౧౦. దసమసఙ్ఘాదిసేససిక్ఖాపదం

౭౨౭. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీసఙ్ఘేన సమనుభట్ఠా భిక్ఖునియో ఏవం వదేతి – ‘‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ [తుమ్హేయేవ (స్యా.)] సఙ్ఘో ఉఞ్ఞాయ పరిభవేన అక్ఖన్తియా వేభస్సియా [వేభస్సా (సీ. స్యా.)] దుబ్బల్యా ఏవమాహ – ‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’’తి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – కథఞ్హి నామ అయ్యా థుల్లనన్దా భిక్ఖునీ సఙ్ఘేన సమనుభట్ఠా భిక్ఖునియో ఏవం వక్ఖతి – సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో…పే… వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీతి…పే… సచ్చం కిర, భిక్ఖవే, థుల్లనన్దా భిక్ఖునీ సఙ్ఘేన సమనుభట్ఠా భిక్ఖునియో ఏవం వదేతి – సంసట్ఠావ అయ్యే తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీతి? ‘‘సచ్చం భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ సఙ్ఘేన సమనుభట్ఠా భిక్ఖునియో ఏవం వక్ఖతి – సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో…పే… వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౨౮. ‘‘యా పన భిక్ఖునీ ఏవం వదేయ్య – ‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’తి. సా భిక్ఖునీ భిక్ఖునీహి ఏవమస్స వచనీయా – ‘మా, అయ్యే, ఏవం అవచ – సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’తి. ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ. యావతతియఞ్చే సమనుభాసీయమానా తం పటినిస్సజ్జేయ్య, ఇచ్చేతం కుసలం; నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేస’’న్తి.

౭౨౯. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

ఏవం వదేయ్యాతి – ‘‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ’’.

తుమ్హఞ్ఞేవ సఙ్ఘో ఉఞ్ఞాయాతి అవఞ్ఞాయ.

పరిభవేనాతి పారిభబ్యతా.

అక్ఖన్తియాతి కోపేన.

వేభస్సియాతి విభస్సీకతా [విభస్సికతాయ (సీ.)].

దుబ్బల్యాతి అపక్ఖతా.

ఏవమాహ – ‘‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. విచిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’తి.

సా భిక్ఖునీతి యా సా ఏవంవాదినీ భిక్ఖునీ.

భిక్ఖునీహీతి అఞ్ఞాహి భిక్ఖునీహి.

యా పస్సన్తి యా సుణన్తి తాహి వత్తబ్బా – ‘‘మాయ్యే, ఏవం అవచ – ‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో…పే… వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’తి. దుతియమ్పి వత్తబ్బా. తతియమ్పి వత్తబ్బా. సచే పటినిస్సజ్జతి, ఇచ్చేతం కుసలం; నో చే పటినిస్సజ్జతి, ఆపత్తి దుక్కటస్స. సుత్వా న వదన్తి, ఆపత్తి దుక్కటస్స. సా భిక్ఖునీ సఙ్ఘమజ్ఝమ్పి ఆకడ్ఢిత్వా వత్తబ్బా – ‘‘మాయ్యే, ఏవం అవచ – ‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో…పే… వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’’’తి. దుతియమ్పి వత్తబ్బా. తతియమ్పి వత్తబ్బా. సచే పటినిస్సజ్జతి, ఇచ్చేతం కుసలం; నో చే పటినిస్సజ్జతి, ఆపత్తి దుక్కటస్స. సా భిక్ఖునీ సమనుభాసితబ్బా. ఏవఞ్చ పన, భిక్ఖవే, సమనుభాసితబ్బా. బ్యత్తాయ భిక్ఖునియా పటిబలాయ సఙ్ఘో ఞాపేతబ్బో –

౭౩౦. ‘‘సుణాతు మే, అయ్యే, సఙ్ఘో. అయం ఇత్థన్నామా భిక్ఖునీ సఙ్ఘేన సమనుభట్ఠా భిక్ఖునియో ఏవం వదేతి – ‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’తి. సా తం వత్థుం న పటినిస్సజ్జతి. యది సఙ్ఘస్స పత్తకల్లం, సఙ్ఘో ఇత్థన్నామం భిక్ఖునిం సమనుభాసేయ్య తస్స వత్థుస్స పటినిస్సగ్గాయ. ఏసా ఞత్తి.

‘‘సుణాతు మే, అయ్యే, సఙ్ఘో. అయం ఇత్థన్నామా భిక్ఖునీ సఙ్ఘేన సమనుభట్ఠా భిక్ఖునియో ఏవం వదేతి – ‘సంసట్ఠావ అయ్యే, తుమ్హే విహరథ. మా తుమ్హే నానా విహరిత్థ. సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. తా సఙ్ఘో న కిఞ్చి ఆహ. తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – భగినియో ఖో సంసట్ఠా విహరన్తి పాపాచారా పాపసద్దా పాపసిలోకా, భిక్ఖునిసఙ్ఘస్స విహేసికా, అఞ్ఞమఞ్ఞిస్సా వజ్జప్పటిచ్ఛాదికా. వివిచ్చథాయ్యే. వివేకఞ్ఞేవ భగినీనం సఙ్ఘో వణ్ణేతీ’తి. సా తం వత్థుం న పటినిస్సజ్జతి. సఙ్ఘో ఇత్థన్నామం భిక్ఖునిం సమనుభాసతి తస్స వత్థుస్స పటినిస్సగ్గాయ. యస్సా అయ్యాయ ఖమతి ఇత్థన్నామాయ భిక్ఖునియా సమనుభాసనా తస్స వత్థుస్స పటినిస్సగ్గాయ, సా తుణ్హస్స; యస్సా నక్ఖమతి, సా భాసేయ్య.

‘‘దుతియమ్పి ఏతమత్థం వదామి…పే… తతియమ్పి ఏతమత్థం వదామి…పే….

‘‘సమనుభట్ఠా సఙ్ఘేన ఇత్థన్నామా భిక్ఖునీ తస్స వత్థుస్స పటినిస్సగ్గాయ. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

ఞత్తియా దుక్కటం, ద్వీహి కమ్మవాచాహి థుల్లచ్చయా, కమ్మవాచాపరియోసానే ఆపత్తి సఙ్ఘాదిసేసస్స. సఙ్ఘాదిసేసం అజ్ఝాపజ్జన్తియా ఞత్తియా దుక్కటం, ద్వీహి కమ్మవాచాహి థుల్లచ్చయా పటిప్పస్సమ్భన్తి.

అయమ్పీతి పురిమాయో ఉపాదాయ వుచ్చతి.

యావతతియకన్తి యావతతియం సమనుభాసనాయ ఆపజ్జతి, న సహవత్థుజ్ఝాచారా.

నిస్సారణీయన్తి సఙ్ఘమ్హా నిస్సారీయతి.

సఙ్ఘాదిసేసోతి సఙ్ఘోవ తస్సా ఆపత్తియా మానత్తం దేతి, మూలాయ పటికస్సతి, అబ్భేతి, న సమ్బహులా న ఏకా భిక్ఖునీ. తేన వుచ్చతి ‘‘సఙ్ఘాదిసేసో’’తి. తస్సేవ ఆపత్తినికాయస్స నామకమ్మం అధివచనం, తేనపి వుచ్చతి ‘‘సఙ్ఘాదిసేసో’’తి.

౭౩౧. ధమ్మకమ్మే ధమ్మకమ్మసఞ్ఞా న పటినిస్సజ్జతి, ఆపత్తి సఙ్ఘాదిసేసస్స. ధమ్మకమ్మే వేమతికా న పటినిస్సజ్జతి, ఆపత్తి సఙ్ఘాదిసేసస్స. ధమ్మకమ్మే అధమ్మకమ్మసఞ్ఞా న పటినిస్సజ్జతి, ఆపత్తి సఙ్ఘాదిసేసస్స.

అధమ్మకమ్మే ధమ్మకమ్మసఞ్ఞా, ఆపత్తి దుక్కటస్స. అధమ్మకమ్మే వేమతికా, ఆపత్తి దుక్కటస్స. అధమ్మకమ్మే అధమ్మకమ్మసఞ్ఞా, ఆపత్తి దుక్కటస్స.

౭౩౨. అనాపత్తి అసమనుభాసన్తియా, పటినిస్సజ్జన్తియా, ఉమ్మత్తికాయ, ఆదికమ్మికాయాతి.

దసమసఙ్ఘాదిసేససిక్ఖాపదం నిట్ఠితం.

ఉద్దిట్ఠా ఖో, అయ్యాయో, సత్తరస సఙ్ఘాదిసేసా ధమ్మా – నవ పఠమాపత్తికా, అట్ఠ యావతతియకా. యేసం భిక్ఖునీ అఞ్ఞతరం వా అఞ్ఞతరం వా ఆపజ్జతి, తాయ భిక్ఖునియా ఉభతోసఙ్ఘే పక్ఖమానత్తం చరితబ్బం. చిణ్ణమానత్తా భిక్ఖునీ యత్థ సియా వీసతిగణో భిక్ఖునిసఙ్ఘో తత్థ (సా భిక్ఖునీ) [( ) (కత్థపి నత్థి)] అబ్భేతబ్బా. ఏకాయపి చే ఊనో వీసతిగణో భిక్ఖునిసఙ్ఘో తం భిక్ఖునిం అబ్భేయ్య. సా చ భిక్ఖునీ అనబ్భితా, తా చ భిక్ఖునియో గారయ్హా, అయం తత్థ సామీచి.

తత్థాయ్యాయో పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.

సత్తరసకం నిట్ఠితం.

భిక్ఖునివిభఙ్గే సఙ్ఘాదిసేసకణ్డం నిట్ఠితం.