౫. చిత్తాగారవగ్గో
౧. పఠమసిక్ఖాపదం
౯౭౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన రఞ్ఞో పసేనదిస్స కోసలస్స ఉయ్యానే చిత్తాగారే పటిభానచిత్తం కతం హోతి. బహూ మనుస్సా చిత్తాగారం దస్సనాయ గచ్ఛన్తి. ఛబ్బగ్గియాపి భిక్ఖునియో చిత్తాగారం దస్సనాయ అగమంసు. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో చిత్తాగారం దస్సనాయ గచ్ఛిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో చిత్తాగారం దస్సనాయ గచ్ఛిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో చిత్తాగారం దస్సనాయ గచ్ఛన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో చిత్తాగారం దస్సనాయ గచ్ఛిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౯౭౮. ‘‘యా పన భిక్ఖునీ రాజాగారం వా చిత్తాగారం వా ఆరామం వా ఉయ్యానం వా పోక్ఖరణిం వా దస్సనాయ గచ్ఛేయ్య, పాచిత్తియ’’న్తి.
౯౭౯. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
రాజాగారం నామ యత్థ కత్థచి రఞ్ఞో కీళితుం రమితుం కతం హోతి.
చిత్తాగారం నామ యత్థ కత్థచి మనుస్సానం కీళితుం రమితుం కతం హోతి.
ఆరామో నామ యత్థ కత్థచి మనుస్సానం కీళితుం రమితుం కతో హోతి.
ఉయ్యానం నామ యత్థ కత్థచి మనుస్సానం కీళితుం రమితుం కతం హోతి.
పోక్ఖరణీ నామ యత్థ కత్థచి మనుస్సానం కీళితుం రమితుం కతా హోతి.
౯౮౦. దస్సనాయ గచ్ఛతి, ఆపత్తి దుక్కటస్స. యత్థ ఠితా పస్సతి, ఆపత్తి పాచిత్తియస్స. దస్సనూపచారం విజహిత్వా పునప్పునం పస్సతి, ఆపత్తి పాచిత్తియస్స. ఏకమేకం దస్సనాయ గచ్ఛతి, ఆపత్తి దుక్కటస్స. యత్థ ఠితా పస్సతి, ఆపత్తి పచిత్తియస్స. దస్సనూపచారం విజహిత్వా పునప్పునం పస్సతి, ఆపత్తి పాచిత్తియస్స.
౯౮౧. అనాపత్తి ఆరామే ఠితా పస్సతి, గచ్ఛన్తీ వా ఆగచ్ఛన్తీ వా పస్సతి, సతి కరణీయే గన్త్వా పస్సతి, ఆపదాసు, ఉమ్మత్తికాయ, ఆదికమ్మికాయాతి.
పఠమసిక్ఖాపదం నిట్ఠితం.
౨. దుతియసిక్ఖాపదం
౯౮౨. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో ఆసన్దిమ్పి పల్లఙ్కమ్పి పరిభుఞ్జన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఆసన్దిమ్పి పల్లఙ్కమ్పి పరిభుఞ్జిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో ఆసన్దిమ్పి పల్లఙ్కమ్పి పరిభుఞ్జిస్సన్తీ’’తి…పే… సచ్చం కిర, భిక్ఖవే, భిక్ఖునియో ఆసన్దిమ్పి పల్లఙ్కమ్పి పరిభుఞ్జన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో ఆసన్దిమ్పి పల్లఙ్కమ్పి పరిభుఞ్జిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౯౮౩. ‘‘యా పన భిక్ఖునీ ఆసన్దిం వా పల్లఙ్కం వా పరిభుఞ్జేయ్య, పాచిత్తియ’’న్తి.
౯౮౪. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
ఆసన్దీ నామ అతిక్కన్తప్పమాణా వుచ్చతి.
పల్లఙ్కో నామ ఆహరిమేహి [‘‘అసంహారిమేహి’’ ఇతి కఙ్ఖావితరణియా సమేతి] వాళేహి కతో హోతి.
పరిభుఞ్జేయ్యాతి తస్మిం అభినిసీదతి వా అభినిపజ్జతి వా, ఆపత్తి పాచిత్తియస్స.
౯౮౫. అనాపత్తి ఆసన్దియా పాదే ఛిన్దిత్వా పరిభుఞ్జతి, పల్లఙ్కస్స వాళే భిన్దిత్వా పరిభుఞ్జతి, ఉమ్మత్తికాయ, ఆదికమ్మికాయాతి.
దుతియసిక్ఖాపదం నిట్ఠితం.
౩. తతియసిక్ఖాపదం
౯౮౬. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో సుత్తం కన్తన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో సుత్తం కన్తిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా …పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో సుత్తం కన్తిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో సుత్తం కన్తన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో సుత్తం కన్తిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౯౮౭. ‘‘యా పన భిక్ఖునీ సుత్తం కన్తేయ్య, పాచిత్తియ’’న్తి.
౯౮౮. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
సుత్తం నామ ఛ సుత్తాని – ఖోమం, కప్పాసికం, కోసేయ్యం, కమ్బలం, సాణం, భఙ్గం.
కన్తేయ్యాతి సయం కన్తతి, పయోగే దుక్కటం. ఉజ్జవుజ్జవే ఆపత్తి పాచిత్తియస్స.
౯౮౯. అనాపత్తి కన్తితసుత్తం కన్తతి, ఉమ్మత్తికాయ, ఆదికమ్మికాయాతి.
తతియసిక్ఖాపదం నిట్ఠితం.
౪. చతుత్థసిక్ఖాపదం
౯౯౦. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన భిక్ఖునియో గిహివేయ్యావచ్చం కరోన్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో గిహివేయ్యావచ్చం కరిస్సన్తీ’’తి…పే… సచ్చం కిర, భిక్ఖవే, భిక్ఖునియో గిహివేయ్యావచ్చం కరోన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో గిహివేయ్యావచ్చం కరిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౯౯౧. ‘‘యా పన భిక్ఖునీ గిహివేయ్యావచ్చం కరేయ్య, పాచిత్తియ’’న్తి.
౯౯౨. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
గిహివేయ్యావచ్చం నామ అగారికస్స యాగుం వా భత్తం వా ఖాదనీయం వా పచతి, సాటకం వా వేఠనం వా ధోవతి, ఆపత్తి పాచిత్తియస్స.
౯౯౩. అనాపత్తి యాగుపానే, సఙ్ఘభత్తే, చేతియపూజాయ, అత్తనో వేయ్యావచ్చకరస్స యాగుం వా భత్తం వా ఖాదనీయం వా పచతి, సాటకం వా వేఠనం వా ధోవతి, ఉమ్మత్తికాయ, ఆదికమ్మికాయాతి.
చతుత్థసిక్ఖాపదం నిట్ఠితం.
౫. పఞ్చమసిక్ఖాపదం
౯౯౪. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరా భిక్ఖునీ థుల్లనన్దం భిక్ఖునిం ఉపసఙ్కమిత్వా ఏతదవోచ – ‘‘ఏహాయ్యే, ఇమం అధికరణం వూపసమేహీ’’తి. థుల్లనన్దా భిక్ఖునీ ‘సాధూ’తి పటిస్సుణిత్వా నేవ వూపసమేతి న వూపసమాయ ఉస్సుక్కం కరోతి. అథ ఖో సా భిక్ఖునీ భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా భిక్ఖునియా – ‘ఏహాయ్యే’, ఇమం అధికరణం వూపసమేహీ’తి వుచ్చమానా – ‘సాధూ’తి పటిస్సుణిత్వా, నేవ వూపసమేస్సతి న వూపసమాయ ఉస్సుక్కం కరిస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ భిక్ఖునియా – ‘‘ఏహాయ్యే, ఇమం అధికరణం వూపసమేహీ’’తి వుచ్చమానా – ‘‘సాధూ’’తి పటిస్సుణిత్వా, నేవ వూపసమేతి న వూపసమాయ ఉస్సుక్కం కరోతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ భిక్ఖునియా – ‘‘ఏహాయ్యే, ఇమం అధికరణం వూపసమేహీ’’తి వుచ్చమానా – ‘‘సాధూ’’తి పటిస్సుణిత్వా, నేవ వూపసమేస్సతి న వూపసమాయ ఉస్సుక్కం కరిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౯౯౫. ‘‘యా పన భిక్ఖునీ భిక్ఖునియా – ‘ఏహాయ్యే, ఇమం అధికరణం వూపసమేహీ’తి వుచ్చమానా – ‘సాధూ’తి పటిస్సుణిత్వా సా పచ్ఛా అనన్తరాయికినీ నేవ వూపసమేయ్య న వూపసమాయ ఉస్సుక్కం కరేయ్య, పాచిత్తియ’’న్తి.
౯౯౬. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
భిక్ఖునియాతి అఞ్ఞాయ భిక్ఖునియా.
అధికరణం నామ చత్తారి అధికరణాని – వివాదాధికరణం, అనువాదాధికరణం, ఆపత్తాధికరణం, కిచ్చాధికరణం.
ఏహాయ్యే ఇమం అధికరణం వూపసమేహీతి ఏహాయ్యే ఇమం అధికరణం వినిచ్ఛేహి.
సా పచ్ఛా అనన్తరాయికినీతి అసతి అన్తరాయే.
నేవ వూపసమేయ్యాతి న సయం వూపసమేయ్య.
న వూపసమాయ ఉస్సుక్కం కరేయ్యాతి న అఞ్ఞం ఆణాపేయ్య. ‘‘నేవ వూపసమేస్సామి న వూపసమాయ ఉస్సుక్కం కరిస్సామీ’’తి ధురం నిక్ఖిత్తమత్తే, ఆపత్తి పాచిత్తియస్స.
౯౯౭. ఉపసమ్పన్నాయ ఉపసమ్పన్నసఞ్ఞా అధికరణం నేవ వూపసమేతి న వూపసమాయ ఉస్సుక్కం కరోతి, ఆపత్తి పాచిత్తియస్స. ఉపసమ్పన్నాయ వేమతికా అధికరణం నేవ వూపసమేతి, న వూపసమాయ ఉస్సుక్కం కరోతి, ఆపత్తి పాచిత్తియస్స. ఉపసమ్పన్నాయ అనుపసమ్పన్నసఞ్ఞా అధికరణం నేవ వూపసమేతి, న వూపసమాయ ఉస్సుక్కం కరోతి, ఆపత్తి పాచిత్తియస్స.
అనుపసమ్పన్నాయ అధికరణం నేవ వూపసమేతి, న వూపసమాయ ఉస్సుక్కం కరోతి, ఆపత్తి దుక్కటస్స. అనుపసమ్పన్నాయ ఉపసమ్పన్నసఞ్ఞా, ఆపత్తి దుక్కటస్స. అనుపసమ్పన్నాయ వేమతికా, ఆపత్తి దుక్కటస్స. అనుపసమ్పన్నాయ అనుపసమ్పన్నసఞ్ఞా, ఆపత్తి దుక్కటస్స.
౯౯౮. అనాపత్తి సతి అన్తరాయే, పరియేసిత్వా న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.
పఞ్చమసిక్ఖాపదం నిట్ఠితం.
౬. ఛట్ఠసిక్ఖాపదం
౯౯౯. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ నటానమ్పి నటకానమ్పి లఙ్ఘకానమ్పి సోకజ్ఝాయికానమ్పి కుమ్భథూణికానమ్పి సహత్థా ఖాదనీయం భోజనీయం దేతి – ‘‘మయ్హం పరిసతి వణ్ణం భాసథా’’తి. నటాపి నటకాపి లఙ్ఘకాపి సోకజ్ఝాయికాపి కుమ్భథూణికాపి థుల్లనన్దాయ భిక్ఖునియా పరిసతి వణ్ణం భాసన్తి – ‘‘అయ్యా థుల్లనన్దా బహుస్సుతా భాణికా విసారదా పట్టా ధమ్మిం కథం కాతుం; దేథ అయ్యాయ, కరోథ అయ్యాయా’’తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – కథఞ్హి నామ అయ్యా థుల్లనన్దా అగారికస్స సహత్థా ఖాదనీయం భోజనీయం దస్సతీతి…పే… సచ్చం కిర, భిక్ఖవే, థుల్లనన్దా భిక్ఖునీ అగారికస్స సహత్థా ఖాదనీయం భోజనీయం దేతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ అగారికస్స సహత్థా ఖాదనీయం భోజనీయం దస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౦౦౦. ‘‘యా పన భిక్ఖునీ అగారికస్స వా పరిబ్బాజకస్స వా పరిబ్బాజికాయ వా సహత్థా ఖాదనీయం వా భోజనీయం వా దదేయ్య, పాచిత్తియ’’న్తి.
౧౦౦౧. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
అగారికో నామ యో కోచి అగారం అజ్ఝావసతి.
పరిబ్బాజకో నామ భిక్ఖుఞ్చ సామణేరఞ్చ ఠపేత్వా యో కోచి పరిబ్బాజకసమాపన్నో.
పరిబ్బాజికా నామ భిక్ఖునిఞ్చ సిక్ఖమానఞ్చ సామణేరిఞ్చ ఠపేత్వా యా కాచి పరిబ్బాజికసమాపన్నా.
ఖాదనీయం నామ పఞ్చ భోజనాని – ఉదకదన్తపోనం ఠపేత్వా అవసేసం ఖాదనీయం నామ.
భోజనీయం నామ పఞ్చ భోజనాని – ఓదనో, కుమ్మాసో, సత్తు, మచ్ఛో, మంసం.
దదేయ్యాతి కాయేన వా కాయపటిబద్ధేన వా నిస్సగ్గియేన వా దేతి, ఆపత్తి పాచిత్తియస్స. ఉదకదన్తపోనం దేతి, ఆపత్తి దుక్కటస్స.
౧౦౦౨. అనాపత్తి దాపేతి న దేతి, ఉపనిక్ఖిపిత్వా దేతి, బాహిరాలేపం దేతి, ఉమ్మత్తికాయ, ఆదికమ్మికాయాతి.
ఛట్ఠసిక్ఖాపదం నిట్ఠితం.
౭. సత్తమసిక్ఖాపదం
౧౦౦౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ ఆవసథచీవరం అనిస్సజ్జిత్వా పరిభుఞ్జతి. అఞ్ఞా ఉతునియో భిక్ఖునియో న లభన్తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా ఆవసథచీవరం అనిస్సజ్జిత్వా పరిభుఞ్జిస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ ఆవసథచీవరం అనిస్సజ్జిత్వా పరిభుఞ్జతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ ఆవసథచీవరం అనిస్సజ్జిత్వా పరిభుఞ్జిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౦౦౪. ‘‘యా పన భిక్ఖునీ ఆవసథచీవరం అనిస్సజ్జిత్వా పరిభుఞ్జేయ్య, పాచిత్తియ’’న్తి.
౧౦౦౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
ఆవసథచీవరం నామ ‘‘ఉతునియో భిక్ఖునియో పరిభుఞ్జన్తూ’’తి దిన్నం హోతి.
అనిస్సజ్జిత్వా పరిభుఞ్జేయ్యాతి ద్వేతిస్సో రత్తియో పరిభుఞ్జిత్వా చతుత్థదివసే ధోవిత్వా భిక్ఖునియా వా సిక్ఖమానాయ వా సామణేరియా వా అనిస్సజ్జిత్వా పరిభుఞ్జతి, ఆపత్తి పాచిత్తియస్స.
౧౦౦౬. అనిస్సజ్జితే అనిస్సజ్జితసఞ్ఞా పరిభుఞ్జతి, ఆపత్తి పాచిత్తియస్స. అనిస్సజ్జితే వేమతికా పరిభుఞ్జతి, ఆపత్తి పాచిత్తియస్స. అనిస్సజ్జితే నిస్సజ్జితసఞ్ఞా పరిభుఞ్జతి, ఆపత్తి పాచిత్తియస్స.
నిస్సజ్జితే అనిస్సజ్జితసఞ్ఞా, ఆపత్తి దుక్కటస్స. నిస్సజ్జితే వేమతికా, ఆపత్తి దుక్కటస్స. నిస్సజ్జితే నిస్సజ్జితసఞ్ఞా అనాపత్తి.
౧౦౦౭. అనాపత్తి నిస్సజ్జిత్వా పరిభుఞ్జతి, పున పరియాయేన పరిభుఞ్జతి, అఞ్ఞా ఉతునియో భిక్ఖునియో న హోన్తి, అచ్ఛిన్నచీవరికాయ, నట్ఠచీవరికాయ, ఆపదాసు, ఉమ్మత్తికాయ, ఆదికమ్మికాయాతి.
సత్తమసిక్ఖాపదం నిట్ఠితం.
౮. అట్ఠమసిక్ఖాపదం
౧౦౦౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ ఆవసథం అనిస్సజ్జిత్వా చారికం పక్కామి. తేన ఖో పన సమయేన థుల్లనన్దాయ భిక్ఖునియా ఆవసథో డయ్హతి. భిక్ఖునియో ఏవమాహంసు – ‘‘హన్దాయ్యే, భణ్డకం నీహరామా’’తి. ఏకచ్చా ఏవమాహంసు – ‘‘న మయం, అయ్యే, నీహరిస్సామ. యం కిఞ్చి నట్ఠం సబ్బం అమ్హే అభియుఞ్జిస్సతీ’’తి. థుల్లనన్దా భిక్ఖునీ పునదేవ తం ఆవసథం పచ్చాగన్త్వా భిక్ఖునియో పుచ్ఛి – ‘‘అపాయ్యే, భణ్డకం నీహరిత్థా’’తి? ‘‘న మయం, అయ్యే, నీహరిమ్హా’’తి. థుల్లనన్దా భిక్ఖునీ ఉజ్ఝాయతి ఖియ్యతి విపాచేతి – ‘‘కథఞ్హి నామ భిక్ఖునియో ఆవసథే డయ్హమానే భణ్డకం న నీహరిస్సన్తీ’’తి! యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా ఆవసథం అనిస్సజ్జిత్వా చారికం పక్కమిస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ ఆవసథం అనిస్సజ్జిత్వా చారికం పక్కమతీతి [పక్కమీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ ఆవసథం అనిస్సజ్జిత్వా చారికం పక్కమిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౦౦౯. ‘‘యా పన భిక్ఖునీ ఆవసథం అనిస్సజ్జిత్వా చారికం పక్కమేయ్య, పాచిత్తియ’’న్తి.
౧౦౧౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
ఆవసథో నామ కవాటబద్ధో వుచ్చతి.
అనిస్సజ్జిత్వా చారికం పక్కమేయ్యాతి భిక్ఖునియా వా సిక్ఖమానాయ వా సామణేరియా వా అనిస్సజ్జిత్వా పరిక్ఖిత్తస్స ఆవసథస్స పరిక్ఖేపం అతిక్కామేన్తియా ఆపత్తి పాచిత్తియస్స. అపరిక్ఖిత్తస్స ఆవసథస్స ఉపచారం అతిక్కామేన్తియా ఆపత్తి పాచిత్తియస్స.
౧౦౧౧. అనిస్సజ్జితే అనిస్సజ్జితసఞ్ఞా పక్కమతి, ఆపత్తి పాచిత్తియస్స. అనిస్సజ్జితే వేమతికా పక్కమతి, ఆపత్తి పాచిత్తియస్స. అనిస్సజ్జితే నిస్సజ్జితసఞ్ఞా పక్కమతి, ఆపత్తి పాచిత్తియస్స.
అకవాటబద్ధం అనిస్సజ్జిత్వా పక్కమతి, ఆపత్తి దుక్కటస్స. నిస్సజ్జితే అనిస్సజ్జితసఞ్ఞా, ఆపత్తి దుక్కటస్స. నిస్సజ్జితే వేమతికా, ఆపత్తి దుక్కటస్స. నిస్సజ్జితే నిస్సజ్జితసఞ్ఞా, అనాపత్తి.
౧౦౧౨. అనాపత్తి నిస్సజ్జిత్వా పక్కమతి, సతి అన్తరాయే, పరియేసిత్వా న లభతి, గిలానాయ, ఆపదాసు, ఉమ్మత్తికాయ, ఆదికమ్మికాయాతి.
అట్ఠమసిక్ఖాపదం నిట్ఠితం.
౯. నవమసిక్ఖాపదం
౧౦౧౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో తిరచ్ఛానవిజ్జం పరియాపుణన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో తిరచ్ఛానవిజ్జం పరియాపుణిస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో తిరచ్ఛానవిజ్జం పరియాపుణిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో తిరచ్ఛానవిజ్జం పరియాపుణన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో తిరచ్ఛానవిజ్జం పరియాపుణిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౦౧౪. ‘‘యా పన భిక్ఖునీ తిరచ్ఛానవిజ్జం పరియాపుణేయ్య, పాచిత్తియ’’న్తి.
౧౦౧౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
తిరచ్ఛానవిజ్జా [తిరచ్ఛానవిజ్జం (క.)] నామ యం కిఞ్చి బాహిరకం అనత్థసంహితం.
పరియాపుణేయ్యాతి పదేన పరియాపుణాతి, పదే పదే ఆపత్తి పాచిత్తియస్స. అక్ఖరాయ పరియాపుణాతి, అక్ఖరక్ఖరాయ ఆపత్తి పాచిత్తియస్స.
౧౦౧౬. అనాపత్తి లేఖం పరియాపుణాతి, ధారణం పరియాపుణాతి, గుత్తత్థాయ పరిత్తం పరియాపుణాతి, ఉమ్మత్తికాయ, ఆదికమ్మికాయాతి.
నవమసిక్ఖాపదం నిట్ఠితం.
౧౦. దసమసిక్ఖాపదం
౧౦౧౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో తిరచ్ఛానవిజ్జం వాచేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో తిరచ్ఛానవిజ్జం వాచేస్సన్తి, సేయ్యథాపి గిహినియో కామభోగినియో’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో తిరచ్ఛానవిజ్జం వాచేస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో తిరచ్ఛానవిజ్జం వాచేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో తిరచ్ఛానవిజ్జం వాచేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –
౧౦౧౮. ‘‘యా పన భిక్ఖునీ తిరచ్ఛానవిజ్జం వాచేయ్య, పాచిత్తియ’’న్తి.
౧౦౧౯. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.
తిరచ్ఛానవిజ్జా [తిరచ్ఛానవిజ్జం (క.)] నామ యం కిఞ్చి బాహిరకం అనత్థసంహితం.
వాచేయ్యాతి పదేన వాచేతి, పదే పదే ఆపత్తి పాచిత్తియస్స. అక్ఖరాయ వాచేతి, అక్ఖరక్ఖరాయ ఆపత్తి పాచిత్తియస్స.
౧౦౨౦. అనాపత్తి లేఖం వాచేతి, ధారణం వాచేతి, గుత్తత్థాయ పరిత్తం వాచేతి, ఉమ్మత్తికాయ, ఆదికమ్మికాయాతి.
దసమసిక్ఖాపదం నిట్ఠితం.
చిత్తాగారవగ్గో పఞ్చమో.