౭. నహానసిక్ఖాపదవణ్ణనా

‘‘దియడ్ఢో మాసో సేసో గిమ్హాన’’న్తి ‘‘వస్సానస్స పఠమో మాసో’’ఇచ్చేతే అడ్ఢతేయ్యమాసా ఉణ్హసమయో, పరిళాహసమయోతి గిమ్హానం సేసో దియడ్ఢో మాసో ఉణ్హసమయో, వస్సానస్స పఠమో మాసో పరిళాహసమయోతి ఏవం ఏతే అడ్ఢతేయ్యమాసా కమేన ఉణ్హసమయో, పరిళాహసమయో నామ హోతీతి అత్థో తేనేవ పదభాజనియం ‘‘ఉణ్హసమయో నామ దియడ్ఢో మాసో సేసో గిమ్హాన’’న్తి, ‘‘పరిళాహసమయో నామ వస్సానస్స పఠమో మాసో’’తి వుత్తం. యదా వినా నహానేన న ఫాసు హోతి, అయం గిలానసమయో. పదభాజనియం (పాచి. ౩౬౪) పన గిలానే నిచ్ఛితే గిలానకాలో నిచ్ఛితోవ హోతీతి ‘‘యస్స వినా నహానేన న ఫాసు హోతి, ‘గిలానసమయో’తి నహాయితబ్బ’’న్తి వుత్తం. పరివేణసమ్మజ్జనమత్తమ్పీతి అన్తమసో పరివేణసమ్మజ్జనమత్తమ్పి.

వాలుకం ఉక్కిరిత్వాతి సుక్ఖాయ నదియా వాలికం ఉత్తిరిత్వా. ఆవాటేసుపీతి పి-సద్దేన నదియం వత్తబ్బమేవ నత్థీతి దస్సేతి. ఆపదాసూతి భమరాదీహి అనుబన్ధేసు.

నహానసిక్ఖాపదవణ్ణనా నిట్ఠితా.