౯. నవమసఙ్ఘాదిసేససిక్ఖాపదం

౭౨౧. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దాయ భిక్ఖునియా అన్తేవాసికా భిక్ఖునియో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో సంసట్ఠా విహరిస్సన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా’’తి…పే… సచ్చం కిర, భిక్ఖవే, భిక్ఖునియో సంసట్ఠా విహరన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికాతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో సంసట్ఠా విహరిస్సన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౨౨. ‘‘భిక్ఖునియో పనేవ సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా భిక్ఖునియో భిక్ఖునీహి ఏవమస్సు వచనీయా – ‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’తి. ఏవఞ్చ తా భిక్ఖునియో భిక్ఖునీహి వుచ్చమానా తథేవ పగ్గణ్హేయ్యుం, తా భిక్ఖునియో భిక్ఖునీహి యావతతియం సమనుభాసితబ్బా తస్స పటినిస్సగ్గాయ. యావతతియఞ్చే సమనుభాసీయమానా తం పటినిస్సజ్జేయ్యుం, ఇచ్చేతం కుసలం; నో చే పటినిస్సజ్జేయ్యుం, ఇమాపి భిక్ఖునియో యావతతియకం ధమ్మం ఆపన్నా నిస్సారణీయం సఙ్ఘాదిసేస’’న్తి.

౭౨౩. భిక్ఖునియో పనేవాతి ఉపసమ్పన్నాయో వుచ్చన్తి.

సంసట్ఠా విహరన్తీతి సంసట్ఠా నామ అననులోమికేన కాయికవాచసికేన సంసట్ఠా విహరన్తి.

పాపాచారాతి పాపకేన ఆచారేన సమన్నాగతా.

పాపసద్దాతి పాపకేన కిత్తిసద్దేన అబ్భుగ్గతా.

పాపసిలోకాతి పాపకేన మిచ్ఛాజీవేన జీవితం కప్పేన్తి.

భిక్ఖునిసఙ్ఘస్స విహేసికాతి అఞ్ఞమఞ్ఞిస్సా కమ్మే కరీయమానే పటిక్కోసన్తి.

అఞ్ఞమఞ్ఞిస్సా వజ్జప్పటిచ్ఛాదికాతి అఞ్ఞమఞ్ఞం వజ్జం పటిచ్ఛాదేన్తి.

తా భిక్ఖునియోతి యా తా సంసట్ఠా భిక్ఖునియో.

భిక్ఖునీహీతి అఞ్ఞాహి భిక్ఖునీహి.

యా పస్సన్తి యా సుణన్తి తాహి వత్తబ్బా – ‘‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’తి. దుతియమ్పి వత్తబ్బా. తతియమ్పి వత్తబ్బా. సచే పటినిస్సజ్జన్తి, ఇచ్చేతం కుసలం; నో చే పటినిస్సజ్జన్తి, ఆపత్తి దుక్కటస్స. సుత్వా న వదన్తి, ఆపత్తి దుక్కటస్స. తా భిక్ఖునియో సఙ్ఘమజ్ఝమ్పి ఆకడ్ఢిత్వా వత్తబ్బా – ‘‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’తి. దుతియమ్పి వత్తబ్బా. తతియమ్పి వత్తబ్బా. సచే పటినిస్సజ్జన్తి, ఇచ్చేతం కుసలం; నో చే పటినిస్సజ్జన్తి, ఆపత్తి దుక్కటస్స. తా భిక్ఖునియో సమనుభాసితబ్బా. ఏవఞ్చ పన, భిక్ఖవే, సమనుభాసితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౭౨౪. ‘‘సుణాతు మే, అయ్యే, సఙ్ఘో. ఇత్థన్నామా చ ఇత్థన్నామా చ భిక్ఖునియో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా తం వత్థుం న పటినిస్సజ్జన్తి. యది సఙ్ఘస్స పత్తకల్లం, సఙ్ఘో ఇత్థన్నామఞ్చ ఇత్థన్నామఞ్చ భిక్ఖునియో సమనుభాసేయ్య తస్స వత్థుస్స పటినిస్సగ్గాయ. ఏసా ఞత్తి.

‘‘సుణాతు మే, అయ్యే, సఙ్ఘో. ఇత్థన్నామా చ ఇత్థన్నామా చ భిక్ఖునియో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా తం వత్థుం న పటినిస్సజ్జన్తి. సఙ్ఘో ఇత్థన్నామఞ్చ ఇత్థన్నామఞ్చ భిక్ఖునియో సమనుభాసతి తస్స వత్థుస్స పటినిస్సగ్గాయ. యస్సా అయ్యాయ ఖమతి ఇత్థన్నామాయ చ ఇత్థన్నామాయ చ భిక్ఖునీనం సమనుభాసనా తస్స వత్థుస్స పటినిస్సగ్గాయ, సా తుణ్హస్స; యస్సా నక్ఖమతి, సా భాసేయ్య.

‘‘దుతియమ్పి ఏతమత్థం వదామి…పే… తతియమ్పి ఏతమత్థం వదామి…పే….

‘‘సమనుభట్ఠా సఙ్ఘేన, ఇత్థన్నామా చ ఇత్థన్నామా చ భిక్ఖునియో తస్స వత్థుస్స పటినిస్సగ్గాయ. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

ఞత్తియా దుక్కటం, ద్వీహి కమ్మవాచాహి థుల్లచ్చయా, కమ్మవాచాపరియోసానే ఆపత్తి సఙ్ఘాదిసేసస్స. సఙ్ఘాదిసేసం అజ్ఝాపజ్జన్తీనం ఞత్తియా దుక్కటం ద్వీహి కమ్మవాచాహి థుల్లచ్చయా పటిప్పస్సమ్భన్తి. ద్వే తిస్సో ఏకతో సమనుభాసితబ్బా. తతుత్తరి న సమనుభాసితబ్బా.

ఇమాపి భిక్ఖునియోతి పురిమాయో ఉపాదాయ వుచ్చన్తి.

యావతతియకన్తి యావతతియం సమనుభాసనాయ ఆపజ్జన్తి, న సహ వత్థుజ్ఝాచారా.

నిస్సారణీయన్తి సఙ్ఘమ్హా నిస్సారీయతి.

సఙ్ఘాదిసేసోతి…పే… తేనపి వుచ్చతి సఙ్ఘాదిసేసోతి.

౭౨౫. ధమ్మకమ్మే ధమ్మకమ్మసఞ్ఞా న పటినిస్సజ్జన్తి, ఆపత్తి సఙ్ఘాదిసేసస్స. ధమ్మకమ్మే వేమతికా న పటినిస్సజ్జన్తి, ఆపత్తి సఙ్ఘాదిసేసస్స. ధమ్మకమ్మే అధమ్మకమ్మసఞ్ఞా న పటినిస్సజ్జన్తి, ఆపత్తి సఙ్ఘాదిసేసస్స.

అధమ్మకమ్మే ధమ్మకమ్మసఞ్ఞా, ఆపత్తి దుక్కటస్స. అధమ్మకమ్మే వేమతికా, ఆపత్తి దుక్కటస్స. అధమ్మకమ్మే అధమ్మకమ్మసఞ్ఞా, ఆపత్తి దుక్కటస్స.

౭౨౬. అనాపత్తి అసమనుభాసన్తీనం, పటినిస్సజ్జన్తీనం, ఉమ్మత్తికానం, ఆదికమ్మికానన్తి.

నవమసఙ్ఘాదిసేససిక్ఖాపదం నిట్ఠితం.