౬. తూలోనద్ధసిక్ఖాపదవణ్ణనా

చిమిలికం పత్థరిత్వా తూలం పక్ఖిపిత్వాతి మఞ్చపీఠానం ఉపరి చిమిలికం పత్థరిత్వా తస్స ఉపరి తూలం పక్ఖిపిత్వాతి అత్థో. ఉపరి చిమిలికాయాతి ఉపరిమభాగే చిమిలికాయ.

సీసప్పమాణన్తి (చూళవ. అట్ఠ. ౨౯౭; సారత్థ. టీ. చూళవగ్గ ౩.౨౯౭) యత్థ గలవాటకతో పట్ఠాయ సబ్బసీసం ఉపదహన్తి, తం సీసప్పమాణం. తఞ్చ ఉక్కట్ఠపరిచ్ఛేదతో తిరియం ముట్ఠిరతనం హోతి, దీఘతో ద్విరతనన్తి దస్సేతుం ‘‘యస్స విత్థారతో తీసు కోణేసూ’’తిఆదిమాహ. ద్విన్నం అన్తరం విదత్థి చతురఙ్గులం హోతీతి ద్విన్నం కోణానం అన్తరం మినియమానం విదత్థి చేవ చతురఙ్గులఞ్చ హోతి. మజ్ఝే ముట్ఠిరతనన్తి బిబ్బోహనస్స మజ్ఝం తిరియతో ముట్ఠిరతనప్పమాణం హోతి. అయఞ్హి సీసప్పమాణస్స ఉక్కట్ఠపరిచ్ఛేదో. తతో ఉద్ధం న వట్టతి, హేట్ఠా వట్టతి. అగిలానస్స సీసూపధానఞ్చ పాదూపధానఞ్చాతి ద్వయమేవ వట్టతి. గిలానస్స బిబ్బోహనాని సన్థరిత్వా ఉపరి పచ్చత్థరణం దత్వా నిపజ్జితుమ్పి వట్టతి.

తూలోనద్ధసిక్ఖాపదవణ్ణనా నిట్ఠితా.