౯. పరిపాచితసిక్ఖాపదవణ్ణనా

పరిపాచితన్తి పరిపాకమాపాదితం, యథా లభతి, తథా కత్వా ఠపితన్తి వుత్తం హోతి. తేనాహ ‘‘నేవ తస్సా’’తిఆది తస్సాతి యో పరిభుఞ్జేయ్య, తస్స భిక్ఖునో. భిక్ఖుస్స గుణం పకాసేత్వాతి ‘‘అయ్యో భాణకో, అయ్యో బహుస్సుతో’’తిఆదినా (పాచి. ౧౯౫) గుణం పకాసేత్వా. పిణ్డపాతన్తి పఞ్చన్నం భోజనానం అఞ్ఞతరం. కమ్మసాధనోయం సమారమ్భసద్దోతి ఆహ ‘‘సమారద్ధ’’న్తి. పటియాదితస్సాతి సమ్పాదితస్స. యస్మా ఞాతకప్పవారితేహి భిక్ఖుస్స అత్థాయ అసమారద్ధోపి పిణ్డపాతో అత్థతో సమారద్ధోవ హోతి యథాసుఖం హరాపేతబ్బతో, తస్మా ‘‘ఞాతకప్పవారితానం వా సన్తక’’న్తి వుత్తం.

ఉభయత్థాతి పరిపాచితాపరిపాచితేసు. అవసేసేతి భిక్ఖునిపరిపాచితేపి యాగుఖజ్జకఫలాఫలాదికే సబ్బత్థ. నిమిత్తోభాసపరికథావిఞ్ఞత్తివసేన పన అవసేసేపి దుక్కటతో న ముచ్చతి.

పరిపాచితసిక్ఖాపదవణ్ణనా నిట్ఠితా.