౭. గబ్భినీవగ్గో

౧. పఠమసిక్ఖాపదం

౧౦౬౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో గబ్భినిం వుట్ఠాపేన్తి. సా పిణ్డాయ చరతి. మనుస్సా ఏవమాహంసు – ‘‘దేథాయ్యాయ భిక్ఖం, గరుభారా [గరుగబ్భా (స్యా.)] అయ్యా’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో గబ్భినిం వుట్ఠాపేస్సన్తీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో గబ్భినిం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో గబ్భినిం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో గబ్భినిం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౦౬౮. ‘‘యా పన భిక్ఖునీ గబ్భినిం వుట్ఠాపేయ్య, పాచిత్తియ’’న్తి.

౧౦౬౯. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

గబ్భినీ నామ ఆపన్నసత్తా వుచ్చతి. వుట్ఠాపేయ్యాతి ఉపసమ్పాదేయ్య.

‘‘వుట్ఠాపేస్సామీ’’తి గణం వా ఆచరినిం వా పత్తం వా చీవరం వా పరియేసతి, సీమం వా సమ్మన్నతి, ఆపత్తి దుక్కటస్స. ఞత్తియా దుక్కటం. ద్వీహి కమ్మవాచాహి దుక్కటా. కమ్మవాచాపరియోసానే ఉపజ్ఝాయాయ ఆపత్తి పాచిత్తియస్స. గణస్స చ ఆచరినియా చ ఆపత్తి దుక్కటస్స.

౧౦౭౦. గబ్భినియా గబ్భినిసఞ్ఞా వుట్ఠాపేతి, ఆపత్తి పాచిత్తియస్స. గబ్భినియా వేమతికా వుట్ఠాపేతి, ఆపత్తి దుక్కటస్స. గబ్భినియా అగబ్భినిసఞ్ఞా వుట్ఠాపేతి, అనాపత్తి. అగబ్భినియా గబ్భినిసఞ్ఞా, ఆపత్తి దుక్కటస్స. అగబ్భినియా వేమతికా, ఆపత్తి దుక్కటస్స. అగబ్భినియా అగబ్భినిసఞ్ఞా, అనాపత్తి.

౧౦౭౧. అనాపత్తి గబ్భినిం అగబ్భినిసఞ్ఞా వుట్ఠాపేతి, అగబ్భినిం అగబ్భినిసఞ్ఞా వుట్ఠాపేతి, ఉమ్మత్తికాయ, ఆదికమ్మికాయాతి.

పఠమసిక్ఖాపదం నిట్ఠితం.

౨. దుతియసిక్ఖాపదం

౧౦౭౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పాయన్తిం వుట్ఠాపేన్తి. సా పిణ్డాయ చరతి. మనుస్సా ఏవమాహంసు – ‘‘దేథాయ్యాయ భిక్ఖం, సదుతియికా అయ్యా’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పాయన్తిం వుట్ఠాపేస్సన్తీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పాయన్తిం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పాయన్తిం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో పాయన్తిం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౦౭౩. ‘‘యా పన భిక్ఖునీ పాయన్తిం వుట్ఠాపేయ్య, పాచిత్తియ’’న్తి.

౧౦౭౪. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పాయన్తీ నామ మాతా వా హోతి [హోతు (క.)] ధాతి [ధాతీ (సీ. స్యా.)] వా.

వుట్ఠాపేయ్యాతి ఉపసమ్పాదేయ్య.

౧౦౭౫. పాయన్తియా పాయన్తిసఞ్ఞా వుట్ఠాపేతి, ఆపత్తి పాచిత్తియస్స. పాయన్తియా వేమతికా వుట్ఠాపేతి, ఆపత్తి దుక్కటస్స. పాయన్తియా అపాయన్తిసఞ్ఞా వుట్ఠాపేతి, అనాపత్తి. అపాయన్తియా పాయన్తిసఞ్ఞా, ఆపత్తి దుక్కటస్స. అపాయన్తియా వేమతికా, ఆపత్తి దుక్కటస్స. అపాయన్తియా అపాయన్తిసఞ్ఞా, అనాపత్తి.

౧౦౭౬. అనాపత్తి పాయన్తిం అపాయన్తిసఞ్ఞా వుట్ఠాపేతి, అపాయన్తిం అపాయన్తిసఞ్ఞా వుట్ఠాపేతి, ఉమ్మత్తికాయ, ఆదికమ్మికాయాతి.

దుతియసిక్ఖాపదం నిట్ఠితం.

౩. తతియసిక్ఖాపదం

౧౦౭౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేన్తి. తా బాలా హోన్తి అబ్యత్తా న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేన్తీ’’తి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, సిక్ఖమానాయ ద్వే వస్సాని ఛసు ధమ్మేసు సిక్ఖాసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ సిక్ఖమానాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా ఇత్థన్నామాయ అయ్యాయ సిక్ఖమానా. సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౦౭౮. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ సిక్ఖమానా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. యది సఙ్ఘస్స పత్తకల్లం సఙ్ఘో ఇత్థన్నామాయ సిక్ఖమానాయ ద్వే వస్సాని ఛసు ధమ్మేసు సిక్ఖాసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ సిక్ఖమానా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. సఙ్ఘో ఇత్థన్నామాయ సిక్ఖమానాయ ద్వే వస్సాని ఛసు ధమ్మేసు సిక్ఖాసమ్ముతిం దేతి. యస్సా అయ్యాయ ఖమతి ఇత్థన్నామాయ సిక్ఖమానాయ ద్వే వస్సాని ఛసు ధమ్మేసు సిక్ఖాసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ సిక్ఖమానాయ ద్వే వస్సాని ఛసు ధమ్మేసు సిక్ఖాసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౧౦౭౯. సా సిక్ఖమానా ‘‘ఏవం వదేహీ’’తి వత్తబ్బా – ‘‘పాణాతిపాతా వేరమణిం ద్వే వస్సాని అవీతిక్కమ్మ సమాదానం సమాదియామి. అదిన్నాదానా వేరమణిం ద్వే వస్సాని అవీతిక్కమ్మ సమాదానం సమాదియామి. అబ్రహ్మచరియా వేరమణిం ద్వే వస్సాని అవీతిక్కమ్మ సమాదానం సమాదియామి. ముసావాదా వేరమణిం ద్వే వస్సాని అవీతిక్కమ్మ సమాదానం సమాదియామి. సురామేరయమజ్జప్పమాదట్ఠానా వేరమణిం ద్వే వస్సాని అవీతిక్కమ్మ సమాదానం సమాదియామి. వికాలభోజనా వేరమణిం ద్వే వస్సాని అవీతిక్కమ్మ సమాదానం సమాదియామీ’’తి.

అథ ఖో భగవా తా భిక్ఖునియో అనేకపరియాయేన విగరహిత్వా దుబ్భరతాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౦౮౦. ‘‘యా పన భిక్ఖునీ ద్వే వస్సాని ఛసు ధమ్మేసు అసిక్ఖితసిక్ఖం సిక్ఖమానం వుట్ఠాపేయ్య, పాచిత్తియ’’న్తి.

౧౦౮౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ద్వే వస్సానీతి ద్వే సంవచ్ఛరాని. అసిక్ఖితసిక్ఖా నామ సిక్ఖా వా న దిన్నా హోతి, దిన్నా వా సిక్ఖా కుపితా. వుట్ఠాపేయ్యాతి ఉపసమ్పాదేయ్య.

౧౦౮౨. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

అధమ్మకమ్మే ధమ్మకమ్మసఞ్ఞా, ఆపత్తి దుక్కటస్స. అధమ్మకమ్మే వేమతికా, ఆపత్తి దుక్కటస్స. అధమ్మకమ్మే అధమ్మకమ్మసఞ్ఞా, ఆపత్తి దుక్కటస్స.

౧౦౮౩. అనాపత్తి ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం వుట్ఠాపేతి, ఉమ్మత్తికాయ, ఆదికమ్మికాయాతి.

తతియసిక్ఖాపదం నిట్ఠితం.

౪. చతుత్థసిక్ఖాపదం

౧౦౮౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేన్తి. భిక్ఖునియో ఏవమాహంసు – ‘‘ఏథ, సిక్ఖమానా, ఇమం జానాథ, ఇమం దేథ, ఇమం ఆహరథ, ఇమినా అత్థో, ఇమం కప్పియం కరోథా’’తి. తా ఏవమాహంసు – ‘‘న మయం, అయ్యే, సిక్ఖమానా. భిక్ఖునియో మయ’’న్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ వుట్ఠానసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అహం, అయ్యే, ఇత్థన్నామా ఇత్థన్నామాయ అయ్యాయ ద్వే వస్సాని ఛసు ధమ్మేసు సిక్ఖితసిక్ఖా సిక్ఖమానా సఙ్ఘం వుట్ఠానసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౦౮౫. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ ద్వే వస్సాని ఛసు ధమ్మేసు సిక్ఖితసిక్ఖా సిక్ఖమానా సఙ్ఘం వుట్ఠానసమ్ముతిం యాచతి. యది సఙ్ఘస్స పత్తకల్లం, సఙ్ఘో ఇత్థన్నామాయ ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ వుట్ఠానసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ ద్వే వస్సాని ఛసు ధమ్మేసు సిక్ఖితసిక్ఖా సిక్ఖమానా సఙ్ఘం వుట్ఠానసమ్ముతిం యాచతి. సఙ్ఘో ఇత్థన్నామాయ ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ వుట్ఠానసమ్ముతిం దేతి. యస్సా అయ్యాయ ఖమతి ఇత్థన్నామాయ ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ వుట్ఠానసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ ద్వే వస్సాని ఛసు ధమ్మేసు సిక్ఖితసిక్ఖాయ సిక్ఖమానాయ వుట్ఠానసమ్ముతి; ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౧౦౮౬. ‘‘యా పన భిక్ఖునీ ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన అసమ్మతం వుట్ఠాపేయ్య, పాచిత్తియ’’న్తి.

౧౦౮౭. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ద్వే వస్సానీతి ద్వే సంవచ్ఛరాని. సిక్ఖితసిక్ఖా నామ ఛసు ధమ్మేసు సిక్ఖితసిక్ఖా. అసమ్మతా నామ ఞత్తిదుతియేన కమ్మేన వుట్ఠానసమ్ముతి న దిన్నాహోతి. వుట్ఠాపేయ్యాతి ఉపసమ్పాదేయ్య.

౧౦౮౮. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

౧౦౮౯. అనాపత్తి ద్వే వస్సాని ఛసు ధమ్మేసు సిక్ఖితసిక్ఖం సిక్ఖమానం సఙ్ఘేన సమ్మతం వుట్ఠాపేతి, ఉమ్మత్తికాయ, ఆదికమ్మికాయాతి.

చతుత్థసిక్ఖాపదం నిట్ఠితం.

౫. పఞ్చమసిక్ఖాపదం

౧౦౯౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ఊనద్వాదసవస్సం గిహిగతం వుట్ఠాపేన్తి. తా అక్ఖమా హోన్తి సీతస్స ఉణ్హస్స జిఘచ్ఛాయ పిపాసాయ డంసమకసవాతాతపసరీసపసమ్ఫస్సానం దురుత్తానం దురాగతానం వచనపథానం. ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అనధివాసకజాతికా హోన్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఊనద్వాదసవస్సం గిహిగతం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో ఊనద్వాదసవస్సం గిహిగతం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ఊనద్వాదసవస్సం గిహిగతం వుట్ఠాపేస్సన్తి! ఊనద్వాదసవస్సా [ఊనద్వాదసవస్సాహి (క.)], భిక్ఖవే, గిహిగతా అక్ఖమా హోతి సీతస్స ఉణ్హస్స జిఘచ్ఛాయ పిపాసాయ డంసమకసవాతాతపసరీసపసమ్ఫస్సానం దురుత్తానం దురాగతానం వచనపథానం. ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అనధివాసకజాతికా హోతి. ద్వాదసవస్సావ [ద్వాదసవస్సా చ (స్యా. క.)] ఖో, భిక్ఖవే, గిహిగతా ఖమా హోతి సీతస్స ఉణ్హస్స జిఘచ్ఛాయ పిపాసాయ డంసమకసవాతాతపసరీసపసమ్ఫస్సానం దురుత్తానం దురాగతానం వచనపథానం. ఉప్పన్నానం సారీరికానం వేదనానం దుక్ఖానం తిబ్బానం ఖరానం కటుకానం అసాతానం అమనాపానం పాణహరానం అధివాసకజాతికా హోతి. నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౦౯౧. ‘‘యా పన భిక్ఖునీ ఊనద్వాదసవస్సం గిహిగతం వుట్ఠాపేయ్య, పాచిత్తియ’’న్తి.

౧౦౯౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ఊనద్వాదసవస్సా నామ అప్పత్తద్వాదసవస్సా. గిహిగతా నామ పురిసన్తరగతా వుచ్చతి. వుట్ఠాపేయ్యాతి ఉపసమ్పాదేయ్య.

౧౦౯౩. ఊనద్వాదసవస్సాయ ఊనద్వాదసవస్ససఞ్ఞా వుట్ఠాపేతి, ఆపత్తి పాచిత్తియస్స. ఊనద్వాదసవస్సాయ వేమతికా వుట్ఠాపేతి, ఆపత్తి దుక్కటస్స. ఊనద్వాదసవస్సాయ పరిపుణ్ణసఞ్ఞా వుట్ఠాపేతి, అనాపత్తి.

పరిపుణ్ణద్వాదసవస్సాయ ఊనద్వాదసవస్ససఞ్ఞా, ఆపత్తి దుక్కటస్స. పరిపుణ్ణద్వాదసవస్సాయ వేమతికా, ఆపత్తి దుక్కటస్స. పరిపుణ్ణద్వాదసవస్సాయ పరిపుణ్ణసఞ్ఞా, అనాపత్తి.

౧౦౯౪. అనాపత్తి ఊనద్వాదసవస్సం పరిపుణ్ణసఞ్ఞా వుట్ఠాపేతి, పరిపుణ్ణద్వాదసవస్సం పరిపుణ్ణసఞ్ఞా వుట్ఠాపేతి, ఉమ్మత్తికాయ, ఆదికమ్మికాయాతి.

పఞ్చమసిక్ఖాపదం నిట్ఠితం.

౬. ఛట్ఠసిక్ఖాపదం

౧౦౯౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తి. తా బాలా హోన్తి అబ్యత్తా న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖాసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ పరిపుణ్ణద్వాదసవస్సాయ గిహిగతాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౧౦౯౬. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. యది సఙ్ఘస్స పత్తకల్లం సఙ్ఘో ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖాసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా సఙ్ఘం ద్వే వస్సాని ఛసు ధమ్మేసు సిక్ఖాసమ్ముతిం యాచతి. సఙ్ఘో ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖాసమ్ముతిం దేతి. యస్సా అయ్యాయ ఖమతి ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖాసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖాసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

సా పరిపుణ్ణద్వాదసవస్సా గిహిగతా ఏవం వదేహీతి వత్తబ్బా – ‘‘పాణాతిపాతా వేరమణిం ద్వే వస్సాని అవీతిక్కమ్మ సమాదానం సమాదియామి…పే… వికాలభోజనా వేరమణిం ద్వే వస్సాని అవీతిక్కమ్మ సమాదానం సమాదియామీ’’తి.

౧౦౯౭. ‘‘యా పన భిక్ఖునీ పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు అసిక్ఖితసిక్ఖం వుట్ఠాపేయ్య, పాచిత్తియ’’న్తి.

౧౦౯౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పరిపుణ్ణద్వాదసవస్సా నామ పత్తద్వాదసవస్సా. గిహిగతా నామ పురిసన్తరగతా వుచ్చతి. ద్వే వస్సానీతి ద్వే సంవచ్ఛరాని. అసిక్ఖితసిక్ఖా నామ సిక్ఖా వా న దిన్నా హోతి, దిన్నా వా సిక్ఖా కుపితా. వుట్ఠాపేయ్యాతి ఉపసమ్పాదేయ్య.

౧౦౯౯. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

అధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి దుక్కటస్స. అధమ్మకమ్మే వేమతికా వుట్ఠాపేతి, ఆపత్తి దుక్కటస్స. అధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి దుక్కటస్స.

౧౧౦౦. అనాపత్తి పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం వుట్ఠాపేతి, ఉమ్మత్తికాయ, ఆదికమ్మికాయాతి.

ఛట్ఠసిక్ఖాపదం నిట్ఠితం.

౭. సత్తమసిక్ఖాపదం

౧౧౦౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేన్తి. భిక్ఖునియో ఏవమాహంసు – ‘‘ఏథ సిక్ఖమానా, ఇమం జానాథ, ఇమం దేథ, ఇమం ఆహరథ, ఇమినా అత్థో, ఇమం కప్పియం కరోథా’’తి. తా ఏవమాహంసు – ‘‘న మయం, అయ్యే, సిక్ఖమానా, భిక్ఖునియో మయ’’న్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేస్సన్తీ’’తి…పే… సచ్చం కిర, భిక్ఖవే, భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మత్తం వుట్ఠాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ భిక్ఖవే భిక్ఖునియో పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేస్సన్తి! నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – ‘‘అనుజానామి, భిక్ఖవే, పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దాతుం. ఏవఞ్చ పన, భిక్ఖవే, దాతబ్బా. తాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – అహం, అయ్యే, ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా ద్వే వస్సాని ఛసు ధమ్మేసు సిక్ఖితసిక్ఖా, సఙ్ఘం వుట్ఠానసమ్ముతిం యాచామీ’’తి. దుతియమ్పి యాచితబ్బా. తతియమ్పి యాచితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో.

౧౧౦౨. ‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా ద్వే వస్సాని ఛసు ధమ్మేసు సిక్ఖితసిక్ఖా సఙ్ఘం వుట్ఠానసమ్ముతిం యాచతి. యది సఙ్ఘస్స పత్తకల్లం, సఙ్ఘో ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దదేయ్య. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా ఇత్థన్నామాయ అయ్యాయ పరిపుణ్ణద్వాదసవస్సా గిహిగతా ద్వే వస్సాని ఛసు ధమ్మేసు సిక్ఖితసిక్ఖా సఙ్ఘం వుట్ఠానసమ్ముతిం యాచతి. సఙ్ఘో ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతిం దేతి. యస్సా అయ్యాయ ఖమతి ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతియా దానం, సా తుణ్హస్స; యస్సా నక్ఖమతి, సా భాసేయ్య.

‘‘దిన్నా సఙ్ఘేన ఇత్థన్నామాయ పరిపుణ్ణద్వాదసవస్సాయ గిహిగతాయ ద్వే వస్సాని ఛసు ధమ్మేసు సిక్ఖితసిక్ఖాయ వుట్ఠానసమ్ముతి. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

౧౧౦౩. ‘‘యా పన భిక్ఖునీ పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన అసమ్మతం వుట్ఠాపేయ్య, పాచిత్తియ’’న్తి.

౧౧౦౪. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పరిపుణ్ణద్వాదసవస్సా నామ పత్తద్వాదసవస్సా. గిహిగతా నామ పురిసన్తరగతా వుచ్చతి. ద్వే వస్సానీతి ద్వే సంవచ్ఛరాని. సిక్ఖితసిక్ఖా నామ ఛసు ధమ్మేసు సిక్ఖితసిక్ఖా. అసమ్మతా నామ ఞత్తిదుతియేన కమ్మేన వుట్ఠానసమ్ముతి న దిన్నా హోతి. వుట్ఠాపేయ్యాతి ఉపసమ్పాదేయ్య.

౧౧౦౫. ధమ్మకమ్మే ధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స. ధమ్మకమ్మే వేమతికా వుట్ఠాపేతి, ఆపత్తి పాచిత్తియస్స. ధమ్మకమ్మే అధమ్మకమ్మసఞ్ఞా వుట్ఠాపేతి, ఆపత్తి పాచిత్తియస్స.

౧౧౦౬. అనాపత్తి పరిపుణ్ణద్వాదసవస్సం గిహిగతం ద్వే వస్సాని ఛసు ధమ్మేసు సిక్ఖితసిక్ఖం సఙ్ఘేన సమ్మతం వుట్ఠాపేతి, ఉమ్మత్తికాయ, ఆదికమ్మికాయాతి.

సత్తమసిక్ఖాపదం నిట్ఠితం.

౮. అట్ఠమసిక్ఖాపదం

౧౧౦౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ సహజీవినిం వుట్ఠాపేత్వా ద్వే వస్సాని నేవ అనుగ్గణ్హాతి న అనుగ్గణ్హాపేతి. తా బాలా హోన్తి అబ్యత్తా; న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా సహజీవినిం వుట్ఠాపేత్వా ద్వే వస్సాని నేవ అనుగ్గణ్హిస్సతి న అనుగ్గణ్హాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ సహజీవినిం వుట్ఠాపేత్వా ద్వే వస్సాని నేవ అనుగ్గణ్హాతి న అనుగ్గణ్హాపేతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ సహజీవినిం వుట్ఠాపేత్వా ద్వే వస్సాని నేవ అనుగ్గణ్హిస్సతి న అనుగ్గణ్హాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౦౮. ‘‘యా పన భిక్ఖునీ సహజీవినిం వుట్ఠాపేత్వా ద్వే వస్సాని నేవ అనుగ్గణ్హేయ్య న అనుగ్గణ్హాపేయ్య, పాచిత్తియ’’న్తి.

౧౧౦౯. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

సహజీవినీ నామ సద్ధివిహారినీ వుచ్చతి. వుట్ఠాపేత్వాతి ఉపసమ్పాదేత్వా. ద్వే వస్సానీతి ద్వే సంవచ్ఛరాని.

నేవ అనుగ్గణ్హేయ్యాతి న సయం అనుగ్గణ్హేయ్య ఉద్దేసేన పరిపుచ్ఛాయ ఓవాదేన అనుసాసనియా.

న అనుగ్గణ్హాపేయ్యాతి న అఞ్ఞం ఆణాపేయ్య ‘‘ద్వే వస్సాని నేవ అనుగ్గణ్హిస్సామి న అనుగ్గణ్హాపేస్సామీ’’తి ధురం నిక్ఖిత్తమత్తే ఆపత్తి పాచిత్తియస్స.

౧౧౧౦. అనాపత్తి సతి అన్తరాయే, పరియేసిత్వా న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.

అట్ఠమసిక్ఖాపదం నిట్ఠితం.

౯. నవమసిక్ఖాపదం

౧౧౧౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో వుట్ఠాపితం పవత్తినిం ద్వే వస్సాని నానుబన్ధన్తి. తా బాలా హోన్తి అబ్యత్తా; న జానన్తి కప్పియం వా అకప్పియం వా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో వుట్ఠాపితం పవత్తినిం ద్వే వస్సాని నానుబన్ధిస్సన్తీ’’తి…పే… సచ్చం కిర, భిక్ఖవే, భిక్ఖునియో వుట్ఠాపితం పవత్తినిం ద్వే వస్సాని నానుబన్ధన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో వుట్ఠాపితం పవత్తినిం ద్వే వస్సాని నానుబన్ధిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౧౨. ‘‘యా పన భిక్ఖునీ వుట్ఠాపితం పవత్తినిం ద్వే వస్సాని నానుబన్ధేయ్య, పాచిత్తియ’’న్తి.

౧౧౧౩. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

వుట్ఠాపితన్తి ఉపసమ్పాదితం. పవత్తినీ నామ ఉపజ్ఝాయా వుచ్చతి. ద్వే వస్సానీతి ద్వే సంవచ్ఛరాని. నానుబన్ధేయ్యాతి న సయం ఉపట్ఠహేయ్య. ద్వే వస్సాని నానుబన్ధిస్సామీతి ధురం నిక్ఖిత్తమత్తే ఆపత్తి పాచిత్తియస్స.

౧౧౧౪. అనాపత్తి ఉపజ్ఝాయా బాలా వా హోతి అలజ్జినీ వా, గిలానాయ, ఆపదాసు, ఉమ్మత్తికాయ, ఆదికమ్మికాయాతి.

నవమసిక్ఖాపదం నిట్ఠితం.

౧౦. దసమసిక్ఖాపదం

౧౧౧౫. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ సహజీవినిం వుట్ఠాపేత్వా నేవ వూపకాసేతి న వూపకాసాపేతి. సామికో అగ్గహేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా సహజీవినిం వుట్ఠాపేత్వా నేవ వూపకాసేస్సతి న వూపకాసాపేస్సతి, సామికో అగ్గహేసి! సచాయం భిక్ఖునీ పక్కన్తా అస్స, న చ సామికో గణ్హేయ్యా’’తి…పే… సచ్చం కిర, భిక్ఖవే, థుల్లనన్దా భిక్ఖునీ సహజీవినిం వుట్ఠాపేత్వా నేవ వూపకాసేతి న వూపకాసాపేతి […సి (క.)], సామికో అగ్గహేసీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ సహజీవినిం వుట్ఠాపేత్వా నేవ వూపకాసేస్సతి న వూపకాసాపేస్సతి, సామికో అగ్గహేసి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౧౧౧౬. ‘‘యా పన భిక్ఖునీ సహజీవినిం వుట్ఠాపేత్వా నేవ వూపకాసేయ్య న వూపకాసాపేయ్య అన్తమసో ఛప్పఞ్చయోజనానిపి, పాచిత్తియ’’న్తి.

౧౧౧౭. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

సహజీవినీ నామ సద్ధివిహారినీ వుచ్చతి. వుట్ఠాపేత్వాతి ఉపసమ్పాదేత్వా. నేవ వూపకాసేయ్యాతి న సయం వూపకాసేయ్య. న వూపకాసాపేయ్యాతి న అఞ్ఞం ఆణాపేయ్య. ‘‘నేవ వూపకాసేస్సామి న వూపకాసాపేస్సామి అన్తమసో ఛప్పఞ్చయోజనానిపీ’’తి ధురం నిక్ఖిత్తమత్తే ఆపత్తి పాచిత్తియస్స.

౧౧౧౮. అనాపత్తి సతి అన్తరాయే, పరియేసిత్వా దుతియికం భిక్ఖునిం న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.

దసమసిక్ఖాపదం నిట్ఠితం.

గబ్భినివగ్గో సత్తమో.