཱུ་པི་ནོ ཁ་ནྡྷཱ. པ་བྷེ་ད་ཏོ པ་ནེ་ས ཛཱ་ཏི་ཏོ ཀུ་ས་ལཱ་དཱི་ནཾ, བྷཱུ་མི་ཏོ ཙ ཀཱ་མཱ་ཝ་ཙ་རཱ་དཱི་ནཾ ཝ་སེ་ན ཨ་ནེ་ཀ་དྷཱ བྷི་ཛྫ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ. ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀེ་སུ་པི ཀུ་ས་ལ་ཀྑ་ནྡྷེ་སུ ཨེ་ཀོ ཁ་ནྡྷོ ཏི་ཎྞཾ ཁ་ནྡྷཱ་ནཾ, ཏ་ཡོ ཨེ་ཀ་སྶ, དྭེ དྭི་ནྣ་ནྟི ཨེ་ཝཾ ས་བྦེ་པི ཨ་ཉྙ་མ་ཉྙཾ ས་མྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཨ་ཀུ་ས་ལ་ཝི་པཱ་ཀ་ཀི་རི་ཡ་ཀྑ་ནྡྷེ་སུ་པི ཨེ་སེ་ཝ ན་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ས་མྤ་ཡུ་ཏྟ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢༠. ཝི་པྤ་ཡུ་ཏྟ་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༠. ཝི་པྤ་ཡུ་ཏྟ་པ་ཙྩ་ཡ་ནི་དྡེ་སེ རཱུ་པི་ནོ དྷ་མྨཱ ཨ་རཱུ་པཱི་ནནྟི ཨི་དཾ ཏཱ་ཝ ཧ་ད་ཡ་ཝ་ཏྠུ་ནོ ཙེ་ཝ ཙ་ཀྑུ་ནྡྲི་ཡཱ་དཱི་ན་ཉྩ ཝ་སེ་ན ཝེ་དི་ཏ་བྦཾ. རཱུ་པ་དྷ་མྨེ་སུ ཧི ཨེ་ཏེ་ཡེ་ཝ ཚ ཀོ་ཊྛཱ་སཱ ཨ་རཱུ་པ་ཀྑ་ནྡྷཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡཱ ཧོ་ནྟི. རཱུ་པཱ་ཡ་ཏ་ནཱ་ད་ཡོ པ་ན ཨཱ་ར་མྨ་ཎ་དྷ་མྨཱ ཀི་ཉྩཱ་པི ཝི་པྤ་ཡུ་ཏྟ་དྷ་མྨཱ, ཝི་པྤ་ཡུ་ཏྟ་པ་ཙྩ་ཡཱ པ་ན ན ཧོ་ནྟི. ཀིཾ ཀཱ་ར་ཎཱ? ས་མྤ་ཡོ་གཱ་ས་ངྐཱ་ཡ ཨ་བྷཱ་ཝ་ཏོ. ཨ་རཱུ་པི་ནོ ཧི ཁ་ནྡྷཱ ཙ་ཀྑཱ་དཱི་ནཾ ཝ་ཏྠཱུ་ནཾ ཨ་བྦྷ་ནྟ་ར་ཏོ ནི་ཀྑ་མ་ནྟཱ ཝི་ཡ ཨུ་པྤ་ཛྫ་ནྟི. ཏ་ཏྠ ཨཱ་ས་ངྐཱ ཧོ་ཏི – ‘‘ཀིཾ ནུ ཁོ ཨེ་ཏེ ཨེ་ཏེ་ཧི ས་མྤ་ཡུ་ཏྟཱ, ཨུ་དཱ་ཧུ ཝི་པྤ་ཡུ་ཏྟཱ’’ཏི. ཨཱ་ར་མྨ་ཎ་དྷ་མྨཱ པ་ན ཝ་ཏྠུ་ནི་སྶ་ཡེ་ན ཨུ་པྤ་ཛྫ་མཱ་ནཱ་ནཾ ཨཱ་ར་མྨ་ཎ་མ་ཏྟཱ ཧོ་ནྟཱི་ཏི ན་ཏྠི ཏེ་སུ ས་མྤ་ཡོ་གཱ་ས་ངྐཱ. ཨི་ཏི ས་མྤ་ཡོ་གཱ་ས་ངྐཱ་ཡ ཨ་བྷཱ་ཝ་ཏོ ན ཏེ ཝི་པྤ་ཡུ་ཏྟ་པ་ཙྩ་ཡཱ. ཧ་ད་ཡ་ཝ་ཏྠུ་ཨཱ་དཱི་སུ ཨེ་ཝ པ་ནཱ་ཡཾ ཝི་པྤ་ཡུ་ཏྟ་པ་ཙྩ་ཡ་ཏཱ ཝེ་དི་ཏ་བྦཱ. ཝུ་ཏྟ་མྤི ཙེ་ཏཾ པ་ཉྷཱ་ཝཱ་རེ – ཝ་ཏྠུ ཀུ་ས་ལཱ་ནཾ ཁ་ནྡྷཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཝ་ཏྠུ ཨ་ཀུ་ས་ལཱ་ནཾ ཁ་ནྡྷཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཙ་ཀྑཱ་ཡ་ཏ་ནཾ ཙ་ཀྑུ་ཝི་ཉྙཱ་ཎ་སྶ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. སོ་ཏ… གྷཱ་ན… ཛི་ཝ྄ཧཱ… ཀཱ་ཡཱ་ཡ་ཏ་ནཾ ཀཱ་ཡ་ཝི་ཉྙཱ་ཎ་སྶ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཝ་ཏྠུ ཝི་པཱ་ཀཱ་བྱཱ་ཀ་ཏཱ་ནཾ ཀི་རི་ཡཱ་བྱཱ་ཀ་ཏཱ་ནཾ ཁ་ནྡྷཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ་ཏི.

ཨ་རཱུ་པི་ནོ དྷ་མྨཱ རཱུ་པཱི་ནནྟི ཨི་དཾ པ་ན ཙ་ཏུ་ནྣཾ ཁ་ནྡྷཱ་ནཾ ཝ་སེ་ན ཝེ་དི་ཏ་བྦཾ. ཨ་རཱུ་པ་དྷ་མྨེ་སུ ཧི ཙ་ཏྟཱ་རོ ཁ་ནྡྷཱ་ཝ ས་ཧ་ཛཱ་ཏ་པུ་རེ་ཛཱ་ཏཱ་ནཾ རཱུ་པ་དྷ་མྨཱ་ནཾ ཝི་པྤ་ཡུ་ཏྟ་པ་ཙྩ་ཡཱ ཧོ་ནྟི, ནི་བྦཱ་ནཾ པ་ན ཨ་རཱུ་པ་མྤི ས་མཱ་ནཾ རཱུ་པ་སྶ ཝི་པྤ་ཡུ་ཏྟ་པ་ཙྩ་ཡོ ན ཧོ་ཏི. ‘‘ཙ་ཏཱུ་ཧི ས་མྤ་ཡོ་གོ ཙ་ཏཱུ་ཧི ཝི་པྤ་ཡོ་གོ’’ཏི ཧི ཝུ་ཏྟཾ. ཨི་ཏི ཙ་ཏུ་ནྣཾ ཨ་རཱུ་པ་ཀྑ་ནྡྷཱ་ནཾ་ཡེ་ཝ ཝི་པྤ་ཡུ་ཏྟ་པ་ཙྩ་ཡ་ཏཱ ཝེ་དི་ཏ་བྦཱ. ཝུ་ཏྟ་མྤི ཙེ་ཏཾ པ་ཉྷཱ་ཝཱ་རེ – ས་ཧ་ཛཱ་ཏཱ ཀུ་ས་ལཱ ཁ་ནྡྷཱ ཙི་ཏྟ་ས་མུ་ཊྛཱ་ནཱ་ནཾ རཱུ་པཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. པ་ཙྪཱ་ཛཱ་ཏཱ ཀུ་ས་ལཱ ཁ་ནྡྷཱ པུ་རེ་ཛཱ་ཏ་སྶ ཨི་མ་སྶ ཀཱ་ཡ་སྶ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. པ་ཊི་ས་ནྡྷི་ཀྑ་ཎེ ཝི་པཱ་ཀཱ་བྱཱ་ཀ་ཏཱ ཁ་ནྡྷཱ ཀ་ཊ་ཏྟཱ་རཱུ་པཱ་ནཾ ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ, ཁ་ནྡྷཱ ཝ་ཏྠུ་སྶཱ་ཏི. ཨེ་ཝཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ ཝེ་དི་ཏ་བྦཱ.

ཨ་ཡཾ པ་ན ཝི་པྤ་ཡུ་ཏྟ་པ་ཙྩ་ཡོ ནཱ་མ ས་ངྑེ་པ་ཏོ པ་ཉྩ་ཝོ་ཀཱ་ར་བྷ་ཝེ ཝ་ཏྟ་མཱ་ནཱ རཱུ་པཱ་རཱུ་པ་དྷ་མྨཱ. ཏེ་སུ རཱུ་པཾ ཝ་ཏྠུ་ནོ ཙ་ཀྑཱ་དཱི་ན་ཉྩ ཝ་སེ་ན ཚ་དྷཱ བྷི་ནྣཾ, ཨ་རཱུ་པཾ པ་ཉྩ་ཝོ་ཀཱ་ར་བྷ་ཝེ ཨུ་པྤ་ནྣ་ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་ཝ་སེ་ན ཙ་ཏུ་དྷཱ བྷི་ནྣཾ. ཏ་སྶ བྷཱུ་མི་ཏོ ཀཱ་མཱ་ཝ་ཙ་རཱ་དི་ཝ་སེ་ན ཙ་ཏུ་དྷཱ, ཨེ་ཀ་དྷཱ, ཏི་དྷཱ, ཏི་དྷཱ་ཏི ཨེ་ཀ་ད་ས་དྷཱ བྷེ་དོ ཧོ་ཏི. ཨཱ་རུ་པྤ་ཝི་པཱ་ཀ་ཉྷི ཝི་པྤ་ཡུ་ཏྟ་པ་ཙྩ་ཡོ ན ཧོ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ པ་ཉྩ་ཝོ་ཀཱ་ར་བྷ་ཝེ ཨུ་པྤ་ནྣཾ ཙ་ཏུ་བྷཱུ་མ་ཀ་མྤི ཀུ་ས་ལཾ ཨ་ཀུ་ས་ལ་ཉྩ ཨ་ཏྟ་ནཱ ས་མུ་ཊྛཱ་པི་ཏ་ཙི་ཏྟ་ས་མུ་ཊྛཱ་ན་རཱུ་པ་སྶ ས་ཧ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ ཧོ་ཏི. ཨུ་པྤཱ་ད་ཀྑ་ཎཾ པ་ན ཨ་ཏི་ཀྐ་མི་ཏྭཱ ཋི་ཏི་ཀྑ་ཎཾ པ་ཏྟ་སྶ པུ་རེ་ཛཱ་ཏ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་རཱུ་པ་ཀཱ་ཡ་སྶ པ་ཙྪཱ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ ཧོ་ཏི. ཨེ་ཏྠ ཙ ཏི་ས་མུ་ཊྛཱ་ནི་ཀ་ཀཱ་ཡོ་ཏི ཨཱ་ཧཱ་ར་ས་མུ་ཊྛཱ་ན་སྶ ཨ་བྷཱ་ཝ་ཏོ བྲ་ཧྨ་པཱ་རི་ས་ཛྫཱ་དཱི་ནཾ ཀཱ་ཡོ ཝེ་དི་ཏ་བྦོ. ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཾ པ་ན པ་ཝ་ཏྟེ ཙི་ཏྟ་ས་མུ་ཊྛཱ་ན་རཱུ་པ་སྶ, པ་ཊི་ས་ནྡྷི་ཡཾ ཀ་ཊ་ཏྟཱ་རཱུ་པ་སྶ ཙ ས་ཧ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ ཧོ་ཏི. ལོ་ཀུ་ཏྟ་ར་ཝི་པཱ་ཀཾ ཙི་ཏྟ་ས་མུ་ཊྛཱ་ན་རཱུ་པ་སྶེ་ཝ. ཏི་ཝི་དྷ་མྤི པ་ནེ་ཏཾ པུ་རེ་ཛཱ་ཏ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཏེ་བྷཱུ་མ་ཀ་མྤི ཀི་རི་ཡཾ ཙི་ཏྟ་ས་མུ་ཊྛཱ་ན་སྶ ས་ཧ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ, པུ་རེ་ཛཱ་ཏ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཚ་དྷཱ ཋི་ཏེ་སུ པ་ན རཱུ་པེ་སུ ཝ་ཏྠུ་རཱུ་པཾ པ་ཊི་ས་ནྡྷི་ཀྑ་ཎེ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀཱ་ནཾ ས་ཧ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ, པ་ཝ་ཏྟེ ཨུ་པྤ་ཛྫ་མཱ་ནཱ་ནཾ ཙ་ཏུ་བྷཱུ་མ་ཀ་ཀུ་ས་ལཱ་ནཾ ཨ་ཀུ་ས་ལཱ་ནཾ དྭི་པ་ཉྩ་ཝི་ཉྙཱ་ཎ་ཝ་ཛྫཱ་ནཾ ཏེ་བྷཱུ་མ་ཀ་ཝི་པཱ་ཀཱ་ནཾ ཏེ་བྷཱུ་མ་ཀ་ཀི་རི་ཡཱ་ན་ཉྩ པུ་རེ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ. ཙ་ཀྑཱ་ཡ་ཏ་ནཱ་དཱི་ནི ཙ་ཀྑུ་ཝི་ཉྙཱ་ཎཱ་དཱི་ནཾ པུ་རེ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ་ན པ་ཙྩ་ཡོ་ཏི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཝི་པྤ་ཡུ་ཏྟ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢༡. ཨ་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༡. ཨ་ཏྠི་པ་ཙྩ་ཡ་ནི་དྡེ་སེ ཙ་ཏྟཱ་རོ ཁ་ནྡྷཱཏི་ཨཱ་དཱི་ཧི ས་ཧ་ཛཱ་ཏ་ཝ་སེ་ན ཨ་ཏྠི་པ་ཙྩ་ཡོ ནི་དྡི་ཊྛོ. ཙ་ཀྑཱ་ཡ་ཏ་ནནྟི་ཨཱ་དཱི་ཧི པུ་རེ་ཛཱ་ཏ་ཝ་སེ་ན. ཡཾ རཱུ་པཾ ནི་སྶཱ་ཡཱཏི ཨེ་ཏྠ ས་ཧ་ཛཱ་ཏ་པུ་རེ་ཛཱ་ཏ་ཝ་སེ་ན ཨ་ཏྠི་པ་ཙྩ་ཡོ ནི་དྡི་ཊྛོ. ཨེ་ཝ་མ་ཡཾ པཱ་ལི༹ ས་ཧ་ཛཱ་ཏ་པུ་རེ་ཛཱ་ཏཱ་ན་ཉྙེ་ཝ ཨ་ཏྠི་པ་ཙྩ་ཡཱ་ནཾ ཝ་སེ་ན ཨཱ་ག་ཏཱ. པ་ཉྷཱ་ཝཱ་རེ པ་ན ས་ཧ་ཛཱ་ཏཾ, པུ་རེ་ཛཱ་ཏཾ, པ་ཙྪཱ་ཛཱ་ཏཾ, ཨཱ་ཧཱ་རཾ, ཨི་ནྡྲི་ཡ་ནྟི ཨི་མེ་སཾ ཝ་སེ་ན ཨཱ་ག་ཏ་ཏྟཱ པ་ཙྪཱ་ཛཱ་ཏ་ཨཱ་ཧཱ་རི་ནྡྲི་ཡ་ཝ་སེ་ནཱ་པི ཨ་ཏྠི་པ་ཙྩ་ཡོ ལ་བྦྷ་ཏི. ཨི་དྷ པ་ན སཱ་ཝ་སེ་ས་ཝ་སེ་ན དེ་ས་ནཱ ཀ་ཏཱ་ཏི ཨ་ཡཾ ཏཱ་ཝེ་ཏྠ པཱ་ལི༹་ཝ་ཎྞ་ནཱ.

ཨ་ཡཾ པ་ན ཨ་ཏྠི་པ་ཙྩ་ཡོ ནཱ་མ དུ་ཝི་དྷོ – ཨ་ཉྙ་མ་ཉྙ་ཏོ, ན ཨ་ཉྙ་མ་ཉྙ་ཏོ. ཏ་ཏྠ ཨ་ཉྙ་མ་ཉྙཾ ཏི་ཝི་དྷཾ – ཨ་རཱུ་པཾ ཨ་རཱུ་པེ་ན, རཱུ་པཾ རཱུ་པེ་ན, རཱུ་པཱ་རཱུ་པཾ རཱུ་པཱ་རཱུ་པེ་ན. ‘‘ཙ་ཏྟཱ་རོ ཁ་ནྡྷཱ ཨ་རཱུ་པི་ནོ’’ཏི ཨེ་ཏྠ ཧི ས་བྦ་ཙི་ཏྟུ་པྤ་ཏྟི་ཝ་སེ་ན ཨ་རཱུ་པཾ ཨ་རཱུ་པེ་ན ཝུ་ཏྟཾ. ‘‘ཙ་ཏྟཱ་རོ མ་ཧཱ་བྷཱུ་ཏཱ’’ཏི ཨེ་ཏྠ ས་བྦ་ས་ནྟ་ཏི་ཝ་སེ་ན རཱུ་པཾ རཱུ་པེ་ན. ‘‘ཨོ་ཀྐ་ནྟི་ཀྑ་ཎེ ནཱ་མ་རཱུ་པ’’ནྟི ཨེ་ཏྠ པ་ཊི་ས་ནྡྷི་ཁ་ནྡྷཱ་ན་ཉྩེ་ཝ ཝ་ཏྠུ་ནོ ཙ ཝ་སེ་ན རཱུ་པཱ་རཱུ་པཾ རཱུ་པཱ་རཱུ་པེ་ན ཝུ་ཏྟཾ. ན ཨ་ཉྙ་མ་ཉྙ་མྤི ཏི་ཝི་དྷཾ – ‘‘ཨ་རཱུ་པཾ རཱུ་པ་སྶ, རཱུ་པཾ རཱུ་པ་སྶ, རཱུ་པཾ ཨ་རཱུ་པ་སྶ ཙི་ཏྟ་ཙེ་ཏ་སི་ཀཱ དྷ་མྨཱ’’ཏི ཨེ་ཏྠ ཧི པ་ཉྩ་ཝོ་ཀཱ་ར་ཝ་སེ་ན ཨ་རཱུ་པཾ རཱུ་པ་སྶ ཝུ་ཏྟཾ. ‘‘མ་ཧཱ་བྷཱུ་ཏཱ ཨུ་པཱ་དཱ་རཱུ་པཱ་ན’’ནྟི ཨེ་ཏྠ ས་བྦ་ས་ནྟ་ཏི་ཝ་སེ་ན རཱུ་པཾ རཱུ་པ་སྶ. ‘‘ཙ་ཀྑཱ་ཡ་ཏ་ནཾ ཙ་ཀྑུ་ཝི་ཉྙཱ་ཎ་དྷཱ་ཏུ་ཡཱ’’ཏི་ཨཱ་དཱི་སུ ཝ་ཏྠཱ་ར་མྨ་ཎ་ཝ་སེ་ན རཱུ་པཾ ཨ་རཱུ་པ་སྶ ཨ་ཏྠི་པ་ཙྩ་ཡོ་ཏི ཝུ་ཏྟཾ.

ཨ་པི་ཙེ་ས ཨ་ཏྠི་པ་ཙྩ་ཡོ ནཱ་མ ས་ངྑེ་པ་ཏོ ཁ་ཎ་ཏྟ་ཡ་པྤ་ཏྟཾ ནཱ་མ་ཉྩེ་ཝ རཱུ་པ་ཉྩ, ཝ་ཏྟ་མཱ་ནཱ པ་ཉྩ་ཀྑ་ནྡྷཱ་ཏི་པི ཝ་ཏྟུཾ ཝ་ཊྚ་ཏི. སོ ཛཱ་ཏི་བྷེ་ད་ཏོ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་རཱུ་པ་ཝ་སེ་ན པ་ཉྩ་དྷཱ བྷི་ཛྫ་ཏི. ཏ་ཏྠ ཀུ་ས་ལོ ས་ཧ་ཛཱ་ཏ་པ་ཙྪཱ་ཛཱ་ཏ་ཝ་སེ་ན དུ་ཝི་དྷོ ཧོ་ཏི, ཏ་ཐཱ ཨ་ཀུ་ས་ལོ ཝི་པཱ་ཀ་ཀི་རི་ཡ་ས་ངྑཱ་ཏོ ཙ. ཏེ་སུ ཀུ་ས་ལོ ཀཱ་མཱ་ཝ་ཙ་རཱ་དི་བྷེ་དེ་ན ཙ་ཏུ་དྷཱ བྷི་ཛྫ་ཏི, ཨ་ཀུ་ས་ལོ ཀཱ་མཱ་ཝ་ཙ་རོ་ཝ ཝི་པཱ་ཀོ ཙ་ཏུ་བྷཱུ་མ་ཀོ, ཀི་རི་ཡཱ་ས་ངྑཱ་ཏོ ཏི་བྷཱུ་མ་ཀོ. རཱུ་པ་ས་ངྑཱ་ཏོ ཨ་ཏྠི་པ་ཙྩ་ཡོ ཀཱ་མཱ་ཝ་ཙ་རོ་ཝ. སོ པ་ན ས་ཧ་ཛཱ་ཏ་པུ་རེ་ཛཱ་ཏ་ཝ་སེ་ན དུ་ཝི་དྷོ. ཏ་ཏྠ པ་ཉྩ ཝ་ཏྠཱུ་ནི ཨཱ་ར་མྨ་ཎཱ་ནི ཙ པུ་རེ་ཛཱ་ཏཱ་ནེ་ཝ, ཧ་ད་ཡ་ཝ་ཏྠུ ས་ཧ་ཛཱ་ཏཾ ཝཱ ཧོ་ཏི པུ་རེ་ཛཱ་ཏཾ ཝཱ. པ་ཉྷཱ་ཝཱ་རེ པ་ན ཨཱ་ག་ཏོ ཨཱ་ཧཱ་རོ ཨི་ནྡྲི་ཡ་ཉྩ ས་ཧ་ཛཱ་ཏཱ་དི་བྷེ་དཾ ན ལ་བྷ་ཏཱི་ཏི ཨེ་ཝ་མེ་ཏྠ ནཱ་ན་པྤ་ཀཱ་ར་བྷེ་ད་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཝཾ བྷི་ནྣེ པ་ནེ་ཏྠ ཙ་ཏུ་བྷཱུ་མ་ཀ་ཀུ་ས་ལོ་པི ས་ཧ་ཛཱ་ཏོ ཨ་ཏྠི་པ་ཙྩ་ཡོ པ་ཉྩ་ཝོ་ཀཱ་རེ ‘‘ཨེ་ཀོ ཁ་ནྡྷོ ཏི་ཎྞ་ནྣཾ ཁ་ནྡྷཱ་ན’’ནྟི་ཨཱ་དི་ནཱ ན་ཡེ་ན ཨ་ཉྙ་མ་ཉྙཾ ཁ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ཋ་པེ་ཏྭཱ པ་ན རཱུ་པཱ་ཝ་ཙ་ར་ཀུ་ས་ལཾ ཨ་ཝ་སེ་སོ ཨཱ་རུ་པྤེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏ་ཀུ་ས་ལོ ཨ་ཏྠི་པ་ཙྩ་ཡེ་ན པ་ཙྩ་ཡོ ཧོ་ཏི. ཙ་ཏུ་བྷཱུ་མ་ཀོ པ་ནེ་ས པ་ཉྩ་ཝོ་ཀཱ་རེ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏོ ཀུ་ས་ལོ ཨ་ཏྠི་པ་ཙྩ་ཡེ་ན པ་ཙྩ་ཡོ ཧོ་ཏི. ཨ་ཀུ་ས་ལེ་པི ཨེ་སེ་ཝ ན་ཡོ. སོ་པི ཧི པ་ཉྩ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ, ཙ་ཏུ་ཝོ་ཀཱ་རེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏཱ་ཀུ་ས་ལོ ཨ་ཏྠི་པ་ཙྩ་ཡེ་ན པ་ཙྩ་ཡོ. པ་ཉྩ་ཝོ་ཀཱ་རེ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏཱ་ཀུ་ས་ལོ ཨ་ཏྠི་པ་ཙྩ་ཡེ་ན པ་ཙྩ་ཡོ.

ཝི་པཱ་ཀ་ཏོ པ་ན ཀཱ་མཱ་ཝ་ཙ་ར་རཱུ་པཱ་ཝ་ཙ་རོ ཨ་ཏྠི་པ་ཙྩ་ཡོ ནི་ཡ་མེ་ནེ་ཝ པ་ཊི་ས་ནྡྷི་ཀྑ་ཎེ ཁ་ནྡྷཱ་ན་ཉྩེ་ཝ ཀ་ཊ་ཏྟཱ་རཱུ་པ་སྶ ཙ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ. པ་ཝ་ཏྟེ པ་ན ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ, ཋི་ཏི་པྤ་ཏྟ་སྶ ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ. ཨ་རཱུ་པཱ་ཝ་ཙ་ར་ཝི་པཱ་ཀོ པ་ན ཨཱ་རུ་པྤེ ཨུ་པྤ་ནྣ་ལོ་ཀུ་ཏྟ་ར་ཝི་པཱ་ཀོ ཙ ཨ་ཏྟ་ནཱ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ. པ་ཉྩ་ཝོ་ཀཱ་རེ ལོ་ཀུ་ཏྟ་ར་ཝི་པཱ་ཀོ ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ, ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ. ཀི་རི་ཡ་ཏོ རཱུ་པཱ་ཝ་ཙ་རོ ཨ་ཏྠི་པ་ཙྩ་ཡོ ས་མྤ་ཡུ་ཏྟ་ཀྑ་ནྡྷཱ་ན་ཉྩེ་ཝ ཙི་ཏྟ་ས་མུ་ཊྛཱ་ན་རཱུ་པ་སྶ ཙ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ, ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ. ཀཱ་མཱ་ཝ་ཙ་རཱ་རཱུ་པཱ་ཝ་ཙ་རོ པ་ན ཨཱ་རུ་པྤེ ས་མྤ་ཡུ་ཏྟ་ཀྑ་ནྡྷཱ་ན་ཉྙེ་ཝ, པ་ཉྩ་ཝོ་ཀཱ་རེ ཙི་ཏྟ་ས་མུ་ཊྛཱ་ན་རཱུ་པ་སྶཱ་པི ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ, ཙ་ཏུ་ས་མུ་ཊྛཱ་ནི་ཀ་ཏི་ས་མུ་ཊྛཱ་ནི་ཀ་ཀཱ་ཡ་སྶ པ་ཙྪཱ་ཛཱ་ཏ་ཏྠི པ་ཙྩ་ཡེ་ན པ་ཙྩ་ཡོ.

རཱུ་པ་ས་ངྑཱ་ཏོ པ་ན ཨ་ཏྠི་པ་ཙྩ་ཡོ ས་ཧ་ཛཱ་ཏོ, པུ་རེ་ཛཱ་ཏོ, ཨཱ་ཧཱ་རོ, ཨི་ནྡྲི་ཡ་ནྟི ཙ་ཏུ་བྦི་དྷོ. ཏ་ཏྠ ས་ཧ་ཛཱ་ཏ་རཱུ་པ་ཏྠི་པ་ཙྩ་ཡོ ཙ་ཏུ་ས་མུ་ཊྛཱ་ན་ཝ་སེ་ན ཙ་ཏུ་དྷཱ ཋི་ཏོ. ཏ་ཏྠ ཀ་མྨ་ས་མུ་ཊྛཱ་ནོ ཨེ་ཀཾ མ་ཧཱ་བྷཱུ་ཏཾ ཏི་ཎྞ་ནྣཾ མ་ཧཱ་བྷཱུ་ཏཱ་ནཾ, ཏཱི་ཎི ཨེ་ཀ་སྶ, དྭེ དྭི་ནྣཾ, མ་ཧཱ་བྷཱུ་ཏཱ ཨུ་པཱ་དཱ་རཱུ་པཱ་ན་ནྟི ཨེ་ཝཾ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ ཧོ་ཏི. པ་ཊི་ས་ནྡྷི་ཀྑ་ཎེ ཝ་ཏྠུ་རཱུ་པཾ ཀཱ་མཱ་ཝ་ཙ་ར་རཱུ་པཱ་ཝ་ཙ་ར་ཝི་པཱ་ཀ་ཀྑ་ནྡྷཱ་ནཾ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ ཧོ་ཏི. ཏེ་ས་མྤི ཏི་ས་མུ་ཊྛཱ་ནི་ཀ་རཱུ་པཾ ཨེ་ཀཾ མ་ཧཱ་བྷཱུ་ཏཾ ཏི་ཎྞ་ནྣཾ མ་ཧཱ་བྷཱུ་ཏཱ་ནཾ, ཏཱི་ཎི ཨེ་ཀ་སྶ, དྭེ དྭི་ནྣཾ, མ་ཧཱ་བྷཱུ་ཏཱ ཨུ་པཱ་དཱ་རཱུ་པཱ་ན་ནྟི ཨེ་ཝཾ ས་ཧ་ཛཱ་ཏ་ཏྠི་པ་ཙྩ་ཡེ་ན པ་ཙྩ་ཡོ ཧོ་ཏི. པུ་རེ་ཛཱ་ཏ་ཏྠི་པ་ཙྩ་ཡོ པ་ན ཝ་ཏྠུ་པུ་རེ་ཛཱ་ཏ་ཨཱ་ར་མྨ་ཎ་པུ་རེ་ཛཱ་ཏ་ཝ་སེ་ན དུ་ཝི་དྷོ ཧོ་ཏི. སོ དུ་ཝི་དྷོ་པི ཧེ་ཊྛཱ པུ་རེ་ཛཱ་ཏ་པ་ཙྩ་ཡེ ཝུ་ཏྟ་ན་ཡེ་ནེ་ཝ ཡོ་ཛེ་ཏྭཱ ག་ཧེ་ཏ་བྦོ. ཨཱ་ཧཱ་ར་ཏྠི་པ་ཙྩ་ཡོ་པི ཧེ་ཊྛཱ ཀ་བ་ལཱི༹་ཀཱ་རཱ་ཧཱ་ར་པ་ཙྩ་ཡེ ཡོ་ཛི་ཏ་ན་ཡེ་ནེ་ཝ ཡོ་ཛེ་ཏ་བྦོ. ཨི་དྷ པ་ནེ་ས ཨ་ཏྟ་ནོ ཨ་ནི་རུ་དྡྷ་ཀྑ་ཎེ པ་ཙྩ་ཡ་བྷཱ་ཝེ་ན ཨ་ཏྠི་པ་ཙྩ་ཡོ་ཏི ཝུ་ཏྟོ. རཱུ་པ་ཛཱི་ཝི་ཏི་ནྡྲི་ཡ་མྤི ཧེ་ཊྛཱ ཨི་ནྡྲི་ཡ་པ་ཙྩ་ཡེ རཱུ་པ་ཛཱི་ཝི་ཏི་ནྡྲི་ཡ་ཡོ་ཛ་ནཱ་ཡཾ ཝུ་ཏྟ་ན་ཡེ་ནེ་ཝ ཡོ་ཛེ་ཏ་བྦཾ. ཨི་དྷ པ་ནེ་ཏ་མྤི ཨ་ཏྟ་ནོ ཨ་ནི་རུ་དྡྷ་ཀྑ་ཎེ་ཡེ་ཝ པ་ཙྩ་ཡ་བྷཱ་ཝེ་ན ཨ་ཏྠི་པ་ཙྩ་ཡོ་ཏི ཝུ་ཏྟ་ནྟི ཨེ་ཝ་མེ་ཏྠ པ་ཙྩ་ཡུ་པྤ་ནྣ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

ཨ་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢༢. ན་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༢. ན་ཏྠི་པ་ཙྩ་ཡ་ནི་དྡེ་སེ ས་མ་ན་ནྟ་ར་ནི་རུ་དྡྷཱཏི ཨ་ཉྙེ་ན ཙི་ཏྟུ་པྤཱ་དེ་ན ཨ་ན་ནྟ་རི་ཀཱ ཧུ་ཏྭཱ ས་མ་ན་ནྟ་ར་ནི་རུ་དྡྷཱ. པ་ཊུ་པྤ་ནྣཱ་ནནྟི པ་ཙྩུ་པྤ་ནྣཱ་ནཾ. ཨི་མི་ནཱ ན་ཏྠི་པ་ཙྩ་ཡ་སྶ ཨོ་ཀཱ་ས་དཱ་ན་ཊྛེ་ན ན་ཏྠི་པ་ཙྩ་ཡ་བྷཱ་ཝཾ སཱ་དྷེ་ཏི. པུ་རི་མེ་སུ ཧི ནི་རོ་དྷ་ཝ་སེ་ན པ་ཙྪི་མཱ་ནཾ པ་ཝ་ཏྟ་ནོ་ཀཱ་སཾ ཨ་དེ་ནྟེ་སུ ཏེ་སཾ པ་ཊུ་པྤ་ནྣ་བྷཱ་ཝོ ན སི་ཡཱ་ཏི ཨ་ཡ་མེ་ཏྠ པཱ་ལི༹་ཝ་ཎྞ་ནཱ. སེ་སཾ ས་བྦཾ ཨ་ན་ནྟ་ར་པ་ཙྩ་ཡེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. པ་ཙྩ་ཡ་ལ་ཀྑ་ཎ་མེ་ཝ ཧེ་ཏྠ ནཱ་ནཾ, པ་ཙྩ་ཡཱ་ནཾ པ་ན པ་ཙྩ་ཡུ་པྤ་ནྣཱ་ན་ཉྩ ནཱ་ནཱ་ཀ་ར་ཎཾ ན་ཏྠི. ཀེ་ཝ་ལཾ པ་ན ཏ་ཏྠ ‘‘ཙ་ཀྑུ་ཝི་ཉྙཱ་ཎ་དྷཱ་ཏུ ཏཾ་ས་མྤ་ཡུ་ཏྟ་ཀཱ ཙ དྷ་མྨཱ མ་ནོ་དྷཱ་ཏུ་ཡཱ’’ཏི་ཨཱ་དི་ནཱ ན་ཡེ་ན པ་ཙྩ་ཡཱ ཙ པ་ཙྩ་ཡུ་པྤ་ནྣཱ ཙ ས་རཱུ་པ་ཏོ ད་སྶི་ཏཱ. ཨི་དྷ པ་ན ‘‘ས་མ་ན་ནྟ་ར་ནི་རུ་དྡྷཱ ཙི་ཏྟ་ཙེ་ཏ་སི་ཀཱ དྷ་མྨཱ པ་ཊུ་པྤ་ནྣཱ་ནཾ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ན’’ནྟི ས་བྦེ་པི ཏེ ནི་རོ་དྷུ་པྤཱ་ད་ཝ་སེ་ན སཱ་མ་ཉྙ་ཏོ ད་སྶི་ཏཱ་ཏི.

ན་ཏྠི་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢༣. ཝི་ག་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༣. ཝི་ག་ཏ་པ་ཙྩ་ཡ་ནི་དྡེ་སེ ས་མ་ན་ནྟ་ར་ཝི་ག་ཏཱཏི ས་མ་ན་ནྟ་ར་མེ་ཝ ཝི་ག་ཏཱ. ཨི་མི་ནཱ ཝི་ག་ཏ་པ་ཙྩ་ཡ་སྶ ཝི་ག་ཙྪ་མཱ་ན་བྷཱ་ཝེ་ནེ་ཝ པ་ཙྩ་ཡ་བྷཱ་ཝཾ ད་སྶེ་ཏི. ཨི་ཏི ན་ཏྠི་པ་ཙྩ་ཡ་སྶ ཙ ཨི་མ་སྶ ཙ བྱ་ཉྫ་ན་མ་ཏྟེ་ཡེ་ཝ ནཱ་ན་ཏྟཾ, ན ཨ་ཏྠེ་ཏི.

ཝི་ག་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ.

༢༤. ཨ་ཝི་ག་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ

༢༤. ཨ་ཝི་ག་ཏ་པ་ཙྩ་ཡ་ནི་དྡེ་སེ ཙ་ཏྟཱ་རོ ཁ་ནྡྷཱཏི་ཨཱ་དཱི་ནཾ ས་བྦཱ་ཀཱ་རེ་ན ཨ་ཏྠི་པ་ཙྩ་ཡ་ནི་དྡེ་སེ ཝུ་ཏྟ་ན་ཡེ་ནེ་ཝ ཨ་ཏྠོ ཝེ་དི་ཏ་བྦོ. ཨི་མ་སྶ་པི ཧི པ་ཙྩ་ཡ་སྶ ཨ་ཏྠི་པ་ཙྩ་ཡེ་ན ས་དྡྷིཾ བྱ་ཉྫ་ན་མ་ཏྟེ་ཡེ་ཝ ནཱ་ན་ཏྟཾ, ན ཨ་ཏྠེ་ཏི.

ཨ་ཝི་ག་ཏ་པ་ཙྩ་ཡ་ནི་དྡེ་ས་ཝ་ཎྞ་ནཱ.

པ་ཙྩ་ཡ་ནི་དྡེ་ས་པ་ཀི་ཎྞ་ཀ་ཝི་ནི་ཙྪ་ཡ་ཀ་ཐཱ

ཨི་དཱ་ནི ཨེ་ཝཾ ཨུ་དྡེ་ས་ནི་དྡེ་ས་ཏོ ད་སྶི་ཏེ་སུ ཨི་མེ་སུ ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ཉཱ་ཎ་ཙཱ་ར་སྶ ཝི་ས་ད་བྷཱ་ཝ་ཏྠཾ ཨ་ནེ་ཀ་དྷ་མྨཱ་ནཾ ཨེ་ཀ་པ་ཙྩ་ཡ་བྷཱ་ཝ་ཏོ, ཨེ་ཀ་དྷ་མྨ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོ, ཨེ་ཀ་པ་ཙྩ་ཡ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོ, པ་ཙྩ་ཡ་ས་བྷཱ་ག་ཏོ, པ་ཙྩ་ཡ་ཝི་ས་བྷཱ་ག་ཏོ, ཡུ་ག་ལ༹་ཀ་ཏོ, ཛ་ན་ཀཱ་ཛ་ན་ཀ་ཏོ, ས་བྦ་ཊྛཱ་ནི་ཀཱ་ས་བྦ་ཊྛཱ་ནི་ཀ་ཏོ, རཱུ་པཾ རཱུ་པ་སྶཱ་ཏི་ཨཱ་དི་ཝི་ཀ་པྤ་ཏོ, བྷ་ཝ་བྷེ་ད་ཏོ་ཏི ཨི་མེ་སཾ ད་ས་ནྣཾ པ་དཱ་ནཾ ཝ་སེ་ན པ་ཀི་ཎྞ་ཀ་ཝི་ནི་ཙྪ་ཡོ ཝེ་དི་ཏ་བྦོ. ཏ་ཏྠ ཨ་ནེ་ཀ་དྷ་མྨཱ་ནཾ ཨེ་ཀ་པ་ཙྩ་ཡ་བྷཱ་ཝ་ཏོཏི ཨེ་ཏེ་སུ ཧི ཋ་པེ་ཏྭཱ ཀ་མྨ་པ་ཙྩ་ཡཾ ཨ་ཝ་སེ་སེ་སུ ཏེ་ཝཱི་ས་ཏི་ཡཱ པ་ཙྩ་ཡེ་སུ ཨ་ནེ་ཀ་དྷ་མྨཱ ཨེ་ཀ་ཏོ པ་ཙྩ་ཡཱ ཧོ་ནྟི. ཀ་མྨ་པ་ཙྩ་ཡོ པ་ན ཨེ་ཀོ ཙེ་ཏ་ནཱ་དྷ་མྨོ་ཡེ་ཝཱ་ཏི ཨེ་ཝཾ ཏཱ་ཝེ་ཏྠ ཨ་ནེ་ཀ་དྷ་མྨཱ་ནཾ ཨེ་ཀ་པ་ཙྩ་ཡ་བྷཱ་ཝ་ཏོ ཝི་ནི་ཙྪ་ཡོ ཝེ་དི་ཏ་བྦོ.

ཨེ་ཀ་དྷ་མྨ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོཏི ཧེ་ཏུ་པ་ཙྩ་ཡེ ཏཱ་ཝ ཨ་མོ་ཧོ ཨེ་ཀོ དྷ་མྨོ. སོ པུ་རེ་ཛཱ་ཏ་ཀ་མྨཱ་ཧཱ་ར་ཛྷཱ་ན་པ་ཙྩ་ཡོ་ཝ ན ཧོ་ཏི, སེ་སཱ་ནཾ ཝཱི་ས་ཏི་ཡཱ པ་ཙྩ་ཡཱ་ནཾ ཝ་སེ་ན པ་ཙྩ་ཡོ ཧོ་ཏི. ཨ་ལོ་བྷཱ་དོ་སཱ ཨི་ནྡྲི་ཡ་མ་གྒ་པ་ཙྩ་ཡཱ་པི ན ཧོ་ནྟི, སེ་སཱ་ནཾ ཨ་ཊྛཱ་ར་ས་ནྣཾ པ་ཙྩ་ཡཱ་ནཾ ཝ་སེ་ན པ་ཙྩ་ཡཱ ཧོ་ནྟི. ལོ་བྷ་མོ་ཧཱ ཝི་པཱ་ཀ་པ་ཙྩ་ཡཱ་པི ན ཧོ་ནྟི, སེ་སཱ་ནཾ ས་ཏྟ་ར་ས་ནྣཾ པ་ཙྩ་ཡཱ་ནཾ ཝ་སེ་ན པ་ཙྩ་ཡཱ ཧོ་ནྟི. དོ་སོ ཨ་དྷི་པ་ཏི་པ་ཙྩ་ཡོ་པི ན ཧོ་ཏི, སེ་སཱ་ནཾ སོ་ལ༹་ས་ནྣཾ པ་ཙྩ་ཡཱ་ནཾ ཝ་སེ་ན པ་ཙྩ་ཡོ ཧོ་ཏི. ཨཱ་ར་མྨ་ཎ་པ་ཙྩ་ཡེ རཱུ་པཱ་ཡ་ཏ་ནཾ ཙ་ཀྑུ་ཝི་ཉྙཱ་ཎ་དྷཱ་ཏུ་ཡཱ ཨཱ་ར་མྨ་ཎ་པུ་རེ་ཛཱ་ཏ་ཨ་ཏྠི་ཨ་ཝི་ག་ཏ་ཝ་སེ་ན ཙ་ཏུ་དྷཱ པ་ཙྩ་ཡོ; ཏ་ཐཱ མ་ནོ་དྷཱ་ཏུ་ཡཱ ཨ་ཧེ་ཏུ་ཀ་མ་ནོ་ཝི་ཉྙཱ་ཎ་དྷཱ་ཏུ་ཡཱ ཙ. ས་ཧེ་ཏུ་ཀཱ་ཡ པ་ན ཨཱ་ར་མྨ་ཎཱ་དྷི་པ་ཏི་ཨཱ་ར་མྨ་ཎཱུ་པ་ནི་སྶ་ཡ་ཝ་སེ་ནཱ་པི པ་ཙྩ་ཡོ ཧོ་ཏི. ཨི་མི་ནཱ ན་ཡེ་ན ས་བྦེ་སཾ ཨཱ་ར་མྨ་ཎ་པ་ཙྩ་ཡ་དྷ་མྨཱ་ནཾ ཨ་ནེ་ཀ་པ་ཙྩ་ཡ་བྷཱ་ཝོ ཝེ་དི་ཏ་བྦོ.

ཨ་དྷི་པ་ཏི་པ་ཙྩ་ཡེ ཨཱ་ར་མྨ་ཎཱ་དྷི་པ་ཏི་ནོ ཨཱ་ར་མྨ་ཎ་པ་ཙྩ་ཡེ ཝུ་ཏྟ་ན་ཡེ་ནེ་ཝ ཨ་ནེ་ཀ་པ་ཙྩ་ཡ་བྷཱ་ཝོ ཝེ་དི་ཏ་བྦོ. ས་ཧ་ཛཱ་ཏཱ་དྷི་པ་ཏཱི་སུ ཝཱི་མཾ་སཱ ཨ་མོ་ཧ་ཧེ་ཏུ ཝི་ཡ ཝཱི་ས་ཏི་དྷཱ པ་ཙྩ་ཡོ ཧོ་ཏི. ཚ་ནྡོ ཧེ་ཏུ་པུ་རེ་ཛཱ་ཏ་ཀ་མྨ་ཨཱ་ཧཱ་ར་ཨི་ནྡྲི་ཡ་ཛྷཱ་ན་མ་གྒ་པ་ཙྩ་ཡོ ན ཧོ་ཏི, སེ་སཱ་ནཾ ས་ཏྟ་ར་ས་ནྣཾ པ་ཙྩ་ཡཱ་ནཾ ཝ་སེ་ན པ་ཙྩ་ཡོ ཧོ་ཏི. ཙི་ཏྟཾ ཧེ་ཏུ་པུ་རེ་ཛཱ་ཏ་ཀ་མྨ་ཛྷཱ་ན་མ་གྒ་པ་ཙྩ་ཡོ ན ཧོ་ཏི, སེ་སཱ་ནཾ ཨེ་ཀཱུ་ན་ཝཱི་ས་ཏི་ཡཱ པ་ཙྩ་ཡཱ་ནཾ ཝ་སེ་ན པ་ཙྩ་ཡོ ཧོ་ཏི. ཝཱི་རི་ཡཾ ཧེ་ཏུ་པུ་རེ་ཛཱ་ཏ་ཀ་མྨཱ་ཧཱ་ར་ཛྷཱ་ན་པ་ཙྩ་ཡོ ན ཧོ་ཏི, སེ་སཱ་ནཾ ཨེ་ཀཱུ་ན་ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི.

ཨ་ན་ནྟ་ར་པ་ཙྩ་ཡེ ‘‘ཙ་ཀྑུ་ཝི་ཉྙཱ་ཎ་དྷཱ་ཏཱུ’’ཏི་ཨཱ་དི་ནཱ ན་ཡེ་ན ཝུ་ཏྟེ་སུ ཙ་ཏཱུ་སུ ཁ་ནྡྷེ་སུ ཝེ་ད་ནཱ་ཀྑ་ནྡྷོ ཧེ་ཏུ་པུ་རེ་ཛཱ་ཏ་ཀ་མྨཱ་ཧཱ་ར་མ་གྒ་པ་ཙྩ་ཡོ ན ཧོ་ཏི, སེ་སཱ་ནཾ ཨེ་ཀཱུ་ན་ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི. ས་ཉྙཱ་ཀྑ་ནྡྷོ ཨི་ནྡྲི་ཡ་ཛྷཱ་ན་པ་ཙྩ་ཡོ་པི ན ཧོ་ཏི, སེ་སཱ་ནཾ ས་ཏྟ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. ས་ངྑཱ་ར་ཀྑ་ནྡྷེ ཧེ་ཏཱུ ཧེ་ཏུ་པ་ཙྩ་ཡེ ཝུ་ཏྟ་ན་ཡེ་ན, ཚ་ནྡ་ཝཱི་རི་ཡཱ་ནི ཨ་དྷི་པ་ཏི་པ་ཙྩ་ཡེ ཝུ་ཏྟ་ན་ཡེ་ནེ་ཝ པ་ཙྩ་ཡཱ ཧོ་ནྟི. ཕ་སྶོ ཧེ་ཏུ་པུ་རེ་ཛཱ་ཏ་ཀ་མྨ་ཨི་ནྡྲི་ཡ་ཛྷཱ་ན་མ་གྒ་པ་ཙྩ་ཡོ ན ཧོ་ཏི, སེ་སཱ་ནཾ ཨ་ཊྛཱ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. ཙེ་ཏ་ནཱ ཧེ་ཏུ་པུ་རེ་ཛཱ་ཏ་ཨི་ནྡྲི་ཡ་ཛྷཱ་ན་མ་གྒ་པ་ཙྩ་ཡོ ན ཧོ་ཏི. སེ་སཱ་ནཾ ཨེ་ཀཱུ་ན་ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི. ཝི་ཏ་ཀྐོ ཧེ་ཏུ་པུ་རེ་ཛཱ་ཏ་ཀ་མྨཱ་ཧཱ་རི་ནྡྲི་ཡ་པ་ཙྩ་ཡོ ན ཧོ་ཏི, སེ་སཱ་ནཾ ཨེ་ཀཱུ་ན་ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི. ཝི་ཙཱ་རོ མ་གྒ་པ་ཙྩ་ཡོ་པི ན ཧོ་ཏི, སེ་སཱ་ནཾ ཨ་ཊྛཱ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. པཱི་ཏི ཏེ་ས་ཉྙེ་ཝ ཝ་སེ་ན པ་ཙྩ་ཡོ ཧོ་ཏི. ཙི་ཏྟེ་ཀ་གྒ་ཏཱ ཧེ་ཏུ་པུ་རེ་ཛཱ་ཏ་ཀ་མྨཱ་ཧཱ་ར་པ་ཙྩ་ཡོ ན ཧོ་ཏི, སེ་སཱ་ནཾ ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི. ས་དྡྷཱ ཧེ་ཏུ་པུ་རེ་ཛཱ་ཏ་ཀ་མྨཱ་ཧཱ་ར་ཛྷཱ་ན་མ་གྒ་པ་ཙྩ་ཡོ ན ཧོ་ཏི, སེ་སཱ་ནཾ ཨ་ཊྛཱ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. ས་ཏི ཏེ་ཧི ཙེ་ཝ མ་གྒ་པ་ཙྩ་ཡེ་ན ཙཱ་ཏི ཨེ་ཀཱུ་ན་ཝཱི་ས་ཏི་ཡཱ ཝ་སེ་ན པ་ཙྩ་ཡོ ཧོ་ཏི. ཛཱི་ཝི་ཏི་ནྡྲི་ཡཾ ས་དྡྷཱ་ཡ ཝུ་ཏྟཱ་ནཾ ཨ་ཊྛཱ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. ཧི་རོ་ཏྟ་པྤཾ ཏ་ཏོ ཨི་ནྡྲི་ཡ་པ་ཙྩ་ཡཾ ཨ་པ་ནེ་ཏྭཱ སེ་སཱ་ནཾ ས་ཏྟ་ར་ས་ནྣཾ ཝ་སེ་ན པ་ཙྩ་ཡོ ཧོ་ཏི. ཏ་ཐཱ ཀཱ་ཡ་པ་སྶ་དྡྷཱ་དཱི་ནི ཡུ་ག་ལ༹་ཀཱ་ནི, ཡེ་ཝཱ་པ་ན་ཀེ་སུ ཨ་དྷི་མོ་ཀྑ་མ་ན་སི་ཀཱ་ར་ཏ་ཏྲ་མ་ཛ྄ཛྷ་ཏྟ་ཏཱ ཀ་རུ་ཎཱ་མུ་དི་ཏཱ ཙ. ཝི་ར་ཏི་ཡོ པ་ན ཏེ་ཧི ཙེ་ཝ མ་གྒ་པ་ཙྩ་ཡེ་ན ཙཱ་ཏི ཨ་ཊྛཱ་ར་ས་དྷཱ པ་ཙྩ་ཡཱ ཧོ་ནྟི. མི་ཙྪཱ་དི་ཊྛི ཏ་ཏོ ཝི་པཱ་ཀ་པ་ཙྩ་ཡཾ ཨ་པ་ནེ་ཏྭཱ ས་ཏྟ་ར་ས་དྷཱ, མི་ཙྪཱ་ཝཱ་ཙཱ་ཀ་མྨ་ནྟཱ་ཛཱི་ཝཱ ཏེ་ཧི ཙེ་ཝ ཀ་མྨཱ་ཧཱ་ར་པ་ཙྩ་ཡེ་ཧི ཙཱ་ཏི ཨེ་ཀཱུ་ན་ཝཱི་ས་ཏི་དྷཱ. ཨ་ཧི་རི་ཀཾ ཨ་ནོ་ཏྟ་པྤཾ མཱ་ནོ ཐི་ནཾ མི་དྡྷཾ ཨུ་དྡྷ་ཙྩ་ནྟི ཨི་མེ ཧེ་ཏུ་པུ་རེ་ཛཱ་ཏ་ཀ་མྨ་ཝི་པཱ་ཀཱ་ཧཱ་རི་ནྡྲི་ཡ་ཛྷཱ་ན་མ་གྒ་པ་ཙྩ་ཡཱ ན ཧོ་ནྟི, སེ་སཱ་ནཾ པ་ན སོ་ལ༹་ས་ནྣཾ པ་ཙྩ་ཡཱ་ནཾ ཝ་སེ་ན པ་ཙྩ་ཡཱ ཧོ་ནྟི. ཝི་ཙི་ཀི་ཙྪཱ་ཨི་སྶཱ་མ་ཙྪ་རི་ཡ་ཀུ་ཀྐུ་ཙྩཱ་ནི ཏ་ཏོ ཨ་དྷི་པ་ཏི་པ་ཙྩ་ཡཾ ཨ་པ་ནེ་ཏྭཱ པ་ནྣ་ར་ས་དྷཱ ཝི་ཉྙཱ་ཎ་ཀྑ་ནྡྷ་སྶ. ཨ་དྷི་པ་ཏི་པ་ཙྩ་ཡེ ཝུ་ཏྟ་ན་ཡེ་ནེ་ཝ ཨ་ནེ་ཀ་པ་ཙྩ་ཡ་བྷཱ་ཝོ ཝེ་དི་ཏ་བྦོ. ས་མ་ན་ནྟ་ར་པ་ཙྩ་ཡེ་པི ཨེ་སེ་ཝ ན་ཡོ.

ས་ཧ་ཛཱ་ཏ་པ་ཙྩ་ཡེ ཙ་ཏཱུ་སུ ཏཱ་ཝ ཁ་ནྡྷེ་སུ ཨེ་ཀེ་ཀ་སྶ དྷ་མྨ་སྶ ཨ་ནེ་ཀ་པ་ཙྩ་ཡ་བྷཱ་ཝོ ཝུ་ཏྟ་ན་ཡེ་ནེ་ཝ ཝེ་དི་ཏ་བྦོ. ཙ་ཏྟཱ་རི མ་ཧཱ་བྷཱུ་ཏཱ་ནི ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཨུ་པ་ནི་སྶ་ཡ་པུ་རེ་ཛཱ་ཏ་ཨ་ཏྠི་ཨ་ཝི་ག་ཏ་ཝ་སེ་ན ན་ཝ་དྷཱ པ་ཙྩ་ཡཱ ཧོ་ནྟི. ཧ་ད་ཡ་ཝ་ཏྠུ ཏེ་ས་ཉྩེ་ཝ ཝི་པྤ་ཡུ་ཏྟ་སྶ ཙ ཝ་སེ་ན ད་ས་དྷཱ པ་ཙྩ་ཡོ ཧོ་ཏི. ཨ་ཉྙ་མ་ཉྙ་པ་ཙྩ་ཡེ ཨ་པུ་བྦཾ ན་ཏྠི. ནི་སྶ་ཡ་པ་ཙྩ་ཡེ ཙ་ཀྑཱ་ཡ་ཏ་ནཱ་དཱི་ནི ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ནི་སྶ་ཡ་ཨུ་པ་ནི་སྶ་ཡ་པུ་རེ་ཛཱ་ཏ་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ན་ཝ་དྷཱ པ་ཙྩ་ཡཱ ཧོ་ནྟི. ཨུ་པ་ནི་སྶ་ཡེ ཨ་པུ་བྦཾ ན་ཏྠི. པུ་རེ་ཛཱ་ཏ་པ་ཙྩ་ཡེ རཱུ་པ་ས་དྡ་ག་ནྡྷ་ར་སཱ་ཡ་ཏ་ནཱ་ནི ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ཨུ་པ་ནི་སྶ་ཡ་པུ་རེ་ཛཱ་ཏ་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ པ་ཙྩ་ཡཱ ཧོ་ནྟི. ཨེ་ཏྟ་ཀ་མེ་ཝེ་ཏྠ ཨ་པུ་བྦཾ. པ་ཙྪཱ་ཛཱ་ཏཱ་དཱི་སུ ཨ་པུ་བྦཾ ན་ཏྠི. ཨཱ་ཧཱ་ར་པ་ཙྩ་ཡེ ཀ་བ་ལཱི༹་ཀཱ་རཱ་ཧཱ་རོ ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ཨུ་པ་ནི་སྶ་ཡ་ཨཱ་ཧཱ་ར་ཨ་ཏྠི་ཨ་ཝི་ག་ཏ་ཝ་སེ་ན ཚ་དྷཱ པ་ཙྩ་ཡོ ཧོ་ཏི. ཨི་ནྡྲི་ཡཱ་དཱི་སུ ཨ་པུ་བྦཾ ན་ཏྠི. ཨེ་ཝ་མེ་ཏྠ ཨེ་ཀ་དྷ་མྨ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

ཨེ་ཀ་པ་ཙྩ་ཡ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོཏི ཧེ་ཏུ་པ་ཙྩ་ཡཱ་དཱི་སུ ཡ་སྶ ཀ་སྶ་ཙི ཨེ་ཀ་སྶ པ་ཙྩ་ཡ་སྶ ཡེ་ནཱ་ཀཱ་རེ་ན ཡེ་ན་ཏྠེ་ན ཡོ པ་ཙྩ་ཡུ་པྤ་ནྣཱ་ནཾ པ་ཙྩ་ཡོ ཧོ་ཏི, ཏཾ ཨཱ་ཀཱ་རཾ ཏཾ ཨ་ཏྠཾ ཨ་ཝི་ཛ་ཧི་ཏྭཱ་ཝ ཨ་ཉྙེ་ཧི་པི ཡེ་ཧཱ་ཀཱ་རེ་ཧི ཡེ་ཧི ཨ་ཏྠེ་ཧི སོ ཏ་སྨི་ཉྙེ་ཝ ཁ་ཎེ ཏེ་སཾ དྷ་མྨཱ་ནཾ ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི, ཏ་ཏོ ཨ་ནེ་ཀ་པ་ཙྩ་ཡ་བྷཱ་ཝ་ཏོ ཏ་སྶ ཝི་ནི་ཙྪ་ཡོ ཝེ་དི་ཏ་བྦོ་ཏི ཨ་ཏྠོ. སེ་ཡྻ་ཐི་དཾ – ཨ་མོ་ཧོ ཧེ་ཏུ་པ་ཙྩ་ཡོ, སོ ཧེ་ཏུ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨི་ནྡྲི་ཡ་མ་གྒ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཨེ་ཀཱ་ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་ལོ་བྷཱ་དོ་སཱ ཏ་ཏོ ཨ་དྷི་པ་ཏི་ཨི་ནྡྲི་ཡ་མ་གྒ་པ་ཙྩ་ཡེ ཏ་ཡོ ཨ་པ་ནེ་ཏྭཱ སེ་སཱ་ནཾ ཝ་སེ་ན ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི. ཨི་དཾ ཝི་པཱ་ཀ་ཧེ་ཏཱུ་སུ་ཡེ་ཝ ལ་བྦྷ་ཏི, ཀུ་ས་ལ་ཀི་རི་ཡེ་སུ པ་ན ཝི་པཱ་ཀ་པ་ཙྩ་ཡ་ཏཱ པ་རི་ཧཱ་ཡ་ཏི. ལོ་བྷ་དོ་ས་མོ་ཧཱ ཏེ ཏ་ཡོ ཝི་པཱ་ཀ་ཉྩཱ་ཏི ཙ་ཏྟཱ་རོ ཨ་པ་ནེ་ཏྭཱ སེ་སཱ་ནཾ ཝ་སེ་ན ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི.

ཨཱ་ར་མྨ་ཎ་པ་ཙྩ་ཡོ ཏཾ ཨཱ་ར་མྨ་ཎ་པ་ཙྩ་ཡ་ཏྟཾ ཨ་ཝི་ཛ་ཧ་ནྟཾ་ཡེ་ཝ ཨཱ་ར་མྨ་ཎཱ་དྷི་པ་ཏི་ནི་སྶ་ཡ་ཨུ་པ་ནི་སྶ་ཡ་པུ་རེ་ཛཱ་ཏ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ས་ཏྟ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་ཡ་མེ་ཏྠ ཨུ་ཀྐ་ཊྛ་པ་རི་ཙྪེ་དོ, ཨ་རཱུ་པ་དྷ་མྨཱ་ནཾ པ་ན ཨ་ཏཱི་ཏཱ་ནཱ་ག་ཏཱ་ནཾ ཝཱ རཱུ་པ་དྷ་མྨཱ་ནཾ ཨཱ་ར་མྨ་ཎ་པ་ཙྩ་ཡ་བྷཱ་ཝེ ས་ཏི ཨཱ་ར་མྨ་ཎཱ་དྷི་པ་ཏི་ཨཱ་ར་མྨ་ཎཱུ་པ་ནི་སྶ་ཡ་མ་ཏྟ་ཉྙེ་ཝ ཨུ་ཏྟ་རི ལ་བྦྷ་ཏི. ཨ་དྷི་པ་ཏི་པ་ཙྩ་ཡེ ཝཱི་མཾ་སཱ ཨ་མོ་ཧ་ས་དི་སཱ. ཚ་ནྡོ ཨ་དྷི་པ་ཏི་པ་ཙྩ་ཡོ ཨ་དྷི་པ་ཏི་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཨ་ཊྛ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཝཱི་རི་ཡཾ ཏེ་ས་ཉྩེ་ཝ ཨི་ནྡྲི་ཡ་མ་གྒ་པ་ཙྩ་ཡཱ་ན་ཉྩཱ་ཏི ཨི་མེ་སཾ ཝ་སེ་ན ཨ་པ་རེ་ཧི་པི ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཙི་ཏྟཾ ཏ་ཏོ མ་གྒ་པ་ཙྩ་ཡཾ ཨ་པ་ནེ་ཏྭཱ ཨཱ་ཧཱ་ར་པ་ཙྩ་ཡཾ པ་ཀྑི་པི་ཏྭཱ ཨི་མེ་སཾ ཝ་སེ་ན ཨ་དྷི་པ་ཏི་པ་ཙྩ་ཡ་ཏོ ཨུ་ཏྟ་རི ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨཱ་ར་མྨ་ཎཱ་དྷི་པ་ཏི་ནོ པ་ན ཧེ་ཊྛཱ ཨཱ་ར་མྨ་ཎ་པ་ཙྩ་ཡེ ཝུ་ཏྟ་ན་ཡེ་ནེ་ཝ ཨ་ནེ་ཀ་པ་ཙྩ་ཡ་བྷཱ་ཝོ ཝེ་དི་ཏ་བྦོ.

ཨ་ན་ནྟ་ར་ས་མ་ན་ནྟ་ར་པ་ཙྩ་ཡཱ ཨ་ན་ནྟ་ར་ས་མ་ན་ནྟ་ར་པ་ཙྩ་ཡ་ཏྟཾ ཨ་ཝི་ཛ་ཧ་ནྟཱ་ཝ ཨུ་པ་ནི་སྶ་ཡ་ཀ་མྨ་ཨཱ་སེ་ཝ་ན་ན་ཏྠི་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི པ་ཉྩ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི. ཨ་རི་ཡ་མ་གྒ་ཙེ་ཏ་ནཱ་ཡེ་ཝ ཙེ་ཏྠ ཀ་མྨ་པ་ཙྩ་ཡ་ཏཾ ལ་བྷ་ཏི, ན སེ་ས་དྷ་མྨཱ. ས་ཧ་ཛཱ་ཏ་པ་ཙྩ་ཡོ ས་ཧ་ཛཱ་ཏ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཧེ་ཏུ་ཨ་དྷི་པ་ཏི་ཨ་ཉྙ་མ་ཉྙ་ནི་སྶ་ཡ་ཀ་མྨ་ཝི་པཱ་ཀ་ཨཱ་ཧཱ་ར་ཨི་ནྡྲི་ཡ་ཛྷཱ་ན་མ་གྒ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི ཙུ་དྡ་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་ཡ་མྤི ཨུ་ཀྐ་ཊྛ་པ་རི་ཙྪེ་དོ ཝ་ཏྠུ་ས་ཧ་ཛཱ་ཏཱ་དཱི་ནཾ པ་ན ཝ་སེ་ནེ་ཏྠ ཧེ་ཏུ་པ་ཙྩ་ཡཱ་དཱི་ནཾ ཨ་བྷཱ་ཝོ་པི ཝེ་དི་ཏ་བྦོ. ཨ་ཉྙ་མ་ཉྙ་པ་ཙྩ་ཡེ་པི ཨེ་སེ་ཝ ན་ཡོ.

ནི་སྶ་ཡ་པ་ཙྩ་ཡོ ནི་སྶ་ཡ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ཨ་ཏྟ་ནོ ནི་སྶ་ཡ་པ་ཙྩ་ཡ་ཏྟ་ཉྩེ་ཝ ཨ་ན་ནྟ་ར་ས་མ་ན་ནྟ་ར་པ་ཙྪཱ་ཛཱ་ཏ་ཨཱ་སེ་ཝ་ན་ན་ཏྠི་ཝི་ག་ཏ་པ་ཙྩ་ཡེ ཙ ཚ ཨ་པ་ནེ་ཏྭཱ སེ་སཱ་ནཾ ཝ་སེ་ན ཨ་པ་རེ་ཧི་པི ས་ཏྟ་ར་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་ཡ་མྤི ཨུ་ཀྐ་ཊྛ་པ་རི་ཙྪེ་དོ་ཝ ཝ་ཏྠུ་ནི་སྶ་ཡཱ་དཱི་ནཾ པ་ན ཝ་སེ་ནེ་ཏྠ ཧེ་ཏུ་པ་ཙྩ་ཡཱ་དཱི་ནཾ ཨཱ་བྷཱ་ཝོ་པི ཝེ་དི་ཏ་བྦོ.

ཨུ་པ་ནི་སྶ་ཡ་པ་ཙྩ་ཡེ ཨཱ་ར་མྨ་ཎཱུ་པ་ནི་སྶ་ཡོ ཨཱ་ར་མྨ་ཎཱ་དྷི་པ་ཏི་ས་དི་སོ. ཨ་ན་ནྟ་རཱུ་པ་ནི་སྶ་ཡོ ཨ་ན་ནྟ་རཱུ་པ་ནི་སྶ་ཡ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་ན་ནྟ་ར་ས་མ་ན་ནྟ་ར་ཀ་མྨ་ཨཱ་སེ་ཝ་ན་ན་ཏྠི་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཚ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་རི་ཡ་མ་གྒ་ཙེ་ཏ་ནཱ་ཡེ་ཝ ཙེ་ཏྠ ཀ་མྨ་པ་ཙྩ་ཡ་ཏཾ ལ་བྷ་ཏི, ན སེ་ས་དྷ་མྨཱ. པ་ཀ་ཏཱུ་པ་ནི་སྶ་ཡོ པ་ཀ་ཏཱུ་པ་ནི་སྶ་ཡོ་ཝ. པུ་རེ་ཛཱ་ཏ་པ་ཙྩ་ཡོ ཨ་ཏྟ་ནོ པུ་རེ་ཛཱ་ཏ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ནི་སྶ་ཡ་ཨུ་པ་ནི་སྶ་ཡ་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཨ་ཊྛ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་ཡ་མྤི ཨུ་ཀྐ་ཊྛ་ནི་དྡེ་སོ་ཝ ཨཱ་ར་མྨ་ཎ་པུ་རེ་ཛཱ་ཏེ པ་ནེ་ཏྠ ནི་སྶ་ཡ་ཨི་ནྡྲི་ཡ་ཝི་པྤ་ཡུ་ཏྟ་པ་ཙྩ་ཡ་ཏཱ ན ལ་བྦྷ་ཏི. ཨི་ཏོ ཨུ་ཏྟ་རི་པི ལ་བྦྷ་མཱ་ནཱ་ལ་བྦྷ་མཱ་ནཾ ཝེ་དི་ཏ་བྦཾ. པ་ཙྪཱ་ཛཱ་ཏ་པ་ཙྩ་ཡོ ཨ་ཏྟ་ནོ པ་ཙྪཱ་ཛཱ་ཏ་པ་ཙྩ་ཡ་བྷཱ་ཝཾ ཨ་ཝི་ཛ་ཧ་ནྟོ་ཝ ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཏཱི་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨཱ་སེ་ཝ་ན་པ་ཙྩ་ཡོ ཨཱ་སེ་ཝ་ན་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་ན་ནྟ་ར་ས་མ་ན་ནྟ་ར་ཨུ་པ་ནི་སྶ་ཡ་ན་ཏྠི་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི པ་ཉྩ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི.

ཀ་མྨ་པ་ཙྩ་ཡོ ཀ་མྨ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨེ་ཀ་ཀྑ་ཎི་ཀོ ཏཱ་ཝ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨཱ་ཧཱ་ར་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ན་ཝ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ནཱ་ནཱ་ཀྑ་ཎི་ཀོ ཨུ་པ་ནི་སྶ་ཡ་ཨ་ན་ནྟ་ར་ས་མ་ན་ནྟ་ར་ན་ཏྠི་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི པ་ཉྩ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཝི་པཱ་ཀ་པ་ཙྩ་ཡོ ཝི་པཱ་ཀ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཧེ་ཏུ་ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཀ་མྨ་ཨཱ་ཧཱ་ར་ཨི་ནྡྲི་ཡ་ཛྷཱ་ན་མ་གྒ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཙུ་དྡ་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨཱ་ཧཱ་ར་པ་ཙྩ་ཡེ ཀ་བ་ལཱི༹་ཀཱ་རོ ཨཱ་ཧཱ་རོ ཨཱ་ཧཱ་ར་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི དྭཱི་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. སེ་སཱ ཏ་ཡོ ཨཱ་ཧཱ་ར་པ་ཙྩ་ཡ་ཏྟཾ ཨ་ཝི་ཛ་ཧ་ནྟཱ་ཝ ཡ་ཐཱ་ནུ་རཱུ་པཾ ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཀ་མྨ་ཝི་པཱ་ཀ་ཨི་ནྡྲི་ཡ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཨེ་ཀཱ་ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི.

ཨི་ནྡྲི་ཡ་པ་ཙྩ་ཡེ རཱུ་པི་ནོ པ་ཉྩི་ནྡྲི་ཡཱ ཨི་ནྡྲི་ཡ་པ་ཙྩ་ཡ་ཏྟཾ ཨ་ཝི་ཛ་ཧ་ནྟཱ་ཝ ནི་སྶ་ཡ་པུ་རེ་ཛཱ་ཏ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི པ་ཉྩ་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི. རཱུ་པ་ཛཱི་ཝི་ཏི་ནྡྲི་ཡ་མྤི ཨི་ནྡྲི་ཡ་པ་ཙྩ་ཡ་ཏྟཾ ཨ་ཝི་ཛ་ཧ་ནྟ་ཉྙེ་ཝ ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི དྭཱི་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཨ་རཱུ་པི་ནོ ཨི་ནྡྲི་ཡཱ་ནི་པི ཡ་ཐཱ་ནུ་རཱུ་པཾ ཨི་ནྡྲི་ཡ་པ་ཙྩ་ཡ་ཏྟཾ ཨ་ཝི་ཛ་ཧ་ནྟཱ་ནེ་ཝ ཧེ་ཏུ་ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨཱ་ཧཱ་ར་ཛྷཱ་ན་མ་གྒ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཏེ་ར་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ནྟི. ཛྷཱ་ན་པ་ཙྩ་ཡོ ཛྷཱ་ན་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཡ་ཐཱ་ནུ་རཱུ་པཾ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཝི་པཱ་ཀ་ཨི་ནྡྲི་ཡ་མ་གྒ་ས་མྤ་ཡུ་ཏྟ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. མ་གྒ་པ་ཙྩ་ཡོ མ་གྒ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཡ་ཐཱ་ནུ་རཱུ་པཾ ཛྷཱ་ན་པ་ཙྩ་ཡེ ཝུ་ཏྟཱ་ནཾ ད་ས་ནྣཾ ཧེ་ཏུ་ཨ་དྷི་པ་ཏཱི་ན་ཉྩཱ་ཏི ཨི་མེ་སཾ ཝ་སེ་ན ཨ་པ་རེ་ཧི་པི དྭཱ་ད་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི.

ས་མྤ་ཡུ་ཏྟ་པ་ཙྩ་ཡོ ས་མྤ་ཡུ་ཏྟ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཡ་ཐཱ་ནུ་རཱུ་པཾ ཧེ་ཏུ་ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཀ་མྨ་ཝི་པཱ་ཀ་ཨཱ་ཧཱ་ར་ཨི་ནྡྲི་ཡ་ཛྷཱ་ན་མ་གྒ་ཨ་ཏྠི་ཨ་ཝི་ག་ཏཱ་ནཾ ཝ་སེ་ན ཨ་པ་རེ་ཧི་པི ཏེ་ར་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཝི་པྤ་ཡུ་ཏྟ་པ་ཙྩ་ཡོ ཝི་པྤ་ཡུ་ཏྟ་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་ན་ནྟ་ར་ས་མ་ན་ནྟ་ར་ཨཱ་སེ་ཝ་ན་ས་མྤ་ཡུ་ཏྟ་ན་ཏྠི་ཝི་ག་ཏ་ས་ངྑཱ་ཏེ ཚ པ་ཙྩ་ཡེ ཨ་པ་ནེ་ཏྭཱ སེ་སཱ་ནཾ ཝ་སེ་ན ཡ་ཐཱ་ནུ་རཱུ་པཾ ཨ་པ་རེ་ཧི་པི ས་ཏྟ་ར་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ཏ་ཏྠ རཱུ་པ་སྶ ཙ ཨ་རཱུ་པ་སྶ ཙ པ་ཙྩ་ཡ་ཝི་བྷཱ་གོ ཝེ་དི་ཏ་བྦོ. ཨ་ཏྠི་པ་ཙྩ་ཡོ ཨ་ཏྠི་པ་ཙྩ་ཡ་ཏྟཾ ཨ་ཝི་ཛ་ཧ་ནྟོ་ཝ ཨ་ན་ནྟ་ར་ས་མ་ན་ནྟ་ར་ཨཱ་སེ་ཝ་ན་ན་ཏྠི་ཝི་ག་ཏ་ས་ངྑཱ་ཏེ པ་ཉྩ པ་ཙྩ་ཡེ ཨ་པ་ནེ་ཏྭཱ སེ་སཱ་ནཾ ཝ་སེ་ན ཡ་ཐཱ་ནུ་རཱུ་པཾ ཨ་པ་རེ་ཧི ཨ་ཊྛཱ་ར་ས་ཧཱ་ཀཱ་རེ་ཧི ཨ་ནེ་ཀ་པ་ཙྩ་ཡ་བྷཱ་ཝཾ ག་ཙྪ་ཏི. ན་ཏྠི་པ་ཙྩ་ཡ་ཝི་ག་ཏ་པ་ཙྩ་ཡཱ ཨ་ན་ནྟ་ར་པ་ཙྩ་ཡ་ས་དི་སཱ. ཨ་ཝི་ག་ཏ་པ་ཙྩ་ཡོ ཨ་ཏྠི་པ་ཙྩ་ཡ་ས་དི་སོ་ཡེ་ཝཱ་ཏི ཨེ་ཝ་མེ་ཏྠ ཨེ་ཀ་པ་ཙྩ་ཡ་སྶ ཨ་ནེ་ཀ་པ་ཙྩ་ཡ་བྷཱ་ཝ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

པ་ཙྩ་ཡ་ས་བྷཱ་ག་ཏོཏི ཨེ་ཏེ་སུ ཧི ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ཨ་ན་ནྟ་ར་ས་མ་ན་ནྟ་ར་ཨ་ན་ནྟ་རཱུ་པ་ནི་སྶ་ཡ་ཨཱ་སེ་ཝ་ན་ན་ཏྠི་ཝི་ག་ཏཱ ས་བྷཱ་གཱ, ཏ་ཐཱ ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ཨཱ་ར་མྨ་ཎཱུ་པ་ནི་སྶ་ཡཱ་ཏི ཨི་མི་ནཱ ཨུ་པཱ་ཡེ་ནེ་ཏྠ པ་ཙྩ་ཡ་ས་བྷཱ་ག་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

པ་ཙྩ་ཡ་ཝི་ས་བྷཱ་ག་ཏོཏི པུ་རེ་ཛཱ་ཏ་པ་ཙྩ་ཡོ པ་ནེ་ཏྠ པ་ཙྪཱ་ཛཱ་ཏ་པ་ཙྩ་ཡེ་ན ཝི་ས་བྷཱ་གོ, ཏ་ཐཱ ས་མྤ་ཡུ་ཏྟ་པ་ཙྩ་ཡོ ཝི་པྤ་ཡུ་ཏྟ་པ་ཙྩ་ཡེ་ན, ཨ་ཏྠི་པ་ཙྩ་ཡོ ན་ཏྠི་པ་ཙྩ་ཡེ་ན, ཝི་ག་ཏ་པ་ཙྩ་ཡོ ཨ་ཝི་ག་ཏ་པ་ཙྩ་ཡེ་ནཱ་ཏི ཨི་མི་ནཱ ཨུ་པཱ་ཡེ་ནེ་ཏྠ པ་ཙྩ་ཡ་ཝི་ས་བྷཱ་ག་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

ཡུ་ག་ལ༹་ཀ་ཏོཏི ཨེ་ཏེ་སུ ཙ ཨ་ཏྠ་ས་རི་ཀྑ་ཏཱ་ཡ, ས་དྡ་ས་རི་ཀྑ་ཏཱ་ཡ, ཀཱ་ལ་པ་ཊི་པ་ཀྑ་ཏཱ་ཡ, ཧེ་ཏུ་ཕ་ལ་ཏཱ་ཡ, ཨ་ཉྙ་མ་ཉྙ་པ་ཊི་པ་ཀྑ་ཏཱ་ཡཱ་ཏི ཨི་མེ་ཧི ཀཱ་ར་ཎེ་ཧི ཡུ་ག་ལ༹་ཀ་ཏོ ཝི་ཉྙཱ་ཏ་བྦོ ཝི་ནི་ཙྪ་ཡོ. ཨ་ན་ནྟ་ར་ས་མ་ན་ནྟ་རཱ ཧི ཨ་ཏྠ་ས་རི་ཀྑ་ཏཱ་ཡ ཨེ་ཀཾ ཡུ་ག་ལ༹་ཀཾ ནཱ་མ; ནི་སྶ་ཡཱུ་པ་ནི་སྶ་ཡཱ ས་དྡ་ས་རི་ཀྑ་ཏཱ་ཡ, པུ་རེ་ཛཱ་ཏ་པ་ཙྪཱ་ཛཱ་ཏཱ ཀཱ་ལ་པ་ཊི་པ་ཀྑ་ཏཱ་ཡ, ཀ་མྨ་པ་ཙྩ་ཡ་ཝི་པཱ་ཀ་པ་ཙྩ་ཡཱ ཧེ་ཏུ་ཕ་ལ་ཏཱ་ཡ, ས་མྤ་ཡུ་ཏྟ་ཝི་པྤ་ཡུ་ཏྟ་པ་ཙྩ་ཡཱ ཨ་ཉྙ་མ་ཉྙ་པ་ཊི་པ་ཀྑ་ཏཱ་ཡ ཨེ་ཀཾ ཡུ་ག་ལ༹་ཀཾ ནཱ་མ, ཏ་ཐཱ ཨ་ཏྠི་ན་ཏྠི་པ་ཙྩ་ཡཱ, ཝི་ག་ཏཱ་ཝི་ག་ཏ་པ་ཙྩ་ཡཱ ཙཱ་ཏི ཨེ་ཝ་མེ་ཏྠ ཡུ་ག་ལ༹་ཀ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ. ཛ་ན་ཀཱ་ཛ་ན་ཀ་ཏོཏི ཨེ་ཏེ་སུ ཙ ཨ་ན་ནྟ་ར་ས་མ་ན་ནྟ་རཱ་ན་ནྟ་རཱུ་པ་ནི་སྶ་ཡ་པ་ཀ་ཏཱུ་པ་ནི་སྶ་ཡཱ་སེ་ཝ་ན་པ་ཙྩ་ཡཱ ནཱ་ནཱ་ཀྑ་ཎི་ཀོ, ཀ་མྨ་པ་ཙྩ་ཡོ, ན་ཏྠི་ཝི་ག་ཏ་པ་ཙྩ་ཡཱ་ཏི ཨི་མེ པ་ཙྩ་ཡཱ ཛ་ན་ཀཱ་ཡེ་ཝ, ན ཨ་ཛ་ན་ཀཱ. པ་ཙྪཱ་ཛཱ་ཏ་པ་ཙྩ་ཡོ ཀེ་ཝ་ལཾ ཨུ་པ་ཏྠ་མྦྷ་ཀོ་ཡེ་ཝ, ན ཛ་ན་ཀོ. སེ་སཱ ཛ་ན་ཀཱ ཙ ཨ་ཛ་ན་ཀཱ ཙ ཨུ་པ་ཏྠ་མྦྷ་ཀཱ ཙཱ་ཏི ཨ་ཏྠོ. ཨེ་ཝ་མེ་ཏྠ ཛ་ན་ཀཱ་ཛ་ན་ཀ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

ས་བྦ་ཊྛཱ་ནི་ཀཱ་ས་བྦ་ཊྛཱ་ནི་ཀ་ཏོཏི ཨེ་ཏེ་སུ ཙ ས་ཧ་ཛཱ་ཏ་ནི་སྶ་ཡ་ཨ་ཏྠི་ཨ་ཝི་ག་ཏ་པ་ཙྩ་ཡཱ ས་བྦ་ཊྛཱ་ནི་ཀཱ ནཱ་མ, ས་བྦེ་སཾ ས་ངྑ་ཏཱ་ནཾ རཱུ་པཱ་རཱུ་པ་དྷ་མྨཱ་ནཾ ཋཱ་ན་བྷཱུ་ཏཱ ཀཱ་ར་ཎ་བྷཱུ་ཏཱ་ཏི ཨ་ཏྠོ. ཨེ་ཏེ་ཧི ཝི་ནཱ ཨུ་པྤ་ཛྫ་མཱ་ནོ ཨེ་ཀ་དྷ་མྨོ་པི ན་ཏྠཱི་ཏི. ཨཱ་ར་མྨ་ཎ་ཨཱ་ར་མྨ་ཎཱ་དྷི་པ་ཏི་ཨ་ན་ནྟ་ར་ས་མ་ན་ནྟ་རཱ་ན་ནྟ་རཱུ་པ་ནི་སྶ་ཡ་པ་ཀ་ཏཱུ་པ་ནི་སྶ་ཡཱ་སེ་ཝ་ན་ས་མྤ་ཡུ་ཏྟ་ན་ཏྠི་ཝི་ག་ཏ་པ་ཙྩ་ཡཱ ཨ་ས་བྦ་ཊྛཱ་ནི་ཀཱ ནཱ་མ. ན ས་བྦེ་སཾ རཱུ་པཱ་རཱུ་པ་དྷ་མྨཱ་ནཾ ཋཱ་ན་བྷཱུ་ཏཱ, ཨ་རཱུ་པ་ཀྑ་ནྡྷཱ་ན་ཉྙེ་ཝ པ་ན ཋཱ་ན་བྷཱུ་ཏཱ ཀཱ་ར་ཎ་བྷཱུ་ཏཱ་ཏི ཨ་ཏྠོ. ཨ་རཱུ་པ་དྷ་མྨཱ་ཡེ་ཝ ཧི ཨེ་ཏེ་ཧི ཨུ་པྤ་ཛྫ་ནྟི, ན རཱུ་པ་དྷ་མྨཱ. པུ་རེ་ཛཱ་ཏ་པ་ཙྪཱ་ཛཱ་ཏཱ་པི ཨ་ས་བྦ་ཊྛཱ་ནི་ཀཱ ཨ་རཱུ་པ་རཱུ་པཱ་ན་ཉྙེ་ཝ ཡ་ཐཱ་ཀྐ་མེ་ན པ་ཙྩ་ཡ་བྷཱ་ཝ་ཏོ. ཝུ་ཏྟཱ་ཝ་སེ་སཱ་པི ཨེ་ཀ་ཙྩཱ་ནཾ རཱུ་པཱ་རཱུ་པ་དྷ་མྨཱ་ནཾ ཨུ་པྤ་ཏྟི་ཧེ་ཏུ་ཏོ ན ས་བྦ་ཊྛཱ་ནི་ཀཱ་ཏི ཨེ་ཝ་མེ་ཏྠ ས་བྦ་ཊྛཱ་ནི་ཀཱ ས་བྦ་ཊྛཱ་ནི་ཀ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

རཱུ་པཾ རཱུ་པ་སྶཱ་ཏི་ཨཱ་དི་ཝི་ཀ་པྤ་ཏོཏི ཨེ་ཏེ་སུ ཙ ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ ཨེ་ཀ་པ་ཙྩ་ཡོ་པི ཨེ་ཀ་ནྟེ་ན རཱུ་པ་མེ་ཝ ཧུ་ཏྭཱ རཱུ་པ་སྶེ་ཝ པ་ཙྩ་ཡོ ནཱ་མ ན་ཏྠི, ཨེ་ཀ་ནྟེ་ན པ་ན རཱུ་པཾ ཧུ་ཏྭཱ ཨ་རཱུ་པ་སྶེ་ཝ པ་ཙྩ་ཡོ ནཱ་མ ཨ་ཏྠི. ཀ་ཏ་རོ པ་ནེ་སོ་ཏི? པུ་རེ་ཛཱ་ཏ་པ་ཙྩ་ཡོ. པུ་རེ་ཛཱ་ཏ་པ་ཙྩ་ཡོ ཧི ཨེ་ཀ་ནྟེ་ན རཱུ་པ་མེ་ཝ ཧུ་ཏྭཱ ཨ་རཱུ་པ་སྶེ་ཝ པ་ཙྩ་ཡོ ཧོ་ཏི. ཨེ་ཀ་ནྟེ་ན རཱུ་པ་མེ་ཝ ཧུ་ཏྭཱ རཱུ་པཱ་རཱུ་པ་སྶེ་ཝ པ་ཙྩ་ཡོ ནཱ་མཱ་ཏི་པི ན་ཏྠི, ཨེ་ཀ་ནྟེ་ན པ་ན ཨ་རཱུ་པཾ ཧུ་ཏྭཱ ཨ་རཱུ་པ་སྶེ་ཝ པ་ཙྩ་ཡོ ནཱ་མ ཨ་ཏྠི. ཀ་ཏ་རོ པ་ནེ་སོ་ཏི? ཨ་ན་ནྟ་ར་ས་མ་ན་ནྟ་ར་ཨཱ་སེ་ཝ་ན་ས་མྤ་ཡུ་ཏྟ་ན་ཏྠི་ཝི་ག་ཏ་ཝ་སེ་ན ཚ་བྦི་དྷོ. སོ ཧི ས་བྦོ་པི ཨེ་ཀ་ནྟེ་ན ཨ་རཱུ་པ་མེ་ཝ ཧུ་ཏྭཱ ཨ་རཱུ་པ་སྶེ་ཝ པ་ཙྩ་ཡོ ཧོ་ཏི. ཨེ་ཀ་ནྟེ་ན ཨ་རཱུ་པ་མེ་ཝ ཧུ་ཏྭཱ་པི ཨེ་ཀ་ནྟེ་ན རཱུ་པ་སྶེ་ཝ པ་ཙྩ་ཡོ ནཱ་མཱ་ཏི་པི ཨ་ཏྠི. ཀ་ཏ་རོ པ་ནེ་སོ་ཏི? པ་ཙྪཱ་ཛཱ་ཏ་པ་ཙྩ་ཡོ. སོ ཧི ཨེ་ཀ་ནྟེ་ན ཨ་རཱུ་པཾ ཧུ་ཏྭཱ རཱུ་པ་སྶེ་ཝ པ་ཙྩ་ཡོ ཧོ་ཏི; ཨེ་ཀ་ནྟེ་ན པ་ན ཨ་རཱུ་པ་དྷ་མྨོ་ཝ ཧུ་ཏྭཱ རཱུ་པཱ་རཱུ་པཱ་ནཾ པ་ཙྩ་ཡོ་པི ཨ་ཏྠི. ཀ་ཏ་རོ པ་ནེ་སོ་ཏི? ཧེ་ཏུ་ཀ་མྨ་ཝི་པཱ་ཀ་ཛྷཱ་ན་མ་གྒ་ཝ་སེ་ན པ་ཉྩ་ཝི་དྷོ. སོ ཧི ས་བྦོ་པི ཨེ་ཀ་ནྟེ་ན ཨ་རཱུ་པ་མེ་ཝ ཧུ་ཏྭཱ རཱུ་པ་དྷ་མྨཱ་ནཾ ཨ་རཱུ་པ་དྷ་མྨཱ་ན་མྤི པ་ཙྩ་ཡོ ཧོ་ཏི. ཨེ་ཀ་ནྟེ་ན པ་ན རཱུ་པཱ་རཱུ་པ་མེ་ཝ ཧུ་ཏྭཱ རཱུ་པ་སྶེ་ཝ པ་ཙྩ་ཡོ ནཱ་མཱ་ཏི་པི ན་ཏྠི, ཨ་རཱུ་པ་སྶེ་ཝ པ་ན ཧོ་ཏི. ཀ་ཏ་རོ པ་ནེ་སོ་ཏི? ཨཱ་ར་མྨ་ཎ་པ་ཙྩ་ཡོ ཙེ་ཝ ཨུ་པ་ནི་སྶ་ཡ་པ་ཙྩ་ཡོ ཙ. ཨི་ད་ཉྷི དྭ་ཡཾ ཨེ་ཀ་ནྟེ་ན རཱུ་པཱ་རཱུ་པ་མེ་ཝ ཧུ་ཏྭཱ ཨ་རཱུ་པ་སྶེ་ཝ པ་ཙྩ་ཡོ ཧོ་ཏི. ཨེ་ཀ་ནྟེ་ན རཱུ་པཱ་རཱུ་པ་མེ་ཝ ཧུ་ཏྭཱ པ་ན རཱུ་པཱ་རཱུ་པ་སྶེ་ཝ པ་ཙྩ་ཡོ ནཱ་མཱ་ཏི་པི ཨ་ཏྠི. ཀ་ཏ་རོ པ་ནེ་སོ་ཏི? ཨ་དྷི་པ་ཏི་ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཨཱ་ཧཱ་ར་ཨི་ནྡྲི་ཡ་ཝི་པྤ་ཡུ་ཏྟ་ཨ་ཏྠི་ཨ་ཝི་ག་ཏ་ཝ་སེ་ན ན་ཝ་ཝི་དྷོ. སོ ཧི ས་བྦོ་པི ཨེ་ཀ་ནྟེ་ན རཱུ་པཱ་རཱུ་པ་མེ་ཝ ཧུ་ཏྭཱ རཱུ་པཱ་རཱུ་པ་སྶེ་ཝ པ་ཙྩ་ཡོ ཧོ་ཏཱི་ཏི ཨེ་ཝ་མེ་ཏྠ རཱུ་པཾ རཱུ་པ་སྶཱ་ཏི་ཨཱ་དི་ཝི་ཀ་པྤ་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ.

བྷ་ཝ་བྷེ་ད་ཏོཏི ཨི་མེ་སུ པ་ན ཙ་ཏུ་ཝཱི་ས་ཏི་ཡཱ པ་ཙྩ་ཡེ་སུ པ་ཉྩ་ཝོ་ཀཱ་ར་བྷ་ཝེ ཏཱ་ཝ ན ཀོ་ཙི པ་ཙྩ་ཡོ ན ལ་བྦྷ་ཏི ནཱ་མ. ཙ་ཏུ་ཝོ་ཀཱ་ར་བྷ་ཝེ པ་ན ཏ་ཡོ པུ་རེ་ཛཱ་ཏ་པ་ཙྪཱ་ཛཱ་ཏ་ཝི་པྤ་ཡུ་ཏྟ་པ་ཙྩ་ཡེ ཨ་པ་ནེ་ཏྭཱ སེ་སཱ ཨེ་ཀ་ཝཱི་ས་ཏི་མེ་ཝ ལ་བྦྷ་ནྟི. ཨེ་ཀ་ཝོ་ཀཱ་ར་བྷ་ཝེ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཀ་མྨ་ཨི་ནྡྲི་ཡ་ཨ་ཏྠི་ཨ་ཝི་ག་ཏ་ཝ་སེ་ན ས་ཏྟེ་ཝ ལ་བྦྷ་ནྟི. བཱ་ཧི་རེ པ་ན ཨ་ནི་ནྡྲི་ཡ་བ་དྡྷ་རཱུ་པེ ས་ཧ་ཛཱ་ཏ་ཨ་ཉྙ་མ་ཉྙ་ནི་སྶ་ཡ་ཨ་ཏྠི་ཨ་ཝི་ག་ཏ་ཝ་སེ་ན པ་ཉྩེ་ཝ ལ་བྦྷ་ནྟཱི་ཏི ཨེ་ཝ་མེ་ཏྠ བྷ་ཝ་བྷེ་ད་ཏོ་པི ཝི་ཉྙཱ་ཏ་བྦོ ཝི་ནི་ཙྪ་ཡོ་ཏི.

པ་ཙྩ་ཡ་ནི་དྡེ་ས་ཝཱ་ར་ཝ་ཎྞ་ནཱ ནི་ཊྛི་ཏཱ.

པུ་ཙྪཱ་ཝཱ་རོ

༡. པ་ཙྩ་ཡཱ་ནུ་ལོ་མ་ཝ་ཎྞ་ནཱ