༧. ཨ་ར་ཀྑི་ཏ་སུ་ཏྟཾ
༡༡༠. ཨ་ཐ ཁོ ཨ་ནཱ་ཐ་པི་ཎྜི་ཀོ ག་ཧ་པ་ཏི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ ཨ་ནཱ་ཐ་པི་ཎྜི་ཀཾ ག་ཧ་པ་ཏིཾ བྷ་ག་ཝཱ ཨེ་ཏ་ད་ཝོ་ཙ – ‘‘ཙི་ཏྟེ, ག་ཧ་པ་ཏི, ཨ་ར་ཀྑི་ཏེ ཀཱ་ཡ་ཀ་མྨ་མྤི ཨ་ར་ཀྑི་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ར་ཀྑི་ཏཾ ཧོ་ཏི, མ་ནོ་ཀ་མྨ་མྤི ཨ་ར་ཀྑི་ཏཾ ཧོ་ཏི. ཏ་སྶ ཨ་ར་ཀྑི་ཏ་ཀཱ་ཡ་ཀ་མྨ་ནྟ་སྶ ཨ་ར་ཀྑི་ཏ་ཝ་ཙཱི་ཀ་མྨ་ནྟ་སྶ ཨ་ར་ཀྑི་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་ཝ་སྶུ་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ཝ་སྶུ་ཏཾ ཧོ་ཏི, མ་ནོ་ཀ་མྨ་མྤི ཨ་ཝ་སྶུ་ཏཾ ཧོ་ཏི. ཏ་སྶ ཨ་ཝ་སྶུ་ཏ་ཀཱ་ཡ་ཀ་མྨ་ནྟ་སྶ ཨ་ཝ་སྶུ་ཏ་ཝ་ཙཱི་ཀ་མྨ་ནྟ་སྶ ཨ་ཝ་སྶུ་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི པཱུ་ཏི་ཀཾ ཧོ་ཏི, ཝ་ཙཱི་ཀ་མྨ་མྤི པཱུ་ཏི་ཀཾ ཧོ་ཏི, མ་ནོ་ཀ་མྨ་མྤི པཱུ་ཏི་ཀཾ ཧོ་ཏི. ཏ་སྶ པཱུ་ཏི་ཀཱ་ཡ་ཀ་མྨ་ནྟ་སྶ པཱུ་ཏི་ཝ་ཙཱི་ཀ་མྨ་ནྟ་སྶ པཱུ་ཏི་མ་ནོ་ཀ་མྨ་ནྟ་སྶ ན བྷ་དྡ་ཀཾ མ་ར་ཎཾ ཧོ་ཏི, ན བྷ་དྡི་ཀཱ ཀཱ་ལ་ངྐི་རི་ཡཱ.
‘‘སེ་ཡྻ་ཐཱ་པི, ག་ཧ་པ་ཏི, ཀཱུ་ཊཱ་གཱ་རེ དུ་ཙྪ་ནྣེ ཀཱུ་ཊ་མྤི ཨ་ར་ཀྑི་ཏཾ ཧོ་ཏི, གོ་པཱ་ན་སི་ཡོ་པི ཨ་ར་ཀྑི་ཏཱ ཧོ་ནྟི, བྷི་ཏྟི་པི ཨ་ར་ཀྑི་ཏཱ ཧོ་ཏི; ཀཱུ་ཊ་མྤི ཨ་ཝ་སྶུ་ཏཾ ཧོ་ཏི, གོ་པཱ་ན་སི་ཡོ་པི ཨ་ཝ་སྶུ་ཏཱ ཧོ་ནྟི, བྷི་ཏྟི་པི ཨ་ཝ་སྶུ་ཏཱ ཧོ་ཏི; ཀཱུ་ཊ་མྤི པཱུ་ཏི་ཀཾ ཧོ་ཏི, གོ་པཱ་ན་སི་ཡོ་པི པཱུ་ཏི་ཀཱ ཧོ་ནྟི, བྷི་ཏྟི་པི པཱུ་ཏི་ཀཱ ཧོ་ཏི.
‘‘ཨེ་ཝ་མེ་ཝཾ ཁོ, ག་ཧ་པ་ཏི, ཙི་ཏྟེ ཨ་ར་ཀྑི་ཏེ ཀཱ་ཡ་ཀ་མྨ་མྤི ཨ་ར་ཀྑི་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ར་ཀྑི་ཏཾ ཧོ་ཏི, མ་ནོ་ཀ་མྨ་མྤི ཨ་ར་ཀྑི་ཏཾ ཧོ་ཏི. ཏ་སྶ ཨ་ར་ཀྑི་ཏ་ཀཱ་ཡ་ཀ་མྨ་ནྟ་སྶ ཨ་ར་ཀྑི་ཏ་ཝ་ཙཱི་ཀ་མྨ་ནྟ་སྶ ཨ་ར་ཀྑི་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་ཝ་སྶུ་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ཝ་སྶུ་ཏཾ ཧོ་ཏི, མ་ནོ་ཀ་མྨ་མྤི ཨ་ཝ་སྶུ་ཏཾ ཧོ་ཏི. ཏ་སྶ ཨ་ཝ་སྶུ་ཏ་ཀཱ་ཡ་ཀ་མྨ་ནྟ་སྶ ཨ་ཝ་སྶུ་ཏ་ཝ་ཙཱི་ཀ་མྨ་ནྟ་སྶ ཨ་ཝ་སྶུ་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི པཱུ་ཏི་ཀཾ ཧོ་ཏི, ཝ་ཙཱི་ཀ་མྨ་མྤི པཱུ་ཏི་ཀཾ ཧོ་ཏི, མ་ནོ་ཀ་མྨ་མྤི པཱུ་ཏི་ཀཾ ཧོ་ཏི. ཏ་སྶ པཱུ་ཏི་ཀཱ་ཡ་ཀ་མྨ་ནྟ་སྶ པཱུ་ཏི་ཝ་ཙཱི་ཀ་མྨ་ནྟ་སྶ པཱུ་ཏི་མ་ནོ་ཀ་མྨ་ནྟ་སྶ ན བྷ་དྡ་ཀཾ མ་ར་ཎཾ ཧོ་ཏི, ན བྷ་དྡི་ཀཱ ཀཱ་ལ་ངྐི་རི་ཡཱ.
‘‘ཙི་ཏྟེ, ག་ཧ་པ་ཏི, ར་ཀྑི་ཏེ ཀཱ་ཡ་ཀ་མྨ་མྤི ར་ཀྑི་ཏཾ ཧོ་ཏི, ཝ་ཙཱི་ཀ་མྨ་མྤི ར་ཀྑི་ཏཾ ཧོ་ཏི, མ་ནོ་ཀ་མྨ་མྤི ར་ཀྑི་ཏཾ ཧོ་ཏི. ཏ་སྶ ར་ཀྑི་ཏ་ཀཱ་ཡ་ཀ་མྨ་ནྟ་སྶ ར་ཀྑི་ཏ་ཝ་ཙཱི་ཀ་མྨ་ནྟ་སྶ ར་ཀྑི་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི, མ་ནོ་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི. ཏ་སྶ ཨ་ན་ཝ་སྶུ་ཏ་ཀཱ་ཡ་ཀ་མྨ་ནྟ་སྶ ཨ་ན་ཝ་སྶུ་ཏ་ཝ་ཙཱི་ཀ་མྨ་ནྟ་སྶ ཨ་ན་ཝ་སྶུ་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་པཱུ་ཏི་ཀཾ ཧོ་ཏི, ཝ་ཙཱི་ཀ་མྨ་མྤི ཨ་པཱུ་ཏི་ཀཾ ཧོ་ཏི, མ་ནོ་ཀ་མྨ་མྤི ཨ་པཱུ་ཏི་ཀཾ ཧོ་ཏི. ཏ་སྶ ཨ་པཱུ་ཏི་ཀཱ་ཡ་ཀ་མྨ་ནྟ་སྶ ཨ་པཱུ་ཏི་ཝ་ཙཱི་ཀ་མྨ་ནྟ་སྶ ཨ་པཱུ་ཏི་མ་ནོ་ཀ་མྨ་ནྟ་སྶ བྷ་དྡ་ཀཾ མ་ར་ཎཾ ཧོ་ཏི, བྷ་དྡི་ཀཱ ཀཱ་ལ་ངྐི་རི་ཡཱ.
‘‘སེ་ཡྻ་ཐཱ་པི, ག་ཧ་པ་ཏི, ཀཱུ་ཊཱ་གཱ་རེ སུ་ཙྪ་ནྣེ ཀཱུ་ཊ་མྤི ར་ཀྑི་ཏཾ ཧོ་ཏི, གོ་པཱ་ན་སི་ཡོ་པི ར་ཀྑི་ཏཱ ཧོ་ནྟི, བྷི་ཏྟི་པི ར་ཀྑི་ཏཱ ཧོ་ཏི; ཀཱུ་ཊ་མྤི ཨ་ན་ཝ་སྶུ་ཏཾ ཧོ་ཏི, གོ་པཱ་ན་སི་ཡོ་པི ཨ་ན་ཝ་སྶུ་ཏཱ ཧོ་ནྟི, བྷི་ཏྟི་པི ཨ་ན་ཝ་སྶུ་ཏཱ ཧོ་ཏི; ཀཱུ་ཊ་མྤི ཨ་པཱུ་ཏི་ཀཾ ཧོ་ཏི, གོ་པཱ་ན་སི་ཡོ་པི ཨ་པཱུ་ཏི་ཀཱ ཧོ་ནྟི, བྷི་ཏྟི་པི ཨ་པཱུ་ཏི་ཀཱ ཧོ་ཏི.
ཨེ་ཝ་མེ་ཝཾ ཁོ, ག་ཧ་པ་ཏི, ཙི་ཏྟེ ར་ཀྑི་ཏེ ཀཱ་ཡ་ཀ་མྨ་མྤི ར་ཀྑི་ཏཾ ཧོ་ཏི, ཝ་ཙཱི་ཀ་མྨ་མྤི ར་ཀྑི་ཏཾ ཧོ་ཏི, མ་ནོ་ཀ་མྨ་མྤི ར་ཀྑི་ཏཾ ཧོ་ཏི. ཏ་སྶ ར་ཀྑི་ཏ་ཀཱ་ཡ་ཀ་མྨ་ནྟ་སྶ ར་ཀྑི་ཏ་ཝ་ཙཱི་ཀ་མྨ་ནྟ་སྶ ར་ཀྑི་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི, ཝ་ཙཱི་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི, མ་ནོ་ཀ་མྨ་མྤི ཨ་ན་ཝ་སྶུ་ཏཾ ཧོ་ཏི. ཏ་སྶ ཨ་ན་ཝ་སྶུ་ཏ་ཀཱ་ཡ་ཀ་མྨ་ནྟ་སྶ ཨ་ན་ཝ་སྶུ་ཏ་ཝ་ཙཱི་ཀ་མྨ་ནྟ་སྶ ཨ་ན་ཝ་སྶུ་ཏ་མ་ནོ་ཀ་མྨ་ནྟ་སྶ ཀཱ་ཡ་ཀ་མྨ་མྤི ཨ་པཱུ་ཏི་ཀཾ ཧོ་ཏི, ཝ་ཙཱི་ཀ་མྨ་མྤི ཨ་པཱུ་ཏི་ཀཾ ཧོ་ཏི, མ་ནོ་ཀ་མྨ་མྤི ཨ་པཱུ་ཏི་ཀཾ ཧོ་ཏི. ཏ་སྶ ཨ་པཱུ་ཏི་ཀཱ་ཡ་ཀ་མྨ་ནྟ་སྶ ཨ་པཱུ་ཏི་ཝ་ཙཱི་ཀ་མྨ་ནྟ་སྶ ཨ་པཱུ་ཏི་མ་ནོ་ཀ་མྨ་ནྟ་སྶ བྷ་དྡ་ཀཾ མ་ར་ཎཾ ཧོ་ཏི, བྷ་དྡི་ཀཱ ཀཱ་ལ་ངྐི་རི་ཡཱ’’ཏི. ས་ཏྟ་མཾ.