౩. నిస్సగ్గియకణ్డం (భిక్ఖునీవిభఙ్గో)

౧. పత్తవగ్గో

౧. పఠమసిక్ఖాపదం

ఇమే ఖో పనాయ్యాయో తింస నిస్సగ్గియా పాచిత్తియా

ధమ్మా ఉద్దేసం ఆగచ్ఛన్తి.

౭౩౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఛబ్బగ్గియా భిక్ఖునియో బహూ పత్తే సన్నిచయం కరోన్తి. మనుస్సా విహారచారికం ఆహిణ్డన్తా పస్సిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో బహూ పత్తే సన్నిచయం కరిస్సన్తి, పత్తవాణిజ్జం వా భిక్ఖునియో కరిస్సన్తి, ఆమత్తికాపణం వా పసారేస్సన్తీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఛబ్బగ్గియా భిక్ఖునియో పత్తసన్నిచయం కరిస్సన్తీ’’తి…పే… సచ్చం కిర, భిక్ఖవే, ఛబ్బగ్గియా భిక్ఖునియో పత్తసన్నిచయం కరోన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, ఛబ్బగ్గియా భిక్ఖునియో పత్తసన్నిచయం కరిస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౩౪. ‘‘యా పన భిక్ఖునీ పత్తసన్నిచయం కరేయ్య, నిస్సగ్గియం పాచిత్తియ’’న్తి.

౭౩౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

పత్తో నామ ద్వే పత్తా – అయోపత్తో, మత్తికాపత్తో. తయో పత్తస్స వణ్ణా – ఉక్కట్ఠో పత్తో, మజ్ఝిమో పత్తో, ఓమకో పత్తో. ఉక్కట్ఠోనామపత్తో అడ్ఢాళ్హకోదనం గణ్హాతి చతుభాగం ఖాదనం తదుపియం బ్యఞ్జనం. మజ్ఝిమో నామపత్తో నాళికోదనం గణ్హాతి చతుభాగం ఖాదనం తదుపియం బ్యఞ్జనం. ఓమకో నామపత్తో పత్థోదనం గణ్హాతి చతుభాగం ఖాదనం తదుపియం బ్యఞ్జనం. తతో ఉక్కట్ఠో అపత్తో ఓమకో అపత్తో.

సన్నిచయం కరేయ్యాతి అనధిట్ఠితో అవికప్పితో.

నిస్సగ్గియో హోతీతి సహ అరుణుగ్గమనా నిస్సగ్గియో హోతి. నిస్సజ్జితబ్బో సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బో. తాయ భిక్ఖునియా సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘‘అయం మే, అయ్యే, పత్తో రత్తాతిక్కన్తో నిస్సగ్గియో, ఇమాహం సఙ్ఘస్స నిస్సజ్జామీ’’తి. నిస్సజ్జిత్వా ఆపత్తి దేసేతబ్బా. బ్యత్తాయ భిక్ఖునియా పటిబలాయ ఆపత్తి పటిగ్గహేతబ్బా. నిస్సట్ఠపత్తో దాతబ్బో –

‘‘సుణాతు మే, అయ్యే, సఙ్ఘో. అయం పత్తో ఇత్థన్నామాయ భిక్ఖునియా నిస్సగ్గియో సఙ్ఘస్స నిస్సట్ఠో. యది సఙ్ఘస్స పత్తకల్లం, సఙ్ఘో ఇమం పత్తం ఇత్థన్నామాయ భిక్ఖునియా దదేయ్యా’’తి.

తాయ భిక్ఖునియా సమ్బహులా భిక్ఖునియో ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖునీనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్సు వచనీయా – ‘‘అయం మే, అయ్యాయో, పత్తో రత్తాతిక్కన్తో నిస్సగ్గియో, ఇమాహం అయ్యానం నిస్సజ్జామీ’’తి. నిస్సజ్జిత్వా ఆపత్తి దేసేతబ్బా. బ్యత్తాయ భిక్ఖునియా పటిబలాయ ఆపత్తి పటిగ్గహేతబ్బా. నిస్సట్ఠపత్తో దాతబ్బో –

‘‘సుణన్తు మే అయ్యాయో. అయం పత్తో ఇత్థన్నామాయ భిక్ఖునియా నిస్సగ్గియో అయ్యానం నిస్సట్ఠో. యది అయ్యానం పత్తకల్లం, అయ్యాయో ఇమం పత్తం ఇత్థన్నామాయ భిక్ఖునియా దదేయ్యు’’న్తి.

తాయ భిక్ఖునియా ఏకం భిక్ఖునిం ఉపసఙ్కమిత్వా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయా – ‘‘అయం మే, అయ్యే, పత్తో రత్తాతిక్కన్తో నిస్సగ్గియో. ఇమాహం అయ్యాయ నిస్సజ్జామీ’’తి. నిస్సజ్జిత్వా ఆపత్తి దేసేతబ్బా. తాయ భిక్ఖునియా ఆపత్తి పటిగ్గహేతబ్బా. నిస్సట్ఠపత్తో దాతబ్బో – ‘‘ఇమం పత్తం అయ్యాయ దమ్మీ’’తి.

౭౩౬. రత్తాతిక్కన్తే అతిక్కన్తసఞ్ఞా, నిస్సగ్గియం పాచిత్తియం. రత్తాతిక్కన్తే వేమతికా, నిస్సగ్గియం పాచిత్తియం. రత్తాతిక్కన్తే అనతిక్కన్తసఞ్ఞా, నిస్సగ్గియం పాచిత్తియం. అనధిట్ఠితే అధిట్ఠితసఞ్ఞా, నిస్సగ్గియం పాచిత్తియం. అవికప్పితే వికప్పితసఞ్ఞా, నిస్సగ్గియం పాచిత్తియం. అవిస్సజ్జితే విస్సజ్జితసఞ్ఞా, నిస్సగ్గియం పాచిత్తియం. అనట్ఠే నట్ఠసఞ్ఞా… అవినట్ఠే వినట్ఠసఞ్ఞా… అభిన్నే భిన్నసఞ్ఞా… అవిలుత్తే విలుత్తసఞ్ఞా, నిస్సగ్గియం పాచిత్తియం.

నిస్సగ్గియం పత్తం అనిస్సజ్జిత్వా పరిభుఞ్జతి, ఆపత్తి దుక్కటస్స. రత్తానతిక్కన్తే అతిక్కన్తసఞ్ఞా, ఆపత్తి దుక్కటస్స. రత్తానతిక్కన్తే వేమతికా, ఆపత్తి దుక్కటస్స. రత్తానతిక్కన్తే అనతిక్కన్తసఞ్ఞా అనాపత్తి.

౭౩౭. అనాపత్తి అన్తోఅరుణే అధిట్ఠేతి, వికప్పేతి, విస్సజ్జేతి, నస్సతి, వినస్సతి, భిజ్జతి, అచ్ఛిన్దిత్వా గణ్హన్తి, విస్సాసం గణ్హన్తి, ఉమ్మత్తికాయ, ఆదికమ్మికాయాతి.

తేన ఖో పన సమయేన ఛబ్బగ్గియా భిక్ఖునియో నిస్సట్ఠపత్తం న దేన్తి. భగవతో ఏతమత్థం ఆరోచేసుం. న, భిక్ఖవే, నిస్సట్ఠపత్తో న దాతబ్బో. యా న దదేయ్య, ఆపత్తి దుక్కటస్సాతి.

పఠమసిక్ఖాపదం నిట్ఠితం.

౨. దుతియసిక్ఖాపదం

౭౩౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన సమ్బహులా భిక్ఖునియో గామకావాసే వస్సంవుట్ఠా [వస్సంవుత్థా (సీ. స్యా.)] సావత్థిం అగమంసు వత్తసమ్పన్నా ఇరియాపథసమ్పన్నా దుచ్చోళా లూఖచీవరా. ఉపాసకా తా భిక్ఖునియో పస్సిత్వా – ‘‘ఇమా భిక్ఖునియో వత్తసమ్పన్నా ఇరియాపథసమ్పన్నా దుచ్చోళా లూఖచీవరా, ఇమా భిక్ఖునియో అచ్ఛిన్నా భవిస్సన్తీ’’తి భిక్ఖునిసఙ్ఘస్స అకాలచీవరం అదంసు. థుల్లనన్దా భిక్ఖునీ – ‘‘అమ్హాకం కథినం అత్థతం కాలచీవర’’న్తి అధిట్ఠహిత్వా భాజాపేసి. ఉపాసకా తా భిక్ఖునియో పస్సిత్వా ఏతదవోచుం – ‘‘అపయ్యాహి చీవరం లద్ధ’’న్తి? ‘‘న మయం, ఆవుసో, చీవరం లభామ. అయ్యా థుల్లనన్దా – ‘అమ్హాకం కథినం అత్థతం కాలచీవర’న్తి అధిట్ఠహిత్వా భాజాపేసీ’’తి. ఉపాసకా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా అకాలచీవరం ‘కాలచీవర’న్తి అధిట్ఠహిత్వా భాజాపేస్సతీ’’తి! అస్సోసుం ఖో భిక్ఖునియో తేసం ఉపాసకానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా అకాలచీవరం ‘కాలచీవర’న్తి అధిట్ఠహిత్వా భాజాపేస్సతీ’’తి! అథ ఖో తా భిక్ఖునియో భిక్ఖూనం ఏతమత్థం ఆరోచేసుం. భిక్ఖూ భగవతో ఏతమత్థం ఆరోచేసుం …పే… సచ్చం కిర, భిక్ఖవే, థుల్లనన్దా భిక్ఖునీ అకాలచీవరం ‘‘కాలచీవర’’న్తి అధిట్ఠహిత్వా భాజాపేతీతి [భాజాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ అకాలచీవరం ‘‘కాలచీవర’’న్తి అధిట్ఠహిత్వా భాజాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౩౯. ‘‘యా పన భిక్ఖునీ అకాలచీవరం ‘కాలచీవర’న్తి అధిట్ఠహిత్వా భాజాపేయ్య, నిస్సగ్గియం పాచిత్తియ’’న్తి.

౭౪౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అకాలచీవరం నామ అనత్థతే కథినే ఏకాదసమాసే ఉప్పన్నం, అత్థతే కథినే సత్తమాసే ఉప్పన్నం, కాలేపి ఆదిస్స దిన్నం, ఏతం అకాలచీవరం నామ.

అకాలచీవరం ‘‘కాలచీవర’’న్తి అధిట్ఠహిత్వా భాజాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, అయ్యే, అకాలచీవరం ‘‘కాలచీవర’న్తి అధిట్ఠహిత్వా భాజాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౪౧. అకాలచీవరే అకాలచీవరసఞ్ఞా ‘‘కాలచీవర’’న్తి అధిట్ఠహిత్వా భాజాపేతి, నిస్సగ్గియం పాచిత్తియం. అకాలచీవరే వేమతికా ‘‘కాలచీవర’’న్తి అధిట్ఠహిత్వా భాజాపేతి, ఆపత్తి దుక్కటస్స. అకాలచీవరే కాలచీవరసఞ్ఞా ‘‘కాలచీవర’’న్తి అధిట్ఠహిత్వా భాజాపేతి, అనాపత్తి. కాలచీవరే అకాలచీవరసఞ్ఞా, ఆపత్తి దుక్కటస్స. కాలచీవరే వేమతికా, ఆపత్తి దుక్కటస్స. కాలచీవరే కాలచీవరసఞ్ఞా, అనాపత్తి.

౭౪౨. అనాపత్తి అకాలచీవరం కాలచీవరసఞ్ఞా భాజాపేతి, కాలచీవరం కాలచీవరసఞ్ఞా భాజాపేతి, ఉమ్మత్తికాయ, ఆదికమ్మికాయాతి.

దుతియసిక్ఖాపదం నిట్ఠితం.

౩. తతియసిక్ఖాపదం

౭౪౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ అఞ్ఞతరాయ భిక్ఖునియా సద్ధిం చీవరం పరివత్తేత్వా పరిభుఞ్జి. అథ ఖో సా భిక్ఖునీ తం చీవరం సఙ్ఘరిత్వా [సంహరిత్వా (క.)] నిక్ఖిపి. థుల్లనన్దా భిక్ఖునీ తం భిక్ఖునిం ఏతదవోచ – ‘‘యం తే, అయ్యే, మయా సద్ధిం చీవరం పరివత్తితం, కహం తం చీవర’’న్తి? అథ ఖో సా భిక్ఖునీ తం చీవరం నీహరిత్వా థుల్లనన్దాయ భిక్ఖునియా దస్సేసి. థుల్లనన్దా భిక్ఖునీ తం భిక్ఖునిం ఏతదవోచ – ‘‘హన్దాయ్యే, తుయ్హం చీవరం, ఆహర మే’తం చీవరం, యం తుయ్హం తుయ్హమేవేతం, యం మయ్హం మయ్హమేవేతం, ఆహర మే’తం, సకం పచ్చాహరా’’తి అచ్ఛిన్ది. అథ ఖో సా భిక్ఖునీ భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా భిక్ఖునియా సద్ధిం చీవరం పరివత్తేత్వా అచ్ఛిన్దిస్సతీ’’తి! అథ ఖో తా భిక్ఖునియో భిక్ఖూనం ఏతమత్థం ఆరోచేసుం. భిక్ఖూ భగవతో ఏతమత్థం ఆరాచేసుం…పే… సచ్చం కిర, భిక్ఖవే, థుల్లనన్దా భిక్ఖునీ భిక్ఖునియా సద్ధిం చీవరం పరివత్తేత్వా అచ్ఛిన్దతీతి [అచ్ఛిన్దీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ భిక్ఖునియా సద్ధిం చీవరం పరివత్తేత్వా అచ్ఛిన్దిస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౪౪. ‘‘యా పన భిక్ఖునీ భిక్ఖునియా సద్ధిం చీవరం పరివత్తేత్వా సా పచ్ఛా ఏవం వదేయ్య – ‘హన్దాయ్యే, తుయ్హం చీవరం ఆహర, మేతం చీవరం, యం తుయ్హం తుయ్హమేవేతం, యం మయ్హం మయ్హమేవేతం, ఆహర మేతం, సకం పచ్చాహరా’తి అచ్ఛిన్దేయ్య వా అచ్ఛిన్దాపేయ్య వా, నిస్సగ్గియం పాచిత్తియ’’న్తి.

౭౪౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

భిక్ఖునియా సద్ధిన్తి అఞ్ఞాయ భిక్ఖునియా సద్ధిం.

చీవరం నామ ఛన్నం చీవరానం అఞ్ఞతరం చీవరం వికప్పనుపగం పచ్ఛిమం.

పరివత్తేత్వాతి పరిత్తేన వా విపులం, విపులేన వా పరిత్తం.

అచ్ఛిన్దేయ్యాతి సయం అచ్ఛిన్దతి నిస్సగ్గియం పాచిత్తియం.

అచ్ఛిన్దాపేయ్యాతి అఞ్ఞం ఆణాపేతి, ఆపత్తి దుక్కటస్స. సకిం ఆణత్తా బహుకమ్పి అచ్ఛిన్దతి, నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే అయ్యే చీవరం భిక్ఖునియా సద్ధిం పరివత్తేత్వా అచ్ఛిన్నం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౪౬. ఉపసమ్పన్నాయ ఉపసమ్పన్నసఞ్ఞా చీవరం పరివత్తేత్వా అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం. ఉపసమ్పన్నాయ వేమతికా చీవరం పరివత్తేత్వా అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం. ఉపసమ్పన్నాయ అనుపసమ్పన్నసఞ్ఞా చీవరం పరివత్తేత్వా అచ్ఛిన్దతి వా అచ్ఛిన్దాపేతి వా, నిస్సగ్గియం పాచిత్తియం.

అఞ్ఞం పరిక్ఖారం పరివత్తేత్వా అచ్ఛిన్దతి వా అచ్ఛిన్దాపేతి వా, ఆపత్తి దుక్కటస్స. అనుపసమ్పన్నాయ సద్ధిం చీవరం వా అఞ్ఞం వా పరిక్ఖారం పరివత్తేత్వా అచ్ఛిన్దతి వా అచ్ఛిన్దాపేతి వా, ఆపత్తి దుక్కటస్స. అనుపసమ్పన్నాయ ఉపసమ్పన్నసఞ్ఞా, ఆపత్తి దుక్కటస్స. అనుపసమ్పన్నాయ వేమతికా, ఆపత్తి దుక్కటస్స. అనుపసమ్పన్నాయ అనుపసమ్పన్నసఞ్ఞా, ఆపత్తి దుక్కటస్స.

౭౪౭. అనాపత్తి సా వా దేతి, తస్సా వా విస్ససన్తీ గణ్హాతి, ఉమ్మత్తికాయ, ఆదికమ్మికాయాతి.

తతియసిక్ఖాపదం నిట్ఠితం.

౪. చతుత్థసిక్ఖాపదం

౭౪౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ గిలానా హోతి. అథ ఖో అఞ్ఞతరో ఉపాసకో యేన థుల్లనన్దా భిక్ఖునీ తేనుపసఙ్కమి; ఉపసఙ్కమిత్వా థుల్లనన్దం భిక్ఖునిం ఏతదవోచ – ‘‘కిం తే, అయ్యే, అఫాసు, కిం ఆహరీయతూ’’తి? ‘‘సప్పినా మే, ఆవుసో, అత్థో’’తి. అథ ఖో సో ఉపాసకో అఞ్ఞతరస్స ఆపణికస్స ఘరా కహాపణస్స సప్పిం ఆహరిత్వా థుల్లనన్దాయ భిక్ఖునియా అదాసి. థుల్లనన్దా భిక్ఖునీ ఏవమాహ – ‘‘న మే, ఆవుసో, సప్పినా అత్థో; తేలేన మే అత్థో’’తి. అథ ఖో సో ఉపాసకో యేన సో ఆపణికో తేనుపసఙ్కమి; ఉపసఙ్కమిత్వా తం ఆపణికం ఏతదవోచ – ‘‘న కిరాయ్యో అయ్యాయ సప్పినా అత్థో, తేలేన అత్థో. హన్ద తే సప్పిం, తేలం మే దేహీ’’తి. ‘‘సచే మయం అయ్యో విక్కీతం భణ్డం పున ఆదియిస్సామ [ఆహరిస్సామ (క.)], కదా అమ్హాకం భణ్డం విక్కాయిస్సతి [విక్కీయిస్సతి (?)]; సప్పిస్స కయేన సప్పి హటం, తేలస్స కయం ఆహర, తేలం హరిస్ససీ’’తి. అథ ఖో సో ఉపాసకో ఉజ్ఝాయతి ఖియ్యతి విపాచేతి – ‘‘కథఞ్హి నామ అయ్యా థుల్లనన్దా అఞ్ఞం విఞ్ఞాపేత్వా అఞ్ఞం విఞ్ఞాపేస్సతీ’’తి! అస్సోసుం ఖో భిక్ఖునియో తస్స ఉపాసకస్స ఉజ్ఝాయన్తస్స ఖియ్యన్తస్స విపాచేన్తస్స. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి…పే… అథ ఖో తా భిక్ఖునియో భిక్ఖూనం ఏతమత్థం ఆరోచేసుం. భిక్ఖూ భగవతో ఏతమత్థం ఆరోచేసుం…పే… సచ్చం కిర, భిక్ఖవే, థుల్లనన్దా భిక్ఖునీ అఞ్ఞం విఞ్ఞాపేత్వా అఞ్ఞం విఞ్ఞాపేతీతి [విఞ్ఞాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా …పే… కథఞ్హి నామ, భిక్ఖవే, థుల్లనన్దా భిక్ఖునీ అఞ్ఞం విఞ్ఞాపేత్వా అఞ్ఞం విఞ్ఞాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౪౯. ‘‘యా పన భిక్ఖునీ అఞ్ఞం విఞ్ఞాపేత్వా అఞ్ఞం విఞ్ఞాపేయ్య, నిస్సగ్గియం పాచిత్తియ’’న్తి.

౭౫౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞం విఞ్ఞాపేత్వాతి యం కిఞ్చి విఞ్ఞాపేత్వా.

అఞ్ఞం విఞ్ఞాపేయ్యాతి తం ఠపేత్వా అఞ్ఞం విఞ్ఞాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే అయ్యే అఞ్ఞం విఞ్ఞాపేత్వా అఞ్ఞం విఞ్ఞాపితం నిస్సగ్గియం, ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… అయ్యాయ దమ్మీ’’తి.

౭౫౧. అఞ్ఞే అఞ్ఞసఞ్ఞా అఞ్ఞం విఞ్ఞాపేతి, నిస్సగ్గియం పాచిత్తియం. అఞ్ఞే వేమతికా అఞ్ఞం విఞ్ఞాపేతి, నిస్సగ్గియం పాచిత్తియం. అఞ్ఞే అనఞ్ఞసఞ్ఞా అఞ్ఞం విఞ్ఞాపేతి, నిస్సగ్గియం పాచిత్తియం.

అనఞ్ఞే అఞ్ఞసఞ్ఞా అనఞ్ఞం విఞ్ఞాపేతి, ఆపత్తి దుక్కటస్స. అనఞ్ఞే వేమతికా అనఞ్ఞం విఞ్ఞాపేతి, ఆపత్తి దుక్కటస్స. అనఞ్ఞే అనఞ్ఞసఞ్ఞా, అనాపత్తి.

౭౫౨. అనాపత్తి తఞ్ఞేవ [తఞ్చేవ (స్యా.)] విఞ్ఞాపేతి, అఞ్ఞఞ్చ విఞ్ఞాపేతి, ఆనిసంసం దస్సేత్వా విఞ్ఞాపేతి, ఉమ్మత్తికాయ, ఆదికమ్మికాయాతి.

చతుత్థసిక్ఖాపదం నిట్ఠితం.

౫. పఞ్చమసిక్ఖాపదం

౭౫౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ గిలానా హోతి. అథ ఖో అఞ్ఞతరో ఉపాసకో యేన థుల్లనన్దా భిక్ఖునీ తేనుపసఙ్కమి; ఉపసఙ్కమిత్వా థుల్లనన్దం భిక్ఖునిం ఏతదవోచ – ‘‘కచ్చి, అయ్యే, ఖమనీయం కచ్చి యాపనీయ’’న్తి? ‘‘న మే, ఆవుసో, ఖమనీయం, న యాపనీయ’’న్తి. ‘‘అముకస్స, అయ్యే, ఆపణికస్స ఘరే కహాపణం నిక్ఖిపిస్సామి, తతో యం ఇచ్ఛేయ్యాసి తం ఆహరాపేయ్యాసీ’’తి. థుల్లనన్దా భిక్ఖునీ అఞ్ఞతరం సిక్ఖమానం ఆణాపేసి – ‘‘గచ్ఛ, సిక్ఖమానే, అముకస్స ఆపణికస్స ఘరా కహాపణస్స తేలం ఆహరా’’తి. అథ ఖో సా సిక్ఖమానా తస్స ఆపణికస్స ఘరా కహాపణస్స తేలం ఆహరిత్వా థుల్లనన్దాయ భిక్ఖునియా అదాసి. థుల్లనన్దా భిక్ఖునీ ఏవమాహ – ‘‘న మే, సిక్ఖమానే, తేలేన అత్థో, సప్పినా మే అత్థో’’తి. అథ ఖో సా సిక్ఖమానా యేన సో ఆపణికో తేనుపసఙ్కమి; ఉపసఙ్కమిత్వా తం ఆపణికం ఏతదవోచ – ‘‘న కిర, ఆవుసో, అయ్యాయ తేలేన అత్థో, సప్పినా అత్థో, హన్ద తే తేలం, సప్పిం మే దేహీ’’తి. ‘‘సచే మయం, అయ్యే, విక్కీతం భణ్డం పున ఆదియిస్సామ, కదా అమ్హాకం భణ్డం విక్కాయిస్సతి! తేలస్స కయేన తేలం హటం, సప్పిస్స కయం ఆహర, సప్పిం హరిస్ససీ’’తి. అథ ఖో సా సిక్ఖమానా రోదన్తీ అట్ఠాసి. భిక్ఖునియో తం సిక్ఖమానం ఏతదవోచుం – ‘‘కిస్స త్వం, సిక్ఖమానే, రోదసీ’’తి? అథ ఖో సా సిక్ఖమానా భిక్ఖునీనం ఏతమత్థం ఆరోచేసి. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా అఞ్ఞం చేతాపేత్వా అఞ్ఞం చేతాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ అఞ్ఞం చేతాపేత్వా అఞ్ఞం చేతాపేతీతి [చేతాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ అఞ్ఞం చేతాపేత్వా అఞ్ఞం చేతాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౫౪. ‘‘యా పన భిక్ఖునీ అఞ్ఞం చేతాపేత్వా అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౫౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞం చేతాపేత్వాతి యం కిఞ్చి చేతాపేత్వా.

అఞ్ఞం చేతాపేయ్యాతి తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞం చేతాపేత్వా అఞ్ఞం చేతాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౫౬. అఞ్ఞే అఞ్ఞసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞే అనఞ్ఞసఞ్ఞా అఞ్ఞం చేతాపేతి, నిస్సగ్గియం పాచిత్తియం.

అనఞ్ఞే అఞ్ఞసఞ్ఞా అనఞ్ఞం చేతాపేతి, ఆపత్తి దుక్కటస్స. అనఞ్ఞే వేమతికా అనఞ్ఞం చేతాపేతి, ఆపత్తి దుక్కటస్స. అనఞ్ఞే అనఞ్ఞసఞ్ఞా అనాపత్తి.

౭౫౭. అనాపత్తి తఞ్ఞేవ [తఞ్చేవ (స్యా.)] చేతాపేతి, అఞ్ఞఞ్చ చేతాపేతి, ఆనిసంసం దస్సేత్వా చేతాపేతి, ఉమ్మత్తికాయ, ఆదికమ్మికాయాతి.

పఞ్చమసిక్ఖాపదం నిట్ఠితం.

౬. ఛట్ఠసిక్ఖాపదం

౭౫౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఉపాసకా భిక్ఖునిసఙ్ఘస్స చీవరత్థాయ ఛన్దకం సఙ్ఘరిత్వా అఞ్ఞతరస్స పావారికస్స ఘరే పరిక్ఖారం నిక్ఖిపిత్వా భిక్ఖునియో ఉపసఙ్కమిత్వా ఏతదవోచుం – ‘‘అముకస్స, అయ్యే, పావారికస్స ఘరే చీవరత్థాయ పరిక్ఖారో నిక్ఖిత్తో, తతో చీవరం ఆహరాపేత్వా భాజేథా’’తి. భిక్ఖునియో తేన పరిక్ఖారేన భేసజ్జం చేతాపేత్వా పరిభుఞ్జింసు. ఉపాసకా జానిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేస్సన్తీ’’తి! అస్సోసుం ఖో భిక్ఖునియో తేసం ఉపాసకానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా …పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేస్సన్తీ’’తి…పే… సచ్చం కిర, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౫౯. ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౬౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞదత్థికేన పరిక్ఖారేన అఞ్ఞుద్దిసికేనాతి అఞ్ఞస్సత్థాయ దిన్నేన.

సఙ్ఘికేనాతి సఙ్ఘస్స, న గణస్స, న ఏకభిక్ఖునియా.

అఞ్ఞం చేతాపేయ్యాతి యంఅత్థాయ దిన్నం, తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి.…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౬౧. అఞ్ఞదత్థికే అఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే అనఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. నిస్సట్ఠం పటిలభిత్వా యథాదానే ఉపనేతబ్బం.

అనఞ్ఞదత్థికే అఞ్ఞదత్థికసఞ్ఞా, ఆపత్తి దుక్కటస్స. అనఞ్ఞదత్థికే వేమతికా, ఆపత్తి దుక్కటస్స. అనఞ్ఞదత్థికే అనఞ్ఞదత్థికసఞ్ఞా, అనాపత్తి.

౭౬౨. అనాపత్తి సేసకం ఉపనేతి, సామికే అపలోకేత్వా ఉపనేతి, ఆపదాసు, ఉమ్మత్తికాయ, ఆదికమ్మికాయాతి.

ఛట్ఠసిక్ఖాపదం నిట్ఠితం.

౭. సత్తమసిక్ఖాపదం

౭౬౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన ఉపాసకా భిక్ఖునిసఙ్ఘస్స చీవరత్థాయ ఛన్దకం సఙ్ఘరిత్వా అఞ్ఞతరస్స పావారికస్స ఘరే పరిక్ఖారం నిక్ఖిపిత్వా భిక్ఖునియో ఉపసఙ్కమిత్వా ఏతదవోచుం – ‘‘అముకస్స, అయ్యే, పావారికస్స ఘరే చీవరత్థాయ పరిక్ఖారో నిక్ఖిత్తో, తతో చీవరం ఆహరాపేత్వా భాజేథా’’తి. భిక్ఖునియో తేన చ పరిక్ఖారేన సయమ్పి యాచిత్వా భేసజ్జం చేతాపేత్వా పరిభుఞ్జింసు. ఉపాసకా జానిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపేస్సన్తీ’’తి…పే… సచ్చం కిర, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౬౪. ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౬౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞదత్థికేన పరిక్ఖారేన అఞ్ఞుద్దిసికేనాతి అఞ్ఞస్సత్థాయ దిన్నేన.

సఙ్ఘికేనాతి సఙ్ఘస్స, న గణస్స, న ఏకభిక్ఖునియా.

సఞ్ఞాచికేనాతి సయం యాచిత్వా.

అఞ్ఞం చేతాపేయ్యాతి యంఅత్థాయ దిన్నం తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౬౬. అఞ్ఞదత్థికే అఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే అనఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. నిస్సట్ఠం పటిలభిత్వా యథాదానే ఉపనేతబ్బం.

అనఞ్ఞదత్థికే అఞ్ఞదత్థికసఞ్ఞా, ఆపత్తి దుక్కటస్స. అనఞ్ఞదత్థికే వేమతికా, ఆపత్తి దుక్కటస్స. అనఞ్ఞదత్థికే అనఞ్ఞదత్థికసఞ్ఞా, అనాపత్తి.

౭౬౭. అనాపత్తి సేసకం ఉపనేతి, సామికే అపలోకేత్వా ఉపనేతి, ఆపదాసు, ఉమ్మత్తికాయ, ఆదికమ్మికాయాతి.

సత్తమసిక్ఖాపదం నిట్ఠితం.

౮. అట్ఠమసిక్ఖాపదం

౭౬౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరస్స పూగస్స పరివేణవాసికా భిక్ఖునియో యాగుయా కిలమన్తి. అథ ఖో సో పూగో భిక్ఖునీనం యాగుఅత్థాయ ఛన్దకం సఙ్ఘరిత్వా అఞ్ఞతరస్స ఆపణికస్స ఘరే పరిక్ఖారం నిక్ఖిపిత్వా భిక్ఖునియో ఉపసఙ్కమిత్వా ఏతదవోచ – ‘‘అముకస్స, అయ్యే, ఆపణికస్స ఘరే యాగుఅత్థాయ పరిక్ఖారో నిక్ఖిత్తో, తతో తణ్డులం ఆహరాపేత్వా యాగుం పచాపేత్వా పరిభుఞ్జథా’’తి. భిక్ఖునియో తేన పరిక్ఖారేన భేసజ్జం చేతాపేత్వా పరిభుఞ్జింసు. సో పూగో జానిత్వా ఉజ్ఝాయతి ఖియ్యతి విపాచేతి – ‘‘కథఞ్హి నామ భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేస్సన్తీ’’తి…పే… సచ్చం కిర, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౬౯. ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౭౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞదత్థికేన పరిక్ఖారేన అఞ్ఞుద్దిసికేనాతి అఞ్ఞస్సత్థాయ దిన్నేన.

మహాజనికేనాతి గణస్స, న సఙ్ఘస్స, న ఏకభిక్ఖునియా.

అఞ్ఞం చేతాపేయ్యాతి యంఅత్థాయ దిన్నం తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపితం నిస్సగ్గియం ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౭౧. అఞ్ఞదత్థికే అఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే అనఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. నిస్సట్ఠం పటిలభిత్వా యథాదానే ఉపనేతబ్బం.

అనఞ్ఞదత్థికే అఞ్ఞదత్థికసఞ్ఞా, ఆపత్తి దుక్కటస్స. అనఞ్ఞదత్థికే వేమతికా, ఆపత్తి దుక్కటస్స. అనఞ్ఞదత్థికే అనఞ్ఞదత్థికసఞ్ఞా, అనాపత్తి.

౭౭౨. అనాపత్తి సేసకం ఉపనేతి, సామికే అపలోకేత్వా ఉపనేతి, ఆపదాసు, ఉమ్మత్తికాయ, ఆదికమ్మికాయాతి.

అట్ఠమసిక్ఖాపదం నిట్ఠితం.

౯. నవమసిక్ఖాపదం

౭౭౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన అఞ్ఞతరస్స పూగస్స పరివేణవాసికా భిక్ఖునియో యాగుయా కిలమన్తి. అథ ఖో సో పూగో భిక్ఖునీనం యాగుఅత్థాయ ఛన్దకం సఙ్ఘరిత్వా అఞ్ఞతరస్స ఆపణికస్స ఘరే పరిక్ఖారం నిక్ఖిపిత్వా భిక్ఖునియో ఉపసఙ్కమిత్వా ఏతదవోచ – ‘‘అముకస్స, అయ్యే, ఆపణికస్స ఘరే యాగుఅత్థాయ పరిక్ఖారో నిక్ఖిత్తో. తతో తణ్డులే ఆహరాపేత్వా యాగుం పచాపేత్వా పరిభుఞ్జథా’’తి. భిక్ఖునియో తేన చ పరిక్ఖారేన సయమ్పి యాచిత్వా భేసజ్జం చేతాపేత్వా పరిభుఞ్జింసు. సో పూగో జానిత్వా ఉజ్ఝాయతి ఖియ్యతి విపాచేతి – ‘‘కథఞ్హి నామ భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపేస్సన్తీ’’తి…పే… సచ్చం కిర, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపేన్తీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, భిక్ఖునియో అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపేస్సన్తి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౭౪. ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౭౫. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞదత్థికేన పరిక్ఖారేన అఞ్ఞుద్దిసికేనాతి అఞ్ఞస్సత్థాయ దిన్నేన.

మహాజనికేనాతి గణస్స, న సఙ్ఘస్స, న ఏకభిక్ఖునియా.

సఞ్ఞాచికేనాతి సయం యాచిత్వా.

అఞ్ఞం చేతాపేయ్యాతి యంఅత్థాయ దిన్నం తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపితం నిస్సగ్గియం. ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౭౬. అఞ్ఞదత్థికే అఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే అనఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. నిస్సట్ఠం పటిలభిత్వా యథాదానే ఉపనేతబ్బం.

అనఞ్ఞదత్థికే అఞ్ఞదత్థికసఞ్ఞా, ఆపత్తి దుక్కటస్స. అనఞ్ఞదత్థికే వేమతికా, ఆపత్తి దుక్కటస్స. అనఞ్ఞదత్థికే అనఞ్ఞదత్థికసఞ్ఞా అనాపత్తి.

౭౭౭. అనాపత్తి సేసకం ఉపనేతి, సామికే అపలోకేత్వా ఉపనేతి, ఆపదాసు, ఉమ్మత్తికాయ, ఆదికమ్మికాయాతి.

నవమసిక్ఖాపదం నిట్ఠితం.

౧౦. దసమసిక్ఖాపదం

౭౭౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ బహుస్సుతా హోతి భాణికా విసారదా పట్టా ధమ్మిం కథం కాతుం. బహూ మనుస్సా థుల్లనన్దం భిక్ఖునిం పయిరుపాసన్తి. తేన ఖో పన సమయేన థుల్లనన్దాయ భిక్ఖునియా పరివేణం ఉన్ద్రియతి [ఉద్రీయతి (స్యా.)]. మనుస్సా థుల్లనన్దం భిక్ఖునిం ఏతదవోచుం – ‘‘కిస్సిదం తే, అయ్యే, పరివేణం ఉన్ద్రియతీ’’తి? ‘‘నత్థావుసో, దాయకా, నత్థి కారకా’’తి. అథ ఖో తే మనుస్సా థుల్లనన్దాయ భిక్ఖునియా పరివేణత్థాయ ఛన్దకం సఙ్ఘరిత్వా థుల్లనన్దాయ భిక్ఖునియా పరిక్ఖారం అదంసు. థుల్లనన్దా భిక్ఖునీ తేన చ పరిక్ఖారేన సయమ్పి యాచిత్వా భేసజ్జం చేతాపేత్వా పరిభుఞ్జి. మనుస్సా జానిత్వా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపేతీతి? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౭౯. ‘‘యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియ’’న్తి.

౭౮౦. యా పనాతి యా యాదిసా…పే… భిక్ఖునీతి…పే… అయం ఇమస్మిం అత్థే అధిప్పేతా భిక్ఖునీతి.

అఞ్ఞదత్థికేన పరిక్ఖారేన అఞ్ఞుద్దిసికేనాతి అఞ్ఞస్సత్థాయ దిన్నేన.

పుగ్గలికేనాతి ఏకాయ భిక్ఖునియా, న సఙ్ఘస్స, న గణస్స.

సఞ్ఞాచికేనాతి సయం యాచిత్వా.

అఞ్ఞం చేతాపేయ్యాతి యంఅత్థాయ దిన్నం తం ఠపేత్వా అఞ్ఞం చేతాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౮౧. అఞ్ఞదత్థికే అఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే వేమతికా అఞ్ఞం చేతాపేతి, నిస్సగ్గియం పాచిత్తియం. అఞ్ఞదత్థికే అనఞ్ఞదత్థికసఞ్ఞా అఞ్ఞం చేతాపేతి, నిస్సగ్గియం పాచిత్తియం. నిస్సట్ఠం పటిలభిత్వా యథాదానే ఉపనేతబ్బం.

అనఞ్ఞదత్థికే అఞ్ఞదత్థికసఞ్ఞా, ఆపత్తి దుక్కటస్స. అనఞ్ఞదత్థికే వేమతికా, ఆపత్తి దుక్కటస్స. అనఞ్ఞదత్థికే అనఞ్ఞదత్థికసఞ్ఞా, అనాపత్తి.

౭౮౨. అనాపత్తి సేసకం ఉపనేతి, సామికే అపలోకేత్వా ఉపనేతి, ఆపదాసు, ఉమ్మత్తికాయ, ఆదికమ్మికాయాతి.

దసమసిక్ఖాపదం నిట్ఠితం.

౧౧. ఏకాదసమసిక్ఖాపదం

౭౮౩. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ బహుస్సుతా హోతి భాణికా విసారదా పట్టా ధమ్మిం కథం కాతుం. అథ ఖో రాజా పసేనది కోసలో సీతకాలే మహగ్ఘం కమ్బలం పారుపిత్వా యేన థుల్లనన్దా భిక్ఖునీ తేనుపసఙ్కమి; ఉపసఙ్కమిత్వా థుల్లనన్దం భిక్ఖునిం అభివాదేత్వా ఏకమన్తం నిసీది. ఏకమన్తం నిసిన్నం ఖో రాజానం పసేనదిం కోసలం థుల్లనన్దా భిక్ఖునీ ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో రాజా పసేనది కోసలో థుల్లనన్దాయ భిక్ఖునియా ధమ్మియా కథాయ సన్దస్సితో సమాదపితో సముత్తేజితో సమ్పహంసితో థుల్లనన్దం భిక్ఖునిం ఏతదవోచ – ‘‘వదేయ్యాసి, అయ్యే, యేన అత్థో’’తి? ‘‘సచే మే త్వం, మహారాజ, దాతుకామోసి, ఇమం కమ్బలం దేహీ’’తి. అథ ఖో రాజా పసేనది కోసలో థుల్లనన్దాయ భిక్ఖునియా కమ్బలం దత్వా ఉట్ఠాయాసనా థుల్లనన్దం భిక్ఖునిం అభివాదేత్వా పదక్ఖిణం కత్వా పక్కామి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘మహిచ్ఛా ఇమా భిక్ఖునియో అసన్తుట్ఠా. కథఞ్హి నామ రాజానం కమ్బలం విఞ్ఞాపేస్సన్తీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా రాజానం కమ్బలం విఞ్ఞాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ రాజానం కమ్బలం విఞ్ఞాపేతీతి [విఞ్ఞాపేసీతి (క.)]? ‘‘సచ్చం, భగవా’’తి. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ రాజానం కమ్బలం విఞ్ఞాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౮౪. ‘‘గరుపావురణం [పాపురణం (సీ. స్యా.)] పన భిక్ఖునియా చేతాపేన్తియా చతుక్కంసపరమం చేతాపేతబ్బం. తతో చే ఉత్తరి చేతాపేయ్య, నిస్సగ్గియం పాచిత్తియ’’న్తి.

౭౮౫. గరుపావురణం నామ యం కిఞ్చి సీతకాలే పావురణం.

చేతాపేన్తియాతి విఞ్ఞాపేన్తియా.

చతుక్కంసపరమం చేతాపేతబ్బన్తి సోళసకహాపణగ్ఘనకం చేతాపేతబ్బం.

తతో చే ఉత్తరి చేతాపేయ్యాతి తతుత్తరి విఞ్ఞాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ‘‘ఇదం మే, అయ్యే, గరుపావురణం అతిరేకచతుక్కంసపరమం చేతాపితం నిస్సగ్గియం, ఇమాహం సఙ్ఘస్స నిస్సజ్జామీ’’తి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౮౬. అతిరేకచతుక్కంసే అతిరేకసఞ్ఞా చేతాపేతి, నిస్సగ్గియం పాచిత్తియం. అతిరేకచతుక్కంసే వేమతికా చేతాపేతి, నిస్సగ్గియం పాచిత్తియం. అతిరేకచతుక్కంసే ఊనకసఞ్ఞా చేతాపేతి, నిస్సగ్గియం పాచిత్తియం.

ఊనకచతుక్కంసే అతిరేకసఞ్ఞా, ఆపత్తి దుక్కటస్స. ఊనకచతుక్కంసే వేమతికా, ఆపత్తి దుక్కటస్స. ఊనకచతుక్కంసే ఊనకసఞ్ఞా, అనాపత్తి.

౭౮౭. అనాపత్తి చతుక్కంసపరమం చేతాపేతి, ఊనకచతుక్కంసపరమం చేతాపేతి, ఞాతకానం, పవారితానం, అఞ్ఞస్సత్థాయ, అత్తనో ధనేన, మహగ్ఘం చేతాపేతుకామస్స అప్పగ్ఘం చేతాపేతి, ఉమ్మత్తికాయ, ఆదికమ్మికాయాతి.

ఏకాదసమసిక్ఖాపదం నిట్ఠితం.

౧౨. ద్వాదసమసిక్ఖాపదం

౭౮౮. తేన సమయేన బుద్ధో భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన థుల్లనన్దా భిక్ఖునీ బహుస్సుతా హోతి భాణికా విసారదా పట్టా ధమ్మిం కథం కాతుం. అథ ఖో రాజా పసేనది కోసలో ఉణ్హకాలే మహగ్ఘం ఖోమం పారుపిత్వా యేన థుల్లనన్దా భిక్ఖునీ తేనుపసఙ్కమి; ఉపసఙ్కమిత్వా థుల్లనన్దం భిక్ఖునిం అభివాదేత్వా ఏకమన్తం నిసీది. ఏకమన్తం నిసిన్నం ఖో రాజానం పసేనదిం కోసలం థుల్లనన్దా భిక్ఖునీ ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో రాజా పసేనది కోసలో థుల్లనన్దాయ భిక్ఖునియా ధమ్మియా కథాయ సన్దస్సితో సమాదపితో సముత్తేజితో సమ్పహంసితో థుల్లనన్దం భిక్ఖునిం ఏతదవోచ – ‘‘వదేయ్యాసి, అయ్యే, యేన అత్థో’’తి. ‘‘సచే మే త్వం, మహారాజ, దాతుకామోసి, ఇమం ఖోమం దేహీ’’తి. అథ ఖో రాజా పసేనది కోసలో థుల్లనన్దాయ భిక్ఖునియా ఖోమం దత్వా ఉట్ఠాయాసనా థుల్లనన్దం భిక్ఖునిం అభివాదేత్వా పదక్ఖిణం కత్వా పక్కామి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘మహిచ్ఛా ఇమా భిక్ఖునియో అసన్తుట్ఠా. కథఞ్హి నామ రాజానం ఖోమం విఞ్ఞాపేస్సన్తీ’’తి! అస్సోసుం ఖో భిక్ఖునియో తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. యా తా భిక్ఖునియో అప్పిచ్ఛా…పే… తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ అయ్యా థుల్లనన్దా రాజానం ఖోమం విఞ్ఞాపేస్సతీ’’తి…పే… సచ్చం కిర, భిక్ఖవే, థుల్లనన్దా భిక్ఖునీ రాజానం ఖోమం విఞ్ఞాపేతీతి [విఞ్ఞాపేసీతి (క.)]? ‘‘సచ్చం, భగవాతి’’. విగరహి బుద్ధో భగవా…పే… కథఞ్హి నామ, భిక్ఖవే, థుల్లనన్దా భిక్ఖునీ రాజానం ఖోమం విఞ్ఞాపేస్సతి! నేతం, భిక్ఖవే, అప్పసన్నానం వా పసాదాయ…పే… ఏవఞ్చ పన, భిక్ఖవే, భిక్ఖునియో ఇమం సిక్ఖాపదం ఉద్దిసన్తు –

౭౮౯. ‘‘లహుపావురణం పన భిక్ఖునియా చేతాపేన్తియా అడ్ఢతేయ్యకంసపరమం చేతాపేతబ్బం. తతో చే ఉత్తరి చేతాపేయ్య, నిస్సగ్గియం పాచిత్తియ’’న్తి.

౭౯౦. లహుపావురణం నామ యం కిఞ్చి ఉణ్హకాలే పావురణం.

చేతాపేన్తియాతి విఞ్ఞాపేన్తియా.

అడ్ఢతేయ్యకంసపరమం చేతాపేతబ్బన్తి దసకహాపణగ్ఘనకం చేతాపేతబ్బం.

తతో చే ఉత్తరి చేతాపేయ్యాతి తతుత్తరి విఞ్ఞాపేతి, పయోగే దుక్కటం. పటిలాభేన నిస్సగ్గియం హోతి. నిస్సజ్జితబ్బం సఙ్ఘస్స వా గణస్స వా ఏకభిక్ఖునియా వా. ఏవఞ్చ పన, భిక్ఖవే, నిస్సజ్జితబ్బం…పే… ఇదం మే, అయ్యే, లహుపావురణం అతిరేకఅడ్ఢతేయ్యకంసపరమం చేతాపితం నిస్సగ్గియం, ఇమాహం సఙ్ఘస్స నిస్సజ్జామీతి…పే… దదేయ్యాతి…పే… దదేయ్యున్తి…పే… అయ్యాయ దమ్మీతి.

౭౯౧. అతిరేకఅడ్ఢతేయ్యకంసే అతిరేకసఞ్ఞా చేతాపేతి, నిస్సగ్గియం పాచిత్తియం. అతిరేకఅడ్ఢతేయ్యకంసే వేమతికా చేతాపేతి, నిస్సగ్గియం పాచిత్తియం. అతిరేకఅడ్ఢతేయ్యకంసే ఊనకసఞ్ఞా చేతాపేతి, నిస్సగ్గియం పాచిత్తియం.

ఊనకఅడ్ఢతేయ్యకంసే అతిరేకసఞ్ఞా, ఆపత్తి దుక్కటస్స. ఊనకఅడ్ఢతేయ్యకంసే వేమతికా, ఆపత్తి దుక్కటస్స. ఊనకఅడ్ఢతేయ్యకంసే ఊనకసఞ్ఞా, అనాపత్తి.

౭౯౨. అనాపత్తి అడ్ఢతేయ్యకంసపరమం చేతాపేతి, ఊనకఅడ్ఢతేయ్యకంసపరమం చేతాపేతి, ఞాతకానం, పవారితానం, అఞ్ఞస్సత్థాయ, అత్తనో ధనేన, మహగ్ఘం చేతాపేతుకామస్స అప్పగ్ఘం చేతాపేతి, ఉమ్మత్తికాయ, ఆదికమ్మికాయాతి.

ద్వాదసమసిక్ఖాపదం నిట్ఠితం.

ఉద్దిట్ఠా ఖో, అయ్యాయో, తింస నిస్సగ్గియా పాచిత్తియా ధమ్మా. తత్థాయ్యాయో పుచ్ఛామి – ‘‘కచ్చిత్థ పరిసుద్ధా’’? దుతియమ్పి పుచ్ఛామి – ‘‘కచ్చిత్థ పరిసుద్ధా’’? తతియమ్పి పుచ్ఛామి – ‘‘కచ్చిత్థ పరిసుద్ధా’’? పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.

భిక్ఖునివిభఙ్గే నిస్సగ్గియకణ్డం నిట్ఠితం.