๕. กุมฺภวคฺโค

๒๙๑. สุราฆฏชาตกํ (๒-๕-๑)

๑๒๑. สพฺพกามททํ กุมฺภํ, กุฏํ ลทฺธาน ธุตฺตโก;

ยาว นํ อนุปาเลติ, ตาว โส สุขเมธติ.

๑๒๒. ยทา มตฺโต จ ทิตฺโต จ, ปมาทา กุมฺภมพฺภิทา;

ตทา นคฺโค จ โปตฺโถ จ, ปจฺฉา พาโล วิหญฺญติ.

๑๒๓. เอวเมว โย ธนํ ลทฺธา, ปมตฺโต [อมตฺตา (สี.), อมตฺโต (ปี.)] ปริภุญฺชติ;

ปจฺฉา ตปฺปติ ทุมฺเมโธ, กุฏํ ภิตฺวาว [กุฏํ ภินฺโนว (สี. ปี.), กุฏภินฺโนว (?)] ธุตฺตโกติ.

สุราฆฏ [ภทฺรฆฏ (สี. ปี.), ภทฺรฆฏเภทก (สฺยา.)] ชาตกํ ปฐมํ.

๒๙๒. สุปตฺตชาตกํ (๓-๕-๒)

๑๒๔. พาราณสฺยํ [พาราณสฺสํ (สี. ปี.)] มหาราช, กากราชา นิวาสโก [นิวาสิโก (สี. ปี.)];

อสีติยา สหสฺเสหิ, สุปตฺโต ปริวาริโต.

๑๒๕. ตสฺส โทหฬินี ภริยา, สุผสฺสา ภกฺขิตุมิจฺฉติ [มจฺฉมิจฺฉติ (สี. ปี.)];

รญฺโญ มหานเส ปกฺกํ, ปจฺจคฺฆํ ราชโภชนํ.

๑๒๖. เตสาหํ ปหิโต ทูโต, รญฺโญ จมฺหิ อิธาคโต;

ภตฺตุ อปจิตึ กุมฺมิ, นาสายมกรํ [มกรึ (สี. นิสฺสย)] วณนฺติ.

สุปตฺตชาตกํ ทุติยํ.

๒๙๓. กายนิพฺพินฺทชาตกํ (๓-๕-๓)

๑๒๗. ผุฏฺฐสฺส เม อญฺญตเรน พฺยาธินา, โรเคน พาฬฺหํ ทุขิตสฺส รุปฺปโต;

ปริสุสฺสติ ขิปฺปมิทํ กเฬวรํ, ปุปฺผํ ยถา ปํสุนิ อาตเป กตํ.

๑๒๘. อชญฺญํ ชญฺญสงฺขาตํ, อสุจึ สุจิสมฺมตํ;

นานากุณปปริปูรํ, ชญฺญรูปํ อปสฺสโต.

๑๒๙. ธิรตฺถุมํ อาตุรํ ปูติกายํ, เชคุจฺฉิยํ อสฺสุจึ พฺยาธิธมฺมํ;

ยตฺถปฺปมตฺตา อธิมุจฺฉิตา ปชา, หาเปนฺติ มคฺคํ สุคตูปปตฺติยาติ.

กายนิพฺพินฺท [กายวิจฺฉนฺท (สี.), กายวิจฺฉินฺท (ปี.)] ชาตกํ ตติยํ.

๒๙๔. ชมฺพุขาทกชาตกํ (๓-๕-๔)

๑๓๐. โกยํ พินฺทุสฺสโร วคฺคุ, สรวนฺตาน [ปวทนฺตาน (สี. ปี.)] มุตฺตโม;

อจฺจุโต ชมฺพุสาขาย, โมรจฺฉาโปว กูชติ.

๑๓๑. กุลปุตฺโตว ชานาติ [กุลปุตฺโต ปชานาติ (สฺยา. ก.)], กุลปุตฺตํ [กุลปุตฺเต (สี. ปี.)] ปสํสิตุํ;

พฺยคฺฆจฺฉาปสรีวณฺณ, ภุญฺช สมฺม ททามิ เต.

๑๓๒. จิรสฺสํ วต ปสฺสามิ, มุสาวาที สมาคเต;

วนฺตาทํ กุณปาทญฺจ, อญฺญมญฺญํ ปสํสเกติ.

ชมฺพุขาทกชาตกํ จตุตฺถํ.

๒๙๕. อนฺตชาตกํ (๓-๕-๕)

๑๓๓. อุสภสฺเสว เต ขนฺโธ, สีหสฺเสว วิชมฺภิตํ;

มิคราช นโม ตฺยตฺถุ, อปิ กิญฺจิ ลภามเส.

๑๓๔. กุลปุตฺโตว ชานาติ, กุลปุตฺตํ ปสํสิตุํ;

มยูรคีวสงฺกาส, อิโต ปริยาหิ วายส.

๑๓๕. มิคานํ สิงฺคาโล [โกตฺถุโก (สี. ปี.), โกฏฺฐุโก (สฺยา.)] อนฺโต, ปกฺขีนํ ปน วายโส;

เอรณฺโฑ อนฺโต รุกฺขานํ, ตโย อนฺตา สมาคตาติ.

อนฺตชาตกํ ปญฺจมํ.

๒๙๖. สมุทฺทชาตกํ (๓-๕-๖)

๑๓๖. โก นายํ [โก นฺวายํ (สฺยา.)] โลณโตยสฺมึ, สมนฺตา ปริธาวติ;

มจฺเฉ มกเร จ วาเรติ, อูมีสุ จ วิหญฺญติ.

๑๓๗. อนนฺตปายี สกุโณ, อติตฺโตติ ทิสาสุโต;

สมุทฺทํ ปาตุมิจฺฉามิ, สาครํ สริตํ ปตึ.

๑๓๘. โส อยํ หายติ เจว, ปูรเต จ มโหทธิ;

นาสฺส นายติ ปีตนฺโต, อเปยฺโย กิร สาคโรติ.

สมุทฺทชาตกํ ฉฏฺฐํ.

๒๙๗. กามวิลาปชาตกํ (๓-๕-๗)

๑๓๙. อุจฺเจ สกุณ เฑมาน, ปตฺตยาน วิหงฺคม;

วชฺชาสิ โข ตฺวํ วามูรุํ, จิรํ โข สา กริสฺสติ [สริสฺสติ (ก.)].

๑๔๐. อิทํ โข สา น ชานาติ, อสึ สตฺติญฺจ โอฑฺฑิตํ;

สา จณฺฑี กาหติ โกธํ, ตํ เม ตปติ โน อิทํ [โน อิธ (สี. สฺยา. ปี.)].

๑๔๑. เอส อุปฺปลสนฺนาโห, นิกฺขญฺจุสฺสีสโกหิตํ [นิกฺขมุสฺสีสเก กตํ (สี. ปี.), นิกฺขญฺจุสฺสีสเก กตํ (สฺยา.)];

กาสิกญฺจ มุทุํ วตฺถํ, ตปฺเปตุ ธนิกา ปิยาติ [ธนกามิยาติ (สฺยา. ปี.), ธนกามิกาติ (สี.)].

กามวิลาปชาตกํ สตฺตมํ.

๒๙๘. อุทุมฺพรชาตกํ (๓-๕-๘)

๑๔๒. อุทุมฺพรา จิเม ปกฺกา, นิโคฺรธา จ กปิตฺถนา;

เอหิ นิกฺขม ภุญฺชสฺสุ, กึ ชิฆจฺฉาย มิยฺยสิ.

๑๔๓. เอวํ โส สุหิโต โหติ, โย วุฑฺฒมปจายติ;

ยถาหมชฺช สุหิโต, ทุมปกฺกานิ มาสิโต.

๑๔๔. ยํ วเนโช วเนชสฺส, วญฺเจยฺย กปิโน กปิ;

ทหโร กปิ [ทหโรปิ ตํ น (สี. ปี.), ทหโรปิ น (สฺยา.)] สทฺเธยฺย, น หิ ชิณฺโณ ชรากปีติ.

อุทุมฺพรชาตกํ อฏฺฐมํ.

๒๙๙. โกมารปุตฺตชาตกํ (๓-๕-๙)

๑๔๕. ปุเร ตุวํ สีลวตํ สกาเส, โอกฺกนฺติกํ [โอกฺกนฺทิกํ (สี. สฺยา. ปี.)] กีฬสิ อสฺสมมฺหิ;

กโรหเร [กโรหิ เร (ก.)] มกฺกฏิยานิ มกฺกฏ, น ตํ มยํ สีลวตํ รมาม.

๑๔๖. สุตา หิ มยฺหํ ปรมา วิสุทฺธิ, โกมารปุตฺตสฺส พหุสฺสุตสฺส;

มา ทานิ มํ มญฺญิ ตุวํ ยถา ปุเร, ฌานานุยุตฺโต วิหรามิ [ฌานานุยุตฺตา วิหราม (สี. ปี.)] อาวุโส.

๑๔๗. สเจปิ เสลสฺมิ วเปยฺย พีชํ, เทโว จ วสฺเส น หิ ตํ วิรูเฬฺห [เนว หิ ตํ รุเหยฺย (สี. ปี.), น หิ ตํ วิรูเห (?)];

สุตา หิ เต สา ปรมา วิสุทฺธิ, อารา ตุวํ มกฺกฏ ฌานภูมิยาติ.

โกมารปุตฺตชาตกํ นวมํ.

๓๐๐. วกชาตกํ (๓-๕-๑๐)

๑๔๘. ปรปาณโรธา [ปรปาณฆาเต (สฺยา.), ปรปาณโรจํ (ก.)] ชีวนฺโต, มํสโลหิตโภชโน;

วโก วตํ สมาทาย, อุปปชฺชิ อุโปสถํ.

๑๔๙. ตสฺส สกฺโก วตญฺญาย, อชรูเปนุปาคมิ;

วีตตโป อชฺฌปฺปตฺโต, ภญฺชิ โลหิตโป ตปํ.

๑๕๐. เอวเมว อิเธกจฺเจ, สมาทานมฺหิ ทุพฺพลา;

ลหุํ กโรนฺติ อตฺตานํ, วโกว อชการณาติ.

วกชาตกํ ทสมํ.

กุมฺภวคฺโค ปญฺจโม.

ตสฺสุทฺทานํ –

วรกุมฺภ สุปตฺตสิริวฺหยโน, สุจิสมฺมต พินฺทุสโร จุสโภ;

สริตํปติ จณฺฑิ ชรากปินา, อถ มกฺกฏิยา วกเกน ทสาติ.

อถ วคฺคุทฺทานํ –

สงฺกปฺโป ปทุโม เจว, อุทปาเนน ตติยํ;

อพฺภนฺตรํ ฆฏเภทํ, ติกนิปาตมฺหิลงฺกตนฺติ.

ติกนิปาตํ นิฏฺฐิตํ.