౪. నన్దనసుత్తం

౯౫. ఏకమన్తం ఠితో ఖో నన్దనో దేవపుత్తో భగవన్తం గాథాయ అజ్ఝభాసి –

‘‘పుచ్ఛామి తం గోతమ భూరిపఞ్ఞ,

అనావటం భగవతో ఞాణదస్సనం;

కథంవిధం సీలవన్తం వదన్తి,

కథంవిధం పఞ్ఞవన్తం వదన్తి;

కథంవిధో దుక్ఖమతిచ్చ ఇరియతి,

కథంవిధం దేవతా పూజయన్తీ’’తి.

‘‘యో సీలవా పఞ్ఞవా భావితత్తో,

సమాహితో ఝానరతో సతీమా;

సబ్బస్స సోకా విగతా పహీనా,

ఖీణాసవో అన్తిమదేహధారీ.

‘‘తథావిధం సీలవన్తం వదన్తి,

తథావిధం పఞ్ఞవన్తం వదన్తి;

తథావిధో దుక్ఖమతిచ్చ ఇరియతి,

తథావిధం దేవతా పూజయన్తీ’’తి.