౬. సేఖియకణ్డం (భిక్ఖునీవిభఙ్గో)

౧. పరిమణ్డలవగ్గో

ఇమే ఖో పనాయ్యాయో సేఖియా

ధమ్మా ఉద్దేసం ఆగచ్ఛన్తి.

౧౨౪౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో పురతోపి పచ్ఛతోపి ఓలమ్బేన్తీ నివాసేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పురతోపి పచ్ఛతోపి ఓలమ్బేన్తీ నివాసేస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో పురతోపి పచ్ఛతోపి ఓలమ్బేన్తీ నివాసేస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో పురతోపి పచ్ఛతోపి ఓలమ్బేన్తీ నివాసేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో పురతోపి పచ్ఛతోపి ఓలమ్బేన్తీ నివాసేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

‘‘పరిమణ్డలం నివాసేస్సామీతి సిక్ఖా కరణీయా’’తి.

పరిమణ్డలం నివాసేతబ్బం నాభిమణ్డలం జాణుమణ్డలం పటిచ్ఛాదేన్తియా. యా అనాదరియం పటిచ్చ పురతో వా పచ్ఛతో వా ఓలమ్బేన్తీ నివాసేతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తియా, గిలానాయ, ఆపదాసు, ఉమ్మత్తికాయ, ఆదికమ్మికాయాతి…పే… (సంఖిత్తం).

౭. పాదుకవగ్గో

౧౨౪౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కరోన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కరిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా, తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కరిస్సన్తీ’’తి! అథ ఖో భిక్ఖునియో భిక్ఖూనం ఏతమత్థం ఆరోచేసుం. భిక్ఖూ [యే తే భిక్ఖూ…పే… (?)] భగవతో ఏతమత్థం ఆరోచేసుం. అథ ఖో భగవా…పే… భిక్ఖూ పటిపుచ్ఛి – ‘‘సచ్చం కిర, భిక్ఖవే, ఛబ్బగ్గియా భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కరోన్తీ’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కరిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

‘‘న ఉదకే ఉచ్చారం వా పస్సావం వా ఖేళం వా కరిస్సామీతి సిక్ఖా కరణీయా’’తి.

ఏవఞ్చిదం భగవతా భిక్ఖునీనం సిక్ఖాపదం పఞ్ఞత్తం హోతి.

తేన ఖో పన సమయేన గిలానా భిక్ఖునియో ఉదకే ఉచ్చారమ్పి పస్సావమ్పి ఖేళమ్పి కాతుం కుక్కుచ్చాయన్తి. భగవతో ఏతమత్థం ఆరోచేసుం…పే… అనుజానామి, భిక్ఖవే, గిలానాయ భిక్ఖునియా ఉదకే ఉచ్చారమ్పి పస్సావమ్పి ఖేళమ్పి కాతుం. ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

‘‘న ఉదకే అగిలానా ఉచ్చారం వా పస్సావం వా ఖేళం వా కరిస్సామీతి సిక్ఖా కరణీయా’’తి.

న ఉదకే అగిలానాయ ఉచ్చారో వా పస్సావో వా ఖేళో వా కాతబ్బో. యా అనాదరియం పటిచ్చ ఉదకే అగిలానా ఉచ్చారం వా పస్సావం వా ఖేళం వా కరోతి, ఆపత్తి దుక్కటస్స.

అనాపత్తి అసఞ్చిచ్చ, అస్సతియా, అజానన్తియా, గిలానాయ, థలే కతో ఉదకం ఓత్థరతి, ఆపదాసు, ఉమ్మత్తికాయ, ఖిత్తచిత్తాయ, వేదనాట్టాయ, ఆదికమ్మికాయాతి.

పన్నరసమసిక్ఖాపదం నిట్ఠితం.

పాదుకవగ్గో సత్తమో.

ఉద్దిట్ఠా ఖో, అయ్యాయో, సేఖియా ధమ్మా. తత్థాయ్యాయో పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.

సేఖియకణ్డం నిట్ఠితం.