౭. దుచ్చరితసుత్తవణ్ణనా

౪౧౩. ఏత్థాపి మనోసుచరితం సీలం నామాతి దస్సేతీతి కత్వా వుత్తం ‘‘పచ్ఛిమాపి తయో’’తి. అనభిజ్ఝాఅబ్యాపాదసమ్మాదిట్ఠిధమ్మా సీలం హోతీతి వేదితబ్బా కాయవచీసుచరితేహి సద్ధిం మనోసుచరితమ్పి వత్వా ‘‘తతో త్వం భిక్ఖు సీలం నిస్సాయ సీలే పతిట్ఠాయా’’తి వుత్తత్తా. సేసం వుత్తనయమేవ. ఛట్ఠసత్తమేసూతి ఛట్ఠసత్తమవగ్గేసు అపుబ్బం నత్థి. తేన వుత్తం ‘‘హేట్ఠా వుత్తనయేనేవ అత్థో వేదితబ్బో’’తి. వగ్గపేయ్యాలతో పన ఇమస్మిం సతిపట్ఠానసంయుత్తే కతిపయవగ్గా సఙ్గహం ఆరూళ్హా, తథాపి తేసం అత్థవిసేసాభావతో ఏకచ్చేసు పోత్థకేసు ముఖమత్తం దస్సేత్వా సంఖిత్తా, ఏకచ్చేసు అతిసంఖిత్తావ, తే సఙ్ఖేపవసేన ద్వే కత్వా ‘‘ఛట్ఠసత్తమేసూ’’తి వుత్తం.

అమతవగ్గవణ్ణనా నిట్ఠితా.

సతిపట్ఠానసంయుత్తవణ్ణనా నిట్ఠితా.