౨. సహజాతవారవణ్ణనా

౨౩౪-౨౪౨. కుసలం ధమ్మం సహజాతో, కుసలం ఏకం ఖన్ధం సహజాతోతిఆదీసు సహజాతసద్దేన సహజాతపచ్చయకరణం సహజాతాయత్తభావగమనం వా వుత్తన్తి తస్స కరణస్స గమనస్స వా కుసలాదీనం కమ్మభావతో ఉపయోగవచనం కతన్తి దట్ఠబ్బం. ఏస నయో పచ్చయవారాదీసుపి. తత్రాపి హి పచ్చయసద్దేన చ నిస్సయపచ్చయకరణం నిస్సయాయత్తభావగమనం వా వుత్తం, సంసట్ఠసద్దేన చ సమ్పయుత్తపచ్చయకరణం సమ్పయుత్తాయత్తభావగమనం వాతి తంకమ్మభావతో ఉపయోగవచనం కుసలాదీసు కతన్తి. సహజాతమ్పి చ ఉపాదారూపం భూతరూపస్స పచ్చయో న హోతీతి ‘‘పటిచ్చా’’తి ఇమినా వచనేన దీపితో పచ్చయో న హోతీతి అత్థో. ‘‘ఉపాదారూపం భూతరూపస్సా’’తి చ నిదస్సనవసేన వుత్తం. ఉపాదారూపస్సపి హి ఉపాదారూపం యథావుత్తో పచ్చయో న హోతి, వత్థువజ్జాని రూపాని చ అరూపానన్తి.

సహజాతవారవణ్ణనా నిట్ఠితా.