౯. దుతియఉచ్చారఛడ్డనసిక్ఖాపదవణ్ణనా

భిక్ఖునియాపీతి పి-సద్దేన భిక్ఖుం సముచ్చినోతి. అనిక్ఖిత్తబీజేసు (పాచి. అట్ఠ. ౮౩౦) పన ఖేత్తేసు కోణాదీసు వా అసఞ్జాతరోపిమేసు ఖేత్తమరియాదాదీసు వా ఛడ్డేతుం వట్టతి. మనుస్సానం కచవరఛడ్డనట్ఠానేపి వట్టతియేవ. ఛడ్డితఖేత్తేతి మనుస్సేసు సస్సం ఉద్ధరిత్వా గతేసు ఛడ్డితఖేత్తం నామ హోతి, తత్థ వట్టతి. యత్థ పన ‘‘లాయితమ్పి పుబ్బణ్ణాది పున ఉట్ఠహిస్సతీ’’తి రక్ఖన్తి, తత్థ యథావత్థుకమేవ. సామికే అపలోకేత్వాతి ఏత్థ ఖేత్తపాలకా, ఆరామాదిగోపకా చ సామికావ. ఇమినా చ సఙ్ఘసన్తకే భిక్ఖుస్స ఛడ్డేతుం వట్టతి సఙ్ఘపరియాపన్నత్తా, న భిక్ఖునీనం. భిక్ఖునీనం పన అత్తనో సన్తకే భిక్ఖుసన్తకే వుత్తనయేనేవ వట్టతీతి దస్సేతి, ఏవం సన్తేపి సారుప్పవసేన కాతబ్బం.

దుతియఉచ్చారఛడ్డనసిక్ఖాపదవణ్ణనా నిట్ఠితా.