๒๙๗. กามวิลาปชาตกํ (๓-๕-๗)

๑๓๙. อุจฺเจ สกุณ เฑมาน, ปตฺตยาน วิหงฺคม;

วชฺชาสิ โข ตฺวํ วามูรุํ, จิรํ โข สา กริสฺสติ [สริสฺสติ (ก.)].

๑๔๐. อิทํ โข สา น ชานาติ, อสึ สตฺติญฺจ โอฑฺฑิตํ;

สา จณฺฑี กาหติ โกธํ, ตํ เม ตปติ โน อิทํ [โน อิธ (สี. สฺยา. ปี.)].

๑๔๑. เอส อุปฺปลสนฺนาโห, นิกฺขญฺจุสฺสีสโกหิตํ [นิกฺขมุสฺสีสเก กตํ (สี. ปี.), นิกฺขญฺจุสฺสีสเก กตํ (สฺยา.)];

กาสิกญฺจ มุทุํ วตฺถํ, ตปฺเปตุ ธนิกา ปิยาติ [ธนกามิยาติ (สฺยา. ปี.), ธนกามิกาติ (สี.)].

กามวิลาปชาตกํ สตฺตมํ.