౫. పాటిదేసనీయకణ్డం (భిక్ఖునీవిభఙ్గో)

౧. పఠమపాటిదేసనీయసిక్ఖాపదం

ఇమే ఖో పనాయ్యాయో అట్ఠ పాటిదేసనీయా

ధమ్మా ఉద్దేసం ఆగచ్ఛన్తి.

౧౨౨౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో సప్పిం విఞ్ఞాపేత్వా భుఞ్జన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో సప్పిం విఞ్ఞాపేత్వా భుఞ్జిస్సన్తి! కస్స సమ్పన్నం న మనాపం, కస్స సాదుం న రుచ్చతీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో సప్పిం విఞ్ఞాపేత్వా భుఞ్జిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా, భిక్ఖునియో సప్పిం విఞ్ఞాపేత్వా భుఞ్జన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో సప్పిం విఞ్ఞాపేత్వా భుఞ్జిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

‘‘యా పన భిక్ఖునీ సప్పిం విఞ్ఞాపేత్వా భుఞ్జేయ్య, పటిదేసేతబ్బం తాయ భిక్ఖునియా – ‘గారయ్హం, అయ్యే, ధమ్మం ఆపజ్జిం అసప్పాయం పాటిదేసనీయం, తం పటిదేసేమీ’’’తి.

ఏవఞ్చిదం భగవతా భిక్ఖునీనం సిక్ఖాపదం పఞ్ఞత్తం హోతి.

౧౨౨౯. తేన ఖో పన సమయేన భిక్ఖునియో గిలానా హోన్తి. గిలానపుచ్ఛికా భిక్ఖునియో గిలానా భిక్ఖునియో ఏతదవోచుం – ‘‘కచ్చి, అయ్యే, ఖమనీయం, కచ్చి యాపనీయ’’న్తి? ‘‘పుబ్బే మయం, అయ్యే, సప్పిం విఞ్ఞాపేత్వా భుఞ్జామ, తేన నో ఫాసు హోతి; ఇదాని పన ‘‘భగవతా పటిక్ఖిత్త’’న్తి కుక్కుచ్చాయన్తా న విఞ్ఞాపేమ, తేన నో న ఫాసు హోతీ’’తి…పే… భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానాయ భిక్ఖునియా సప్పిం విఞ్ఞాపేత్వా భుఞ్జితుం. ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౨౩౦. ‘‘యా పన భిక్ఖునీ అగిలానా సప్పిం విఞ్ఞాపేత్వా భుఞ్జేయ్య, పటిదేసేతబ్బం తాయ భిక్ఖునియా – ‘గారయ్హం, అయ్యే, ధమ్మం ఆపజ్జిం అసప్పాయం పాటిదేసనీయం తం పటిదేసేమీ’’’తి.

౧౨౩౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అగిలానా నామ యస్సా వినా సప్పినా ఫాసు హోతి.

గిలానా నామ యస్సా వినా సప్పినా న ఫాసు హోతి.

సప్పి నామ గోసప్పి వా అజికాసప్పి వా మహింససప్పి వా. యేసం మంసం కప్పతి తేసం సప్పి.

అగిలానా అత్తనో అత్థాయ విఞ్ఞాపేతి, పయోగే దుక్కటం. పటిలాభేన ‘‘భుఞ్జిస్సామీ’’తి పటిగ్గణ్హాతి, ఆపత్తి దుక్కటస్స. అజ్ఝోహారే అజ్ఝోహారే ఆపత్తి పాటిదేసనీయస్స.

౧౨౩౨. అగిలానా అగిలానసఞ్ఞా సప్పిం విఞ్ఞాపేత్వా భుఞ్జతి, ఆపత్తి పాటిదేసనీయస్స. అగిలానా వేమతికా సప్పిం విఞ్ఞాపేత్వా భుఞ్జతి, ఆపత్తి పాటిదేసనీయస్స. అగిలానా గిలానసఞ్ఞా సప్పిం విఞ్ఞాపేత్వా భుఞ్జతి, ఆపత్తి పాటిదేసనీయస్స.

గిలానా అగిలానసఞ్ఞా, ఆపత్తి దుక్కటస్స. గిలానా వేమతికా, ఆపత్తి దుక్కటస్స. గిలానా గిలానసఞ్ఞా, అనాపత్తి.

౧౨౩౩. అనాపత్తి గిలానాయ, గిలానా హుత్వా విఞ్ఞాపేత్వా అగిలానా భుఞ్జతి, గిలానాయ సేసకం భుఞ్జతి, ఞాతకానం పవారితానం, అఞ్ఞస్సత్థాయ, అత్తనో ధనేన, ఉమ్మత్తికాయ, ఆదికమ్మికాయాతి.

పఠమపాటిదేసనీయసిక్ఖాపదం నిట్ఠితం.

౨. దుతియాదిపాటిదేసనీయసిక్ఖాపదాని

౧౨౩౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో తేలం విఞ్ఞాపేత్వా భుఞ్జన్తి…పే… మధుం విఞ్ఞాపేత్వా భుఞ్జన్తి…పే… ఫాణితం విఞ్ఞాపేత్వా భుఞ్జన్తి…పే… మచ్ఛం విఞ్ఞాపేత్వా భుఞ్జన్తి…పే… మంసం విఞ్ఞాపేత్వా భుఞ్జన్తి…పే… ఖీరం విఞ్ఞాపేత్వా భుఞ్జన్తి…పే… దధిం విఞ్ఞాపేత్వా భుఞ్జన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో దధిం విఞ్ఞాపేత్వా భుఞ్జిస్సన్తి! కస్స సమ్పన్నం న మనాపం, కస్స సాదుం న రుచ్చతీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో దధిం విఞ్ఞాపేత్వా భుఞ్జిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో దధిం విఞ్ఞాపేత్వా భుఞ్జన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో దధిం విఞ్ఞాపేత్వా భుఞ్జిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

‘‘యా పన భిక్ఖునీ దధిం విఞ్ఞాపేత్వా భుఞ్జేయ్య, పటిదేసేతబ్బం తాయ భిక్ఖునియా – ‘గారయ్హం, అయ్యే, ధమ్మం ఆపజ్జిం అసప్పాయం పాటిదేసనీయం, తం పటిదేసేమీ’’’తి.

ఏవఞ్చిదం భగవతా భిక్ఖునీనం సిక్ఖాపదం పఞ్ఞత్తం హోతి.

౧౨౩౫. తేన ఖో పన సమయేన భిక్ఖునియో గిలానా హోన్తి. గిలానపుచ్ఛికా భిక్ఖునియో గిలానా భిక్ఖునియో ఏతదవోచుం – ‘‘కచ్చి, అయ్యే, ఖమనీయం, కచ్చి యాపనీయ’’న్తి? ‘‘పుబ్బే మయం, అయ్యే, దధిం విఞ్ఞాపేత్వా భుఞ్జిమ్హా, తేన నో ఫాసు హోతి, ఇదాని పన ‘‘భగవతా పటిక్ఖిత్త’’న్తి కుక్కుచ్చాయన్తా న విఞ్ఞాపేమ, తేన నో న ఫాసు హోతీ’’తి…పే… భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానాయ భిక్ఖునియా దధిం విఞ్ఞాపేత్వా భుఞ్జితుం. ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౨౩౬. ‘‘యా పన భిక్ఖునీ అగిలానా (తేలం…పే… మధుం…పే… ఫాణితం…పే… మచ్ఛం…పే… మంసం…పే… ఖీరం…పే…) దధిం విఞ్ఞాపేత్వా భుఞ్జేయ్య , పటిదేసేతబ్బం తాయ భిక్ఖునియా – ‘గారయ్హం, అయ్యే, ధమ్మం ఆపజ్జిం అసప్పాయం పాటిదేసనీయం, తం పటిదేసేమీ’’’తి.

౧౨౩౭. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అగిలానా నామ యస్సా వినా దధినా ఫాసు హోతి.

గిలానా నామ యస్సా వినా దధినా న ఫాసు హోతి.

తేలం నామ తిలతేలం సాసపతేలం మధుకతేలం ఏరణ్డతేలం వసాతేలం.

మధు నామ మక్ఖికామధు. ఫాణితం నామ ఉచ్ఛుమ్హా నిబ్బత్తం. మచ్ఛో నామ ఓదకో వుచ్చతి. మంసం నామ యేసం మంసం కప్పతి తేసం మంసం. ఖీరం నామ గోఖీరం వా అజికాఖీరం వా మహింసఖీరం వా యేసం మంసం కప్పతి తేసం ఖీరం. దధి నామ తేసఞ్ఞేవ దధి.

అగిలానా అత్తనో అత్థాయ విఞ్ఞాపేతి, పయోగే దుక్కటం. పటిలాభేన భుఞ్జిస్సామీతి పటిగ్గణ్హాతి, ఆపత్తి దుక్కటస్స. అజ్ఝోహారే అజ్ఝోహారే ఆపత్తి పాటిదేసనీయస్స.

౧౨౩౮. అగిలానా అగిలానసఞ్ఞా దధిం విఞ్ఞాపేత్వా భుఞ్జతి, ఆపత్తి పాటిదేసనీయస్స. అగిలానా వేమతికా దధిం విఞ్ఞాపేత్వా భుఞ్జతి, ఆపత్తి పాటిదేసనీయస్స. అగిలానా గిలానసఞ్ఞా దధిం విఞ్ఞాపేత్వా భుఞ్జతి, ఆపత్తి పాటిదేసనీయస్స.

గిలానా అగిలానసఞ్ఞా, ఆపత్తి దుక్కటస్స. గిలానా వేమతికా, ఆపత్తి దుక్కటస్స. గిలానా గిలానసఞ్ఞా అనాపత్తి.

౧౨౩౯. అనాపత్తి గిలానాయ, గిలానా హుత్వా విఞ్ఞాపేత్వా అగిలానా భుఞ్జతి, గిలానాయ సేసకం భుఞ్జతి, ఞాతకానం పవారితానం, అఞ్ఞస్సత్థాయ, అత్తనో ధనేన, ఉమ్మత్తికాయ, ఆదికమ్మికాయాతి.

అట్ఠమపాటిదేసనీయసిక్ఖాపదం నిట్ఠితం.

ఉద్దిట్ఠా ఖో, అయ్యాయో, అట్ఠ పాటిదేసనీయా ధమ్మా. తత్థాయ్యాయో పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.

భిక్ఖునివిభఙ్గే పాటిదేసనీయకణ్డం నిట్ఠితం.