౩. తతియసిక్ఖాపదం

౯౮౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో సుత్తం కన్తన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో సుత్తం కన్తిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా …పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో సుత్తం కన్తిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో సుత్తం కన్తన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో సుత్తం కన్తిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౯౮౭. ‘‘యా పన భిక్ఖునీ సుత్తం కన్తేయ్య, పాచిత్తియ’’న్తి.

౯౮౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

సుత్తం నామ ఛ సుత్తాని – ఖోమం, కప్పాసికం, కోసేయ్యం, కమ్బలం, సాణం, భఙ్గం.

కన్తేయ్యాతి సయం కన్తతి, పయోగే దుక్కటం. ఉజ్జవుజ్జవే ఆపత్తి పాచిత్తియస్స.

౯౮౯. అనాపత్తి కన్తితసుత్తం కన్తతి, ఉమ్మత్తికాయ, ఆదికమ్మికాయాతి.

తతియసిక్ఖాపదం నిట్ఠితం.