༡༠. མོ་ནེ་ཡྻ་སུ་ཏྟཾ

༡༢༣. ‘‘ཏཱི་ཎི་མཱ་ནི, བྷི་ཀྑ་ཝེ, མོ་ནེ་ཡྻཱ་ནི. ཀ་ཏ་མཱ་ནི ཏཱི་ཎི? ཀཱ་ཡ་མོ་ནེ་ཡྻཾ, ཝ་ཙཱི་མོ་ནེ་ཡྻཾ, མ་ནོ་མོ་ནེ་ཡྻཾ. ཀ་ཏ་མ་ཉྩ, བྷི་ཀྑ་ཝེ, ཀཱ་ཡ་མོ་ནེ་ཡྻཾ? ཨི་དྷ, བྷི་ཀྑ་ཝེ, བྷི་ཀྑུ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, ཨ་བྲ་ཧྨ་ཙ་རི་ཡཱ པ་ཊི་ཝི་ར་ཏོ ཧོ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཀཱ་ཡ་མོ་ནེ་ཡྻཾ.

‘‘ཀ་ཏ་མ་ཉྩ, བྷི་ཀྑ་ཝེ, ཝ་ཙཱི་མོ་ནེ་ཡྻཾ? ཨི་དྷ, བྷི་ཀྑ་ཝེ, བྷི་ཀྑུ མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, པི་སུ་ཎཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ཕ་རུ་སཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ས་མྥ་པྤ་ལཱ་པཱ པ་ཊི་ཝི་ར་ཏོ ཧོ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཝ་ཙཱི་མོ་ནེ་ཡྻཾ.

‘‘ཀ་ཏ་མ་ཉྩ, བྷི་ཀྑ་ཝེ, མ་ནོ་མོ་ནེ་ཡྻཾ? ཨི་དྷ, བྷི་ཀྑ་ཝེ, བྷི་ཀྑུ ཨཱ་ས་ཝཱ་ནཾ ཁ་ཡཱ ཨ་ནཱ་ས་ཝཾ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ དི་ཊྛེ་ཝ དྷ་མྨེ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, མ་ནོ་མོ་ནེ་ཡྻཾ. ཨི་མཱ་ནི ཁོ, བྷི་ཀྑ་ཝེ, ཏཱི་ཎི མོ་ནེ་ཡྻཱ་ནཱི’’ཏི.

‘‘ཀཱ་ཡ་མུ་ནིཾ ཝ་ཙཱི་མུ་ནིཾ, ཙེ་ཏོ་མུ་ནིཾ ཨ་ནཱ་ས་ཝཾ;

མུ་ནིཾ མོ་ནེ་ཡྻ་ས་མྤ་ནྣཾ, ཨཱ་ཧུ ས་བྦ་པྤ་ཧཱ་ཡི་ན’’ནྟི. ད་ས་མཾ;

ཨཱ་པཱ་ཡི་ཀ་ཝ་གྒོ དྭཱ་ད་ས་མོ.