౯. ఛత్తుపాహనవగ్గో
౧. పఠమసిక్ఖాపదం
౧౧౭౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో ఛత్తుపాహనం ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఛత్తుపాహనం ధారేస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో ఛత్తుపాహనం ధారేస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో ఛత్తుపాహనం ధారేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో ఛత్తుపాహనం ధారేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
‘‘యా పన భిక్ఖునీ ఛత్తుపాహనం ధారేయ్య, పాచిత్తియ’’న్తి.
ఏవఞ్చిదం భగవతా భిక్ఖునీనం సిక్ఖాపదం పఞ్ఞత్తం హోతి.
౧౧౭౯. తేన ఖో పన సమయేన అఞ్ఞతరా భిక్ఖునీ గిలానా హోతి. తస్సా వినా ఛత్తుపాహనం న ఫాసు హోతి…పే… భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానాయ భిక్ఖునియా ఛత్తుపాహనం. ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౧౮౦. ‘‘యా పన భిక్ఖునీ అగిలానా ఛత్తుపాహనం ధారేయ్య, పాచిత్తియ’’న్తి.
౧౧౮౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
అగిలానా నామ యస్సా వినా ఛత్తుపాహనం ఫాసు హోతి.
గిలానా నామ యస్సా వినా ఛత్తుపాహనం న ఫాసు హోతి.
ఛత్తం నామ తీణి ఛత్తాని – సేతచ్ఛత్తం, కిలఞ్జచ్ఛత్తం, పణ్ణచ్ఛత్తం మణ్డలబద్ధం సలాకబద్ధం. ధారేయ్యాతి సకిమ్పి ధారేతి, ఆపత్తి పాచిత్తియస్స.
౧౧౮౨. అగిలానా అగిలానసఞ్ఞా ఛత్తుపాహనం ధారేతి, ఆపత్తి పాచిత్తియస్స. అగిలానా వేమతికా ఛత్తుపాహనం ధారేతి, ఆపత్తి పాచిత్తియస్స. అగిలానా గిలానసఞ్ఞా ఛత్తుపాహనం ధారేతి, ఆపత్తి పాచిత్తియస్స.
ఛత్తం ధారేతి న ఉపాహనం, ఆపత్తి దుక్కటస్స. ఉపాహనం ధారేతి న ఛత్తం, ఆపత్తి దుక్కటస్స. గిలానా అగిలానసఞ్ఞా, ఆపత్తి దుక్కటస్స. గిలానా వేమతికా, ఆపత్తి దుక్కటస్స. గిలానా గిలానసఞ్ఞా, అనాపత్తి.
౧౧౮౩. అనాపత్తి గిలానాయ, ఆరామే ఆరామూపచారే ధారేతి, ఆపదాసు, ఉమ్మత్తికాయ, ఆదికమ్మికాయాతి.
పఠమసిక్ఖాపదం నిట్ఠితం.
౨. దుతియసిక్ఖాపదం
౧౧౮౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో యానేన యాయన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో యానేన యాయిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే. … తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో యానేన యాయిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో యానేన యాయన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో యానేన యాయిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
‘‘యా పన భిక్ఖునీ యానేన యాయేయ్య, పాచిత్తియ’’న్తి.
ఏవఞ్చిదం భగవతా భిక్ఖునీనం సిక్ఖాపదం పఞ్ఞత్తం హోతి.
౧౧౮౫. తేన ఖో పన సమయేన అఞ్ఞతరా భిక్ఖునీ గిలానా హోతి, న సక్కోతి పదసా గన్తుం…పే… భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానాయ భిక్ఖునియా యానం. ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౧౮౬. ‘‘యా పన భిక్ఖునీ అగిలానా యానేన యాయేయ్య, పాచిత్తియ’’న్తి.
౧౧౮౭. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
అగిలానా నామ సక్కోతి పదసా గన్తుం.
గిలానా నామ న సక్కోతి పదసా గన్తుం.
యానం నామ వయ్హం రథో సకటం సన్దమానికా సివికా పాటఙ్కీ.
యాయేయ్యాతి సకిమ్పి యానేన యాయతి, ఆపత్తి పాచిత్తియస్స.
౧౧౮౮. అగిలానా అగిలానసఞ్ఞా యానేన యాయతి, ఆపత్తి పాచిత్తియస్స. అగిలానా వేమతికా యానేన యాయతి, ఆపత్తి పాచిత్తియస్స. అగిలానా గిలానసఞ్ఞా యానేన యాయతి, ఆపత్తి పాచిత్తియస్స.
గిలానా అగిలానసఞ్ఞా, ఆపత్తి దుక్కటస్స. గిలానా వేమతికా, ఆపత్తి దుక్కటస్స. గిలానా గిలానసఞ్ఞా, అనాపత్తి.
౧౧౮౯. అనాపత్తి గిలానాయ, ఆపదాసు, ఉమ్మత్తికాయ, ఆదికమ్మికాయాతి.
దుతియసిక్ఖాపదం నిట్ఠితం.
౩. తతియసిక్ఖాపదం
౧౧౯౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరా భిక్ఖునీ అఞ్ఞతరిస్సా ఇత్థియా కులూపికా హోతి. అథ ఖో సా ఇత్థీ తం భిక్ఖునిం ఏతదవోచ – ‘‘హన్దాయ్యే, ఇమం సఙ్ఘాణిం అముకాయ నామ ఇత్థియా దేహీ’’తి. అథ ఖో సా భిక్ఖునీ – ‘‘సచాహం పత్తేన ఆదాయ గచ్ఛామి విస్సరో మే భవిస్సతీ’’తి పటిముఞ్చిత్వా అగమాసి. తస్సా రథికాయ సుత్తకే ఛిన్నే విప్పకిరియింసు. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో సఙ్ఘాణిం ధారేస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే. … తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునీ సఙ్ఘాణిం ధారేస్సతీ’’తి…పే… సచ్చం కిర, భిక్ఖవే, భిక్ఖునీ సఙ్ఘాణిం ధారేతీ’’తి [ధారేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునీ సఙ్ఘాణిం ధారేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౧౯౧. ‘‘యా పన భిక్ఖునీ సఙ్ఘాణిం ధారేయ్య, పాచిత్తియ’’న్తి.
౧౧౯౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
సఙ్ఘాణి నామ యా కాచి కటూపగా.
ధారేయ్యాతి సకిమ్పి ధారేతి, ఆపత్తి పాచిత్తియస్స.
౧౧౯౩. అనాపత్తి ఆబాధప్పచ్చయా, కటిసుత్తకం ధారేతి, ఉమ్మత్తికాయ, ఆదికమ్మికాయాతి.
తతియసిక్ఖాపదం నిట్ఠితం.
౪. చతుత్థసిక్ఖాపదం
౧౧౯౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో ఇత్థాలఙ్కారం ధారేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఇత్థాలఙ్కారం ధారేస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో ఇత్థాలఙ్కారం ధారేస్సన్తీ’’తి …పే… సచ్చం కిర, భిక్ఖవే, ఛబ్బగ్గియా భిక్ఖునియో ఇత్థాలఙ్కారం ధారేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో ఇత్థాలఙ్కారం ధారేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౧౯౫. ‘‘యా పన భిక్ఖునీ ఇత్థాలఙ్కారం ధారేయ్య, పాచిత్తియ’’న్తి.
౧౧౯౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
ఇత్థాలఙ్కారో నామ సీసూపగో గీవూపగో హత్థూపగో పాదూపగో కటూపగో. ధారేయ్యాతి సకిమ్పి ధారేతి, ఆపత్తి పాచిత్తియస్స.
౧౧౯౭. అనాపత్తి ఆబాధపచ్చయా, ఉమ్మత్తికాయ, ఆదికమ్మికాయాతి.
చతుత్థసిక్ఖాపదం నిట్ఠితం.
౫. పఞ్చమసిక్ఖాపదం
౧౧౯౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో గన్ధవణ్ణకేన నహాయన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో గన్ధవణ్ణకేన నహాయిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో గన్ధవణ్ణకేన నహాయిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో గన్ధవణ్ణకేన నహాయన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో గన్ధవణ్ణకేన నహాయిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౧౯౯. ‘‘యా పన భిక్ఖునీ గన్ధవణ్ణకేన నహాయేయ్య, పాచిత్తియ’’న్తి.
౧౨౦౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
గన్ధో నామ యో కోచి గన్ధో. వణ్ణకం నామ యం కిఞ్చి వణ్ణకం. నహాయేయ్యాతి నహాయతి. పయోగే దుక్కటం, నహానపరియోసానే ఆపత్తి పాచిత్తియస్స.
౧౨౦౧. అనాపత్తి ఆబాధప్పచ్చయా, ఉమ్మత్తికాయ, ఆదికమ్మికాయాతి.
పఞ్చమసిక్ఖాపదం నిట్ఠితం.
౬. ఛట్ఠసిక్ఖాపదం
౧౨౦౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో వాసితకేన పిఞ్ఞాకేన నహాయన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో వాసితకేన పిఞ్ఞాకేన నహాయిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో వాసితకేన పిఞ్ఞాకేన నహాయిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో వాసితకేన పిఞ్ఞాకేన నహాయన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో వాసితకేన పిఞ్ఞాకేన నహాయిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౦౩. ‘‘యా పన భిక్ఖునీ వాసితకేన పిఞ్ఞాకేన నహాయేయ్య, పాచిత్తియ’’న్తి.
౧౨౦౪. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
వాసితకం నామ యం కిఞ్చి గన్ధవాసితకం. పిఞ్ఞాకం నామ తిలపిట్ఠం వుచ్చతి. నహాయేయ్యాతి నహాయతి. పయోగే దుక్కటం, నహానపరియోసానే ఆపత్తి పాచిత్తియస్స.
౧౨౦౫. అనాపత్తి ఆబాధప్పచ్చయా, పకతిపిఞ్ఞాకేన నహాయతి, ఉమ్మత్తికాయ, ఆదికమ్మికాయాతి.
ఛట్ఠసిక్ఖాపదం నిట్ఠితం.
౭. సత్తమసిక్ఖాపదం
౧౨౦౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో భిక్ఖునియా ఉమ్మద్దాపేన్తిపి పరిమద్దాపేన్తిపి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో భిక్ఖునియా ఉమ్మద్దాపేస్సన్తిపి పరిమద్దాపేస్సన్తిపి సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో భిక్ఖునియా ఉమ్మద్దాపేస్సన్తిపి పరిమద్దాపేస్సన్తిపీ’’తి…పే… సచ్చం కిర, భిక్ఖవే, భిక్ఖునియో భిక్ఖునియా ఉమ్మద్దాపేన్తిపి పరిమద్దాపేన్తిపీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో భిక్ఖునియా ఉమ్మద్దాపేస్సన్తిపి పరిమద్దాపేస్సన్తిపి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౦౭. ‘‘యా పన భిక్ఖునీ భిక్ఖునియా ఉమ్మద్దాపేయ్య వా పరిమద్దాపేయ్య వా, పాచిత్తియ’’న్తి.
౧౨౦౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
భిక్ఖునియాతి అఞ్ఞాయ భిక్ఖునియా. ఉమ్మద్దాపేయ్య వాతి ఉమ్మద్దాపేతి [ఉబ్బట్టాపేతి (సీ.)], ఆపత్తి పాచిత్తియస్స. పరిమద్దాపేయ్య వాతి సమ్బాహాపేతి, ఆపత్తి పాచిత్తియస్స.
౧౨౦౯. అనాపత్తి గిలానాయ, ఆపదాసు, ఉమ్మత్తికాయ, ఆదికమ్మికాయాతి.
సత్తమసిక్ఖాపదం నిట్ఠితం.
౮-౯-౧౦. అట్ఠమ-నవమ-దసమసిక్ఖాపదం
౧౨౧౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో సిక్ఖమానాయ ఉమ్మద్దాపేన్తిపి పరిమద్దాపేన్తిపి…పే… సామణేరియా ఉమ్మద్దాపేన్తిపి పరిమద్దాపేన్తిపి…పే… గిహినియా ఉమ్మద్దాపేన్తిపి పరిమద్దాపేన్తిపి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో గిహినియా ఉమ్మద్దాపేస్సన్తిపి పరిమద్దాపేస్సన్తిపి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – కథఞ్హి నామ భిక్ఖునియో గిహినియా ఉమ్మద్దాపేస్సన్తిపి పరిమద్దాపేస్సన్తిపీతి…పే… సచ్చం కిర, భిక్ఖవే, భిక్ఖునియో గిహినియా ఉమ్మద్దాపేన్తిపి పరిమద్దాపేన్తిపీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో గిహినియా ఉమ్మద్దాపేస్సన్తిపి పరిమద్దాపేస్సన్తిపి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౧౧. ‘‘యా పన భిక్ఖునీ (సిక్ఖమానాయ…పే… సామణేరియా…పే…) గిహినియా ఉమ్మద్దాపేయ్య వా పరిమద్దాపేయ్య వా, పాచిత్తియ’’న్తి.
౧౨౧౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా.
సామణేరీ నామ దససిక్ఖాపదికా.
గిహినీ నామ అగారినీ వుచ్చతి.
ఉమ్మద్దాపేయ్య వాతి ఉమ్మద్దాపేతి, ఆపత్తి పాచిత్తియస్స.
పరిమద్దాపేయ్య వాతి సమ్బాహాపేతి, ఆపత్తి పాచిత్తియస్స.
౧౨౧౩. అనాపత్తి గిలానాయ [ఆబాధప్పచ్చయా (క.)], ఆపదాసు, ఉమ్మత్తికాయ, ఆదికమ్మికాయాతి.
అట్ఠమ నవమ దసమసిక్ఖాపదాని నిట్ఠితాని.
౧౧. ఏకాదసమసిక్ఖాపదం
౧౨౧౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో భిక్ఖుస్స పురతో అనాపుచ్ఛా ఆసనే నిసీదన్తి. భిక్ఖూ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో భిక్ఖుస్స పురతో అనాపుచ్ఛా ఆసనే నిసీదిస్సన్తీ’’తి…పే… సచ్చం కిర, భిక్ఖవే, భిక్ఖునియో భిక్ఖుస్స పురతో అనాపుచ్ఛా ఆసనే నిసీదన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో భిక్ఖుస్స పురతో అనాపుచ్ఛా ఆసనే నిసీదిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౧౫. ‘‘యా పన భిక్ఖునీ భిక్ఖుస్స పురతో అనాపుచ్ఛా ఆసనే నిసీదేయ్య, పాచిత్తియ’’న్తి.
౧౨౧౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
భిక్ఖుస్స పురతోతి ఉపసమ్పన్నస్స పురతో. అనాపుచ్ఛాతి అనపలోకేత్వా. ఆసనే నిసీదేయ్యాతి అన్తమసో ఛమాయపి నిసీదతి, ఆపత్తి పాచిత్తియస్స.
౧౨౧౭. అనాపుచ్ఛితే అనాపుచ్ఛితసఞ్ఞా ఆసనే నిసీదతి, ఆపత్తి పాచిత్తియస్స. అనాపుచ్ఛితే వేమతికా ఆసనే నిసీదతి, ఆపత్తి పాచిత్తియస్స. అనాపుచ్ఛితే ఆపుచ్ఛితసఞ్ఞా ఆసనే నిసీదతి, ఆపత్తి పాచిత్తియస్స.
ఆపుచ్ఛితే అనాపుచ్ఛితసఞ్ఞా, ఆపత్తి దుక్కటస్స. ఆపుచ్ఛితే వేమతికా, ఆపత్తి దుక్కటస్స. ఆపుచ్ఛితే ఆపుచ్ఛితసఞ్ఞా, అనాపత్తి.
౧౨౧౮. అనాపత్తి ఆపుచ్ఛా ఆసనే నిసీదతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.
ఏకాదసమసిక్ఖాపదం నిట్ఠితం.
౧౨. ద్వాదసమసిక్ఖాపదం
౧౨౧౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో అనోకాసకతం భిక్ఖుం పఞ్హం పుచ్ఛన్తి. భిక్ఖూ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అనోకాసకతం భిక్ఖుం పఞ్హం పుచ్ఛిస్సన్తీ’’తి…పే… సచ్చం కిర, భిక్ఖవే, భిక్ఖునియో అనోకాసకతం భిక్ఖుం పఞ్హం పుచ్ఛన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అనోకాసకతం భిక్ఖుం పఞ్హం పుచ్ఛిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౨౦. ‘‘యా పన భిక్ఖునీ అనోకాసకతం భిక్ఖుం పఞ్హం పుచ్ఛేయ్య, పాచిత్తియ’’న్తి.
౧౨౨౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
అనోకాసకతన్తి అనాపుచ్ఛా. భిక్ఖున్తి ఉపసమ్పన్నం. పఞ్హం పుచ్ఛేయ్యాతి సుత్తన్తే ఓకాసం కారాపేత్వా వినయం వా అభిధమ్మం వా పుచ్ఛతి, ఆపత్తి పాచిత్తియస్స. వినయే ఓకాసం కారాపేత్వా సుత్తన్తం వా అభిధమ్మం వా పుచ్ఛతి, ఆపత్తి పాచిత్తియస్స. అభిధమ్మే ఓకాసం కారాపేత్వా సుత్తన్తం వా వినయం వా పుచ్ఛతి, ఆపత్తి పాచిత్తియస్స.
౧౨౨౨. అనాపుచ్ఛితే అనాపుచ్ఛితసఞ్ఞా పఞ్హం పుచ్ఛతి, ఆపత్తి పాచిత్తియస్స. అనాపుచ్ఛితే వేమతికా పఞ్హం పుచ్ఛతి, ఆపత్తి పాచిత్తియస్స. అనాపుచ్ఛితే ఆపుచ్ఛితసఞ్ఞా పఞ్హం పుచ్ఛతి, ఆపత్తి పాచిత్తియస్స.
ఆపుచ్ఛితే అనాపుచ్ఛితసఞ్ఞా, ఆపత్తి దుక్కటస్స. ఆపుచ్ఛితే వేమతికా, ఆపత్తి దుక్కటస్స. ఆపుచ్ఛితే ఆపుచ్ఛితసఞ్ఞా, అనాపత్తి.
౧౨౨౩. అనాపత్తి ఓకాసం కారాపేత్వా పుచ్ఛతి, అనోదిస్స ఓకాసం కారాపేత్వా యత్థ కత్థచి పుచ్ఛతి, ఉమ్మత్తికాయ, ఆదికమ్మికాయాతి.
ద్వాదసమసిక్ఖాపదం నిట్ఠితం.
౧౩. తేరసమసిక్ఖాపదం
౧౨౨౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరా భిక్ఖునీ అసఙ్కచ్చికా [అసఙ్కచ్ఛికా (స్యా.)] గామం పిణ్డాయ పావిసి. తస్సా రథికాయ వాతమణ్డలికా సఙ్ఘాటియో ఉక్ఖిపింసు. మనుస్సా ఉక్కుట్ఠిం అకంసు – ‘‘సున్దరా అయ్యాయ థనుదరా’’తి. సా భిక్ఖునీ తేహి మనుస్సేహి ఉప్పణ్డియమానా మఙ్కు అహోసి. అథ ఖో సా భిక్ఖునీ ఉపస్సయం గన్త్వా భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునీ అసఙ్కచ్చికా గామం పవిసిస్సతీ’’తి…పే… సచ్చం కిర, భిక్ఖవే, భిక్ఖునీ అసఙ్కచ్చికా గామం పావిసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునీ అసఙ్కచ్చికా గామం పవిసిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౨౨౫. ‘‘యా పన భిక్ఖునీ అసఙ్కచ్చికా [అసఙ్కచ్ఛికా (స్యా.)] గామం పవిసేయ్య, పాచిత్తియ’’న్తి.
౧౨౨౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
అసఙ్కచ్చికాతి వినా సఙ్కచ్చికం.
సఙ్కచ్చికం నామ అధక్ఖకం ఉబ్భనాభి, తస్స పటిచ్ఛాదనత్థాయ.
గామం పవిసేయ్యాతి పరిక్ఖిత్తస్స గామస్స పరిక్ఖేపం అతిక్కామేన్తియా ఆపత్తి పాచిత్తియస్స. అపరిక్ఖిత్తస్స గామస్స ఉపచారం ఓక్కమన్తియా ఆపత్తి పాచిత్తియస్స.
౧౨౨౭. అనాపత్తి అచ్ఛిన్నచీవరికాయ, నట్ఠచీవరికాయ, గిలానాయ, అస్సతియా, అజానన్తియా, ఆపదాసు, ఉమ్మత్తికాయ, ఆదికమ్మికాయాతి.
తేరసమసిక్ఖాపదం నిట్ఠితం.
ఛత్తుపాహనవగ్గో నవమో.
ఉద్దిట్ఠా ఖో, అయ్యాయో, ఛసట్ఠిసతా పాచిత్తియా ధమ్మా. తత్థాయ్యాయో పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.
ఖుద్దకం సమత్తం.
భిక్ఖునివిభఙ్గే పాచిత్తియకణ్డం నిట్ఠితం.