౭. ఛఫస్సాయతనసుత్తం

౧౫౩. ఏకం సమయం భగవా వేసాలియం విహరతి మహావనే కూటాగారసాలాయం. తేన ఖో పన సమయేన భగవా ఛన్నం ఫస్సాయతనానం ఉపాదాయ భిక్ఖూనం ధమ్మియా కథాయ సన్దస్సేతి సమాదపేతి సముత్తేజేతి సమ్పహంసేతి. తే చ భిక్ఖూ అట్ఠిం కత్వా మనసి కత్వా సబ్బచేతసా సమన్నాహరిత్వా ఓహితసోతా ధమ్మం సుణన్తి.

అథ ఖో మారస్స పాపిమతో ఏతదహోసి – ‘‘అయం ఖో సమణో గోతమో ఛన్నం ఫస్సాయతనానం ఉపాదాయ భిక్ఖూనం ధమ్మియా కథాయ సన్దస్సేతి సమాదపేతి సముత్తేజేతి సప్పహంసేతి. తే చ భిక్ఖూ అట్ఠిం కత్వా మనసి కత్వా సబ్బచేతసా సమన్నాహరిత్వా ఓహితసోతా ధమ్మం సుణన్తి. యంనూనాహం యేన సమణో గోతమో తేనుపసఙ్కమేయ్యం విచక్ఖుకమ్మాయా’’తి. అథ ఖో మారో పాపిమా యేన భగవా తేనుపసఙ్కమి; ఉపసఙ్కమిత్వా భగవతో అవిదూరే మహన్తం భయభేరవం సద్దమకాసి, అపిస్సుదం పథవీ మఞ్ఞే ఉన్ద్రీయతి [ఉద్రీయతి (సీ. స్యా. కం. పీ) ఉ + దర + య + తి = ఉద్రీయతి]. అథ ఖో అఞ్ఞతరో భిక్ఖు అఞ్ఞతరం భిక్ఖుం ఏతదవోచ – ‘‘భిక్ఖు, భిక్ఖు, ఏసా పథవీ మఞ్ఞే ఉన్ద్రీయతీ’’తి. ఏవం వుత్తే, భగవా తం భిక్ఖుం ఏతదవోచ – ‘‘నేసా భిక్ఖు పథవీ ఉన్ద్రీయతి. మారో ఏసో పాపిమా తుమ్హాకం విచక్ఖుకమ్మాయ ఆగతో’’తి. అథ ఖో భగవా ‘‘మారో అయం పాపిమా’’ ఇతి విదిత్వా మారం పాపిమన్తం గాథాయ అజ్ఝభాసి –

‘‘రూపా సద్దా రసా గన్ధా, ఫస్సా ధమ్మా చ కేవలా;

ఏతం లోకామిసం ఘోరం, ఏత్థ లోకో విముచ్ఛితో.

‘‘ఏతఞ్చ సమతిక్కమ్మ, సతో బుద్ధస్స సావకో;

మారధేయ్యం అతిక్కమ్మ, ఆదిచ్చోవ విరోచతీ’’తి.

అథ ఖో మారో పాపిమా…పే… తత్థేవన్తరధాయీతి.