౨. సుద్ధకాళకసిక్ఖాపదవణ్ణనా

కాళకానన్తి సభావేన వా రజనేన వా కాళకానం. యథాహ ‘‘కాళకం నామ ద్వే కాళకాని జాతియా కాళకం వా రజనకాళకం వా’’తి. అఞ్ఞేహి అమిస్సితానన్తి అఞ్ఞేహి అమిస్సితకాళకానన్తి అత్థో. ‘‘యథా పఠమే ‘ఏకేనాపి కోసియంసునా’తి (కఙ్ఖా. అట్ఠ. కోసియసిక్ఖాపదవణ్ణనా) వుత్తం, తథా ఇధాపి ‘ఏకేనాపి అఞ్ఞేన అమిస్సేత్వా’తి అవుత్తత్తా అఞ్ఞేన పన మిస్సకభోగేపి అపఞ్ఞాయమానరూపకం చే ‘సుద్ధకాళక’మిచ్చేవ వుచ్చతీ’’తి (వజిర. టీ. పారాజిక ౫౪౭) వదన్తి.

ఏత్థ చ ‘‘ఇదం మే, భన్తే, సుద్ధకాళకానం ఏళకలోమానం సన్థత’’న్తిఆదినా (పారా. ౫౪౯) నిస్సజ్జనవిధానం వేదితబ్బం. సేసన్తి పుబ్బపయోగదుక్కటచతుక్కపాచిత్తియాదికం. అఙ్గేసు పన ‘‘సుద్ధకాళకభావో’’తి అయం విసేసో.

సుద్ధకాళకసిక్ఖాపదవణ్ణనా నిట్ఠితా.