౩. దీఘలట్ఠిసుత్తం

౯౪. ఏవం మే సుతం – ఏకం సమయం భగవా రాజగహే విహరతి వేళువనే కలన్దకనివాపే. అథ ఖో దీఘలట్ఠి దేవపుత్తో అభిక్కన్తాయ రత్తియా అభిక్కన్తవణ్ణో కేవలకప్పం వేళువనం ఓభాసేత్వా యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితో ఖో దీఘలట్ఠి దేవపుత్తో భగవతో సన్తికే ఇమం గాథం అభాసి –

‘‘భిక్ఖు సియా ఝాయీ విముత్తచిత్తో,

ఆకఙ్ఖే చే హదయస్సానుపత్తిం;

లోకస్స ఞత్వా ఉదయబ్బయఞ్చ,

సుచేతసో అనిస్సితో తదానిసంసో’’తి.