༣. གོ་ཏ་མ་ཀ་ཙེ་ཏི་ཡ་སུ་ཏྟཾ

༡༢༦. ཨེ་ཀཾ ས་མ་ཡཾ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི གོ་ཏ་མ་ཀེ ཙེ་ཏི་ཡེ. ཏ་ཏྲ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སི – ‘‘བྷི་ཀྑ་ཝོ’’ཏི. ‘‘བྷ་ད་ནྟེ’’ཏི ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –

‘‘ཨ་བྷི་ཉྙཱ་ཡཱ་ཧཾ, བྷི་ཀྑ་ཝེ, དྷ་མྨཾ དེ་སེ་མི, ནོ ཨ་ན་བྷི་ཉྙཱ་ཡ. ས་ནི་དཱ་ནཱ་ཧཾ, བྷི་ཀྑ་ཝེ, དྷ་མྨཾ དེ་སེ་མི, ནོ ཨ་ནི་དཱ་ནཾ. ས་པྤཱ་ཊི་ཧཱ་རི་ཡཱ་ཧཾ, བྷི་ཀྑ་ཝེ, དྷ་མྨཾ དེ་སེ་མི, ནོ ཨ་པྤཱ་ཊི་ཧཱ་རི་ཡཾ. ཏ་སྶ མ་ཡ྄ཧཾ, བྷི་ཀྑ་ཝེ, ཨ་བྷི་ཉྙཱ་ཡ དྷ་མྨཾ དེ་ས་ཡ་ཏོ ནོ ཨ་ན་བྷི་ཉྙཱ་ཡ, ས་ནི་དཱ་ནཾ དྷ་མྨཾ དེ་ས་ཡ་ཏོ ནོ ཨ་ནི་དཱ་ནཾ, ས་པྤཱ་ཊི་ཧཱ་རི་ཡཾ དྷ་མྨཾ དེ་ས་ཡ་ཏོ ནོ ཨ་པྤཱ་ཊི་ཧཱ་རི་ཡཾ, ཀ་ར་ཎཱི་ཡོ ཨོ་ཝཱ་དོ, ཀ་ར་ཎཱི་ཡཱ ཨ་ནུ་སཱ་ས་ནཱི. ཨ་ལ་ཉྩ པ་ན ཝོ, བྷི་ཀྑ་ཝེ, ཏུ་ཊྛི་ཡཱ, ཨ་ལཾ ཨ་ཏྟ་མ་ན་ཏཱ་ཡ, ཨ་ལཾ སོ་མ་ན་སྶཱ་ཡ – ‘ས་མྨཱ་ས་མྦུ་དྡྷོ བྷ་ག་ཝཱ, སྭཱ་ཀྑཱ་ཏོ དྷ་མྨོ, སུ་པྤ་ཊི་པ་ནྣོ ས་ངྒྷོ’’’ཏི.

ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནཱ ཏེ བྷི་ཀྑཱུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡུ་ནྟི. ཨི་མ་སྨི་ཉྩ པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ས་ཧ་སྶཱི ལོ་ཀ་དྷཱ་ཏུ ཨ་ཀ་མྤི་ཏྠཱ་ཏི. ཏ་ཏི་ཡཾ.