౮. కుమారీభూతవగ్గో

౧. పఠమసిక్ఖాపదం

౧౧౧౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ఊనవీసతివస్సం కుమారిభూతం వుట్ఠాపేన్తి. తా అక్ఖమా హోన్తి సీతస్స ఉణ్హస్స జిఘచ్ఛాయ పిపాసాయ డంసమకసవాతాతపసరీసపసమ్ఫస్సానం దురుత్తానం దురాగతానం వచనపథానం. ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అనధివాసకజాతికా హోన్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఊనవీసతివస్సం కుమారిభూతం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ఊనవీసతివస్సం కుమారిభూతం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ఊనవీసతివస్సం కుమారిభూతం వుట్ఠాపేస్సన్తి! ఊనవీసతివస్సా, భిక్ఖవే, కుమారిభూతా అక్ఖమా హోతి సీతస్స ఉణ్హస్స…పే… పాణహరానం అనధివాసకజాతికా హోతి. వీసతివస్సావ ఖో, భిక్ఖవే, కుమారిభూతా ఖమా హోతి సీతస్స ఉణ్హస్స…పే… పాణహరానం అధివాసకజాతికా హోతి. నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౨౦. ‘‘యా పన భిక్ఖునీ ఊనవీసతివస్సం కుమారిభూతం వుట్ఠాపేయ్య, పాచిత్తియ’’న్తి.

౧౧౨౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ఊనవీసతివస్సా నామ అప్పత్తవీసతివస్సా. కుమారిభూతా నామ సామణేరీ వుచ్చతి. వుట్ఠాపేయ్యాతి ఉపసమ్పాదేయ్య.

‘‘వుట్ఠాపేస్సామీ’’తి గణం వా ఆచరినిం వా పత్తం వా చీవరం వా పరియేసతి, సీమం వా సమ్మన్నతి, ఆపత్తి దుక్కటస్స. ఞత్తియా దుక్కటం. ద్వీహి కమ్మవాచాహి దుక్కటా. కమ్మవాచాపరియోసానే ఉపజ్ఝాయాయ ఆపత్తి పాచిత్తియస్స. గణస్స చ ఆచరినియా చ ఆపత్తి దుక్కటస్స.

౧౧౨౨. ఊనవీసతివస్సాయ ఊనవీసతివస్ససఞ్ఞా వుట్ఠాపేతి, ఆపత్తి పాచిత్తియస్స. ఊనవీసతివస్సాయ వేమతికా వుట్ఠాపేతి, ఆపత్తి దుక్కటస్స. ఊనవీసతివస్సాయ పరిపుణ్ణసఞ్ఞా వుట్ఠాపేతి, అనాపత్తి. పరిపుణ్ణవీసతివస్సాయ ఊనవీసతివస్ససఞ్ఞా, ఆపత్తి దుక్కటస్స. పరిపుణ్ణవీసతివస్సాయ వేమతికా, ఆపత్తి దుక్కటస్స. పరిపుణ్ణవీసతివస్సాయ పరిపుణ్ణసఞ్ఞా, అనాపత్తి.

౧౧౨౩. అనాపత్తి ఊనవీసతివస్సం పరిపుణ్ణసఞ్ఞా వుట్ఠాపేతి, పరిపుణ్ణవీసతివస్సం పరిపుణ్ణసఞ్ఞా వుట్ఠాపేతి, ఉమ్మత్తికాయ, ఆదికమ్మికాయాతి.

పఠమసిక్ఖాపదం నిట్ఠితం.

౨. దుతియసిక్ఖాపదం

౧౧౨౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తి. తా బాలా హోన్తి అబ్యత్తా; న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, అట్ఠారసవస్సాయ కుమారిభూతాయ ద్వే వస్సాని ఛసు ధమ్మేసు సిక్ఖాసమ్ముతిం దాతుం. ఏవఞ్చ పన భిక్ఖవే దాతబ్బా. తాయ అట్ఠారసవస్సాయ కుమారిభూతాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా ఇత్థన్నామాయ అయ్యాయ అట్ఠారసవస్సా కుమారిభూతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౧౨౫. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ అట్ఠారసవస్సా కుమారిభూతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. యది సఙ్ఘస్స పత్తకల్లం, సఙ్ఘో ఇత్థన్నామాయ అట్ఠారసవస్సాయ కుమారిభూతాయ ద్వే వస్సాని ఛసు ధమ్మేసు సిక్ఖాసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ అట్ఠారసవస్సా కుమారిభూతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. సఙ్ఘో ఇత్థన్నామాయ అట్ఠారసవస్సాయ కుమారిభూతాయ ద్వే వస్సాని ఛసు ధమ్మేసు సిక్ఖాసమ్ముతిం దేతి. యస్సా అయ్యాయ ఖమతి ఇత్థన్నామాయ అట్ఠారసవస్సాయ కుమారిభూతాయ ద్వే వస్సాని ఛసు ధమ్మేసు సిక్ఖాసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ అట్ఠారసవస్సాయ కుమారిభూతాయ ద్వే వస్సాని ఛసు ధమ్మేసు సిక్ఖాసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

సా అట్ఠారసవస్సా కుమారిభూతా ఏవం వదేహీతి వత్తబ్బా – ‘‘పాణాతిపాతా వేరమణిం ద్వే వస్సాని అవీతిక్కమ్మ సమాదానం సమాదియామి…పే… వికాలభోజనా వేరమణిం ద్వే వస్సాని అవీతిక్కమ్మ సమాదానం సమాదియామీ’’తి.

అథ ఖో భగవా తా భిక్ఖునియో అనేకపరియాయేన విగరహిత్వా దుబ్భరతాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౨౬. ‘‘యా పన భిక్ఖునీ పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేయ్య, పాచిత్తియ’’న్తి.

౧౧౨౭. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పరిపుణ్ణవీసతివస్సా నామ పత్తవీసతివస్సా. కుమారిభూతా నామ సామణేరీ వుచ్చతి. ద్వే వస్సానీతి ద్వే సంవచ్ఛరాని. అసిక్ఖితసిక్ఖా నామ సిక్ఖా వా న దిన్నా హోతి, దిన్నా వా సిక్ఖా కుపితా. వుట్ఠాపేయ్యాతి ఉపసమ్పాదేయ్య.

౧౧౨౮. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

అధమ్మకమ్మే ధమ్మకమ్మసఞ్ఞా, ఆపత్తి దుక్కటస్స. అధమ్మకమ్మే వేమతికా, ఆపత్తి దుక్కటస్స. అధమ్మకమ్మే అధమ్మకమ్మసఞ్ఞా, ఆపత్తి దుక్కటస్స.

౧౧౨౯. అనాపత్తి పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం వుట్ఠాపేతి, ఉమ్మత్తికాయ, ఆదికమ్మికాయాతి.

దుతియసిక్ఖాపదం నిట్ఠితం.

౩. తతియసిక్ఖాపదం

౧౧౩౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేన్తి. భిక్ఖునియో ఏవమాహంసు – ‘‘ఏథ సిక్ఖమానా, ఇమం జానాథ, ఇమం దేథ, ఇమం ఆహరథ, ఇమినా అత్థో, ఇమం కప్పియం కరోథా’’తి. తా ఏవమాహంసు – ‘‘న మయం, అయ్యే, సిక్ఖమానా; భిక్ఖునియో మయ’’న్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా ఇత్థన్నామాయ అయ్యాయ పరిపుణ్ణవీసతివస్సా కుమారిభూతా ద్వే వస్సాని ఛసు ధమ్మేసు సిక్ఖితసిక్ఖా సఙ్ఘం వుట్ఠానసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౧౩౧. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణవీసతివస్సా కుమారిభూతా ద్వే వస్సాని ఛసు ధమ్మేసు సిక్ఖితసిక్ఖా సఙ్ఘం వుట్ఠానసమ్ముతిం యాచతి. యది సఙ్ఘస్స పత్తకల్లం సఙ్ఘో ఇత్థన్నామాయ పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణవీసతివస్సా కుమారిభూతా ద్వే వస్సాని ఛసు ధమ్మేసు సిక్ఖితసిక్ఖా సఙ్ఘం వుట్ఠానసమ్ముతిం యాచతి. సఙ్ఘో ఇత్థన్నామాయ పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దేతి. యస్సా అయ్యాయ ఖమతి ఇత్థన్నామాయ పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ పరిపుణ్ణవీసతివస్సాయ కుమారిభూతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౧౧౩౨. ‘‘యా పన భిక్ఖునీ పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేయ్య, పాచిత్తియ’’న్తి.

౧౧౩౩. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పరిపుణ్ణవీసతివస్సా నామ పత్తవీసతివస్సా. కుమారిభూతా నామ సామణేరీ వుచ్చతి. ద్వే వస్సానీతి ద్వే సంవచ్ఛరాని. సిక్ఖితసిక్ఖా నామ ఛసు ధమ్మేసు సిక్ఖితసిక్ఖా. అసమ్మతా నామ ఞత్తిదుతియేన కమ్మేన వుట్ఠానసమ్ముతి న దిన్నా హోతి. వుట్ఠాపేయ్యాతి ఉపసమ్పాదేయ్య.

౧౧౩౪. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

౧౧౩౫. అనాపత్తి పరిపుణ్ణవీసతివస్సం కుమారిభూతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన సమ్మతం వుట్ఠాపేతి, ఉమ్మత్తికాయ, ఆదికమ్మికాయాతి.

తతియసిక్ఖాపదం నిట్ఠితం.

౪. చతుత్థసిక్ఖాపదం

౧౧౩౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ఊనద్వాదసవస్సా వుట్ఠాపేన్తి. తా బాలా హోన్తి అబ్యత్తా న జానన్తి కప్పియం వా అకప్పియం వా. సద్ధివిహారినియోపి బాలా హోన్తి అబ్యత్తా; న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఊనద్వాదసవస్సా వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ఊనద్వాదసవస్సా వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ఊనద్వాదసవస్సా వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౩౭. ‘‘యా పన భిక్ఖునీ ఊనద్వాదసవస్సా వుట్ఠాపేయ్య, పాచిత్తియ’’న్తి.

౧౧౩౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ఊనద్వాదసవస్సా నామ అప్పత్తద్వాదసవస్సా.

వుట్ఠాపేయ్యాతి ఉపసమ్పాదేయ్య.

౧౧౩౯. అనాపత్తి పరిపుణ్ణద్వాదసవస్సా వుట్ఠాపేతి, ఉమ్మత్తికాయ, ఆదికమ్మికాయాతి.

చతుత్థసిక్ఖాపదం నిట్ఠితం.

౫. పఞ్చమసిక్ఖాపదం

౧౧౪౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పరిపుణ్ణద్వాదసవస్సా సఙ్ఘేన అసమ్మతా వుట్ఠాపేన్తి. తా బాలా హోన్తి అబ్యత్తా; న జానన్తి కప్పియం వా అకప్పియం వా. సద్ధివిహారినియోపి బాలా హోన్తి అబ్యత్తా; న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పరిపుణ్ణద్వాదసవస్సా సఙ్ఘేన అసమ్మతా వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పరిపుణ్ణద్వాదసవస్సా సఙ్ఘేన అసమ్మతా వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో పరిపుణ్ణద్వాదసవస్సా సఙ్ఘేన అసమ్మతా వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, పరిపుణ్ణద్వాదసవస్సాయ భిక్ఖునియా వుట్ఠాపనసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ పరిపుణ్ణద్వాదసవస్సాయ భిక్ఖునియా సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా పరిపుణ్ణద్వాదసవస్సా భిక్ఖునీ సఙ్ఘం వుట్ఠాపనసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. సా భిక్ఖునీ సఙ్ఘేన పరిచ్ఛిన్దితబ్బా – ‘‘బ్యత్తాయం భిక్ఖునీ లజ్జినీ’’తి. సచే బాలా చ హోతి అలజ్జినీ చ, న దాతబ్బా. సచే బాలా హోతి లజ్జినీ, న దాతబ్బా. సచే బ్యత్తా హోతి అలజ్జినీ, న దాతబ్బా. సచే బ్యత్తా చ హోతి లజ్జినీ చ, దాతబ్బా. ఏవఞ్చ పన, భిక్ఖవే, దాతబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౧౪౧. ‘‘సుణాతు మే, అయ్యే, సఙ్ఘో. అయం ఇత్థన్నామా పరిపుణ్ణద్వాదసవస్సా భిక్ఖునీ సఙ్ఘం వుట్ఠాపనసమ్ముతిం యాచతి. యది సఙ్ఘస్స పత్తకల్లం, సఙ్ఘో ఇత్థన్నామాయ పరిపుణ్ణద్వాదసవస్సాయ భిక్ఖునియా వుట్ఠాపనసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా పరిపుణ్ణద్వాదసవస్సా భిక్ఖునీ సఙ్ఘం వుట్ఠాపనసమ్ముతిం యాచతి. సఙ్ఘో ఇత్థన్నామాయ పరిపుణ్ణద్వాదసవస్సాయ భిక్ఖునియా వుట్ఠాపనసమ్ముతిం దేతి. యస్సా అయ్యాయ ఖమతి ఇత్థన్నామాయ పరిపుణ్ణద్వాదసవస్సాయ భిక్ఖునియా వుట్ఠాపనసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ పరిపుణ్ణద్వాదసవస్సాయ భిక్ఖునియా వుట్ఠాపనసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౧౧౪౨. ‘‘యా పన భిక్ఖునీ పరిపుణ్ణద్వాదసవస్సా సఙ్ఘేన అసమ్మతా వుట్ఠాపేయ్య, పాచిత్తియ’’న్తి.

౧౧౪౩. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పరిపుణ్ణద్వాదసవస్సా నామ పత్తద్వాదసవస్సా.

అసమ్మతా నామ ఞత్తిదుతియేన కమ్మేన వుట్ఠాపనసమ్ముతి న దిన్నా హోతి. వుట్ఠాపేయ్యాతి ఉపసమ్పాదేయ్య.

౧౧౪౪. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

౧౧౪౫. అనాపత్తి పరిపుణ్ణద్వాదసవస్సా సఙ్ఘేన సమ్మతా వుట్ఠాపేతి, ఉమ్మత్తికాయ, ఆదికమ్మికాయాతి.

పఞ్చమసిక్ఖాపదం నిట్ఠితం.

౬. ఛట్ఠసిక్ఖాపదం

౧౧౪౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన చణ్డకాళీ భిక్ఖునీ భిక్ఖునిసఙ్ఘం ఉపసఙ్కమిత్వా వుట్ఠాపనసమ్ముతిం యాచతి. అథ ఖో భిక్ఖునిసఙ్ఘో చణ్డకాళిం భిక్ఖునిం పరిచ్ఛిన్దిత్వా – ‘‘అలం తావ తే, అయ్యే, వుట్ఠాపితేనా’’తి, వుట్ఠాపనసమ్ముతిం న అదాసి. చణ్డకాళీ భిక్ఖునీ ‘సాధూ’తి పటిస్సుణి. తేన ఖో పన సమయేన భిక్ఖునిసఙ్ఘో అఞ్ఞాసం భిక్ఖునీనం వుట్ఠాపనసమ్ముతిం దేతి. చణ్డకాళీ భిక్ఖునీ ఉజ్ఝాయతి ఖియ్యతి విపాచేతి – ‘‘అహమేవ నూన బాలా, అహమేవ నూన అలజ్జినీ; యం సఙ్ఘో అఞ్ఞాసం భిక్ఖునీనం వుట్ఠాపనసమ్ముతిం దేతి, మయ్హమేవ న దేతీ’’తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా చణ్డకాళీ – ‘అలం తావ తే, అయ్యే, వుట్ఠాపితేనా’తి వుచ్చమానా ‘సాధూ’తి పటిస్సుణిత్వా పచ్ఛా ఖీయనధమ్మం ఆపజ్జిస్సతీ’’తి…పే… సచ్చం కిర, భిక్ఖవే, ‘చణ్డకాళీ భిక్ఖునీ అలం తావ తే అయ్యే వుట్ఠాపితేనా’తి వుచ్చమానా ‘‘సాధూ’’తి పటిస్సుణిత్వా పచ్ఛా ఖీయనధమ్మం ఆపజ్జతీతి [ఆపజ్జీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, చణ్డకాళీ భిక్ఖునీ – ‘‘అలం తావ తే, అయ్యే, వుట్ఠాపితేనా’’తి వుచ్చమానా ‘సాధూ’తి పటిస్సుణిత్వా పచ్ఛా ఖీయనధమ్మం ఆపజ్జిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౪౭. ‘‘యా పన భిక్ఖునీ – ‘అలం తావ తే, అయ్యే, వుట్ఠాపితేనా’తి వుచ్చమానా ‘సాధూ’తి పటిస్సుణిత్వా పచ్ఛా ఖీయనధమ్మం ఆపజ్జేయ్య, పాచిత్తియ’’న్తి.

౧౧౪౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అలం తావ తే అయ్యే వుట్ఠాపితేనాతి అలం తావ తే, అయ్యే, ఉపసమ్పాదితేన. ‘సాధూ’తి పటిస్సుణిత్వా పచ్ఛా ఖీయనధమ్మం ఆపజ్జతి, ఆపత్తి పాచిత్తియస్స.

౧౧౪౯. అనాపత్తి పకతియా ఛన్దా దోసా మోహా భయా కరోన్తం ఖియ్యతి, ఉమ్మత్తికాయ, ఆదికమ్మికాయాతి.

ఛట్ఠసిక్ఖాపదం నిట్ఠితం.

౭. సత్తమసిక్ఖాపదం

౧౧౫౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరా సిక్ఖమానా థుల్లనన్దం భిక్ఖునిం ఉపసఙ్కమిత్వా ఉపసమ్పదం యాచి. థుల్లనన్దా భిక్ఖునీ తం సిక్ఖమానం – ‘‘సచే మే త్వం, అయ్యే, చీవరం దస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేతి న వుట్ఠాపనాయ ఉస్సుక్కం కరోతి. అథ ఖో సా సిక్ఖమానా భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా సిక్ఖమానం – ‘సచే మే త్వం, అయ్యే, చీవరం దస్ససి ఏవాహం తం వుట్ఠాపేస్సామీ’తి వత్వా, నేవ వుట్ఠాపేస్సతి న వుట్ఠాపనాయ ఉస్సుక్కం కరిస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ సిక్ఖమానం – ‘‘సచే మే త్వం, అయ్యే, చీవరం దస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేతి న వుట్ఠాపనాయ ఉస్సుక్కం కరోతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ సిక్ఖమానం – ‘‘సచే మే త్వం, అయ్యే, చీవరం దస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేస్సతి న వుట్ఠాపనాయ ఉస్సుక్కం కరిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౫౧. ‘‘యా పన భిక్ఖునీ సిక్ఖమానం – ‘సచే మే త్వం, అయ్యే, చీవరం దస్ససి, ఏవాహం తం వుట్ఠాపేస్సామీ’తి వత్వా, సా పచ్ఛా అనన్తరాయికినీ నేవ వుట్ఠాపేయ్య న వుట్ఠాపనాయ ఉస్సుక్కం కరేయ్య, పాచిత్తియ’’న్తి.

౧౧౫౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా.

సచే మే త్వం అయ్యే చీవరం దస్ససి ఏవాహం తం వుట్ఠాపేస్సామీతి ఏవాహం తం ఉపసమ్పాదేస్సామి.

సా పచ్ఛా అనన్తరాయికినీతి అసతి అన్తరాయే.

నేవ వుట్ఠాపేయ్యాతి న సయం వుట్ఠాపేయ్య.

న వుట్ఠాపనాయ ఉస్సుక్కం కరేయ్యాతి న అఞ్ఞం ఆణాపేయ్య. ‘‘నేవ వుట్ఠాపేస్సామి న వుట్ఠాపనాయ ఉస్సుక్కం కరిస్సామీ’’తి ధురం నిక్ఖిత్తమత్తే ఆపత్తి పాచిత్తియస్స.

౧౧౫౩. అనాపత్తి సతి అన్తరాయే, పరియేసిత్వా న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.

సత్తమసిక్ఖాపదం నిట్ఠితం.

౮. అట్ఠమసిక్ఖాపదం

౧౧౫౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరా సిక్ఖమానా థుల్లనన్దం భిక్ఖునిం ఉపసఙ్కమిత్వా ఉపసమ్పదం యాచి. థుల్లనన్దా భిక్ఖునీ తం సిక్ఖమానం ‘‘సచే మం త్వం, అయ్యే, ద్వే వస్సాని అనుబన్ధిస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేతి న వుట్ఠాపనాయ ఉస్సుక్కం కరోతి. అథ ఖో సా సిక్ఖమానా భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా సిక్ఖమానం – సచే మం త్వం, అయ్యే, ద్వే వస్సాని అనుబన్ధిస్ససి ఏవాహం తం వుట్ఠాపేస్సామీతి వత్వా, నేవ వుట్ఠాపేస్సతి న వుట్ఠాపనాయ ఉస్సుక్కం కరిస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ సిక్ఖమానం – ‘‘సచే మం త్వం అయ్యే ద్వే వస్సాని అనుబన్ధిస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేతి న వుట్ఠాపనాయ ఉస్సుక్కం కరోతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ సిక్ఖమానం – ‘‘సచే మం త్వం, అయ్యే, ద్వే వస్సాని అనుబన్ధిస్ససి ఏవాహం తం వుట్ఠాపేస్సామీ’’తి వత్వా, నేవ వుట్ఠాపేస్సతి న వుట్ఠాపనాయ ఉస్సుక్కం కరిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౫౫. ‘‘యా పన భిక్ఖునీ సిక్ఖమానం – ‘సచే మం త్వం అయ్యే ద్వే వస్సాని అనుబన్ధిస్ససి ఏవాహం తం వుట్ఠాపేస్సామీ’తి వత్వా, సా పచ్ఛా అనన్తరాయికినీ నేవ వుట్ఠాపేయ్య న వుట్ఠాపనాయ ఉస్సుక్కం కరేయ్య, పాచిత్తియ’’న్తి.

౧౧౫౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా.

సచే మం త్వం అయ్యే ద్వే వస్సాని అనుబన్ధిస్ససీతి ద్వే సంవచ్ఛరాని ఉపట్ఠహిస్ససి.

ఏవాహం తం వుట్ఠాపేస్సామీతి ఏవాహం తం ఉపసమ్పాదేస్సామి.

సా పచ్ఛా అనన్తరాయికినీతి అసతి అన్తరాయే.

నేవ వుట్ఠాపేయ్యాతి న సయం వుట్ఠాపేయ్య.

న వుట్ఠాపనాయ ఉస్సుక్కం కరేయ్యాతి న అఞ్ఞం ఆణాపేయ్య. ‘‘నేవ వుట్ఠాపేస్సామి న వుట్ఠాపనాయ ఉస్సుక్కం కరిస్సామీ’’తి ధురం నిక్ఖిత్తమత్తే ఆపత్తి పాచిత్తియస్స.

౧౧౫౭. అనాపత్తి సతి అన్తరాయే, పరియేసిత్వా న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.

అట్ఠమసిక్ఖాపదం నిట్ఠితం.

౯. నవమసిక్ఖాపదం

౧౧౫౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ పురిససంసట్ఠం కుమారకసంసట్ఠం చణ్డిం సోకావాసం [సోకవస్సం (సీ.) సోకావస్సం (స్యా.)] చణ్డకాళిం సిక్ఖమానం వుట్ఠాపేతి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా పురిససంసట్ఠం కుమారకసంసట్ఠం చణ్డిం సోకావాసం [సోకవస్సం (సీ.) సోకావస్సం (స్యా.)] చణ్డకాళిం సిక్ఖమానం వుట్ఠాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ పురిససంసట్ఠం కుమారకసంసట్ఠం చణ్డిం సోకావాసం [సోకవస్సం (సీ.) సోకావస్సం (స్యా.)] చణ్డకాళిం సిక్ఖమానం వుట్ఠాపేతీతి [వుట్ఠాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ పురిససంసట్ఠం కుమారకసంసట్ఠం చణ్డిం సోకావాసం చణ్డకాళిం సిక్ఖమానం వుట్ఠాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౫౯. ‘‘యా పన భిక్ఖునీ పురిససంసట్ఠం కుమారకసంసట్ఠం చణ్డిం సోకావాసం సిక్ఖమానం వుట్ఠాపేయ్య, పాచిత్తియ’’న్తి.

౧౧౬౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పురిసో నామ పత్తవీసతివస్సో. కుమారకో నామ అప్పత్తవీసతివస్సో. సంసట్ఠా నామ అననులోమికేన కాయికవాచసికేన సంసట్ఠా. చణ్డీ నామ కోధనా వుచ్చతి.

సోకావాసా నామ పరేసం దుక్ఖం ఉప్పాదేతి, సోకం ఆవిసతి. సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా. వుట్ఠాపేయ్యాతి ఉపసమ్పాదేయ్య.

‘‘వుట్ఠాపేస్సామీ’’తి గణం వా ఆచరినిం వా పత్తం వా చీవరం వా పరియేసతి, సీమం వా సమ్మన్నతి, ఆపత్తి దుక్కటస్స. ఞత్తియా దుక్కటం. ద్వీహి కమ్మవాచాహి దుక్కటా. కమ్మవాచాపరియోసానే ఉపజ్ఝాయాయ ఆపత్తి పాచిత్తియస్స; గణస్స చ ఆచరినియా చ ఆపత్తి దుక్కటస్స.

౧౧౬౧. అనాపత్తి అజానన్తీ వుట్ఠాపేతి, ఉమ్మత్తికాయ, ఆదికమ్మికాయాతి.

నవమసిక్ఖాపదం నిట్ఠితం.

౧౦. దసమసిక్ఖాపదం

౧౧౬౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ మాతాపితూహిపి సామికేనపి అననుఞ్ఞాతం సిక్ఖమానం వుట్ఠాపేతి. మాతాపితరోపి సామికోపి ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా అమ్హేహి అననుఞ్ఞాతం సిక్ఖమానం వుట్ఠాపేస్సతీ’’తి! అస్సోసుం ఖో భిక్ఖునియో మాతాపితూనమ్పి సామికస్సపి ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా మాతాపితూహిపి సామికేనపి అననుఞ్ఞాతం సిక్ఖమానం వుట్ఠాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ, మాతాపితూహిపి సామికేనపి అననుఞ్ఞాతం సిక్ఖమానం వుట్ఠాపేతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ మాతాపితూహిపి సామికేనపి అననుఞ్ఞాతం సిక్ఖమానం వుట్ఠాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౬౩. ‘‘యా పన భిక్ఖునీ మాతాపితూహి వా సామికేన వా అననుఞ్ఞాతం సిక్ఖమానం వుట్ఠాపేయ్య, పాచిత్తియ’’న్తి.

౧౧౬౪. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

మాతాపితరో నామ జనకా వుచ్చన్తి. సామికో నామ యేన పరిగ్గహితా హోతి. అననుఞ్ఞాతాతి అనాపుచ్ఛా. సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా. వుట్ఠాపేయ్యాతి ఉపసమ్పాదేయ్య.

వుట్ఠాపేస్సామీతి గణం వా ఆచరినిం వా పత్తం వా చీవరం వా పరియేసతి, సీమం వా సమ్మన్నతి, ఆపత్తి దుక్కటస్స. ఞత్తియా దుక్కటం. ద్వీహి కమ్మవాచాహి దుక్కటా. కమ్మవాచాపరియోసానే ఉపజ్ఝాయాయ ఆపత్తి పాచిత్తియస్స. గణస్స చ ఆచరినియా చ ఆపత్తి దుక్కటస్స.

౧౧౬౫. అనాపత్తి అజానన్తీ వుట్ఠాపేతి, అపలోకేత్వా వుట్ఠాపేతి, ఉమ్మత్తికాయ, ఆదికమ్మికాయాతి.

దసమసిక్ఖాపదం నిట్ఠితం.

౧౧. ఏకాదసమసిక్ఖాపదం

౧౧౬౬. తేన సమయేన బుద్ధో భగవా రాజగహే విహరతి వేళువనే కలన్దకనివాపే. తేన ఖో పన సమయేన థుల్లనన్దా భిక్ఖునీ – ‘‘సిక్ఖమానం వుట్ఠాపేస్సామీ’’తి థేరే భిక్ఖూ సన్నిపాతేత్వా పహూతం ఖాదనీయం భోజనీయం పస్సిత్వా – ‘‘న తావాహం, అయ్యా, సిక్ఖమానం వుట్ఠాపేస్సామీ’’తి థేరే భిక్ఖూ ఉయ్యోజేత్వా దేవదత్తం కోకాలికం కటమోదకతిస్సకం ఖణ్డదేవియా పుత్తం సముద్దదత్తం సన్నిపాతేత్వా సిక్ఖమానం వుట్ఠాపేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా పారివాసికఛన్దదానేన సిక్ఖమానం వుట్ఠాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ పారివాసికఛన్దదానేన సిక్ఖమానం వుట్ఠాపేతీతి [వుట్ఠాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ పారివాసికఛన్దదానేన సిక్ఖమానం వుట్ఠాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౬౭. ‘‘యా పన భిక్ఖునీ పారివాసికఛన్దదానేన సిక్ఖమానం వుట్ఠాపేయ్య, పాచిత్తియ’’న్తి.

౧౧౬౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పారివాసికఛన్దదానేనాతి వుట్ఠితాయ పరిసాయ. సిక్ఖమానా నామ ద్వే వస్సాని ఛసు ధమ్మేసు సిక్ఖితసిక్ఖా. వుట్ఠాపేయ్యాతి ఉపసమ్పాదేయ్య.

౧౧౬౯. అనాపత్తి అవుట్ఠితాయ పరిసాయ వుట్ఠాపేతి, ఉమ్మత్తికాయ, ఆదికమ్మికాయాతి.

ఏకాదసమసిక్ఖాపదం నిట్ఠితం.

౧౨. ద్వాదసమసిక్ఖాపదం

౧౧౭౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో అనువస్సం వుట్ఠాపేన్తి, ఉపస్సయో న సమ్మతి. మనుస్సా [మనుస్సా విహారచారికం ఆహిణ్డన్తా పస్సిత్వా (సీ.)] ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అనువస్సం వుట్ఠాపేస్సన్తి, ఉపస్సయో న సమ్మతీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అనువస్సం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో అనువస్సం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అనువస్సం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౭౧. ‘‘యా పన భిక్ఖునీ అనువస్సం వుట్ఠాపేయ్య, పాచిత్తియ’’న్తి.

౧౧౭౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అనువస్సన్తి అనుసంవచ్ఛరం. వుట్ఠాపేయ్యాతి ఉపసమ్పాదేయ్య.

౧౧౭౩. అనాపత్తి ఏకన్తరికం వుట్ఠాపేతి, ఉమ్మత్తికాయ, ఆదికమ్మికాయాతి.

ద్వాదసమసిక్ఖాపదం నిట్ఠితం.

౧౩. తేరసమసిక్ఖాపదం

౧౧౭౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ఏకం వస్సం ద్వే వుట్ఠాపేన్తి. ఉపస్సయో తథేవ న సమ్మతి. మనుస్సా [మనుస్సా విహారచారికం ఆహిణ్డన్తా పస్సిత్వా (సీ.)] తథేవ ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఏకం వస్సం ద్వే వుట్ఠాపేస్సన్తి! ఉపస్సయో తథేవ న సమ్మతీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఏకం వస్సం ద్వే వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ఏకం వస్సం ద్వే వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ఏకం వస్సం ద్వే వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౭౫. ‘‘యా పన భిక్ఖునీ ఏకం వస్సం ద్వే వుట్ఠాపేయ్య, పాచిత్తియ’’న్తి.

౧౧౭౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ఏకం వస్సన్తి ఏకం సంవచ్ఛరం. ద్వే వుట్ఠాపేయ్యాతి ద్వే ఉపసమ్పాదేయ్య.

‘‘ద్వే వుట్ఠాపేస్సామీ’’తి గణం వా ఆచరినిం వా పత్తం వా చీవరం వా పరియేసతి, సీమం వా సమ్మన్నతి, ఆపత్తి దుక్కటస్స. ఞత్తియా దుక్కటం. ద్వీహి కమ్మవాచాహి దుక్కటా. కమ్మవాచాపరియోసానే ఉపజ్ఝాయాయ ఆపత్తి పాచిత్తియస్స. గణస్స చ ఆచరినియా చ ఆపత్తి దుక్కటస్స.

౧౧౭౭. అనాపత్తి ఏకన్తరికం ఏకం వుట్ఠాపేతి, ఉమ్మత్తికాయ, ఆదికమ్మికాయాతి.

తేరసమసిక్ఖాపదం నిట్ఠితం.

కుమారీభూతవగ్గో అట్ఠమో.