౭. సంవిధానసిక్ఖాపదవణ్ణనా

౪౧౨. ‘‘తేన ఖో పన సమయేన అఞ్ఞతరా ఇత్థీ’’తి చ పాఠో అత్థి, కేసుచి నత్థి. నత్థిభావో సున్దరో ‘‘తేన ఖో సమయేనా’’తి అధికారత్తాతి కేచి. ఇధ ఏకతోఉపసమ్పన్నా, సిక్ఖమానా, సామణేరీతి ఇమాపి తిస్సో సఙ్గహం గచ్ఛన్తి. ఇమాసం పన సమయో రక్ఖతి, అయమిమాసం, మాతుగామస్స చ విసేసో.

౪౧౪. అపిచేత్థ ‘‘విఞ్ఞూ పటిబలా’’తి వచనతో అప్పటిబలా అనాపత్తివత్థుకాతి ఏకే, తం న యుత్తం దుక్కటవత్థుకత్తా. ‘‘భిక్ఖు సంవిదహతి, మాతుగామో న సంవిదహతి, ఆపత్తి దుక్కటస్సా’’తి హి వుత్తం. తథా హి ఉపపరిక్ఖితబ్బం.

సంవిధానసిక్ఖాపదవణ్ణనా నిట్ఠితా.