౩. వికాలగామప్పవేసనసిక్ఖాపదవణ్ణనా

చారిత్తేతి చారిత్తసిక్ఖాపదే. ఉపచారన్తి దుతియలేడ్డుపాతం. అఞ్ఞం గామం గచ్ఛన్తానం పున ఆపుచ్ఛనకిచ్చం నత్థీతి ఉస్సాహం అప్పటిప్పస్సమ్భేత్వా అఞ్ఞం గామం గచ్ఛన్తానం గామసతమ్పి హోతు, పున ఆపుచ్ఛనకిచ్చం నత్థీతి అత్థో. తేనాహ ‘‘సచే పనా’’తిఆది. ఉస్సాహన్తి గామప్పవిసనుస్సాహం. అన్తరారామాదీసు (పాచి. అట్ఠ. ౫౧౫) న కేవలం అనాపుచ్ఛా గచ్ఛన్తస్సేవ, కాయబన్ధనం అబన్ధిత్వా సఙ్ఘాటిం అపారుపిత్వా గచ్ఛన్తస్సాపి అనాపత్తి. ఆపదాసూతి సీహో వా బ్యగ్ఘో వా ఆగచ్ఛతి, మేఘో వా ఉట్ఠేతి, అఞ్ఞో వా కోచి ఉపద్దవో ఉప్పజ్జతి, అనాపత్తి. ఏవరూపాసు ఆపదాసు బహిగామతో అన్తోగామం పవిసితుం వట్టతి.

వికాలగామప్పవేసనసిక్ఖాపదవణ్ణనా నిట్ఠితా.