౪. అగారసుత్తవణ్ణనా

౨౬౨. పురత్థిమాతి విభత్తిలోపేన నిద్దేసో, నిస్సక్కే వా ఏతం పచ్చత్తవచనం. పఠమజ్ఝానాదివసేనాతి పఠమదుతియజ్ఝానవసేన. అనుస్సతివసేనాతి నిదస్సనమత్తం అఞ్ఞస్సపి ఉపచారజ్ఝానగ్గహితస్స సవితక్కచారస్స నిరామిసస్స సుఖస్స లబ్భనతో. తస్సపి వా పఠమజ్ఝానాదీతి ఏత్థ ఆది-సద్దేన సఙ్గహో దట్ఠబ్బో. కామహేతు దుక్ఖప్పత్తానం దుక్ఖవేదనా కామామిసేన సామిసా వేదనా. అనుత్తరవిమోక్ఖా నామ అరహత్తఫలం. ‘‘కుదాస్సు నామాహం తదాయతనం ఉపసమ్పజ్జ విహరిస్సామీ’’తి ఏవం పిహం ఉపట్ఠాపయతో తస్మిం అనిజ్ఝమానే పిహప్పచ్చయా ఉప్పన్నదోమనస్సవేదనా. నేక్ఖమ్మనిస్సితా ఉపేక్ఖావేదనా నిరామిసా అదుక్ఖమసుఖా నామ. సవిసేసం పన దస్సేతుం ‘‘చతుత్థజ్ఝానవసేన ఉప్పన్నా అదుక్ఖమసుఖవేదనా’’తి వుత్తం.

అగారసుత్తవణ్ణనా నిట్ఠితా.